Danié 10 - Tupanaarü Ore

Taxtü ga Tígricutüwa Tupana Daniéxü̃ nüxü̃ nadauxẽxẽ i ngẽma tá ngupetüxü̃

¹ Rü gumá norü tomaepü̱x ga taunecü nax ãẽ̱xgacü yixĩxü̃ ga Chíru ga Pérchiaanewa, rü choma ga Danié ga Betachámaxã choxü̃ naxugüe rü Tupana choxü̃ nüxü̃ nadauxẽxẽ i ngẽma tá ngupetüxü̃. Rü yema nüxü̃ chadauxü̃ rü aixcüma nixĩ, natürü poraãcü naguxcha nax nüxü̃ icuáxü̃ nax ta̱xacüchiga yixĩxü̃. Natürü ga choma rü meama chanangugü nax ta̱xacüchiga yixĩxü̃ rü yemaacü nüxü̃ chacua̱xama ga yema nüxü̃ chadauxü̃.

² Rü yexguma yemaxü̃ chada̱u̱xgu rü choma ga Danié rü tomaepü̱x ga yüxü poraãcü changechaü̃.

³ Rü tama chanangõ̱x ga maixcuraxü̃, rü tama chanangõ̱x ga namachi, rü tama chayaxaxü ga bínu, rü tama chaugü chamexẽxẽ ñu̱xmata yema tomaepü̱x ga yüxü ngupetügu.

⁴ Rü wüxi ga ngunexü̃ meama gumá taunecüarü nüxíraxü̃ ga tauemacüarü 24 ga ngunexü̃gu, rü taxtü ga Tígricutüwa chayexma.

⁵ Rü ngürüãchi nüxü̃ chadau ga wüxi ga yatü ga línuchimaxã ãxchiruxü̃ rü úirumaxã goyexü̃ã́xü̃.

⁶ Rü yema naxü̃ne rü ñoma nuta ya topáchiurüxü̃ niyauracüxü, rü yema nachiwe rü ñoma ba̱i̱xbeanexü̃rüxü̃ nixĩ. Rü guma naxetügü rü ñoma üxüemagürüxü̃ nixĩ, rü guma nachacüügü rü nacutügü rü ñoma bróũche iya̱u̱xracüüxü̃rüxü̃ nixĩ. Rü yema naga rü ñoma muxü̃ i duü̃xü̃gü idexagüxü̃rüxü̃ nixĩ.

⁷ Rü chaxicatama nixĩ ga nüxü̃ chadauxü̃ ga yema Tupana cha̱u̱xca̱x ngo̱xẽẽxü̃. Rü yema togü ga chomücügü rü taxuxü̃ma nadaugü, yerü norü muü̃maxã nibuxmü rü nicu̱xgü.

⁸ Rü yemaacü chaxicatama yéma chayexma ga yexguma yemaxü̃ chada̱u̱xgu. Rü chaba̱i̱xãchiãxẽ rü chanachoxõchi rü chaturaxü̃ne.

⁹ Rü yexguma nagaxü̃ chaxĩnügu ga nax yadexaxü̃, rü chiyuãchi rü waixü̃müanegu changu.

¹⁰ Natürü wüxi ga naxme̱x rü choxna natüxüe rü choxü̃ nangenagü ñu̱xmata cho̱xme̱xmaxã rü chauã́pü̱xümaxã ichachuxenü.

¹¹ Rü ñu̱xũchi ñanagürü choxü̃: —Pa Daniéx, Tupana rü cuxü̃ nangechaü̃. ¡Rü mea irüxĩnü i ngẽma tá cumaxã nüxü̃ chixuxü̃! ¡Rü inachi! Erü choxü̃ nixĩ i cuxü̃tawa namuxü̃ ya Tupana —ñanagürü. Rü yexguma yagúegagu nax yadexaxü̃ rü choma rü chidu̱xruxãcüma ichachi.

¹² Rü yexguma ga nüma rü ñanagürü: —¡Taxṹ i choxü̃ cumuü̃xü̃, Pa Daniéx! Yerü yema ngunexü̃ ga nagu nüxü̃ cucuáxchaü̃xü̃ ga yema Tupana nagu rüxĩnüxü̃ rü nape̱xewa cugü ícurüxíra. Rü nüma rü cuxü̃́ nüxü̃ naxĩnü ga curü yumüxẽgü. Rü ngẽmaca̱x nua cuxü̃tawa chaxũ.

