Charumóü̃arü wiyae 1 - Tupanaarü Ore

Charumóü̃arü wiyae

¹ Ñaa nixĩ i Charomóü̃arü wiyae i guxü̃ma i norü wiyaegüxü̃ rümemaexü̃.

Norü ügü i wiyae Ngĩmax

² ¡Cuberamaxã choxü̃ nachúxu! Rü curü meãxẽ rü bínuarü yexera narümaixcuramae.

³ Rü curü pumara rü nachi̱xichi. Rü cuéga rü ñoma pumara i baxü̃rüxü̃ nixĩ. Rü ngẽmaca̱x i ngexü̃gü rü nüxü̃́ cungúchaü̃.

⁴ ¡Rü paxãma cugüxü̃tawa choxü̃ naga! ¡Pa Ãẽ̱xgacüx, curü ucapuwa choxü̃ naga! Rü ngéma rü tá wüxigu tataãẽgü. Rü curü meãxẽ rü namaxã tataãẽgü bínuarü yexera. Rü ngẽmaca̱x nixĩ i ngexü̃gü i poraãcü nüxü̃́ cungúchaü̃güxü̃.

Coru Ngĩmax

⁵ Pa Ngecügü i Yerucharéü̃cüã̱xgüx, choma rü chawaxracha̱xmü, natürü chamechametü. Chawaxraxü̃ne yimá Quedáxcüã̱xarü ĩpatagürüxü̃. Rü chamexẽchi ñoma Charomóü̃arü ucapuarü düxmachiü̃rüxü̃.

⁶ ¡Rü taxṹ i cha̱u̱xcha̱xmüü̃ i waxraxü̃gu perüdaunüxü̃! Rü choma rü chawaxracha̱xmüü̃ yerü üa̱xcü choxü̃ nigu. Rü chauenexẽgü rü chomaxã nanue rü norü úbanecüna choxü̃ nadauxẽẽgü. Rü yemaca̱x chorü úbanecü rü yéma chanata̱xmare.

⁷ Pa Choxü̃́ Ngúchaxü̃cüx, ¡chomaxã nüxü̃ ixu i ngextá nixĩ i cuxü̃nagü icuyachibüexẽxẽxü̃! ¿Rü ngẽxguma tocuchiwa nanguxgu rü ngextá nixĩ i cunagagüxü̃ i cuxü̃nagü nax nangü̃exü̃ca̱x? ¿Rü tü̱xcüü̃ ñoma wüxi i ngexü̃ i nu ne naxũxü̃rüxü̃ cumücügüarü naxü̃nagütanüwa tá chaxüpetü nax cuxca̱x chayadauxü̃?

Coru

⁸ Pa Guxü̃ma i Pacüxü̃ Rümemaexü̃chicüx, rü ngẽxguma tama nüxü̃ cucua̱xgu nax ngextá changexmaxü̃, ¡rü naxü̃nagüchitügu ixũ nax ngẽmaãcü ngéma naxü̃nagüarü dauruü̃güarü düxenüxü̃tawa cuyachibüexẽxẽxü̃ca̱x i curü chíbuxacügü!

Nümax

⁹ Rü cumax, Pa Pacü i Cuxü̃ Changechaü̃xü̃chicüx, rü cha̱u̱xca̱x rü ñoma wüxi i cowaru i ngexü̃ i mexẽchixü̃ i Faraóü̃arü caru itúchigüxü̃rüxü̃ cumexẽchi.

¹⁰ Rü cumatügü i cuxmachinügüarü ngãxü̃wa ngẽxmagüxü̃ rü namexẽchi. Rü namexẽchi i cunaxã i cuchagü nawa rütuxü̃.

¹¹ Rü cuxü̃́ tá tanaxü i naxmachinügü i úirunaxca̱x i diẽrumümaxã nga̱xãẽxü̃.

Ngĩmax

¹² Rü ngẽxguma cumax, Pa Ãẽ̱xgacüx, mechawa curütoxgu, rü chorü pumara rü cuxü̃ napa.

¹³ Rü yimá yatü ya nüxü̃ changechaü̃cü rü cha̱u̱xca̱x rü ñoma wüxi i pumarapǘxü̃acü i chauníxü̃güarü ngãxü̃tanügu chingexü̃rüxü̃ nixĩ.

¹⁴ Rü yimá yatü ya nüxü̃ changechaü̃cü rü cha̱u̱xca̱x rü ñoma úbanecüwa rüxüxü̃ i nai i aleñachacu i En-gádiwa ngẽxmaxü̃rüxü̃ nixĩ.

Nümax

¹⁵ Pa Choxü̃́ Cungúchaü̃xü̃chicüx, cuma rü cumexẽchi. ¡Rü cuxetügü rü taxre i muxtucugürüxü̃ nixĩ nax namexẽchixü̃.

Ngĩmax

¹⁶ Cumexẽchi Pa Choxü̃́ Cungúchaü̃xü̃chicüx, rü aixcüma cumexẽchi. Yimá maxẽ ya yáuxte̱xecü nixĩ i tórü pechicaxü̃.

Nümax

¹⁷ Rü ocayiwanaxca̱x nixĩ ya naachina̱xãgü ya tapata, rü nai i chiprenaxca̱x nixĩ i naaxü̃.