Norü taxre ga popera ga ãẽ̱xgacügüchiga 13 - Tupanaarü Ore

Iraéanearü ãẽ̱xgacüxü̃ ningucuchi ga Yoacá

¹ Rü yexguma Yoá ga Ocochía nane rü marü 23 ga taunecü ãẽ̱xgacü yixĩxgu ga Yudáanewa, rü Yoacá ga Yeú nane rü Iraéanearü ãẽ̱xgacüxü̃ ningucuchi. Rü nüma ga Yoacá rü 17 ga taunecü nixĩ ga ãẽ̱xgacü yixĩxü̃ ga Chamáriaarü ĩanewa.

² Natürü nüma ga Yoacá rü Tupanape̱xewa chixexü̃gu namaxü̃ yerü nanaxü ga yematama pecadu ga Yeruboáü̃ ga Nabáx nane Iraéanecüã̱xgüxü̃ nagu yixẽẽxü̃. Rü tama nüxü̃ narüxoxchaü̃ ga yema chixexü̃.

³ Rü yemaca̱x ga Cori ya Tupana rü Iraéanecüã̱xgümaxã nanu. Rü Chíriaanearü ãẽ̱xgacü ga Achaéxaxü̃́ rü nane ga Ben-adáxaxü̃́ nanatauxchaxẽxẽ nax mucü ga taunecü Iraéanecüã̱xgüxü̃ naporamaegüxü̃ca̱x. Rü yemaacü Chíriaanearü ãẽ̱xgacügüme̱xẽwa nayexmagü.

⁴ Rü yemaca̱x ga nüma ga Yoacá rü nayumüxẽ rü Cori ya Tupanana naca. Rü nüma ga Cori ya Tupana rü nanangãxü̃ ga yema norü yumüxẽ yerü nüxü̃ nadau nax ñuxãcü yema Chíriaanearü ãẽ̱xgacü rü ngúxü̃ Iraéanecüã̱xgüxü̃ yangexẽẽxü̃.

⁵ Rü nüma ga Tupana rü yéma nanamu ga wüxi ga ngü̃xẽẽruxü̃ nax Chíriaanearü ãẽ̱xgacüme̱xẽwa Iraéanecüã̱xgüxü̃ ínanguxü̃xẽẽxü̃ca̱x. Rü yemaacü ga Iraéanecüã̱xgü rü noxrirüxü̃ taãẽãcü namaxẽ ga napatagüwa.

⁶ Natürü woo yemaacü Tupana nüxü̃ nax rüngü̃xẽẽxü̃, rü nagu namaxẽama ga yema pecadugü ga Yeruboáü̃ noxri Iraéanecüã̱xgüxü̃ nagu yixẽẽxü̃ ga yema natanüxü̃ ga Yeruboáü̃ ta nagu maxẽxü̃. Rü yema Iraéanecüã̱xgü nanaxügüama ga yema chixexü̃, rü tama inayanaxoxẽẽgü ga yema tupananeta ga Acheráchicüna̱xã ga Chamáriawa yexmaxü̃.

⁷ Rü nüma ga Yoacá rü marü noxretama ga norü churaragü nüxü̃́ ínayaxü. Rü 50tama ga churaragü ga cowarugu ĩxü̃, rü 10tama ga carugü ga cowaru itúgüne rü 10,000tama ga churaragü ga nacutügu ĩmarexü̃ nüxü̃́ ínayaxü. Yerü nüma ga Achaé ga Chíriaanearü ãẽ̱xgacü rü muxü̃ma ga Yoacáarü churaragüxü̃ nadai rü yemaacü poraãcü inayanaxoxẽxẽ.

⁸ Rü guxü̃ma ga yema Yoacáchiga, rü yema naxüxü̃chiga rü norü daichiga rü yema popera ga Iraéanearü ãẽ̱xgacügüchiga nagu ümatüxü̃gu naxümatü.

⁹ Rü yexguma nayu̱xgu ga Yoacá rü ĩane ga Chamáriagu nixĩ ga nata̱xgüãxü̃. Rü nawena rü nachicüxü ãẽ̱xgacüxü̃ nixücu ga nane ga Yoá.

Iraéanearü ãẽ̱xgacüxü̃ ningucuchi ga Yoá

¹⁰ Rü yexguma Yoá rü marü 37 ga taunecü ãẽ̱xgacü yixĩxgu ga Yudáanewa, rü Yoá ga Yoacá nane rü Iraéanearü ãẽ̱xgacüxü̃ ningucuchi. Rü nüma ga Yoá rü 16 ga taunecü nixĩ ga ãẽ̱xgacü yixĩxü̃ ga Chamáriaarü ĩanewa.

