Danié 11 - Tupanaarü Ore

¹ Rü nüma ga yema naduü̃xü̃raxü̃xü̃ rü ñanagürüama: —Gumá nüxíraü̃cü ga taunecü ga nagu Médiaarü ãẽ̱xgacü yixĩcü ga Daríu, rü choma rü nüxü̃ charüngü̃xẽxẽ rü chanaporaxẽxẽ.

Ãẽ̱xgacügü ga nórtewa yexmagüxü̃ rü ãẽ̱xgacügü ga súrwa yexmagüxü̃

² Ñu̱xma rü tá cuxü̃ nüxü̃ chacua̱xẽxẽ i ngẽma aixcüma ixĩxü̃: Rü marü tomaepü̱x i ãẽ̱xgacügü Pérchiaanemaxã icua̱xguwena, rü tá nixücu i norü ãgümücü i ãẽ̱xgacü. Rü nüma rü tá ngẽma tomaepü̱xü̃arü yexera nadiẽruã̱xü̃chi. Rü ngẽma norü diẽrumaxã tá nügü ínarüpora rü Gréchiacüã̱xgümaxã tá nügü nadai.

³ Natürü ngẽmawena rü tá nixücu i wüxi i ãẽ̱xgacü i poraxü̃ i muxü̃tama i nachixü̃anemaxã icuáxü̃. Rü nüma rü nanaxwa̱xeãcüma tá namaxã inacua̱x i ngẽma togü i nachixü̃anegü i naxme̱xwa ngẽxmagüxü̃.

⁴ Natürü ngẽxguma yanguxgu nax naxme̱xwa nangẽxmagüxü̃ i ngẽma nachixü̃anegü, rü ãgümücügu tá niyauxye i ngẽma norü naane. Rü ngẽma ãẽ̱xgacüarü pora rü taxũtáma nanegüwa nangu. Rü ngẽma norü nachixü̃ane rü taxũtáma noxrirüxü̃ napora, erü marü ãgümücügu tá niyauxye rü togü tá nachicüxü namaxã inacua̱xgü.

⁵ Rü ngẽma ãẽ̱xgacü i súranemaxã icuáxü̃ rü tá naporaxüchi. Natürü wüxi i ngẽma norü churaragüeru rü tá yexera nüxü̃ narüporamae rü muxü̃ma i nachixü̃anemaxã tá inacua̱x.

⁶ Rü ñuxre ya taunecüwena rü ngẽma taxre i ãẽ̱xgacügü rü tá nügümaxã inaxuneta nax nügü nangü̃xẽẽgüxü̃ca̱x. Rü ngẽma súranearü ãẽ̱xgacü rü tá ngẽma nórteanearü ãẽ̱xgacüna ngĩxü̃ namu i naxacü nax ngĩmaxã naxãmaxü̃ca̱x nax ngẽmaãcü tama nügümaxã nanuexü̃ca̱x i ngẽma taxre i nachixü̃anearü ãẽ̱xgacügü. Natürü ngẽma uneta rü nagu tá narüchixe, erü tá ngĩxü̃ nima̱xgü i naxma̱x wüxigu namaxã ya ngĩne rü ngĩte rü ngĩrü puracütanüxü̃.

⁷ Natürü wüxi i ngĩtanüxü̃ rü tá ãẽ̱xgacüwa nangu i súranewa, rü tá naxca̱x ínayaxüãchi i ngẽma nórteanearü churaragü. Rü tá namaxã inacua̱xgü i ngẽma nórtecüã̱xarü poxü̃chica. Rü tá ngẽma nórteanearü churaragüxü̃ narüporamaegü.

⁸ Rü ñu̱xũchi Equítuanewa tá nanana i ngẽma nórtecüã̱xarü tupanachicüna̱xãgü i bróũchenaxca̱x wüxigu namaxã i norü ngẽmaxü̃gü i úirunaxca̱x rü diẽrumünaxca̱x. Rü ñuxre ya taunecü rü taxũtáma nügü nadai i ngẽma taxre i ãẽ̱xgacügü.

⁹ Natürü nawena rü ngẽma nórteanearü ãẽ̱xgacü rü súranegu tá naxücu. Natürü tá nüxü̃ naxoo̱xgü, rü ngẽmaca̱x nachixü̃aneca̱x tá nataegu.

