Amúx 4 - Tupanaarü Ore

Woo nax napoxcuechirexü̃ i Iraétanüxü̃ rü tama inaxĩnüechaü̃

¹ ¡Iperüxĩnüe, Pa Ngexü̃gü i Íngüexü̃ i Chamáriawa Maxẽxü̃x! Pema rü chixri tümamaxã ipecua̱x ya yíxema ngearü diẽruã̱xgüxe. Rü yíxema ngü̃xẽẽca̱x pexna caxemaxã rü chixri tümamaxã pixĩxgü. Rü petegüxü̃ pemu nax perü axruxü̃ ya bínuwa naxĩxü̃ca̱x.

² Rü nüma ya Cori ya Tupana rü marü norü üüneégagu pemaxã nanaxuegu rü ñanagürü: —Tá ínangu i ngunexü̃ i pexü̃ yawe̱xgüraxü̃ãcüma pexü̃ yagagüxü̃, rü yíxema penegü rü tá poxwamaxã tüxü̃ niwe̱xgüraxü̃.

³ Rü wüxigu tá pixĩxchimüü̃ãcü ngẽma perü ĩanetapü̱x íyaponagüxü̃wa pexü̃ ínagaxü̃. Rü ñu̱xũchi ma̱xpǘne ya Ermóü̃guama tá pexü̃ nigagü —ñanagürü ya Cori ya Tupana.

Cori ya Tupana rü Betéwa, rü Guirigáwa nanamugü ga yema Chamáriaanecüã̱xgü ga ngexü̃gü

⁴ Rü nüma ya Cori ya Tupana rü ñanagürü: —¡Betéwa rü Guirigáwa pexĩ, rü ngéma yexera i chixexü̃ peyaxü̱x! ¡Rü ẽxü̃wa ngéma penana i perü carnérugü nax perü tupananetagüca̱x peyaguxü̃ca̱x! ¡Rü wüxichigü i tomaepü̱x i ngunexü̃gu ngéma penana i perü diésmu naxca̱x i perü tupananetagü!

⁵ ¡Rü pema i Iraétanüxü̃ rü paũ i ngearü pu̱xẽẽruü̃ã́xü̃ naxca̱x pigu i perü tupananetagü, rü ñu̱xũchi guxü̃wama nüxü̃ pixuchiga i ngẽma ãmaregü i perü ngúchaü̃maxã pexãgüxü̃! Erü ngẽma nixĩ i pema penaxwa̱xexü̃ —ñanagürü ya Cori ya Tupana.

Woo napoxcue i Iraétanüxü̃ rü tama Tupanaga naxĩnüe

⁶ Rü choma nixĩ ga taiya pexca̱x íchanguxẽẽxü̃ ga guxü̃nema ga perü ĩanegüwa. Rü choma nixĩ ga pexü̃́ chanatauxẽẽxü̃ ga õna ga guxü̃nema ga perü ĩanexacügüwa. Natürü woo nax yema pexca̱x íchanguxẽẽxü̃ rü tama cha̱u̱xca̱x pewoegu. Rü choma ya Cori ya Tupana nixĩ i pemaxã nüxü̃ chixuxü̃ i ngẽma.

⁷ Rü nüma ya Cori ya Tupana rü ñanagürü: —Choma rü tomaepü̱x ga tauemacü pexcha̱xwa íchayachaxãchixẽxẽ ga pucü naxü̃pa nax peyabuxgüxü̃ ga penetügü. Rü wüxi ga ĩanewa rü chanapuxẽxẽ rü nai ya ĩanewa rü tama. Rü wüxi ga naanewa rü napu rü to ga naanewa rü nipamare yerü nataxuma ga dexá.

⁸ Rü duü̃xü̃gü rü ĩanegügu nixĩgüetanü nax dexáca̱x nadaugüxü̃, natürü taxuxü̃ma ga taxü̃ ga dexáxü̃ inayangaugü nax yemaacü nüxü̃́ yanguxü̃ca̱x nax yata̱xawaexü̃. Natürü woo yema pexü̃ nax ngupetüxü̃ ga pemax rü tama cha̱u̱xca̱x pewoegu —ñanagürü ya Cori ya Tupana.

⁹ Rü ñanagürü ta: —Buanecü ga naiemacü rü naweanegü pexca̱x íchanguxẽxẽ rü yemaacü narüñexgü ga penetügü rü perü úbanecü. Rü munügü nanangõ̱x ga perü igunecü rü perü oribunecü. Natürü ga pemax rü woo yema pexü̃ nax ngupetüxü̃ rü tama cha̱u̱xca̱x pewoegu —ñanagürü ya Cori ya Tupana.

¹⁰ —Rü pexca̱x íchanangugüxẽxẽ ga naweane yema Equítuaneca̱x íchanguxẽẽgurüxü̃. Rü chanayexrü ga perü ngextü̱xücügü nax perü uanügü daigu nada̱i̱xü̃ca̱x. Rü chanayexrü nax perü uanügü yagagüxü̃ca̱x ga perü cowarugü. Rü yema pegü ípeda̱i̱xü̃wa pexü̃ chanapaxẽxẽ ga yema yuexü̃arü yixixü̃. Natürü ga pema rü tama cha̱u̱xca̱x pewoegu. Rü choma i Cori ya Tupana nixĩ i nüxü̃ chixuxü̃ i ngẽma.

¹¹ Rü wüxi ga taxü̃ ga guxchaxü̃ pexca̱x íchanguxẽxẽ yema Chodómaca̱x rü Gomóraca̱x íchanguxẽẽxü̃rüxü̃. Rü pema rü ñoma nai i üxüwa ixaxü̃ rü nawa íyaxuchixü̃rüxü̃ pixĩgü. Natürü ga pema rü tama cha̱u̱xca̱x pewoegu —ñanagürü ya Cori ya Tupana.

¹² —Rü ngẽmaca̱x, Pa Iraétanüxü̃x, rü ngẽxgumarüxü̃ tá ta pemaxã chanaxü. Rü ñu̱xma nax ngẽmaãcü tá pexü̃ chapoxcuexü̃, rü name nixĩ i pegü pemexẽxẽgü nax perü Tupanaxü̃ peyangauxü̃ca̱x —ñanagürü ya Cori ya Tupana.

¹³ Rü choma rü Cori ya Tupana ya Guxãétüwa Ngẽxmacü nixĩ i chauéga. Rü choma nixĩ i ma̱xpǘnegü rü buanecü chango̱xẽẽxü̃. Rü choma nixĩ i yatüxü̃ nüxü̃ chacua̱xẽẽxü̃ i ngẽma nagu charüxĩnüxü̃. Rü choma nixĩ i waanexü̃xü̃ chayanguxuchixẽẽxü̃ i ngóonexü̃. Rü choma nixĩ i ñoma i naanearü máxpü̱xanexü̃gu chixũgüxü̃. Rü Cori ya Tupana ya Guxãétüwa Ngẽxmacü nixĩ i chauéga.