2 Chamué 17 - Tupanaarü Ore

Uchái rü Aitópearü ĩnü ínitóxẽxẽ

¹ Rü yemawena ga Aitópe rü Acharóü̃xü̃ ñanagürü: —¡Choxü̃ yadexechixẽxẽ i 12,000 i churaragü! Rü ñaatama chütaxü̃ tá ichaxũãchi nax Dabíwe changexü̃ca̱x.

² Rü ñu̱xma yapayane rü naturayane rü tá naxca̱x íchayagoõchi rü tá chanamuü̃xẽxẽ. Rü ngẽxguma i guxü̃ma i norü duü̃xü̃gü rü tá nüxna nibuxmü, rü tá nüxica chayama̱x ya ãẽ̱xgacü.

³ Rü ñu̱xũchi guxü̃ma i duü̃xü̃gü rü tá cuxca̱x nawoegu rü tá cumaxã nataãẽgü. Erü ngẽma cuma naxca̱x cudauxü̃ nixĩ nax wüxitama ya yatü yuxü̃, rü ñu̱xũchi guxü̃ma i duü̃xü̃gü rü taãẽwa tá nangẽxmagü —ñanagürü.

⁴ Rü yema ĩnü rü namexẽchi naxca̱x ga Acharóü̃, rü naxca̱x ga guxü̃ma ga Iraétanüxü̃arü ucu̱xẽruü̃gü.

⁵ Natürü nüma ga Acharóü̃ rü duü̃xü̃güxü̃ namu nax Uchái ga Aquítanüxü̃ca̱x yacagüxü̃ca̱x nax nüma rü ta nüxü̃ yaxuxü̃ca̱x ga norü ĩnü.

⁶ Rü yexguma Acharóü̃pe̱xewa nanguxgu ga Uchái rü nüma ga Acharóü̃ rü Aitópearü ĩnüxü̃ namaxã nixu rü ñanagürü: —Rü ñaa nixĩ i Aitópearü ĩnü: “¿Yanguxẽxẽxü̃ rü ẽ̱xna tama? ¡Tomaxã nüxü̃ ixu i ngẽma cuma nagu curüxĩnüxü̃!” —ñanagürü.

⁷ Nüma ga Uchái rü nanangãxü̃ rü ñanagürü: —Ngẽma ñu̱xma Aitópe nagu rüxĩnüxü̃ rü tama wüxi i mexü̃ i ĩnü nixĩ.

⁸ Cuma rü nüxü̃ cucua̱x ya cunatü rü ngẽma norü duü̃xü̃gü rü nax naporaexü̃. Rü ñu̱xma rü ñoma wüxi i osu i naixnecücüã̱x i düraxü̃ naxacü nüxna tüxü̃ ipuxü̃xü̃rüxü̃ nanue. Rü ñu̱xũchi cunatü rü wüxi i yatü i marü daixü̃ cuáxü̃ nixĩ rü ñaa chütaxü̃ rü taxũtáma norü duü̃xü̃gütanüwa nangẽxma.

⁹ Rü ñu̱xmatama rü marü ãxmaxü̃gu rüe̱xna to i nachicagu nicu̱x. Rü to i cumaxã nüxü̃ chixuxü̃ nixĩ nax ngẽxguma tá nüxü̃ yaxugüegu nax ngẽma nuxíraxü̃xü̃ i daigu nayuexü̃ i nümaxü̃ i curü churaragü, rü ngẽxguma i duü̃xü̃gü rü tá nagu narüxĩnüe nax Dabí nüxü̃ rüporamaexü̃ i curü churaragü.

¹⁰ Rü woo ngẽma curü churaragü i nügü írüporaexü̃ rü ñoma leóü̃ idüxraxü̃rüxü̃ ixĩgüxü̃ rü tá poraãcü nüxü̃ ínayamuü̃ãchitanü, erü guxü̃ma i Iraéanecüã̱xgü rü nüxü̃ nacua̱xgü rü cunatü rü norü churaragü rü nax naporaexüchixü̃.