¹⁰ Natürü ngẽma nórtearü ãẽ̱xgacü nanegü rü daixca̱x tá nügü ínamexẽẽgü, rü muxü̃tama i churaragü tá nanutaque̱xegü. Rü wüxi i ngẽma nane rü norü churaragümaxã tá súranegu naxücu, rü guxü̃táma inayarüxoxẽxẽ ñoma mucü ya tacü ya guxü̃ma irüxoxẽẽcürüxü̃. Ngẽmawena rü wena tá ngẽma súrcüã̱xü̃ nadai rü ñu̱xmata ngẽma súranearü ãẽ̱xgacüarü poxü̃chicawa nangugü.

¹¹ Rü ngẽma nax súrarü naanegu nachocuxü̃ i ngẽma nórtecüã̱xgüarü churaragü rü poraãcü tá súranearü ãẽ̱xgacüxü̃ nanuxẽxẽ. Rü ngẽmaca̱x ngẽma nórtecüã̱xarü churaragümaxã tá nügü nadai rü tá nüxü̃ narüporamae woo nax namuxü̃ i ngẽma nórtearü churaragü.

¹² Rü nüma i ngẽma súranearü ãẽ̱xgacü rü tá nügü nicua̱xüxü̃ erü norü uanüxü̃ narüporamae rü ñu̱xũchi nanadai i muxü̃ma i norü uanüarü churaragü. Natürü taxũtáma mucü ya taunecü natai i norü pora.

¹³ Rü ngẽma nórteanearü ãẽ̱xgacü rü tá nananutaque̱xe i nüxíraxü̃güxü̃arü yexera rümumaexü̃ i to i norü churaragü. Rü mea tá nixãxne. Rü ngẽmaãcü ñuxre ya taunecüwena rü tá wenaxarü ngẽma súranearü ãẽ̱xgacüca̱x ínayaxüãchi.

¹⁴ Rü ngẽma ngunexü̃gügu rü muxü̃tama i súrcüã̱x i duü̃xü̃gü rü tá norü ãẽ̱xgacümaxã nanue. Rü ngẽmatanüwa tá nangẽxmagü i ñuxre i Iraétanüxü̃ i chixexü̃gu maxẽxü̃, ngẽma cunegüwa nüxü̃ cudauxü̃rüxü̃. Rü tá nórtearü ãẽ̱xgacüwa naxügü. Natürü ngẽma súranearü ãẽ̱xgacü rü tá nüxü̃ narüporamae.

¹⁵ Rü nümatama i ngẽma nórtearü ãẽ̱xgacü rü tá ínangu. Rü wüxi ya ĩane ya ípoxegunecüwagu tá waixü̃mümaxã nanagünagü rü ngẽmawa tá dauxü̃ naxĩgü rü tá yima ĩanegu nachocu. Rü woo ngẽma nüxü̃ rücua̱xmaegüxü̃ i súranearü churaragü rü taxucürüwatama ínayachaxãchixẽẽgü i ngẽxguma nachocuxgu i ngẽma uanüarü churaragü.

¹⁶ Rü ngẽma ãẽ̱xgacü i ngẽxma ücuxü̃ rü nüma nanaxwa̱xexü̃ tá namaxã naxü i ngẽma nüxü̃ naporamaexü̃. Rü taxúetama tapora nax ítayachaxãchixẽẽxü̃. Rü Iraétanüxü̃arü naane i mexẽchixü̃wa tá nangẽxma rü tá namaxã inacua̱x.

¹⁷ Rü ñu̱xũchi nügü tá naxca̱x namexẽxẽ nax naya̱u̱xãxü̃ca̱x i guxü̃ma i ngẽma naane i Súrwa ngẽxmaxü̃. Rü ngẽmaca̱x Súranearü ãẽ̱xgacümaxã wüxi i uneta tá naxü, rü naxacü tá nüxna ngĩxü̃ namu nax naxma̱x yixĩxü̃ca̱x nax ngẽmaãcü naya̱u̱xãxü̃ca̱x i ngẽma naane i Súrwa ngẽxmaxü̃. Natürü ngẽma nagu naxĩnüxü̃ rü nagu tá narüchixe.

¹⁸ Ngẽmawena i ngẽma nórteanearü ãẽ̱xgacü rü yima ĩanegü ya márpechinüwa ngẽxmagüneca̱x tá ínayagoõchi, rü muxü̃netáma napuxü̃ rü naxme̱xwa tá nangẽxmagü. Natürü wüxi i churaragüeru tá ínayachaxãchixẽxẽ. Rü ngẽmaãcü tá ngẽma Nórteanearü ãẽ̱xgacüxü̃ naxãnexẽxẽ.

