Wenaxarü naxümatü ga Tupanaarü mugü 25 - Tupanaarü Ore

¹ Rü ngẽxguma texé tümamücümaxã guxchaxü̃ tüxü̃́ ngẽxmagu, rü name nax ãẽ̱xgacügü i guxchaxü̃arü mexẽẽruxü̃güpe̱xewa taxĩxü̃ nax nümagü i ãẽ̱xgacügü nangugügüãxü̃ca̱x nax texé tixĩxü̃ ya yíxema guxchaxü̃ üxe. Rü nümagü i ngẽma ãẽ̱xgacügü rü tá tüxü̃ ninge̱x ya yíxema tama guxchaxü̃ üxe, rü tá tüxü̃ napoxcu ya yíxema guxchaxü̃ üxe

² Rü ngẽxguma ngẽma guxchaxü̃ i naxüxü̃ rü cua̱ximaxã yixĩxgu i norü poxcu, rü nüma ya ãẽ̱xgacü rü tá nanamu nax waixü̃müanegu nacaxẽẽgüãxü̃ i ngẽma guxchaxü̃ üxü̃. Rü ngẽmaãcü ãẽ̱xgacüpe̱xegu tá nanacua̱i̱xgü nae̱xpü̱x i ngẽma natanü i ngẽma guxchaxü̃ i naxüxü̃.

³ Natürü taxũtáma i 40 arü yexera i cua̱xi nüxna taxã erü tama tanaxwa̱xe nax nügümaxã yaxãũxãchixü̃ i ngẽma Iraétanüxü̃.

⁴ Rü tama name nax cunawẽxnaguxü̃ i ngẽma woca ega tríguarü pu̱xwa napuracügu.

Mugü i yutegüxechigagu ixuxü̃

⁵ Rü ngẽxguma chi taxre i nügüenexẽgü rü wüxitama ya ĩpatawa namaxẽgu rü chi wüxi rü taguma naxãxacüyane nayu̱xgu, rü ngẽxguma ya yíxema naxma̱x ya tüxna nayuxe rü taxucürüwa taxãte namaxã i tomare i yatü i tama tümate ya tüxna yucütanüxü̃ ixĩxü̃. Rü yimá naenexẽ ya tümate tá nixĩ ya ngĩmaxã ãmacü. Rü ngẽmaãcü tá nayanguxẽxẽ nax naenexẽchicüxü nüxü̃́ naxãxacüxü̃ca̱x.

⁶ Rü yimá tümane ya nüxíra bucü, rü tümate ya tüxna yucüégagu tá nixĩ i naxãégaxü̃, nax ngẽmaãcü ya yimá yucü ya tümate tama iyanaxoxü̃ca̱x i naéga i Iraétanüxü̃tanüwa.

⁷ Natürü ngẽxguma yimá yatü rü tama ngĩmaxã naxãxma̱xchaü̃gu i ngẽma norü ãmacü, rü ngĩma rü tá ãẽ̱xgacügüxü̃tawa ixũ, rü tá nüxü̃ iyarüxu nax tama ngĩmaxã naxãxma̱xchaü̃xü̃. Rü ngĩgürügü tá: “Chorü ãmacü rü tama nanaxwa̱xe nax naenexẽéga ngóxü̃ i Iraéanewa. Rü ñu̱xũchi tama chomaxã nayanguxẽxẽ nax chomaxã naxãmaxü̃ nax ngẽmaãcü nüxü̃́ chaxãxacüxü̃ca̱x”, ngĩgürügü tá.

⁸ Rü ngẽxguma i ngẽma ãẽ̱xgacügü rü tá naxca̱x nangema i ngẽma yatü nax namaxã yadexagüxü̃ca̱x. Rü ngẽxguma nüxü̃ yaxugu nax tama ngĩmaxã naxãxma̱xchaü̃xü̃,

⁹ rü ngĩma i naxüma̱x rü tá naxca̱x iyaxũ rü ãẽ̱xgacüpe̱xewa tá nacutüwa nüxna inapu i norü chapatu. Rü ñu̱xũchi nachametüwa tá icuaxi rü ngĩgürügü tá: “Rü ñaa nixĩ i namaxã ixüxü̃ i ngẽma yatü i tama naenexẽna naxãxchaü̃xü̃ i wüxi ya nane”, ngĩgürügü.

¹⁰ Rü natanüxü̃ ya yimá yatü rü guxü̃ma i Iraétanüwa rü tá ñaãcü nüxü̃ nacua̱xgü: “Duü̃xü̃gü i ngearü chapatüã́xü̃”.

To i mugü

^11-12 Rü ngẽxguma taxre i yatügü nügü daixgu, rü wüxi i ngẽma yatü naxma̱x rü natexü̃ ípoxü̃gu rü ngẽma yatü i tümatemaxã nügü da̱i̱xü̃pü̱xücharewa tichü̱xüxgu, rü cuma rü taxũtáma cuxü̃́ ingechaü̃tümüxü̃ nax ngĩxü̃ ícudaü̃me̱e̱xü̃ i ngẽma nge.

^13-14 Rü ngẽxguma ta̱xacüca̱x cutaxegu rüe̱xna ta̱xacümaxã cutaxegu rü tama name nax curü yáruü̃wa cungĩ́xü̃. Rü ngẽxgumarüxü̃ ta ega ta̱xacü i ãchíüxü̃maxã cutaxegu rü tama name nax wüxi i cupaxü̃ i nawa cungĩ́xü̃wa cunangugü.

¹⁵ Rü ngẽma curü yáruü̃gü rü name i aixcüma ngugügu yaxü̃ cuxü̃́ nangẽxma nax ngẽmaãcü mucü ya taunecü nawa cumaxü̃xü̃ca̱x i ngẽma naane i Cori ya Tupana tá cuxna ãxü̃.

¹⁶ Erü nüma ya Cori ya Tupana rü tama namaxã nataãxẽ i ngẽma duü̃xü̃ i womüxẽẽwa̱xexü̃ rü chixri nangugüxü̃.

Moiché nanamu nax Amaréxtanüxü̃xü̃ nada̱i̱xü̃

¹⁷ ¡Rü nüxna pecuã̱xchie ga yema duü̃xü̃gü ga Amaréxtanüxü̃ pemaxã üxü̃ ga yexguma namagu pexĩxgu, nawena nax Equítuanewa ípechoxü̃xü̃!

¹⁸ ¡Rü nüxna pecuã̱xãchie nax nümagü rü tama Cori ya Tupanaxü̃ namuü̃eãcüma pexca̱x íyaxüãchixü̃ ga yexguma namagu pexĩxgu rü nayoxniegüxü̃ nax poraãcü pipaexü̃! Rü tümaca̱x ínayaxüãchi rü tüxü̃ nadai ga guxema turaxe ga wixweama ãgüxe.

¹⁹ Rü ngẽxguma nüma ya Cori ya Tupana rü ngẽma naane i tá pexna naxãxü̃wa nüxü̃ pexü̃ naporamaexẽẽgu i guxü̃ma i ngẽma perü uanügü i ngẽma naanearü ngaicamawa ngẽxmagüxü̃, rü ngẽxguma daiwa perüngü̃gügu, rü ñu̱xũchi tá peyanaxoxẽxẽ i naéga i guxü̃ma i ngẽma duü̃xü̃gü i Amaréxtanüxü̃ nax taxuwama nüxna nacua̱xãchiexü̃ca̱x i ngẽma duü̃xü̃gü. ¡Rü taxṹ i nüxü̃ iperüngümaexü̃ i ngẽma!