Norü taxre ga popera ga ãẽ̱xgacügüchiga 25 - Tupanaarü Ore

Yerucharéü̃ rü norü uanügüme̱xẽgu nangu

¹ Rü yemawena ga Chedequía rü tama Babiróniaanearü ãẽ̱xgacüga naxĩnü rü nanu. Rü yemaca̱x guma norü 10 ga tauemacüarü 10 ga ngunexü̃gu ga yexguma 9 ga taunecü ãẽ̱xgacü yixĩxgux ga Chedequía, rü nüma ga Babiróniaanearü ãẽ̱xgacü ga Nabucudonochó rü guxü̃ma ga norü churaragümaxã Yerucharéü̃ca̱x ínayagoõchi. Rü norü to̱xma̱xtawa nangugü rü nüxü̃ ínachomaeguãchi. Rü naxtapü̱xarü guxü̃cüwawa waixü̃mümaxã nanagünagügü nax nagu nachocuxü̃ca̱x ga guma ĩane.

² Rü guma ĩanexü̃ ínachomaeguãchi ñu̱xmata norü 11 ga taunecüwa nangu nax ãẽ̱xgacü yixĩxü̃ ga Chedequía

³ Rü yexguma gumá norü 4 ga tauemacüarü 9 ga ngunexü̃gu ga gumátama taunecügu rü yexera poraãcü taiya nangu̱x ga guma ĩanewa. Yerü yema duü̃xü̃gü rü marü nüxü̃́ nataxuma ga ta̱xacü nangõ̱xgüxü̃.

⁴ Rü düxwa ga yema Cadéugü ga Babiróniaanecüã̱x rü nayacapetügü ga guma ĩanearü poxeguxü̃tápü̱x nax yéma nachocuxü̃ca̱x. Rü woo nax ínachomaeguãchiãxü̃ ga yema Cadéugü ga churaragü, natürü nüma ga ãẽ̱xgacü ga Chedequía rü ñu̱xũchi yema norü churaragü rü chütacü nibuxmüama. Rü yema taxre ga poxeguxü̃tápü̱x íyexmaxü̃wa yexmaxü̃ ga ĩã̱xwa ínachoxü̃ ga ãẽ̱xgacüarü putüranecüwaama. Rü yema Yudáü̃arü ngatewa daxü̃ ga namagu nibuxmü.

⁵ Natürü ga yema Cadéugü ga churaragü ga guma ĩanexü̃ íchomaeguxü̃ rü ãẽ̱xgacü ga Chedequíawe nangegü, rü Yericúarü doxonexü̃gu nüxü̃ nayangaugü. Rü guxü̃ma ga yema Chedequíaarü churaragü rü nüxna yéma nibuxmü rü noxrüwaama nibuxmüetanü.

⁶ Rü yema Cadéugü ga churaragü rü ãẽ̱xgacü ga Chedequíaxü̃ niyauxgü. Rü ñu̱xũchi Babiróniaanearü ãẽ̱xgacüxü̃tawa nanagagü ga ĩane ga Ribáwa yexmacü ga Amáanewa. Rü yexma nixĩ ga Chedequíaxü̃ napoxcuxü̃ ga Nabucudonochó.

⁷ Rü nüma rü norü churaragüxü̃ namu nax Chedequíape̱xegu nanegüxü̃ nadaü̃naxãxü̃ca̱x. Rü ñu̱xũchi Chedequíaxü̃ nacaxü̃xetügü, rü cadénamaxã nayana̱i̱xgü. Rü yemaacü Babiróniawa nanagagü.

Tupanapata ga taxü̃negu napogüe

⁸ Rü yexguma gumá norü 5 ga tauemacüarü 7 ga ngunexü̃gu rü 19 ga taunecü nüxü̃́ inguxgu ga Babiróniaanearü ãẽ̱xgacü nax yixĩxü̃ ga Nabucudonochó, rü yexguma nixĩ ga Yerucharéü̃wa nanguxü̃ ga Nabucharadáü̃ ga Nabucudonochóarü ngü̃xẽẽruxü̃ ga ãẽ̱xgacüarü dauruü̃gümaxã icuáxü̃.

⁹ Rü nayagu ga guma Tupanapata ga taxü̃ne rü ãẽ̱xgacüpata rü napatagü ga yema ãẽ̱xgacügü ixĩgüxü̃. Rü yemaacü ínanagu ga guxü̃nema ga ĩpatagü ga guma ĩanewa yexmagüne.

¹⁰ Rü yema Cadéugü ga churaragü ga íyaxümücügüxü̃ ga Nabucharadáü̃, rü nagu napogüe ga yema Yerucharéü̃arü poxeguxü̃tápü̱xgü.

