Wenaxarü naxümatü ga Tupanaarü mugü 1 - Tupanaarü Ore

Moichéarü ore ga Iraétanüxü̃maxã nüxü̃ yaxuxü̃

¹ Rü ñaagü nixĩ ga yema ore ga Moiché nüxü̃ ixuxü̃ namaxã ga guxü̃ma ga Iraétanüxü̃ ga yexguma Arabáarü chianexü̃wa nayexmagügu ga natü ga Yudáü̃arü éstewa ga Chúxarü to̱xma̱xtawa. Rü yema Arabáarü chianexü̃ rü nachicagü ga Paráü̃ rü Tópere rü Labáü̃ rü Acheróx rü Dichaáarü ngãxü̃wa nayexma.

² Rü ngẽxguma ma̱xpǘne ya Oréxwa ixũãchigu rü 11 i ngunexü̃gü nixĩ i ingexü̃ nax Cadé-banéawa inguxü̃. Rü ngẽma nama i Cadé-banéawa daxü̃ rü ma̱xpǘne ya Cheígu nida.

^3-4 Rü 40 ga taunecü marü nangupetü nax Equítuanewa ínachoxü̃xü̃ ga yema Iraétanüxü̃. Rü Moiché rü marü nüxü̃ narüporamae ga gumá Amoréutanüxü̃arü ãẽ̱xgacü ga Chióü̃ ga Ebóü̃gu ãchiü̃cü rü gumá Bacháü̃arü ãẽ̱xgacü ga Óx ga Atarúgu ãchiü̃cü ga Edréianewa. Rü yexguma norü 40 ga taunecüwa nanguxgu ga norü 11 ga tauemacüarü ügügu, rü yexguma nixĩ ga Moiché Iraétanüxü̃maxã nüxü̃ yaxuxü̃ ga guxü̃ma ga yema ore ga Tupana namaxã nüxü̃ ixuxü̃ naxca̱x ga yema Iraétanüxü̃.

⁵ Rü yexguma natü ga Yudáü̃arü éstewaama nayexmagügu ga Moáchixü̃anewa, rü nüma ga Moiché rü Iraétanüxü̃maxã nüxü̃ nixu ga ñaa mugü, rü ñanagürü nüxü̃:

⁶ —Cori ya tórü Tupana rü ma̱xpǘne ya Oréxwa tamaxã nüxü̃ nixu rü ñanagürü: “Pemax rü marü mucüma ya taunecü daa ma̱xpǘnewa pengẽxmagü.

⁷ ¡Rü penade i perü ngẽmaxü̃gü rü ipexĩãchi nax ngẽma Amoréutanüxü̃arü máxpü̱xanexü̃wa pexĩxü̃! ¡Rü nawa pexĩ i guxü̃ma i ngẽma naanegü i norü ngaicamana ngẽxmagüxü̃! ¡Rü ngẽxgumarüxü̃ ta Arabáanewa, rü máxpü̱xanexü̃wa, rü doxonexü̃wa, rü Négueanewa, rü Már i Mediteráneupechinüwa, rü Canaáü̃tanüxü̃arü naanewa, rü Líbanuanewa rü ñu̱xmata taxtü i Eufrátewa pexĩ!

⁸ Choma rü marü pexna chanaxã i ngẽma naane. ¡Rü ngéma pexĩ rü penayaxu i ngẽma naane i choma ya Cori ya Tupana yema nũxcümaü̃güxü̃ ga perü o̱xigü ga Abraáü̃, rü Ichaá, rü Acóbu, rü ñu̱xũchi nataagümaxã chaxueguxü̃ nax nüxna chanaxãxü̃!” ñanagürü ga Tupana.

Moiché rü ãẽ̱xgacügüxü̃ naxuneta nax Iraétanüxü̃maxã inacua̱xgüxü̃ca̱x

⁹ Rü yexguma ma̱xpǘne ga Chinaíwa tayexmagügu, rü choma rü pexü̃ ñachagürü: “Choma rü taxucürüwama chaxicatama pemaxã ichacua̱x i guxãma i pemax.

¹⁰ Rü nüma ya Cori ya tórü Tupana rü pexü̃ nimuxẽxẽ, rü ngẽmaca̱x i ñu̱xma i pemax rü ñoma ẽxtagü ya daxũguxü̃ i naanetüwewa ngẽxmagücürüxü̃ pimuxũchi.

¹¹ Rü chanaxwa̱xe nax yimá nũxcümaü̃güxü̃ i perü o̱xigüarü Tupana rü ñu̱xmaarü yexera 1,000 e̱xpü̱xcüna pexü̃ yamuxẽẽxü̃. Rü yema Tupana pemaxã naxueguxü̃ãcüma, chanaxwa̱xe i pexü̃ narüngü̃xẽxẽ.