¹³ Natürü ngẽma naãxẽ i chixexü̃ i Pérchiaanearü ãẽ̱xgacümaxã icuáxü̃ rü 21 ga ngunexü̃ rü choxü̃́ nanaguxchaxẽxẽ. Natürü nüma ya Miguére i ãẽ̱xgacü i tacü ixĩxü̃ i daxũcüã̱xtanüwa rü nua naxũ rü choxü̃ narüngü̃xẽxẽ. Yerü ga choma ga noxri rü chaxicatama chaugümaxã chawüxica̱x ngẽma naãxẽ i chixexü̃ i Pérchiaanearü ãẽ̱xgacümaxã icuáxü̃.

¹⁴ Rü ngẽmaca̱x i ñu̱xma rü nua chaxũ nax cumaxã nuxü̃ chayarüxuxü̃ca̱x i ngẽma tá yixcüra ngupetüxü̃ namaxã i cutanüxü̃ i Iraétanüxü̃. Rü yema nüxü̃ cudauxü̃ ga yexguma Tupana cuxca̱x nango̱xẽẽgu, rü ngẽma tá yixcüra cutanüxü̃maxã ngupetüxü̃chiga nixĩ —ñanagürü choxü̃.

¹⁵ Rü yexguma yemaxü̃ chomaxã íyaxuyane rü charümaxãchi rü waixü̃müanegu chadawenü rü changeã̱xmare.

¹⁶ Rü ngürüãchi wüxi ga naduü̃xü̃raxü̃xü̃ cha̱u̱a̱xgu ningõgü. Rü yexguma chicho rü chidexa rü ñachagürü nüxü̃ ya yema chopexegu chíxü̃: —Pa Chorü Corix, ngẽma nüxü̃ chadauxü̃ rü poraãcü choxü̃ nangechaü̃xẽxẽ rü choxü̃ nangearü poraã̱xẽxẽ.

¹⁷ ¿Rü ñuxãcü tá i cumaxã chidexaxü̃ i choma nax curü duü̃ chixĩxü̃? Yerü ngürüãchimare chanaturaãchi rü wixguxüchi taxucürüwama chingüãcüxü —ñachagürü.

^18-19 Rü yema naduü̃xü̃raxü̃xü̃ rü wena choxü̃ ningõgü rü pora choxna naxã. Rü ñu̱xũchi choxü̃ ñanagürü: ¡Taxṹ i cumuü̃xü̃ rü cuxoegaãẽxü̃! Tupana rü cuxü̃ nangechaxü̃. ¡Rü cugü naporaxẽxẽ rü taxṹ i cumuü̃xü̃!, ñanagürü. Rü yexguma chomaxã íyadexagu rü nüxü̃ chicua̱xãchi ga nax chiporachigüxü̃. Rü ñachagürü: —¡Pa Corix, ẽcü chomaxã idexa erü cha̱u̱xca̱x cunatáeguxẽxẽ i pora! —ñachagürü.

²⁰ Rü yexguma ga nüma ga yema naduü̃xü̃raxü̃xü̃ rü choxü̃ ñanagürü: —¿Nüxü̃ cucuáxü̃ nax ta̱xacüca̱x yixĩxü̃ i nua cuxü̃ íchayadauxü̃? Erü ñu̱xma rü wena tá namaxã togü tadai i ngẽma naãxẽ i chixexü̃ i Pérchiaanearü ãẽ̱xgacümaxã icuáxü̃. Rü ngẽxguma tá marü togü namaxã tadaixguwena rü tá ínangu i ngẽma naãxẽ i Gréchiaanearü ãẽ̱xgacümaxã icuáxü̃.

²¹ Ñu̱xma rü tá cumaxã nüxü̃ chixu i ñuxü̃ ñaxü̃ i ngẽma popera i nagu naxümatüxü̃ i ngẽma ore i aixcüma ixĩxü̃. Rü ngẽxguma ngẽma uanügümaxã togü tadaixgu rü Miguére ya Tupanaarü orearü ngeruxü̃ i Iraétanüxü̃arü dauruxü̃xicatama nixĩ ya choxü̃ rüngü̃xẽẽcü —ñanagürü.