Danié 5 - Tupanaarü Ore

Ore ga ĩxtapü̱xgu ümatüxü̃

¹ Nüma ga Berchachá ga nüxí Babiróniaanearü ãẽ̱xgacü ixĩcü, rü nüxna naxu ga 1,000 ga ãẽ̱xgacügü ga yema nachixü̃anecüã̱xgü naxca̱x ga wüxi ga õna ga taxü̃. Rü yema chibüwa rü nüma ga ãẽ̱xgacü rü yema nüxna naxuxü̃ rü poraãcü bínu nayaxaxgü.

^2-3 Rü yema bínumaxã nax nangãxü̃xü̃ ga ãẽ̱xgacü ga Berchachá rü norü duü̃xü̃güxü̃ namu nax yanuxü̃ãxü̃ca̱x ga yema naxpáü̃gü ga úirunaxca̱x rü diẽrumünaxca̱x ga nanatü ga Nabucudonochó Yerucharéü̃wa yexmane ga Tupanapata ga taxü̃newa ne naxü̃. Rü nayanuxũ ga yema naxpáü̃gü ga üünexü̃ rü nawa naxaxegü ga ãẽ̱xgacü rü naxma̱xgü rü naxma̱xabagü rü guxü̃ma ga yema chibüwa yéma ĩxü̃.

⁴ Rü guxü̃ma ga yema yéma yexmagüxü̃ rü bínu nixaxgü rü nüxü̃ nicua̱xüü̃gü ga norü tupananetachicüna̱xãgü ga úirunaxca̱x, rü diẽrumünaxca̱x, rü bróũchenaxca̱x, rü fierunaxca̱x, rü nainaxca̱x rü nutanaxca̱x ixĩgüxü̃.

^5-6 Rü yexguma ínaxaxegüyane rü yema ucapuarü ĩxtapü̱x ga cómüxü̃wa nango̱x ga wüxi ga naxme̱x ga omüema ĩxtapü̱xgu ínachixü̃wa iwǘãcüxü̃ne. Rü yexguma guma naxme̱x ga yéma iwǘãcüxü̃nexü̃ nada̱u̱xgu ga gumá ãẽ̱xgacü rü naba̱i̱xãchi rü nanacho̱xõchi rü norü muü̃maxã niyoyoxü̃ne.

⁷ Rü ñu̱xũchi tagaãcü aita naxü ga ãẽ̱xgacü ga Berchachá, rü naxca̱x nangema ga yema norü ucu̱xẽruü̃gü ga ẽxü̃guxü̃xü̃ cua̱xgüxü̃, rü yema cua̱x nüxü̃́ yexmaxü̃, rü yema Babiróniaanecüã̱x ga woramacuriwa ngúexü̃. Rü ñanagürü nüxü̃: —Yíxema nüxü̃ daumatüxe i ngẽma ngẽxma ümatüxü̃ rü nüxü̃ ixuxe nax ta̱xacüchiga yixĩxü̃, rü naxchiru i dauxracharaxü̃gu tá tüxü̃ chicu̱xẽxẽ, rü úirunaxca̱x ya cadénamaxã tá tüxü̃ chaxüchagü, rü tüma tá tixĩ i choweama i norü tomaepü̱xwa taxüxü̃ nax ãẽ̱xgacü tixĩxü̃ —ñanagürü.

⁸ Rü guxü̃ma ga yema norü ucu̱xẽruü̃gü ga nüxü̃ icua̱xüchixü̃ ga yéma yexmagüxü̃ rü nichocu nawa ga yema ucapu. Natürü taxuxü̃ma ga yema yatügü ga nüxü̃ cua̱xüchigüxü̃ rü nüxü̃ nacua̱xgü nax ãẽ̱xgacümaxã nüxü̃ yaxugüxü̃ nax ta̱xacüchiga yixĩxü̃ ga yema yexma ümatüxü̃.

⁹ Rü yexguma nüma ga ãẽ̱xgacü ga Berchachá rü poraãcü namuü̃ rü nanacho̱xõchi. Rü yema natanüxü̃ ga ãẽ̱xgacügü rü tama nüxü̃ nacua̱xgü nax ta̱xacü tá naxügüxü̃.

¹⁰ Natürü ga naé rü yéma iña, yerü nüxü̃ ixĩnü ga aita nax naxüxü̃ ga guma ngĩne rü yema ãẽ̱xgacügü ga namaxã yexmagüxü̃. Rü yemaca̱x yéma ixũ rü ngĩgürügü nüxü̃ ga ngĩne ga Berchachá: —¡Guxü̃guma namaxü̃, Pa Ãẽ̱xgacüx! ¡Rü taxṹ i cuxoegaãẽxü̃ rü taxṹ i cubaixãchixü̃!

