Norü taxre ga popera ga ãẽ̱xgacügüchiga 8 - Tupanaarü Ore

Ãẽ̱xgacü rü nge ga Chunéü̃cüã̱x

¹ Erichéu rü ngĩmaxã nidexa ga yema nge ga ngĩnexü̃ yuwa ínadaxẽẽcü, rü ñanagürü ngĩxü̃: —¡Ínaxũxũ i nua namaxã i cutanüxü̃ rü to i nachicawa pexĩ! Erü nüma ya Cori ya Tupana rü marü nüxü̃ nixu nax 7 ya taunecü taiya tá ínguxü̃ i ñaa nachixü̃anewa —ñanagürü.

² Yema nge rü iyanguxẽxẽ ga yema Tupanaarü orearü uruxü̃ ngĩmaxã nüxü̃ ixuxü̃. Rü Firitéuanewa ixũ namaxã ga ngĩtanüxü̃. Rü 7 ga taunecü yéma iyexma.

³ Rü nawena ga marü nax yanguxü̃ ga gumá 7 ga taunecü, rü itaegu ga Firitéuanewa. Rü Iraéanearü ãẽ̱xgacümaxã iyarüdexa nax ngĩxna naxããxü̃ca̱x ga guma ngĩpata rü ñu̱xũchi yema ngĩrü naanegü.

⁴ Rü yema ngunexü̃gu rü nüma ga ãẽ̱xgacü rü namaxã nidexa ga Guexáchi ga Tupanaarü orearü uruxü̃ ga Erichéuarü ngü̃xẽẽruxü̃. Rü Guexáchina naca nax namaxã nüxü̃ yaxuxü̃ca̱x ga guxü̃ma ga yema mexü̃gü ga Tupanaarü poramaxã naxüxü̃ ga Erichéu.

⁵ Rü yexguma Guexáchi ãẽ̱xgacümaxã nüxü̃ íyaxuyane nax ñuxãcü Erichéu ínadaxẽẽxü̃ ga ngĩne ga yema nge ga Chunéü̃cüã̱x, rü yexgumayane yéma ãẽ̱xgacüxü̃tawa ingu ga yema nge nax nüxna yacaxü̃ca̱x naxca̱x ga guma ngĩpata rü ñu̱xũchi yema ngĩrü naanegü. Rü yexguma ga Guexáchi rü ãẽ̱xgacüxü̃ ñanagürü: —Pa Ãẽ̱xgacüx, ñaa iyixĩ ga yema nge rü ñu̱xũchi daa nixĩ ga gumá bucü ga Erichéu yuwa írüdaxẽẽcü —ñanagürü.

⁶ Rü nüma ga ãẽ̱xgacü rü ngĩxna naca rü ñanagürü: —¿Aixcüma yixü̃? —ñanagürü. Rü ngĩma inangãxü̃ rü: —Ngü̃ —ngĩgürügü. Rü yemawena ga nüma ga ãẽ̱xgacü rü wüxi ga norü ngü̃xẽẽruxü̃ ga nüxna nayoexü̃ca̱x naca, rü yemame̱xẽgu nanaxǘ nax ngĩxü̃́ nataeguxü̃ca̱x ga ngĩpata rü guxü̃ma ga ngĩrü yemaxü̃gü rü ñu̱xũchi guxü̃ma ga yema ngĩanearü nanetügütanü ga nayauxgüxü̃ ga yexguma noxritama yema nachixü̃anewa ínaxũxü̃gu ñu̱xmata yema ngunexü̃ ga nagu nataeguxü̃.

Achaé rü Chíriaanearü ãẽ̱xgacü nixĩ

⁷ Rü yemawena ga nüma ga Erichéu rü ĩane ga Damácuwa naxũ. Rü yexguma ga Chíriaanearü ãẽ̱xgacü ga Ben-adáxü̃ rü nida̱xawe. Rü namaxã nüxü̃ nixugüe ga nax yéma nanguxü̃ ga Tupanaarü orearü uruxü̃.

⁸ Rü yexguma ga nüma ga ãẽ̱xgacü rü norü ngü̃xẽẽruxü̃ ga Achaéxü̃ ñanagürü: —¡Wüxi i ãmare nayaxu rü naxü̃tawa naxũ ya yima Tupanaarü orearü uruxü̃! ¡Rü namaxã nüxü̃ nixu nax Cori ya Tupanamaxã yadexaxü̃ca̱x nax ngẽmaãcü nüxü̃ chacuáxü̃ca̱x rü cha̱u̱xca̱x tá yataane i ñaa da̱xawewa! —ñanagürü.