¹² Natürü i choma rü taxucürüwama chaxicatama chanangenagü i guxü̃ma i perü guxchaxü̃gü i pegümaxã pexüxü̃.

¹³ Rü ngẽmaca̱x chanaxwa̱xe nax wüxitücumüwachigü nüxü̃ pexuneta i wüxi i yatü i nüxü̃ cuáxü̃ rü meama naãxẽxü̃ cuáxü̃ nax ngẽma pemaxã icuáxü̃ca̱x”, ñachagürü.

¹⁴ Rü yexguma ga pema rü choxü̃ pengãxü̃gü rü ñaperügügü: “Torü me nixĩ i ngẽma tomaxã nüxü̃ quixuxü̃”, ñaperügügü.

¹⁵ Rü yexguma ga choma rü yema petanüxü̃tanüwa nüxü̃ chixunetachigü ga yatügü ga naãxẽxü̃ cuáxü̃ rü nawa nangóxü̃ nax mea duü̃xü̃gümaxã inacuáxü̃. Rü ñu̱xũchi nüxna chixãgachigü nax pemaxã inacua̱xgüxü̃ca̱x. Rü nümaxü̃ rü namaxã nüxü̃ chixu nax 1,000 ga yatügümaxã inacuáxü̃ca̱x, rü togü nax 100 maxã inacuáxü̃ca̱x, rü togü nax 50 maxã inacuáxü̃ca̱x, rü togü nax 10 maxã inacuáxü̃ca̱x. Rü yexgumarüxü̃ ta nüxü̃ chaxuneta ga ãẽ̱xgacügü ga wüxitücumüchigü ga Iraétanüxü̃maxã icuáchigüxü̃.

¹⁶ Rü yexgumarüxü̃ ta nüxna chaxãga ga yema ãẽ̱xgacügü ga guxchagüarü mexẽẽruü̃gü rü ñachagürü nüxü̃: “Ngẽxguma ta̱xacürü guxchaxü̃ petanüxü̃axü̃́ pemexẽẽgu rüe̱xna woo to i nachixü̃anecüã̱xaxü̃́ pemexẽẽgu, ¡rü mea nüxü̃́ iperüxĩnüe rü mea penangugü i ngẽma norü guxchaxü̃!

¹⁷ Rü ngẽxguma poxcu pexueguxgu naxca̱x i ngẽma chixexü̃ üxü̃, ¡rü taxúeétüwa pexü! Rü ngẽma ngearü diẽruã́xü̃ rü ngẽma diẽruã́xü̃ rü tá nawüxigumare i norü poxcu. ¡Rü taxũtáma texéxü̃ pemuü̃e! Erü Tupanawa nixĩ i ne naxũxü̃ i ngẽma pexueguxü̃. Rü ngẽxguma chi pema rü taxucürüwa penamexẽẽgu i wüxi i guxchaxü̃ ¡rü chomaxã nüxü̃ pixu nax ngẽmaãcü choma chanamexẽxẽxü̃ca̱x!” ñachagürü.

¹⁸ Rü yexguma nixĩ ga meama pemaxã nüxü̃ chixuxü̃ ga guxü̃ma ga yema tá pexüxü̃ —ñanagürü.

Yema 12 ga ngugütaetanüxü̃ rü inaxĩãchi

¹⁹ Rü nüma ga Moiché rü ñanagürü: —Yexguma ma̱xpǘne ga Oréxwa ixĩãchigu, rü guma ma̱xpǘnegü ga Amoréutanüxü̃ nagu ãchiü̃günewaama taxĩ, yerü yemaacü nixĩ ga tórü Cori ya Tupana tüxü̃ muxü̃. Rü nagu taxĩ ga yema chianexü̃ ga taxü̃ rü ãũcümaxü̃ ga pema marü nüxü̃ pedauxü̃, rü ñu̱xmata nawa tangugü ga Cadé-banéa.

²⁰ Rü yéma nixĩ ga pexü̃ ñachaxü̃: “Marü nawa tangugü i ñaa Amoréutanüxü̃ nawa ngẽxmagüxü̃ i máxpü̱xanexü̃ i Cori ya tórü Tupana tüxna ãxü̃.

²¹ Rü nüma ya Cori ya tórü Tupana ixĩcü, rü marü pexna nanaxã i ñaa naane. ¡Rü ẽcü nawa pexĩ rü nagu pexãchiü̃gü ngẽma Cori ya perü o̱xigüarü Tupana nüxü̃ ixuxü̃rüxü̃! ¡Rü taxṹ i pemuü̃exü̃, rü bai tá iperümaãchitanüxü̃!” ñacharügü.