¹¹ Erü nua cuxme̱xwa nangẽxma i wüxi i yatü ya Tupana ya Üünecüãxẽ nawa ngẽxmaxü̃. Rü yexguma guma cunatü ya Nabucudonochó ãẽ̱xgacü ixĩxgu, rü yema yatü inanawe̱x nax tupanagürüxü̃ aixcüma naãẽxü̃ nacuáxü̃. Rü yemaca̱x ga guma cunatü rü guxü̃ma ga norü ucu̱xẽruü̃güeru nayaxĩxẽxẽ.

¹² Rü nüma rü Danié nixĩ. Rü nüma ga gumá cunatü rü Betachágu nanaxüéga. Rü ngẽma yatü rü poraãcü cua̱x nüxü̃́ nangẽxma rü nüxü̃́ natauxcha nax nango̱xẽẽãxü̃ i wüxi i nanegü, rü nango̱xẽẽãxü̃ i ta̱xacü i cúxü̃, rü namexẽẽãxü̃ i taxü̃ i guxchaxü̃gü. ¡Rü naxca̱x nangema ya yimá yatü ya Danié! Rü nüma tá nixĩ i cumaxã nüxü̃ yaxuxü̃ nax ta̱xacüchiga yixĩxü̃ i ngẽma ĩxtapü̱xgu ümatüxü̃ —ngĩgürügü.

¹³ Rü yexgumatama ãẽ̱xgacüpe̱xewa Daniéxü̃ nagagü. Rü nüma ga ãẽ̱xgacü rü nüxna naca, rü ñanagürü: —¿Cuma quixĩxü̃ i Danié i Yudíu quixĩxü̃ ga chaunatü ga Nabucudonochó Yudáanewa pexü̃ ne gagüxü̃?

¹⁴ Rü chomaxã nüxü̃ nixugü nax tupanagüãxẽ cuwa ngẽxmaxü̃, rü ngẽmaca̱x nixĩ i cua̱x cuxü̃́ ngẽxmaxü̃ rü nüxü̃ cucua̱xüchixü̃.

¹⁵ Rü ngẽma yatügü i nüxü̃ icua̱xüchixü̃ i ñaa nachixü̃anewa ngẽxmagüxü̃ rü marü naxca̱x changema nax nüxü̃ nadaumatügüxü̃ca̱x i ngẽma ore i ĩxtapü̱xgu ümatüxü̃ nax chomaxã nüxü̃ yaxugüxü̃ca̱x rü ta̱xacüchiga yixĩxü̃. Natürü i nümagü rü tama nüxü̃ nacua̱xgüéga nax ta̱xacüchiga yixĩxü̃ i ngẽma.

¹⁶ Rü nüxü̃ chaxĩnüchiga rü cuma rü cuxü̃́ natauxcha nax cunango̱xẽẽxü̃ i wüxi i nanegü rü cunamexẽẽxü̃ i taxü̃ i guxchaxü̃gü. Rü ngẽxguma chi cha̱u̱xca̱x nüxü̃ cudaumatügu i ngẽma ore i ĩxtapü̱xgu ümatüxü̃ rü chomaxã nüxü̃ quixuxgu nax ta̱xacüchiga yixĩxü̃, rü choma rü naxchiru i dauxracharaxü̃gu tá cuxü̃ chicu̱xẽxẽ, rü úirunaxca̱x ya cadénamaxã tá cuxü̃ chaxüchagü, rü cuma tá quixĩ i chautüü̃wa norü tomaepü̱xwa cuxüxü̃ nax ãẽ̱xgacü quixĩxü̃ —ñanagürü.

¹⁷ Rü yexguma ga nüma ga Danié rü nanangãxü̃ rü ñanagürü: —Pa Ãẽ̱xgacüx, tama chanaxwa̱xe i ngẽma ãmaregü. ¡Rü togüxü̃mare naxuneta nax cumaxã ãẽ̱xgacüxü̃ cupatawa nangẽxmaxü̃ca̱x! Natürü, Pa Ãẽ̱xgacüx, rü tá cumaxã nüxü̃ chixu i ta̱xacüchiga yixĩxü̃ i ngẽma dexagü i ĩxtapü̱xgu ümatüxü̃.

¹⁸ Rü nüma ya Tupana ya Guxãétüwa Ngẽxmacü, rü cunatü ga Nabucudonochóna nanaxã nax nüma ãẽ̱xgacü ga poracü rü cua̱x nüxü̃́ yexmacü nax yixĩxü̃ca̱x.

¹⁹ Rü yema pora ga Tupana nüxna ãxü̃gagu rü guxü̃ma ga ĩanecüã̱xgü rü nachixü̃anecüã̱xgü naguxü̃raü̃xü̃ ga nagawa idexagüxü̃ rü naga naxĩnüe rü nüxü̃ namuü̃e. Rü naxme̱xwa nayexma nax tüxü̃ yamáxü̃ rüe̱xna tüxü̃ namaxẽẽxü̃ ga guxema norü me ixĩxẽ. Rü tümaxe rü tüxü̃ nataxẽxẽ, rü toguxe rü tüxü̃ naxãneexẽxẽ.

²⁰ Natürü yexguma nügü yacua̱xüxü̃gu rü taxúegama naxĩnügu, rü Tupana rü nüxna nanayaxu ga norü pora, rü ínanata̱xüchi ga ãẽ̱xgacü nax yixĩxü̃.

