2 Corintios 13 - Tupanaarü Ore

Pauru nayaxucu̱xẽ ga yema yaxõgüxü̃ ga Coríntiucüã̱x rü ñu̱xũchi nüxü̃ narümoxẽ

¹ Ñu̱xma rü norü tomaepü̱xcüna tá nixĩ nax petanüwa chaxũxü̃. Rü Tupanaarü ore rü tamaxã nüxü̃ nixu rü ngẽxguma texé chixexü̃ uxgu, rü taxre rü ẽ̱xna tomaepü̱x i duü̃xü̃gü tüxü̃ daugügu rü nüxü̃ yaxugügu nax aixcüma chixexü̃ taxüxü̃, rü ngẽmawa tá nüxü̃ pecua̱x nax aixcüma yixĩxü̃.

² Rü ñu̱xma nax woo pexna chayáxü̃guxü̃ rü yema ucu̱xẽ ga petanüwa pemaxã nüxü̃ chixuxü̃ rü wenaxarü pexna nüxü̃ chacua̱xãchixẽxẽ. Rü ngẽxguma tá wena petanüwa chaxũxgu rü aixcüma tá chanamexẽxẽ i guxü̃ma i ngẽma chixexü̃ i ngéma ngẽxmaxü̃. Rü taũtáma tüxü̃ chaxüpetümare ya yíxema woetama pecadu ügüechaxe rü guxãma ya yíxema chixri maxẽxe

³ Rü pema rü ñu̱xma nax naxca̱x pedaugüxü̃ i wüxi i cua̱xruxü̃ nax nüxü̃ pecuáxü̃ca̱x rü aixcüma Cristu chowa idexaxü̃, rü nüma ya Cristu rü taxũtáma nüxü̃ naxüpetümare i perü chixexü̃. Rü petanüwa tá nanango̱xẽxẽ i norü pora.

⁴ Rü aixcüma nixĩ ga Cristu ga ñoma wüxi ga duü̃xü̃ ga turaxü̃rüxü̃ nügü yaxĩxẽẽxü̃ ga yexguma curuchawa yapotagu. Natürü i ñu̱xma rü Tupanaarü poragagu namaxü̃. Rü ngẽxgumarüxü̃ ta i toma rü taturae i toxonewa. Natürü ñu̱xma nax norü duü̃xü̃gü tixĩgüxü̃, rü Tupanaarü poragagu tá tamaxẽ nax pexü̃ tarüngü̃xẽẽgüxü̃ca̱x.

⁵ Rü name nixĩ i pegütama pengugü nax nüxü̃ pecuáxü̃ca̱x rü aixcüma mea peyaxõgü. Rü name nixĩ i pegü pengugüarü maxü̃ã̱x rü aixcüma Tupanape̱xewa pime. ¿Tama ẽ̱xna nüxna pecua̱xãchie nax Ngechuchu ya Cristu rü pewa nangẽxmaxü̃ ega tama perüyixgu i perü õwa i ngẽxguma guxchaxü̃ pexca̱x ínguxgu?

⁶ Rü chierüx nüxü̃ pecua̱xgu nax toma rü tama tarüyixü̃ i torü õwa.

⁷ Rü Tupanana naxca̱x taca nax taxuxü̃ma i chixexü̃ pexügüxü̃ca̱x. Rü tama duü̃xü̃güpe̱xewa togü ítarütagüxü̃ca̱x nixĩ nax ngẽmaãcü tayumüxẽgüxü̃. Natürü Tupanana naxca̱x taca i ngẽma nax aixcüma mea naxca̱x pemaxẽxü̃ca̱x woo duü̃xü̃gü nagu rüxĩnüegu nax toma rü tarüyixü̃ i torü õwa.

⁸ Toma rü taxucürüwama chixri nachiga tidexagü i Tupanaarü ore i aixcüma ixĩxü̃. Erü toma rü naétüwa tachogü i ngẽma ore i aixcüma mexü̃.

⁹ Rü toma rü tataãẽgü ega woo taturaegu nax pema peporaexü̃ i perü maxü̃wa. Rü Tupanana tá naxca̱x tacaama nax pexü̃ naporaexẽẽxü̃ca̱x i perü maxü̃wa nax aixcüma mexü̃ i norü duü̃xü̃gü pixĩgüxü̃ca̱x.

¹⁰ Rü naxü̃pa nax pexü̃ íchayadauxü̃ nixĩ i pexca̱x chanaxümatüxü̃ i ñaa popera, nax ngẽxguma ngéma changuxgu rü nataxuxü̃ca̱x i ta̱xacüca̱x pemaxã nax chaporagaxü̃. Erü tórü Cori choxü̃ namu nax pexü̃ charüngü̃xẽxẽxü̃ca̱x nax yexeraãcü mea peyaxõgüxü̃ca̱x. Rü tama chixexü̃gu pexü̃ yayixẽẽxü̃ca̱x nixĩ i choxü̃ namuxü̃.

¹¹ Rü ñu̱xma nax ichayacua̱xẽẽxü̃ i ñaa popera, Pa Chauenexẽgüx, rü chanaxwa̱xe nax petaãẽgüxü̃ rü naxca̱x pedaugüxü̃ nax aixcüma mea Tupanape̱xe pemaxẽxü̃. Rü name nixĩ i pegü petaãẽgüxẽẽxü̃, rü wüxigu perüxĩnüexü̃, rü yáxna pegümaxã pexĩnüexü̃, rü aixcüma pegü pengechaü̃güxü̃. ¡Rü nüma ya Tupana ya tüxü̃ ngechaü̃cü rü tüxü̃ rüngüxmüexẽẽcü, rü guxü̃gutáma pemaxã inarüxã̱ũ̱x!

¹² Rü chanaxwa̱xe i wüxichigü i pema rü pegü pengechaü̃güãcüma pegü perümoxẽgü.

¹³ Rü guxü̃ma i taenexẽgü i yaxõgüxü̃ rü pexü̃ narümoxẽgü.

¹⁴ Rü ñu̱xma rü chanaxwa̱xe i tórü Cori ya Ngechuchu ya Cristu pexü̃ narüngü̃xẽxẽ, rü Tanatü ya Tupana rü pexü̃ nangechaü̃, rü Naãxẽ ya Üünexü̃ rü guxü̃guma pemaxã inarüxã̱ũ̱x.