⁹ Rü nüma ga Achaé rü Tupanaarü orearü uruxü̃ ga Erichéuxü̃tawa naxũ. Rü yéma nanana ga yema rümemaexü̃ ga yemaxü̃gü ga Damácuwa yexmagüxü̃ nax Erichéuna yanaxãxü̃ca̱x. Rü 40 ga caméyuétügu nananugü ga yema ãmaregü ga Erichéuca̱x yéma nanaxü̃. Rü yexguma Erichéuxü̃tawa nanguxgu rü nüxü̃ ñanagürü: —Ben-adáxü̃ i Chíriaanearü ãẽ̱xgacü rü ñoma nanatüãcüma cuxü̃ nadau, rü nua cuxü̃tawa choxü̃ namu nax cuxna chayaca̱xaxü̃ca̱x rü naxca̱x tá yataane i norü da̱xawewa —ñanagürü.

¹⁰ Rü Erichéu nanangãxü̃ rü nüxü̃ ñanagürü: —¡Íixũ rü Ben-adáxmaxã nüxü̃ yarüxu nax naxca̱x tá yataanexü̃ i ngẽma norü da̱xawewa! Natürü Cori ya Tupana choxü̃ nüxü̃ nacua̱xẽxẽ rü tá nayuama —ñanagürü.

¹¹ Rü ñu̱xũchi nüma ga Erichéu rü meama Achaéxü̃ nadawenüecha, rü yemaca̱x nüma ga Achaé rü naba̱i̱xãchiãxẽ. Rü nüma ga Tupanaarü orearü uruxü̃ ga Erichéu rü naxaxu.

¹² Rü Achaé nüxna naca rü nüxü̃ ñanagürü: —¿Ta̱xacüca̱x cuxaxu, Pa Chorü Corix? —ñanagürü. Rü Erichéu nanangãxü̃ rü nüxü̃ ñanagürü: —Erü nüxü̃ chacua̱x i ngẽma chixexü̃ i Iraéanecüã̱xgüca̱x tá ícunguxẽxẽxü̃. Erü yima norü ĩanegü ya ípoxegugüne rü tá ícunagu. Rü ngẽma norü ngextü̱xüxü̃gü rü taramaxã tá cunadai. Rü yíxema ibuxe rü nutagu tá tüxü̃ quichi̱xgüe rü ngẽmaãcü tá tüxü̃ cudai. Rü ñu̱xũchi yíxema ngexegü ya ixãxacüxe rü itacharaü̃güxe rü tá tüxü̃ cuwinapütüwegü —ñanagürü.

¹³ Rü Achaé nanangãxü̃ rü nüxü̃ ñanagürü: —Natürü choma nax curü ngü̃xẽẽruxü̃ chixĩxü̃ rü ñoma wüxi i airu i taxuwama mexü̃rüxü̃ chixĩ. ¿Rü ñuxãcü tá chanaxüxü̃ i ngẽma? —ñanagürü. Rü Erichéu nanangãxü̃ rü nüxü̃ ñanagürü: —Cori ya Tupana rü choxü̃ nüxü̃ nacua̱xẽxẽ rü cuma tá nixĩ i Chíriaanearü ãẽ̱xgacü quixĩxü̃ —ñanagürü.

¹⁴ Rü yemawena ga Achaé rü Erichéuxü̃ narümoxẽ rü nataegu rü norü ãẽ̱xgacüxü̃tawa naxũ. Rü nüma ga ãẽ̱xgacü rü nüxna naca rü nüxü̃ ñanagürü: —¿Ta̱xacüxü̃ i cumaxã yaxuxü̃ ya Erichéux? —ñanagürü. Rü Achaé nanangãxü̃ rü nüxü̃ ñanagürü: —Chomaxã nüxü̃ yaxuxü̃ nax cuxca̱x tá yataanexü̃ i ngẽma curü da̱xawewa —ñanagürü.

¹⁵ Natürü moxü̃ãcü ga Achaé rü yéma naxũ rü wüxi ga naxchápenüxü̃ mea niwaimüxẽxẽ rü yemamaxã ãẽ̱xgacüxü̃ natüchametü ñu̱xmata yangoxochi rü nayu. Rü yemawena rü nüma ga Achaé nixĩ ga Chíriaanearü ãẽ̱xgacü yixĩxü̃.

Yoráü̃ nixücu nax Yudáanearü ãẽ̱xgacü yixĩxü̃ca̱x

¹⁶ Rü yexguma 5 ga taunecü marü Iraéanearü ãẽ̱xgacü yixĩxgu ga Yoráü̃ ga Acáx nane, rü yexguma nixĩ ga Yudáanewa yexwacax ãẽ̱xgacüxü̃ yangucuchixü̃ ga Yoráü̃ ga Yochapáx nane.

¹⁷ Rü nüma ga Yoráü̃ rü 32 ga taunecü nüxü̃́ nayexma ga yexguma inaxügüãgu nax ãẽ̱xgacü yixĩxü̃. Rü 8 ga taunecü ãẽ̱xgacü nixĩ ga Yerucharéü̃wa.

¹⁸ Natürü yema Iraéanearü ãẽ̱xgacügücüma ga chixexü̃gu nixũ rü ñu̱xũchi yema Acáxtaagücümagu nixũ yerü guxema naxma̱x rü Acáxacü tixĩ. Rü yemaacü ga yema naxüxü̃ rü Cori ya Tupanape̱xewa rü nachixe.

