Chacaría 6 - Tupanaarü Ore

Nango̱xetü ga Chacaría rü nüxü̃ nadau ga ãgümücü ga carugü ga daiweü̃

¹ Rü wena chango̱xetü rü nüxü̃ chadau ga ãgümücü ga carugü ga daiweü̃ ixĩgüne. Rü guma carugü rü taxre ga ma̱xpǘnegü ga bróũchenaxca̱xarü ngãxü̃wa nangóe.

² Rü wüxi ga guma caru rü cowarugü ga idauxü̃ inayatú. Rü guma norü taxre ga caru rü cowarugü ga iwaxüxü̃ inayatú.

³ Rü guma norü tomaepü̱x ga caru rü cowarugü ga icómüxü̃ inayatú. Rü guma norü ãgümücü ga caru rü cowarugü ga waxüxü̃maxã rü cómüxü̃maxã ãmatüxü̃ inayatú.

⁴ Rü nüxna chaca ga yema Tupanaarü orearü ngeruxü̃ i daxũcüã̱x ga chomaxã idexaxü̃ rü ñacharügü: —Pa Chorü Corix, ¿Ta̱xacüchiga nixĩ ya yima carugü? —ñacharügü.

⁵ Rü yexguma nüma ga yema Tupanaarü orearü ngeruxü̃ i daxũcüã̱x rü choxü̃ nangãxü̃ rü ñanagürü: —Yima carugü rü nachiga nixĩ ya yimá ãgümücü ya buanecügü ya Cori ya Tupana ya guxü̃ma i ñoma i naanearü yorape̱xewa ixĩãchicü.

⁶ Rü yima caru ya cowarugü iwaxüxü̃ itúgüne rü ngẽma nachixü̃ane i nórtewa ngẽxmaxü̃waama naxũ. Rü yima caru ya cowarugü icómüxü̃ itúgüne rü ngẽma nachixü̃ane i oéstewa ngẽxmaxü̃waama naxũ. Rü yima caru ya cowarugü i ãmatüxü̃ itúgüne rü ngẽma nachixü̃ane i súrwa ngẽxmaxü̃waama naxũ —ñanagürü.

⁷ Rü yema cowarugü ga iporaexü̃ rü nañu̱xãẽgü nax guxü̃ i naanegu íyachoeguxü̃. Rü nüma ga yema Tupanaarü duü̃xü̃ ga daxũcüã̱x rü nüxü̃ ñanagürü: —¡Ẽcü paxa guxü̃ i naanegu ípeyachoegu! —ñanagürü. Rü nüma ga yema cowarugü rü yemaacü nanaxügü.

⁸ Rü yemawena rü nüma ga yema Tupanaarü orearü ngeruxü̃ i daxũcüã̱x rü choxü̃ ñanagürü: —Dücax, rü ngẽma cowarugü i ngẽma nachixü̃ane i nórtewa ngẽxmaxü̃waama ĩxü̃, rü ngéma naxĩ nax ngẽma nachixü̃anewa Tupanaxü̃ yanangüxmüxẽẽgüxü̃ca̱x —ñanagürü.

Yochuéarü nga̱xcueruxü̃chiga

⁹ Rü nüma ga Cori ya Tupana rü chomaxã nüxü̃ nixu ga ore ga ñaxü̃:

¹⁰ —¡Ñu̱xmatama Chofonía nane ya Yochíapatawa naxũ! Erü yimáxü̃tawa nixĩ i nangugüxü̃ i ngẽma Babiróniaanewa ne ĩxü̃ i Yedái rü Tobía rü ñu̱xũchi Yedaía.

¹¹ ¡Rü naxü̃tawa naxca̱x ínaca i ngẽma úiru rü diẽrumü i Babiróniawa ne nangegüxü̃! Rü ngẽma úiruwa rü diẽrumüwa tá cunaxü i wüxi i nga̱xcueruxü̃, rü ngẽmamaxã tá cunanga̱xcueru ya yima chacherdotegüarü ãẽ̱xgacü ya Yochué ya Yochadáx nane.

^12-13 Rü Yochuémaxã nüxü̃ ixu rü ñacurügü nüxü̃: “Tupana ya Guxãétüwa Ngẽxmacü rü ñanagürü cuxü̃: ‘Choma rü tá nua nüxü̃ chaxuneta i wüxi i yatü nax wena naxüaxü̃ca̱x ya chopata ya taxü̃ne. Rü naéga i ngẽma yatü rü Wena Namexẽẽcü, tá nixĩ. Rü nüma rü tá ãẽ̱xgacü nixĩ rü nagu tá nicu̱x i ãẽ̱xgacüchiru. Rü norü tochicaxü̃wa tá narüto rü ngéma tá duü̃xü̃gümaxã inacua̱x. Rü nacüwawa tá narüto i wüxi i chacherdóte. Rü ngẽma taxre rü tá nügüga naxĩnüe rü tá nügümaxã nataãẽgü’ ” —ñacurügü nüxü̃.

¹⁴ Rü ngẽmawena rü chanaxwa̱xe nax Tupanapata ya taxü̃negu cunaxǘxü̃ i ngẽma nga̱xcueruxü̃. Rü ngẽmawa rü guxü̃gutáma nüxna nacua̱xãchie i Yedái rü Tobía rü Yedaía rü ñu̱xũchi Yochía i Chofonía nane.

¹⁵ Rü ngẽxguma tá Cori ya Tupanaga pexĩnüegu, rü nua tá naxĩ i togü i duü̃xü̃gü i yáxü̃wa ne ĩxü̃, rü pexü̃ tá narüngü̃xẽẽgü nawa i Tupanapata ya taxü̃nearü mexẽxẽ. Rü ngẽxguma tá yanguxgu i ngẽma rü pema rü tá nüxü̃ pecua̱x nax Tupana ya Guxãétüwa Ngẽxmacü yixĩxü̃ i nua choxü̃ muxü̃ nax pemaxã nüxü̃ chixuxü̃ca̱x i norü ore.