¹⁹ Rü ngẽmawena i ngẽma Nórteanearü ãẽ̱xgacü rü tá nachixü̃anearü ĩanegü ya ípoxegugüneca̱x nataegu. Natürü chixexü̃ tá nüxü̃ naxüpetü rü ngẽxma tá nayu. Rü tagutáma wena nachiga nidexagü.

²⁰ Rü ngẽma Nórteanearü ãẽ̱xgacüwena rü to i ãẽ̱xgacü tá nachicüxü ningucuchi. Rü ngẽma ãẽ̱xgacü rü norü duü̃xü̃xü̃ tá namu nax duü̃xü̃gütanüwa naya̱u̱xãxü̃ca̱x i taxü̃ i diẽru i ãẽ̱xgacü nagu unetaxü̃ nax ngẽmaãcü nadiẽruã́xü̃ca̱x i norü naane. Natürü ñuxre i ngunexü̃wenatama tá nayama̱xgü i ngẽma ãẽ̱xgacü, rü taxũtáma daigu nayu.

²¹ Nawena rü wüxi i yatü i nüxü̃ naxoexü̃ rü tama ãẽ̱xgacüwa mexü̃ tá ãẽ̱xgacüxü̃ ningucuchi. Rü nüma tá nayacu̱x i ngẽma chixexü̃ i nagu naxĩnüxü̃, rü duü̃xü̃güxü̃ nawomüxẽẽãcüma tá ãẽ̱xgacüxü̃ ningucuchi.

²² Rü nüma i ngẽma ãẽ̱xgacü i chixecümaxü̃ rü ñoma mucü ya tacü ya guxü̃ma iyarüxoxẽẽcürüxü̃ tá inayanaxoxẽxẽ i norü uanügüarü churaragü. Rü tá ínanata̱xüchi i ngẽma ãẽ̱xgacü i namaxã uneta naxuchiréxü̃.

²³ Rü ngẽxgumarüxü̃ tá ta nayawomüxẽxẽgü i ngẽma ãẽ̱xgacügü i marü uneta namaxã naxuchiréxü̃ nax nügü nangechaxü̃güxü̃ca̱x. Rü woo nanoxre i norü churaragü, natürü tá norü uanügüxü̃ narüporamae.

²⁴ Rü ngẽxguma taxúetama nagu írüxĩnügu rü tá nagu naxücu i nachixü̃anearü naanegü i memaexü̃. Rü tá nanaxü i ngẽma nũxcümaü̃güxü̃ ga norü o̱xigü taguma üxü̃. Rü norü churaragümaxã tá nügü nayanu i ngẽma muxü̃ i ngẽmaxü̃gü i daiwa napuxü̃güxü̃. Rü tá naxca̱x nadau nax ñuxãcü tá nagu naxücuxü̃ ya yimá ĩanegü ya ípoxegugüne. Natürü ngẽma naxüxü̃ rü taxũtáma mucü ya taunecü natai.

²⁵ Rü ngẽma nax nügü nacuáxü̃ nax naporaxü̃ rü tama namuü̃xü̃ rü ngẽmaca̱x i nüma i Nórteanearü ãẽ̱xgacü rü muxü̃ma i norü churaragümaxã tá ngẽma Súranearü ãẽ̱xgacüca̱x ínayagoõchi. Rü nüma i ngẽma Súranearü ãẽ̱xgacü rü tá nügü namaxã nadai, natürü taxũtáma nüxü̃ narüporamae erü namücügütama tá nanaechitaegü.

²⁶ Rü ngẽma namücügü i wüxigu norü mechawa namaxã nachibüexü̃ tátama nixĩ i naechitaegüxü̃. Rü ngẽmaãcü norü uanü tá nüxü̃ narüporamae rü tá nayue i muxü̃ma i norü churaragü.

²⁷ Rü ngẽma taxre i ãẽ̱xgacügü rü nügümaxã wüxi tátama i mechawa tá narüto nax nachibüexü̃ca̱x. Rü wüxichigü i nüma i norü ĩnüwa rü tá nagu narüxĩnüe nax ñuxãcü tá nügü nada̱i̱xü̃. Rü doraxü̃ tá nügümaxã nixugüe. Natürü ngẽma nagu naxĩnüexü̃ i ngẽma taxre rü taxũtáma ningu erü tauta norü ngunexü̃wa nangu.