¹¹ Rü yemawena ga Nabucharadáü̃ rü Babiróniawa nanagagü ga yema Yudíugü ga Yerucharéü̃wa yaxǘgüxü̃ rü yema duü̃xü̃gü ga Babiróniaanearü ãẽ̱xgacüme̱xẽwa nügü ügüxẽẽxü̃ rü ñu̱xũchi guxü̃ma ga yema íyaxügüxü̃ ga ta̱xacürü yemaxü̃arü üxü̃ cua̱xgüxü̃.

¹² Rü guxema duü̃xẽgü ga ingearü yemaxü̃ã̱xgüxexicatama yéma tüxü̃ nayaxüxẽxẽ nax úba itatogüxü̃ca̱x rü ñu̱xũchi nax taxüanegüxü̃ca̱x.

¹³ Rü yema Cadéugü rü íxraxü̃gu nanapogü ga yema yemaxü̃gü ga bróũchenaxca̱x ga Tupanapata ga taxü̃newa yexmagüxü̃. Rü yexgumarüxü̃ ta nagu napogüe ga guma taxre ga caxtagü ga bróũchenaxca̱x ga Tupanapata ga taxü̃nearü ĩã̱xwa yexmagüne. Rü yema dexáchixü̃ ga taxü̃ rü ñu̱xũchi naxta̱xmüxü̃ ga bróũchenaxca̱x rü ta nagu napogüe. Rü Babiróniawa nanana ga guxü̃ma ga yema bróũche.

¹⁴ Rü ñu̱xũchi nayanagü ta ga tanimacapáü̃gü, rü paragü, rü pirañagü ga omüchiraü̃güarü mexẽẽruxü̃, rü cucharóü̃gü rü ñu̱xũchi guxü̃ma ga yemaxü̃gü ga bróũchenaxca̱x ga Tupanapataarü ixĩxü̃.

¹⁵ Rü yexgumarüxü̃ ta nüma ga churaragüeru ga Nabucharadáü̃ rü nayana ta ga guxü̃ma ga Tupanapataarü yemaxü̃gü ga úirunaxca̱x rü diẽrumünaxca̱x, rü ñu̱xũchi yema pumarate̱xearü guruü̃gü rü tacháũgü.

¹⁶ Rü taxucürüwa tanangugü ga norü yá ga gumá taxre ga caxtagü, rü yema dexáchixü̃ ga taxü̃, rü yema naxtaxmüxü̃gü ga ãẽ̱xgacü ga Charomóü̃ Tupanapata ga taxü̃neca̱x üxü̃ne.

¹⁷ Rü guma wüxichigü ga caxtagü rü 8 metruarü yexera nixĩ ga norü máchane. Rü yema natape̱xewa ga guma caxtagü rü nüxü̃́ nayexma ga norü nga̱xãẽruxü̃ ga bróũchenaxca̱x ga 2 metruarü yexeragu ixüxü̃. Rü nacüwawa ga yema ngã̱xãẽruü̃gü rü nayexma ga wüxi ga mutachinüxü̃ ga bróũchenaxca̱x ga ãpü̱xüxü̃maxã nga̱xãẽxü̃. Rü guma taxre ga caxtagü rü nawüxigumare.

Yudáanecüã̱xgüxü̃ ínagaxü̃ ga norü naanewa

¹⁸ Rü nüma ga churaragüeru ga Nabucharadáü̃ rü Cheraía ga chacherdótegüarü ãẽ̱xgacüxü̃ niyaxu. Rü yexgumarüxü̃ ta nayayaxu ga namücü ga chacherdóte ga Chofonía. Rü ñu̱xũchi ínanayauxü̃ ga yema tomaepü̱x ga Tupanapata ga taxü̃nearü ĩã̱xarü dauruü̃gü.

¹⁹ Rü ñu̱xũchi guma ĩanecüã̱xtanüwa rü nayayauxgü ta ga gumá ãẽ̱xgacü ga churaragümaxã icuácü. Rü ñu̱xũchi ínanayauxü̃ ga 5 ga yatügü ga Yudáanearü ãẽ̱xgacüarü ngü̃xẽẽruxü̃ ixĩgüxü̃ ga guma ĩanewa yexmagüxü̃. Rü nayayaxu ta ga yema churaragüeru ga yatüxe tüxü̃ nutaque̱xexü̃ nax churara tixĩgüxü̃ca̱x. Rü ñu̱xũchi ínanayauxü̃ ga 60 ga guma ĩanecüã̱xgü ga ãẽ̱xgacügü ga guma ĩanewa yexmagüxü̃.