¹⁹ Natürü nüma ga Cori ya Tupana rü tama Yudáaneca̱x chixexü̃ ínanguxẽẽchaü̃ yerü Dabíxü̃ nangechaü̃ rü namaxã nanaxuegu nax ngẽma natanüxü̃tanüwa rü tá ãẽ̱xgacüwa nanguxü̃.

²⁰ Rü yexguma ãẽ̱xgacü yixĩxgu ga Yoráü̃ rü nüma ga Edóü̃cüã̱xgü rü tama nanaxwa̱xegü nax Yudácüã̱xgüme̱xẽwa nayexmagüxü̃. Rü yemaca̱x noxrütama ãẽ̱xgacüxü̃ naxunetagü.

²¹ Rü yemaca̱x ga Yoráü̃ rü ĩane ga Cháixwama naxũ namaxã ga guxü̃nema ga norü carugü ga dairuxü̃ ixĩgüne. Rü yexguma nachütagu rü ínarüdagü ga nüma rü ñu̱xũchi yema churaragüerugü ga norü carugü ga dairuü̃maxã icua̱xgüxü̃. Rü yema Edóü̃cüã̱xgü ga nüxü̃ íchomaeguchiréxü̃ca̱x ínayaxüãchi rü nayabuxmüxẽxẽ.

²² Natürü yixcaama ga Edóü̃cüã̱xgü rü nawa nangugüama nax nüxna ínachoxü̃xü̃ ga Yudáanecüã̱xgü nax nügümaxãtama inacua̱xgüxü̃ca̱x. Rü ñu̱xma rü ta rü ngẽmaãcütama nixĩ. Rü yexguma ta nixĩ ga ĩane ga Lixnácüã̱xgü rü ta ínanguxü̃xü̃ nüxna ga Yudáanecüã̱xgü.

²³ Rü guxü̃ma ga yema Yoráü̃chiga rü yema naxüxü̃chiga rü yema popera ga Yudáanearü ãẽ̱xgacügüchiga nagu ümatüxü̃gu naxümatü.

²⁴ Rü yexguma nayu̱xgu ga Yoráü̃ rü yexma nanatüxü̃tagutama nanata̱xgü ga Dabíarü Ĩanegu. Rü nawena rü nane ga Ocochía ãẽ̱xgacüxü̃ ningucuchi.

Ocochía nixücu nax Yudáanearü ãẽ̱xgacü yixĩxü̃ca̱x

²⁵ Rü yexguma 12 ga taunecü Iraéanecüã̱xgüarü ãẽ̱xgacü yixĩxgu ga Yoráü̃ ga Acáx nane, rü yexguma nixĩ ga Yudáanewa yexwacax yaxücuxü̃ ga Ocochía nax Yudáanecüã̱xarü ãẽ̱xgacü yixĩxü̃ca̱x. Rü nüma ga Ocochía rü Yudáanecüã̱x ga Yoráü̃ nane nixĩ.

²⁶ Rü nüma ga Ocochía rü 22 ga taunecü nüxü̃́ nayexma ga yexguma inaxügüãxgu nax ãẽ̱xgacü yixĩxü̃. Rü wüxi ga taunecü nixĩ nax Yerucharéü̃wa ãẽ̱xgacü yixĩxü̃. Rü naé ga Ataría rü Iraéanecüã̱xgüarü ãẽ̱xgacü ga Acáxacü iyixĩ rü ngĩrü o̱xi rü ãẽ̱xgacü ga Omrí nixĩ.

²⁷ Rü nüma ga Ocochía rü poraãcü nachixecüma yema norü o̱xi ga Acáxrüxü̃ rü Acáxtanüxü̃rüxü̃. Rü yemaca̱x ga yema Ocochía üxü̃ rü tama name ga Cori ya Tupanape̱xewa.

²⁸ Rü nüma ga Ocochía rü Acáx nane ga Yoráü̃na naxu nax nügü nangü̃xẽẽgüxü̃ca̱x nax Chíriaanearü ãẽ̱xgacü ga Achaémaxã nügü nada̱i̱xü̃ca̱x nawa ga guma ĩane ga Ramóx ga Garaáxanewa yexmane. Natürü ga Chíriaanecüã̱xgü rü Yoráü̃xü̃ nayapi̱xẽẽgü.

²⁹ Rü yemaca̱x norü ĩane ga Yereéca̱x nataegu ga nüma ga Yoráü̃ nax yemaacü naxüxü̃ãxü̃ca̱x ga norü o̱xrigü ga Chírianecüã̱xgü nax napi̱xẽẽgüxü̃ ga yexguma Ramóxgu Chíriaanearü ãẽ̱xgacü ga Achaémaxã nügü nadaixgu. Rü yema nax yada̱xawexü̃ ga Yoráü̃ rü yemaca̱x ga Ocochía ga Yudáanearü ãẽ̱xgacü rü Yereéwa naxũ nax Yoráü̃xü̃ íyadauxü̃ca̱x.