²⁸ Rü ngẽma Nórtearü ãẽ̱xgacü rü nachixü̃aneca̱x tá nataegu namaxã i guxü̃ma i ngẽmaxü̃gü i daiwa napuxü̃xü̃. Natürü norü ĩnüwa rü tama nataãxẽ namaxã i ngẽma uneta i Iraétanüxü̃maxã naxüxü̃ ya Tupana, rü tá nagu nidaucüraxü̃ ya Tupanapata. Rü ngẽmawena tá nachixü̃aneca̱x nataegu.

²⁹ Rü ngẽxguma nawa nanguxgu nax wena naporaxü̃, rü wena tá Súranearü ãẽ̱xgacüarü churaragüxü̃ nayadai. Natürü ngẽma daiwa rü taxũtáma narüporamae yexguma noxri nügü nadaixgurüxü̃.

³⁰ Erü churaragü i wapurugu Oéstewa ne ĩxü̃ tá naxca̱x ínayaxüãchi i ngẽma Nórteanearü churaragü. Rü ngẽmamaxã tá naba̱i̱xãchie rü norü muü̃maxã tá nibuxmü. Rü ngẽmaca̱x i ngẽma Nórteanearü ãẽ̱xgacü rü norü numaxã tá chixexü̃ naxü namaxã i ngẽma Tupanaarü duü̃xü̃gü i Iraétanüxü̃. Natürü ngẽma Iraétanüxü̃ i Tupanana ixĩgachixü̃ rü tá ngẽma ãẽ̱xgacüétüwa naxügü.

³¹ Rü ngẽma norü churaragü rü tá chixexü̃ nawa naxügü ya yima Tupanapata ya taxü̃ne rü yima ĩane ya ípoxegune ya Yerucharéü̃. Rü tá inayanaxoxẽxẽ nax wüxichigü i ngunexü̃ Tupanaca̱x ãmare yagugüxü̃. Rü ngẽmatama ãmarearü guruü̃wa tá nayagugü i ngẽma Tupanaca̱x ãũãchixü̃.

³² Rü nüma i ngẽma ãẽ̱xgacü rü tá ãmaregü nüxna naxãgü i ngẽma Tupanana ixĩgachixü̃. Natürü ngẽma Iraétanüxü̃ i aixcüma Tupanaga ĩnüexü̃ rü taxũtáma ngẽma ãẽ̱xgacüga naxĩnüe.

³³ Rü yíxema duü̃xẽgü i nüxü̃ icuáxe rü tá muxetama i duü̃xü̃güxü̃ tangúexẽxẽ nax aixcüma Tupanaca̱x tamaxẽxü̃ca̱x. Natürü yíxema duü̃xẽgü ya ngúexẽẽtaegüxe rü ñuxre rü tá taramaxã tüxü̃ nadai rü tümaxe rü tá tüxü̃ nigu. Rü tá tüxü̃́ nanade i guxü̃ma i tümaarü ngẽmaxü̃gü. Rü tümaxe rü tá togü i nachixü̃anegüwa tüxü̃ nagagü nax puracütanüxü̃ tixĩgüxü̃ca̱x. Natürü ngẽma rü taxũtáma nũxcü narüxo.

³⁴ Natürü ngẽxguma tá ngẽma guxchaxü̃gü tümaca̱x íngugügu rü íxraxü̃ i ngü̃xẽxẽ tá tayauxgü. Rü woo muxü̃ i duü̃xü̃gü tümatanügu naxãgü natürü tümatanügu naxãgünetamare.

³⁵ Rü ngẽxgumarüxü̃ ta i ñuxre i ngẽma nüxü̃ icuáxü̃ nax duü̃xü̃güxü̃ nangúexẽẽxü̃, rü norü uanügü rü tá nawe ningexü̃tanü. Rü ngẽmaãcü Tupana tá nüxü̃ naxü nax nape̱xewa yamexü̃ca̱x. Rü ngẽmaãcü nixĩ rü ñu̱xmata nawa nangu i ngẽma ngunexü̃ ya Tupana nagu unetaxü̃.