^20-21 Rü nüma ga Nabucharadáü̃ rü nayagagü ga guxü̃ma ga yema duü̃xü̃gü ga Yudáanecüã̱x. Rü Amáanewa ga ĩane ga Ribáwa nanagagü ga Babiróniaanearü ãẽ̱xgacü íyexmaxü̃wa. Rü yexma nixĩ ga Babiróniaanearü ãẽ̱xgacü ga norü churaragüxü̃ tüxü̃ nadaixẽẽxü̃. Rü yemaacü namaxã nangupetü ga Yudáanecüã̱xgü ga yexguma norü naanewa ínagaxü̃ãgu.

Yudáanecüã̱xgü ga íyaxügüxü̃ rü Equítuanewa nabuxmü

²² Rü nüma ga Babiróniaanearü ãẽ̱xgacü ga Nabucudonochó rü Aicáü̃ nane ga Chapáü̃taxa ga Guedaríaxü̃ naxuneta nax namaxã inacuáxü̃ca̱x ga yema duü̃xü̃gü ga nüma Yudáanewa yaxügüxẽẽxü̃.

²³ Rü yexguma yema Yudáanearü churaragüerugü rü ñu̱xũchi yema norü duü̃xü̃gü nüxü̃ cuáxchigagügu nax Babiróniaanearü ãẽ̱xgacü rü Guedaríaxü̃ naxunetaxü̃ nax Yudáanearü ãẽ̱xgacü yixĩxü̃ca̱x, rü Mipáwa naxĩ nax Guedaríamaxã yanadexagüxü̃ca̱x. Rü yema yéma ĩxü̃ nixĩ ga Ismaé ga Netanía nane, rü Yoanáü̃ ga Caréa nane, rü Cheraía ga Tanúmex nane, ĩane ga Netopácüã̱x, rü Yaachanía ga wüxi ga yatü ga ĩane ga Maacácüã̱x nane. Rü yemagü nixĩ ga norü yatügümaxã yéma Mipáwa ĩxü̃.

²⁴ Rü nüma ga Guedaría rü yema churaragüerugümaxã rü norü yatügümaxã inaxüga rü ñanagürü nüxü̃: —Tama name i nüxü̃ pemuü̃exü̃ i ngẽma Cadéugüarü churaragüerugü. Rü name nixĩ i nua tachixü̃anewatama pemaxẽxü̃, rü Babiróniaanearü ãẽ̱xgacüaxü̃́ pepuracüexü̃. Rü ngẽmaãcü tá mea pexü̃ naxüpetü —ñanagürü.

²⁵ Natürü yexguma 7 ga tauemacüwena rü nüma ga Ismaé ga Netanía nane ga Erichamá nataxa ga Yudáanearü ãẽ̱xgacütanüxü̃ rü yéma nangu namaxã ga 10 ga norü yatügü ga íyaxümücügüxü̃, rü wüxigu Guedaríaxü̃ nima̱xgü. Rü nanadai ta ga yema Yudíugü rü ñu̱xũchi yema Cadéugü ga Guedaríamaxã Mispáwa yexmagüxü̃.

²⁶ Rü guxü̃ma ga yema duü̃xü̃gü rü Cadéugüxü̃ namuü̃e rü yemaca̱x naxcha̱xwa Equítuanewa nabuxmü. Rü yemaacü yema ãẽ̱xgacügü ixĩgüxü̃ ñu̱xmata yema duü̃xü̃gümare ixĩgüxü̃ rü nibuxmü.

Ãẽ̱xgacü ga Yoaquíü̃ rü ínanguxuchi rü Babiróniaanearü ãẽ̱xgacü mea nüxna nadau

^27-28 Rü gumá norü 12 ga tauemacüarü 27 ga ngunexü̃gu ga yexguma marü 37 ga taunecü napoxcugu ga Yudáanearü ãẽ̱xgacü ga Yoaquíü̃, rü yexguma nixĩ ga yexwacax yaxücuxü̃ ga Ebí-merodáx nax Babiróniaanearü ãẽ̱xgacü yixĩxü̃ca̱x. Rü nüma rü Yoaquíü̃maxã namecüma, rü poxcupataü̃wa ínananguxuchixẽxẽ. Rü mea nüxna nadau guxü̃ma ga yema togü ga ãẽ̱xgacügü ga Babiróniaanegu namaxã yexmagüxü̃arü yexera.

²⁹ Rü yemaacü ga Yoaquíü̃ rü ínacuxuchi ga yema naxchiru ga poxcupataü̃wa nagu yacúxü̃. Rü yexguma namaxyane rü ãẽ̱xgacüxü̃tawa nachibü.

³⁰ Rü ñu̱xũchi yexguma namaxyane ga Yoaquíü̃ rü wüxichigü ga ngunexü̃gu rü Babiróniaanearü ãẽ̱xgacü nüxü̃́ nanaxütanü.