2 Corintios 7 - Tupanaarü Ore

¹ Pa Chauenexẽgü ya Pexü̃ Changechaü̃güxex, ngẽmagü nixĩ i Tupanaarü unetagü i marü tüxü̃́ ngẽxmagüxü̃. Rü ngẽmaca̱x tanaxwa̱xe nax yigüna idaugüxü̃ nax tama taxünemaxã rü ẽ̱xna taãẽmaxã naxüxü̃ca̱x i ngẽma Tupanape̱xewa tama mexü̃. Rü tanaxwa̱xe i Tupanaxü̃ imuü̃exü̃ rü nüxna yigü ixãgüxü̃ nax naxca̱xicatama imaxẽxü̃ca̱x.

Pauru rü ngẽma Coríntiucüã̱xgümaxã nataãxẽ

² Rü tanaxwa̱xe i toxü̃ pengechaü̃gü. Rü taxúxexü̃ma tawomüxẽẽgü. Rü taxúeca̱x chixexü̃ ítanguxẽxẽ. Rü taxúxexü̃ma ngetanüãcü tapuracüxẽẽmare.

³ Rü tama pexü̃ chixuxü̃ca̱x nixĩ i pemaxã nüxü̃ chixuxü̃ i ngẽma. Yerü marü pemaxã nüxü̃ chixu nax guxü̃ i chorü maxü̃nemaxã pexü̃ changechaü̃xü̃. Rü ngẽma pexü̃ nax changechaü̃xü̃gagu rü íchamemare nax wüxigu petanüwa chamaxü̃xü̃ rüe̱xna wüxigu pemaxã chayuxü̃.

⁴ Rü ñu̱xma rü taxuca̱xma pexü̃ chaxãneãcüma pemaxã chidexa, erü poraãcü pemaxã chataãxẽ. Rü woo ngúxü̃ nax tingegüxü̃, natürü ngẽmaétüwa rü taxü̃ i ngúchaü̃ choxü̃́ nangẽxma rü chataãẽama.

⁵ Rü yexguma Machedóniaanewa tangugügucürüwa rü taguma itarüngügü. Yerü guxü̃wama ga ngexta ítaxĩxü̃wa rü nüxü̃ itayangau ga guxchaxü̃gü. Rü duü̃xü̃gü rü poraãcü toxü̃́ nanaguxchaxẽxẽ rü yemaca̱x poraãcü taxoegaãẽgü.

⁶ Natürü ya Tupana ya tüxü̃ taãẽxẽẽcü ya yíxema ngechaü̃güxe, rü toxü̃ rü ta nataãẽxẽxẽ ga yexguma toxü̃tawa nanguxgu ga taenexẽ ga Títo.

⁷ Rü tama yema toxü̃tawa nax nanguxü̃ca̱xicatama tataãẽgü, natürü tataãẽgü ta yerü ga pema rü poraãcü nüxü̃́ penangúchaü̃xẽxẽ rü penataãẽxẽxẽ ga gumá taenexẽ ga Títo. Rü nüma ga Títo rü tomaxã nüxü̃ nixu nax poraãcü penaxwa̱xexü̃ nax toxü̃ pedaugüxü̃. Rü tomaxã nüxü̃ nixu nax poraãcü toxca̱x pengechaü̃güxü̃, rü ñuxãcü cha̱u̱xca̱x pexoegaãẽgüxü̃. Rü guxü̃ma ga yema oremaxã rü yexeraãcü chataãxẽ.

⁸ Choma nüxü̃ chacua̱x rü yema popera ga pexca̱x chaxümatüxü̃ rü pexü̃ nangechaü̃güxẽxẽ, natürü ñu̱xma rü marü tama naxca̱x changechaü̃ nax chanaxümatüxü̃ ga yema popera. Rü noxri rü yemaacü naxca̱x changechaü̃ ga yexguma nüxü̃ chacua̱xgu nax pexü̃ nangechaü̃güxẽẽxü̃ ga yema popera ga yexguma penayauxgügu.