¹¹ Rü ngẽma ñu̱xma cumaxã nüxü̃ chixuxü̃ nixĩ nax cugüxü̃tagu cungutaque̱xexẽẽxü̃ i guxü̃ma i Iraétanüxü̃. Rü Dáü̃anewa inaxügü rü ñu̱xmata Bechébaanewa nangu rü ngẽmaãcü tá namuxũchi i Iraétanüxü̃ i ñoma márcutüwa ngẽxmacü ya naxnücüte̱xerüxü̃. Rü ngẽma daiwa rü name nixĩ i cuma namaxã icucua̱x.

¹² Rü ngẽmaãcü tá cunatüca̱x ítayaxüãchi ngexü̃rüüxü̃mare i nachica i nawa ínangexmaxü̃wa. Rü naétü tá tayi ñoma caixanexü̃ waixü̃müanegu nguxü̃rüxü̃ rü ngẽmaãcü taxũtáma namaxẽ woo cunatü rü woo norü duü̃xü̃gü.

¹³ Ega ngẽxguma ngürüãchi ngexnerüxüne ya ĩanegu yacu̱xgu, rü name nixĩ i guxãma i yixema i Iraétanüxü̃ rü tórü naxpanaxã itina, rü wüxichigü ya yima ĩanetapü̱xarü nuta rü ítayatúgü rü natüwa tayawoü̃. Rü ngẽmaãcü yima ĩanewa rü bai ya wüxi ya nuta tá ngéma nayaxǘ —ñanagürü.

¹⁴ Rü yema Uchái i Aquítanüxü̃arü ĩnü rü Acharóü̃ca̱x rü ñu̱xũchi guxü̃ma i Iraétanüxü̃ca̱x rü Aitópearü ĩnüxü̃ narümemae. (Yerü nüma ga Cori ya Tupana rü yemaacü Aitópearü ĩnügu nayanachixexẽxẽ nax yemaacü Acharóü̃gu nanguxü̃ca̱x ga chixexü̃.)

^15-16 Rü yemawena ga Uchái rü chacherdótegü ga Chadóx rü Abiatámaxã nüxü̃ nixu ga Aitópearü ucu̱xẽ ga Acharóü̃maxã rü Iraétanüxü̃arü ãẽ̱xgacügümaxã nüxü̃ yaxuxü̃. Rü yexgumarüxü̃ ta nüxü̃ nixu ga yema ucu̱xẽ ga nümatama ga Uchái nüxü̃ yaxuxü̃ nax paxãma Dabímaxã nüxü̃ yanaxugüexü̃ca̱x nax tama yema doxonexü̃ ga taxúema nagu ãpataxü̃wa nangupetüxẽẽãxü̃ca̱x ga yema chütaxü̃, rü paxãma yaxüxexü̃ca̱x ga natü ga Yudáü̃ nax yemaacü tama yama̱xgüãxü̃ca̱x, rü tama norü churaragüxü̃ nada̱i̱xü̃ca̱x.

¹⁷ Rü nüma ga Chadóx nane ga Aimaá rü Abiatá nane ga Yonatáü̃ rü Yerucharẽü̃arü ngaicamana ga natüxacü ga En-roguéxwa nayexmagü, natürü taxucürüwa ĩanegu nachocu yerü tama nanaxwa̱xegü nax duü̃xü̃gü yéma nüxü̃ daugüxü̃. Rü yemaca̱x ga chacherdótegü rü wüxi ga pacüxü̃ namugü nax yema Aimaámaxã rü Yonatáü̃maxã nüxü̃ yarüxuxü̃ca̱x ga Ucháiarü ore. Rü nümagü rü paxa inaxĩãchi nax ãẽ̱xgacü ga Dabímaxã nüxü̃ yanaxugüexü̃ca̱x.

¹⁸ Natürü wüxi ga buxü̃ rü nüxü̃ nadauama rü yexgumatama Acharóü̃maxã nüxü̃ nayarüxu. Rü nümagü rü paxa nibuxmü, rü wüxi ga duü̃xü̃ ga Bauríü̃gu ãpataxü̃xü̃tawa nabuxmü rü wüxi ga puchu ga naã̱xtüwa yexmacüwa nachoü̃.

¹⁹ Rü yemawena ga gumá yatü naxma̱x rü yexma puchugu tanangataü̃. Rü ñu̱xũchi naétügu trigu i marü mete̱xexü̃ yexma tigüüchi. Rü yemaacü taxúema nüxü̃ tacua̱x nax yéma nayexmagüxü̃.