²² Natürü ga pema rü choxna peyacagü rü ñapegürügü: “¿Tama ẽ̱xna i namexü̃ i ñuxre i tamücügü nax nüxíra ngugüwa naxĩxü̃ i ngẽma naanewa, rü ñu̱xũchi taxca̱x nawoeguxü̃ nax tamaxã nüxü̃ yaxugüexü̃ca̱x rü ngexü̃rüüxü̃ i namagu tá ixĩxü̃ rü ngexnerüxüne ya ĩanegügu tá ichocuxü̃?” ñaperügügü.

²³ Rü yema pema chomaxã nüxü̃ pixuxü̃ rü cha̱u̱xca̱x rü name. Rü yemaca̱x petanüwa chanade ga 12 ga yatügü. Rü wüxi tücumüwachigü nüxü̃ chaxuneta ga wüxi.

²⁴ Rü yema yatügü rü inaxĩãchi rü ínamáxpü̱xanexü̃waama naxĩ, rü Ecúarü doxonexü̃wa nangugü. Rü meama nagu nixĩãgütanü ga guxü̃ma ga yema naane.

²⁵ Rü ñu̱xũchi tanabuxgü ga ñuxre ga yémacüã̱x ga nanetügüarü o rü taxca̱x nua nanangegü. Rü tamaxã nüxü̃ nixugü rü ñanagürügü: “Ngẽma naane i tórü Cori ya Tupana tüxna ãxü̃, rü mexẽchixü̃ nixĩ”, ñanagürügü.

²⁶ Natürü ga pema rü tama yéma pexĩxchaü̃, rü tama naga pexĩnüe ga yema tórü Cori ya Tupana pemaxã nüxü̃ ixuxü̃.

²⁷ Rü pechiü̃güwa rü naxca̱x pidexagü rü ñaperügügü: “Nüma ya Cori rü tama aixcüma tüxü̃ nangechaü̃. Rü tüxü̃ ínagaxü̃ ga Equítuanewa nax Amoréugüna tüxü̃ yamugüxü̃ca̱x nax tüxü̃ nada̱i̱xü̃ca̱x”, ñaperügügü.

²⁸ Rü ñaperügügü ta: “Rü ñu̱xma ¿rü ngextá tá taxĩ? Rü tatanüxü̃ i ngugüwa ĩxü̃ rü nüxü̃ nixugügü rü ngéma nax nangemaxü̃ i duü̃xü̃gü i tüxü̃ rüporamaegüxü̃ rü tüxü̃ rümáchanemaegüxü̃, rü nangẽxmaxü̃ ya ĩanegü ya itaxü̃ne ya imáchanearü poxeguã̱xgüne, rü nüxü̃ nadaugüxü̃ ga Anáxtanüxü̃ ga imáchanexü̃chixü̃. Rü guxü̃ma ga yema nixĩ ga toxü̃ íyaxoetanüãchixẽẽxü̃”, ñaperügügü.

²⁹ Rü yexguma ga choma rü pexü̃ changãxü̃ rü ñachagürü: “¡Taxṹ i pexoegaãxẽgüxü̃ rü nüxü̃ pemuü̃exü̃!

³⁰ Rü yimá tórü Cori ya Tupana rü tá pepe̱xegu nixũ. Rü nüma rü pexca̱x tá perü uanügümaxã nügü nadai, yema Equítuanewa pexca̱x naxüxü̃rüxü̃.

³¹ Rü yexguma yema chianexü̃wa pichopetü̱xgu rü nüma ga perü Cori ya Tupana rü ñoma wüxi i papa naxacüxe nügüchacüügu tüxü̃ igaxü̃rüxü̃ meama pexü̃ nigagü rü ñu̱xmata ñaa nachicawa pengugü”, ñachagürü pexü̃ ga yexguma.

³² Natürü woo yemaacü pexü̃ nigagü, natürü ga pema rü tama nüxü̃́ peyaxõgü ya Cori ya perü Tupana.

³³ Rü nüma nixĩ ga pemaxã inacuáxü̃ rü pepe̱xegu yaxũxü̃ nax pexü̃ nüxü̃ nacua̱xẽẽxü̃ca̱x ga nachica ga nagu tá pipegüetanüxü̃. Rü yexguma chütacü ipexĩxgu rü üxüemamaxã pexü̃ nüxü̃ nacua̱xẽxẽ ga nama ga nagu tá pexĩxü̃, rü ngunecü rü wüxi ga caixanexü̃maxã pexü̃ nüxü̃ nacua̱xẽxẽ.