⁹ Natürü i ñu̱xma rü chataãxẽ nax pexca̱x chanaxümatüxü̃ ga yema popera. Rü tama yema nax pengechaü̃güxü̃ca̱x chataãxẽ, natürü chataãxẽ yerü yema perü ngechaü̃gagu Tupanaca̱x pewoegu. Rü yema ngechaü̃ rü Tupanaarü ngúchaü̃ nixĩ, rü yemaacü taxuxü̃ma ga chixexü̃ pemaxã taxü ga yexguma pexca̱x tanaxümatügu ga yema popera.

¹⁰ Rü ngẽma ngechaü̃ ya Tupana pexca̱x ínguxẽẽxü̃, rü ngẽmagagu nüxü̃ perüxoe i pecüma i chixexü̃ rü penayaxu i maxü̃ i taguma gúxü̃. Rü ngẽmaca̱x taxuca̱xma tü̱xcüü̃ pexoegaãẽgü. Natürü ngẽma ngechaü̃ i ñoma i naanewa ngẽxmaxü̃ rü yuwa tüxü̃ naga.

¹¹ Rü yema ngechaü̃ ga Tupana pexca̱x íngu̱xẽẽxü̃ nawa ga yema popera ga pexca̱x chaxümatüxü̃, rü dücax i ngẽma mexü̃ i nawa ínguxuchixü̃. Yerü yema perü ngechaü̃gagu rü aixcüma nagu perüxĩnüe ga yema chixexü̃ ga petanüwa ngupetüxü̃, rü meama chomaxã nüxü̃ pixu ga yema. Rü yema perü ngechaü̃gagu rü peãẽwa nangu̱x ga yema chixexü̃, rü poraãcü Tupanaxü̃ pemuü̃e. Rü yemaca̱x penaxwa̱xe nax yéma chaxũxü̃ nax pexü̃ chayarüngü̃xẽẽxü̃ca̱x, yerü penamexẽẽgüchaü̃ ga yema chixexü̃. Rü yemaca̱x ípenamuxuchi ga yema duü̃xü̃ ga chixexü̃ üxü̃. Rü guxü̃ ga yemawa rü ipenawe̱x nax tama pegagu yixĩxü̃ ga yema chixexü̃ ga ngupetüxü̃.

¹² Rü yemaca̱x, yexguma pexca̱x chanaxümatügu ga yema popera, rü tama yema duü̃xü̃ ga chixexü̃ üxü̃gu charüxĩnüãcü chanaxümatü, rü tama yema duü̃xü̃ ga nape̱xewa chixexü̃ naxüxü̃gu charüxĩnüãcü chanaxümatü. Natürü chanaxümatü ga yema popera nax yemawa Tupanape̱xewa nüxna pecua̱xãchiexü̃ca̱x nax aixcüma toxü̃ pengechaü̃güxü̃.

¹³ Rü yema nax toxü̃ pengechaü̃güxü̃, rü taãxẽ toxna naxã. Natürü yema taãẽarü yexera nixĩ ga yema taãxẽ ga toxü̃́ yexmaxü̃ ga yexguma nüxü̃ tada̱u̱xgu nax poraãcü pemaxã nataãẽxü̃ ga Títo. Rü aixcüma nixĩ nax guxãma ga pema rü wenaxarü penataãẽxẽẽxü̃.

¹⁴ Rü noxri tauta yéma naxũxgu ga Títo, rü namaxã nüxü̃ chixu nax aixcüma pemaxã chataãẽxü̃. Rü ñu̱xma rü taxuca̱xma chaxãne, erü guxü̃ma ga yema Títomaxã nüxü̃ chixuxü̃ ga pechiga rü aixcüma ngẽmaãcü nixĩ, yexgumarüxü̃ nax aixcüma yixĩxü̃ ga guxü̃ma ga yema Tupanaarü ore ga pemaxã nüxü̃ tixuxü̃.

¹⁵ Rü ñu̱xma i Títo rü yexeraãcü pexü̃ nangechaü̃ i ngẽxguma nüxna nacua̱xãchigu nax ñuxãcü mea naga pexĩnüexü̃ rü ñuxãcü nüxü̃ pengechaü̃ãcüma mea penayaxuxü̃.

¹⁶ Rü choma rü ta poraãcü pemaxã chataãẽxü̃chi, erü nüxü̃ chacua̱x nax aixcüma peyanguxẽẽxü̃ ga guxü̃ma ga yema pemaxã nüxü̃ chixuxü̃.