²⁰ Rü yexguma yéma nangugügu ga Acharóü̃arü duü̃xü̃gü, rü yema ngecüna nacagü rü ñanagürügü: —¿Ngextá i nangẽxmagüxü̃ i Aimaá rü Yonatáü̃? —ñanagürügü. Rü ngĩma rü inangãxü̃ rü ngĩgürügü: —Nua nixĩ i nachopetüxü̃, rü natüwaama nixĩ i naxĩxü̃ —ngĩgürügü. Rü yexguma ga Acharóü̃arü duü̃xü̃gü rü naxca̱x nadaugü, natürü tama nüxü̃ inayangau. Rü yemaca̱x Yerucharéü̃ca̱x nawoegu.

²¹ Rü yexguma marü nawoegu̱xgu ga Acharóü̃arü duü̃xü̃gü, rü nümagü ga Aimaá, rü Yonatáü̃ rü puchuwa ínachoxü̃. Rü inaxĩãchi nax ãẽ̱xgacü ga Dabímaxã nüxü̃ yanaxugüexü̃ca̱x rü ñanagürügü: —¡Inachi rü inaxũãchi rü ixüe i natü i Yudáü̃! Erü Aitópe rü Acharóü̃xü̃ naxuxcu̱xẽ nax cuxü̃ yamáxü̃ca̱x —ñanagürügü.

²² Rü yexgumatama ga Dabí rü norü duü̃xü̃gümaxã paxa inaxũãchi rü nichoü̃ ga natü ga Yudáü̃. Rü moxü̃ãcü pa̱xmama rü guxü̃ma marü natü nichoxü̃.

²³ Rü yexguma Aitópe nüxü̃ cua̱xgu nax tama naxüaxü̃ ga yema nagu naxĩnüxü̃, rü nanaxüxmawe̱xe ga norü búru rü guma norü ĩane ga nagu nabuxü̃newa naxũ ga napatawa. Rü yexguma natanüxü̃maxã namexẽẽãgu ga guxü̃ma ga norü yemaxü̃güchiga, rü yemawena rü nügü nawẽxnaxã. Rü yemaacü nayu rü nanatü ítáxü̃gu nanata̱xgü.

Dabí rü Maanaíü̃wa nayexma

²⁴ Rü yexguma Acharóü̃ rü guxü̃ma ga Iraéanecüã̱xmaxã meama natü ga Yudáü̃ yaxüegu, rü nüma ga Dabí rü ĩane ga Maanaíü̃wa nangu.

²⁵ Rü nüma ga Acharóü̃ rü Yoáchicüxü Amacháxü̃ naxuneta nax norü churaragümaxã inacuáxü̃ca̱x. Rü Amachá rü Ismaétanüxü̃ ga Itará nane nixĩ. Rü nüma ga Itará rü ngĩmaxã naxãxma̱x ga Naáxacü ga Abigái. Rü Abigái rü Cheruiáxeya̱x iyixĩ. Rü Cheruiá rü Yoáarü mama iyixĩ.

²⁶ Rü nüma ga Acharóü̃ rü norü churaragü ga Iraétanüxü̃maxã Garaáxarü naanewa nangugü, rü yexma napegü.

²⁷ Rü yexguma Maanaíü̃wa nanguxgu ga Dabí rü naxca̱x naxĩ ga Chobí ga Naáx nane ga Rabácüã̱x ixĩcü ga Amóü̃anewa, rü Maquí ga Amié nane ga Lodebácüã̱x, rü Bachilái ga Rogueríü̃cüã̱x ga Garaáxanewa.

^28-29 Rü nümagü rü Dabíca̱x yéma nanana ga düxruü̃gü rü bachíagu rü buetaregü ga waixü̃münaxca̱x rü trigugü rü chebádagü rü arínagü rü purutugü rü chawüarü goxünegü rü purutu ga tapü̱xünegü rü lentéyagü rü iragü rü quechugü ga wocagünenixü̃naxca̱x rü carnérugüneníü̃naxca̱x nax nangõ̱xgüãxü̃ca̱x ga Dabí rü yema duü̃xü̃gü ga íyaxümücügüxü̃. Rü nagu narüxĩnüe nax yapaexü̃ rü nataiyaexü̃ rü yata̱xawaexü̃ yerü chianexü̃wa ne naxĩ.