Cori ya Tupana rü Iraétanüxü̃maxã nanu

³⁴ Rü yexguma nüxü̃ naxĩnügu ga Cori ya Tupana ga chixri nachiga nax pidexagüxü̃, rü poraãcü nanu, rü ñaa ore pemaxã naxuegu rü ñanagürü:

³⁵ “Rü bai i wüxi i ñaa duü̃xü̃gü i chixecümagüxü̃ rü tá nüxü̃ nadaugü i ngẽma naane i mexü̃ ga norü o̱xigümaxã nüxü̃ chixuxü̃.

³⁶ Natürü ya Caréx ya Yeponé nanexicata nixĩ ya nüxü̃ daucü, rü nüxna rü nanegüna tá nixĩ i chanaxãxü̃ i ngẽma naane ga marü nawa nangaxü̃, yerü nüma rü aixcüma mea chauga naxĩnü”, ñanagürü ga Tupana.

³⁷ Rü pegagu nixĩ ga Cori ya Tupana ga chomaxã nanuxü̃ rü ñaxü̃ choxü̃: “Woo i cuma rü taxũtáma nawa cungu i ngẽma naane.

³⁸ Rü cuchicüxü tá ngéma nangu ya yimá curü ngü̃xẽẽruxü̃ ya Yochué ya Núü̃ nane. ¡Rü nüxü̃́ nangúchaü̃xẽxẽ erü nüma tá nixĩ i Iraétanüxü̃na naxããxü̃ i ngẽma naane!

³⁹ Rü woo pema rü nagu perüxĩnüe nax ngẽma perü uanügü tá pexna tüxü̃ puxü̃güxü̃ ya yíxema pexma̱xgü rü pexacügü, natürü yíxema pexacügü ya tauta tümaãẽxü̃ icuáxe tá tixĩ i nawa ngugüxe i ngẽma naane. Rü choma tá nixĩ i nüxna chanaxãxü̃ i ngẽma naane nax ngẽmaãcü namaxã inacua̱xgüxü̃ca̱x.

⁴⁰ Natürü i pemax, ¡rü wena chianexü̃wa pexĩ! ¡Rü wenaxarü Már i Dauchíüxü̃ca̱x pewoegu!” ñanagürü ga Tupana.

Iraétanüxü̃xü̃ narüporamae ga norü uanügü

⁴¹ Rü yexguma ga pema rü choxü̃ pengãxü̃ga rü ñaperügügü: “Cori ya Tupanape̱xewa chixexü̃ taxüe, natürü i ñu̱xma rü tá itaxĩãchi, rü tá namaxã togü tayadai, ngẽma Cori ya Tupana toxü̃ muxü̃ãcüma”, ñaperügügü. Rü penade ga pexnegü, yerü nagu perüxĩnüe nax pexca̱x tá natauxchaxü̃ nax nagu pexĩgüxü̃ ga guma ma̱xpǘne.

⁴² Natürü ga Cori ya Tupana rü naxü̃pa nax ipexĩãchixü̃ rü choxü̃ pemaxã nüxü̃ nixuxẽxẽ rü ñanagürü: “¡Taxṹ i daiwa pexĩxü̃! rü tama chanaxwa̱xe nax pegü pexã nax perü uanügü pexü̃ daixü̃ca̱x. Erü choma rü taxũtáma pemaxã changexma”, ñanagürü.

⁴³ Rü yexguma ga choma rü pemaxã nüxü̃ chixu ga yema Tupanaarü ucu̱xẽ, natürü ga pema rü tama chauga pexĩnüe. Rü yema Cori ya Tupanaarü mu rü nüxü̃ pexo. Rü pegütama íperüporae rü nagu pexĩgüama ga guma ma̱xpǘne.

⁴⁴ Rü yexguma ga yema Amoréutanüxü̃ ga guma ma̱xpǘnegügu ãpatagüxü̃ rü pexca̱x naxĩ, rü ñoma máxẽgürüxü̃ pewe nangẽgü. Rü Cheígu pexü̃ nadai ñu̱xmata Ormágu yacuáx.

⁴⁵ Rü yexguma pewoegu̱xgu rü Cori ya Tupanape̱xewa peyaxauxe, natürü ga nüma rü tama nüxü̃ naxĩnü ga yema perü axu.

⁴⁶ Rü yemaca̱x ga pema rü muxü̃ma ga ngunexü̃gü Cadéanewa peyexmagü —ñanagürü ga Moiché.