Charumóü̃arü wiyae 2 - Tupanaarü Ore

Ngĩmax

¹ Choma rü ñoma putüra i rosa i doxonexü̃ i Charóü̃cüã̱xrüxü̃ chixĩ. Rü choma rü ñoma putüra i rosa i doxonexü̃cüã̱xrüxü̃ chixĩ.

Nümax

² Ngẽma pacü ya ngĩxü̃ changechaü̃cü, rü guxü̃ma i ngexü̃güxü̃ rümemae. Rü ñoma putüra i líriu i tuxutanüwa rüxüxü̃rüxü̃ imexẽchi.

Ngĩmax

³ Yimá ngextü̱xücü ya choxü̃ ngúchaü̃cü rü guxü̃ma i yatügütanüwa rü ñoma nanetü i manzana i naixnecüarü naigütanüwa rüxüxü̃rüxü̃ nixĩ. Rü chataãxẽ nax norü gáuxchipetatüxü̃wa charütoxü̃. Rü namaixcuraxüchi i ngẽma norü o.

⁴ Rü ngẽma naxmachiã i taxü̃ i nawa nachibüexü̃wa choxü̃ naga. Rü choxü̃́ nangechaü̃acü choxü̃ nadauwenü.

⁵ Rü paũ i maixcuraxü̃ i úbaã́xü̃maxã choxü̃ nataãẽxẽxẽ. Rü manzanamaxã choxü̃ naxüwemü erü ngẽma nax nüxü̃ changechaü̃xü̃ca̱x rü chayuégachaü̃.

⁶ Rü chanaxwa̱xe nax norü to̱xwechacüügu choxü̃ nacanagüeruxẽẽxü̃, rü norü tügünechacüümaxã choxna nanáixü̃.

Nümax

⁷ Pa Ngexü̃gü i Yerucharéü̃cüã̱xgüx, rü chanaxwa̱xe i ngẽma cowügü rü cowüacügü i naixnecüwa ngẽxmagüxü̃égagu chomaxã ipexüga nax taxũtáma ngĩxü̃ ípeba̱i̱xgüxü̃ i ngẽma choxü̃́ ngúchaü̃cü i pacü rü ñu̱xmatáta ngĩechama naba̱i̱xãchi.

Norü taxre i wiyae Ngĩmax

⁸ Marü ínanguchaü̃ ya yimá choxü̃́ ngúchaü̃cü, rü marü nüxü̃ chaxĩnü i naga. Rü máxpü̱xanexü̃wa ne nayuxnagüchigü, rü ma̱xpǘnexü̃ niyuxpetüchigü.

⁹ Rü yimá choxü̃́ ngúchaü̃cü rü ñoma wüxi i cowüxacürüxü̃ nixĩ. Rü ĩã̱x i nawa ixücuxü̃wa nangẽxma. Rü beü̃tánawa nidaucuchi nax bexma ngéma choxü̃ nangugüxü̃ca̱x.

¹⁰ Rü yimá choxü̃́ ngúchaü̃cü rü ñanagürü choxü̃: —¡Írüda, Pa Choxü̃́ Ngúchaxü̃cüx, rü ngĩxã, chowe rüxũ Pa Nge i Mexẽchicüx!

¹¹ ¡Dücax! Ngẽma gáuanexü̃ rü marü nangupetü rü yimá pucü rü nawe narüxũ.

¹² Rü ngẽma putüragü i naanewa ngẽxmagüxü̃ rü marü niboxgüchacu. Rü marü nawa nangu i ngunexü̃ i nagu iwiyaegüxü̃. Rü marü nawa nangu nax naxãeü̃ i ngẽma muxtucuxacügü.

¹³ Rü ngẽma igunecü rü marü nixo, rü úbanecüwa rü marü nixãchacu rü ngẽmamaxã nayixane. ¡Rü írüda, Pa Choxü̃́ Ngúchaxü̃cüx, rü ngĩxã, chowe rüxũ Pa Nge i Mexẽchicü!

¹⁴ Pa Chorü Muxtucux, ¿tü̱xcüü̃ ma̱xpǘnegüarü nutatanügu quicu̱x? ¡Choxü̃́ cugü nawe̱xchametü! ¡Choxü̃́ nüxü̃ naxĩnüxẽxẽ i cuga! Rü chataãxẽ nax cuxü̃ chadauxü̃. Rü namaixcura i cuga nax nüxü̃ chaxĩnüxü̃ —ñanagürü choxü̃.

Nümagü

¹⁵ Ípenayauxü̃ i ngẽma ngowagü i ngexü̃! ¡Rü naxacügü rü ta ípenayauxü̃! Erü tórü úbaarü o nangõ̱xgü rü nachacugu niwagügü.

Ngĩmax

¹⁶ Rü yimá choxü̃́ ngúchaü̃cü rü choxrüxicatama nixĩ, rü choma rü noxrü chixĩ. Rü nüma ya choxü̃́ ngúchaü̃cü rü putüra i rosanecüwa naxü̃nagüxü̃ nachibüexẽxẽ.

¹⁷ ¡Pa Choxü̃́ Ngúchaxü̃cüx, cha̱u̱xca̱x nataegu ñoma rü ta nangóonexüra naxü̃pa nax nawaanexü̃! ¡Rü ñoma cowürüxü̃ paxa inañaãchi! ¡Rü ñoma cowüxacü i yatüxü̃rüxü̃ ma̱xpǘnearü tuãchiwa nagopetü!