²¹ Rü duü̃xü̃güna nixũgachi rü yema norü ĩnü rü naxü̃nagüarü ĩnürüxü̃ nixĩ. Rü naixnecücüã̱x ga búrugütanüwa namaxü̃. Rü wocagürüxü̃ maxẽ nanangõ̱x rü cherenamaxã niwaixine. Rü yemaacü nüxü̃ nangupetü ñu̱xmata düxwa nüxna nacua̱xãchi nax yimá Tupana ya Guxãétüwa Ngẽxmacü nax nüxü̃́ ngẽxmaxü̃ i pora nax namaxã inacuáxü̃ i guxü̃ma i ãẽ̱xgacügü i ñoma i naanewa ngẽxmagüxü̃. Rü nüma ya Tupana rü ãẽ̱xgacüxü̃ tüxü̃ nixĩxẽxẽ ya yíxema nüma norü me ixĩxẽ nax ãẽ̱xgacü tixĩxü̃ca̱x.

²² Rü cumax, Pa Berchachá nax nachicüxü quingucuchixü̃ ga cunatü ga Nabucudonochó, rü nüxü̃ cucua̱x ga yema nüxü̃ ngupetüxü̃. Natürü cuma rü ta narüü̃tama cugü quicua̱xüxü̃.

²³ Dücax, Pa Ãẽ̱xgacüx, cuma rü Cori ya Tupana ya dauxü̃wa ngẽxmacügu quidauxcüraxü̃. Erü curü duü̃xü̃güxü̃ cuyanuxü̃xẽxẽ i ngẽma naxpáü̃gü ga Tupanapata ya taxü̃nearü ixĩxü̃. Rü ngẽma nüxna cuxuxü̃maxã wüxigu ngẽma naxpáü̃güwa peyaxaxü ga bínu, rü nüxü̃ picua̱xüü̃gü i ngẽma perü tupanachicüna̱xãgü i úirunaxca̱x, rü diẽrumünaxca̱x, rü bróũchenaxca̱x, rü fierunaxca̱x, rü nainaxca̱x rü nutanaxca̱x i ngearü maxü̃ã́xü̃, rü tama tüxü̃ dauxü̃, rü tama tüxü̃ ĩnüxü̃ rü taxuxü̃ma cuáxü̃. Natürü tama nüxü̃ quicua̱xüxü̃ ya yimá Tupana ya naxme̱xwa nangẽxmacü i curü maxü̃ rü namaxã icuácü i guxü̃ma i ta̱xacü icuxüxü̃.

²⁴ Rü ngẽmaca̱x nixĩ i nüma ya Tupana i cuxca̱x nango̱xẽẽãxü̃ ya yima naxme̱x i ĩxtapü̱xgu naxümatüne i ngẽma ore.

²⁵ Rü ñaagü nixĩ i ngẽma ore: Méne rü Méne rü Tekél rü Pársin.

²⁶ Rü ngẽma ore rü ñaxü̃chiga nixĩ: Méne: Tupana rü marü nüxü̃ nixu nax ñuxre tátama i ngunexü̃ ãẽ̱xgacü quixĩxü̃, Pa Ãẽ̱xgacüx, rü marü nüxü̃ naxuneta i ngẽma ngunexü̃ i tá nagu cuyuxü̃.

²⁷ Tekél: Pa Ãẽ̱xgacü, rü Tupana rü norü ngugüruü̃wa cuxü̃ inangu, rü ngẽma curü chixexü̃ rü mexü̃xü̃ narüyamae.

²⁸ Pársin: Rü ngẽma cuchixü̃ane, Pa Ãẽ̱xgacüx, rü marü tá niyauxye rü tá Médiaanecüã̱xgüna rü Pérchiaanecüã̱xgüna nanaxã —ñanagürü ga Danié.

²⁹ Rü yexgumatama ga nüma ga ãẽ̱xgacü ga Berchachá rü norü duü̃xü̃güxü̃ namu nax Daniéxü̃ dauxracharaxü̃ ga naxchirugu yacu̱xẽẽgüaxü̃ca̱x, rü wüxi ga cadéna ga úirunaxca̱xmaxã naxüchagügüãxü̃ca̱x. Rü guxãmaxã nüxü̃ nixu nax nüma ya Danié yixĩxü̃ ga norü tomaepü̱xwa naxüxü̃ nax ãẽ̱xgacü yixĩxü̃.

³⁰ Rü yema chütaxü̃gu nixĩ ga yama̱xgüãxü̃ ga Berchachá ga Babiróniaanearü ãẽ̱xgacü ixĩcü.

³¹ Rü Daríu ga Médiaanecüã̱xgüarü ãẽ̱xgacü rü Berchacháchicüxü nixücu nax ãẽ̱xgacü yixĩxü̃ca̱x. Rü nüma ga Daríu rü 62 ga taunecü nüxü̃́ nayexma ga yexguma.