³⁶ Rü ngẽma Nórtearü ãẽ̱xgacü rü guxü̃ma i ngẽma nüma nanaxwa̱xexü̃ tá naxümare. Rü tá nügü nicua̱xüxü̃ rü tá nügügu nayaxõ nax guxü̃ma i tupananetagüarü yexera naporamaexü̃. Rü Tupanamaxã tá naguxchiga. Rü guxü̃táma i ngẽma naxüxü̃wa rü mea tá nüxü̃́ ínanguxuchi rü ñu̱xmata Tupana naxca̱x ínanguxẽxẽ i norü poxcu. Erü ngẽma Tupana ueguxü̃ rü tá nayanguxẽxẽ.

³⁷ Rü ngẽma ãẽ̱xgacü rü taxũtáma nüxna nacua̱xãchi i ngẽma nũxcümaü̃güxü̃ i norü o̱xigüarü tupanagü, rü woo ga yema tupanagü ga ngexü̃gü nüxü̃ icua̱xüü̃güxü̃, rü woo i ta̱xacürü to i tupana. Erü nügügu tá nayaxõ nax guxü̃ma i tupanagüxü̃ nayexeramaexü̃ i nüma.

³⁸ Rü tá nüxü̃ nicua̱xüxü̃ama i ngẽma norü tupana i poxü̃ruxü̃ ixĩxü̃. Rü ngẽma nixĩ i wüxi i tupana ga tama norü o̱xigü nüxü̃ cua̱xgüxü̃. Rü ngẽma tupanana tá nanaxã i úirugü, rü diẽrumügü, rü nuta ya ngã̱xãẽruü̃gü, rü ngẽmaxü̃gü i tatanüxü̃.

³⁹ Rü tá nananutaque̱xe i churaragü i togü i tupanagüxü̃ icua̱xüü̃güxü̃ nax ngẽmaãcü ínapoxü̃ãxü̃ca̱x ya yima ĩanegü ya ípoxegugüne. Rü guxãma ya yíxema nüxü̃ icua̱xüü̃güxe rü tá norü ngü̃xẽẽruü̃gü tüxü̃ nixĩgüxẽxẽ rü tá taxü̃ i naanegü tüxna naxã.

⁴⁰ Rü ngẽxguma nawa nanguxgu nax nügü nada̱i̱xü̃ rü ngẽma súr-arü ãẽ̱xgacü rü tá ngẽma nórtearü ãẽ̱xgacüca̱x ínayagoõchi. Natürü ngẽma nórtearü ãẽ̱xgacü rü ñoma wüxi ya buanecü ya íxãũxẽmacürüxü̃ tá naxca̱x niñaama. Rü carugü i dairuxü̃ ixĩgüxü̃maxã, rü churaragü i cowarutagu ixĩxü̃maxã tá nayapaxẽxẽ i ngẽma nachixü̃ane. Rü tá namu ya norü wapurugü.

⁴¹ Rü nagu tá naxücu i Iraétanüxü̃arü naane i mexẽchixü̃, rü muxü̃tama i duü̃xü̃güxü̃ nadai. Natürü taxũtáma naxme̱xgu nayi i ngẽma Edóü̃anecüã̱xgü, rü Moáanecüã̱xgü, rü ñu̱xũchi ngẽma rümumaexü̃ i Amóü̃anecüã̱x.

⁴² Rü ngẽma norü churaragü rü togü i nachixü̃anegu tá nachocu. Rü woo i ngẽma Equítuane rü taxũtáma niña nax naxme̱xgu nanguxü̃.

⁴³ Rü tá nayana i guxü̃ma i Equítuanearü ngẽmaxü̃gü i mexẽchixü̃ i úirunaxca̱x rü diẽrumünaxca̱x. Rü ngẽmawena rü Líbiaanegu, rü Etiopíaanegu tá naxücu.

⁴⁴ Natürü tá nanayaxu i ore i Éstewaama rü Nórtewaama naxca̱x ne muxü̃ i tá poraãcü namuü̃xẽẽxü̃. Rü norü numaxã tá nataegu, rü ngẽmaca̱x nagu narüxĩnü nax muxetama tüxü̃ nada̱i̱xü̃.

⁴⁵ Rü ñu̱xũchi ngẽma metachinüxü̃ i Yerucharéü̃arü rü márpechinüarü ngãxü̃wa ngẽxmaxü̃gu tá nayatexechigü i norü churaragüpatagü i naxchirunaxca̱x. Natürü ngẽxma tátama nixĩ i nayuxü̃, rü taxúetama nüxü̃ tarüngü̃xẽxẽ —ñanagürü.