¹¹ Natürü nüma ga Yoá rü Tupanape̱xewa chixexü̃gu namaxü̃. Yerü tama nüxna nixũgachi ga guxü̃ma ga yematama pecadugü ga Yeruboáü̃ ga Nabáx nane Iraéanecüã̱xgüxü̃ nagu yixẽẽxü̃. Rü nanaxüama ga yema chixexü̃.

¹² Rü guxü̃ma ga yema Yoáchiga rü yema naxüxü̃chiga, rü norü daichiga rü ñuxãcü Amachía ga Yudáarü ãẽ̱xgacümaxã nügü nax nada̱i̱xü̃chiga, rü yema popera ga Iraéanearü ãẽ̱xgacügüchiga nagu ümatüxü̃gu naxümatü.

¹³ Rü yexguma nayu̱xgu ga Yoá rü yema Iraéanearü ãẽ̱xgacügü íta̱xgüxü̃gu nixĩ ga nata̱xgüãxü̃ ga Chamáriawa. Rü nawena rü nachicüxü ãẽ̱xgacüxü̃ nixücu ga to ga yatü ga Yeruboáü̃gu ãégaxü̃.

Nawa iyacuáxü̃ ga Erichéuarü ore rü yemawena nayu

¹⁴ Rü nüma ga Erichéu rü poraãcüma nida̱xawe rü natura. Rü yexguma nüma ga Yoá ga Iraéanearü ãẽ̱xgacü rü ínayadau rü namaxã naxaxu rü ñanagürü: —¡Pa Chorü Corix, Pa Chorü Corix, cuma rü Iraéanecüã̱xgüca̱x rü ñoma wüxi i churaragütücumü i poraxü̃chixü̃rüxü̃ quixĩ! —ñanagürü.

¹⁵ Rü yexguma nüma ga Erichéu rü nanangãxü̃ rü ñanagürü: —¡Nayaxu ya wüxi ya würa namaxã ya ñuxre ya naxne! —ñanagürü. Rü yexguma nüma ga ãẽ̱xgacü rü nanayaxu ga wüxi ga würa namaxã ga ñuxre ga naxne.

¹⁶ Rü yexguma nüma ga Erichéu rü ãẽ̱xgacüxü̃ ñanagürü: —¡Nüxü̃ naxü nax icumaxnetaxü̃! —ñanagürü. Rü yexguma nüma ga ãẽ̱xgacü rü nanayaxu ga norü würa. Rü nüma ga Erichéu rü Yoáme̱xẽétügu naxǘxme̱x,

¹⁷ rü ñanagürü: —¡Ñu̱xmax rü yawãxna i ngẽma beü̃tána i éstewaama üxü̃! —ñanagürü. Rü yexguma nüma ga ãẽ̱xgacü rü nayawãxna ga yema beü̃tána. Rü nüma ga Erichéu rü nanamu rü ñanagürü: —¡Ñu̱xmax, rü inamaxneta! —ñanagürü. Rü nüma ga ãẽ̱xgacü rü inanamaxü̃ ga guma naxne. Rü nüma ga Erichéu rü ñanagürü: —Daa naanewa rü Tupana cuxü̃ nüxü̃ nacua̱xẽxẽ rü cuma rü tá nüxü̃ curüporamae i ngẽma Chíriaanecüã̱xgü. Rü Aféxgu tá cunadai ñu̱xmatáta cunagu̱xẽxẽ —ñanagürü.

¹⁸ Rü yemawena nüma ga Erichéu rü ãẽ̱xgacüxü̃ ñanagürü: —¡Ñu̱xmax, rü nade ya yima naxnegü! —ñanagürü. Rü nüma ga ãẽ̱xgacü rü nanade ga guma naxnegü. Rü yexguma nüma ga Erichéu rü nanamu rü ñanagürü: —¡Ñu̱xmax, rü yima naxnemaxã ñaxtüanewa nacua̱i̱xca! —ñanagürü. Rü yexguma nüma ga ãẽ̱xgacü rü tomaepü̱xcüna ñaxtüanewa nanacua̱i̱xca rü ñu̱xũchi ínayachaxãchi.

¹⁹ Rü yexguma nüma ga Erichéu ga Tupanaarü orearü uruxü̃ rü poraãcüma ãẽ̱xgacümaxã nanu rü ñanagürü nüxü̃: —Rü ngẽxguma chi 5 rüe̱xna 6 e̱xpü̱xcüna chi ícunacua̱i̱xcagu rü wüxicana chi icuyanaxoxẽxẽ i ngẽma Chíriaanecüã̱xgü, natürü i ñu̱xmax rü tomaepü̱xcüna tátama nüxü̃ curüporamae —ñanagürü.

^20-21 Rü yemawena rü nayu ga Erichéu rü inanata̱xgü. Rü yexgumaü̃cüxü rü nayexma ga ngĩ́ta̱xagüxü̃ ga Moátanüxü̃ ga Iraéanearü naanegu chocuxü̃. Rü wüxi ga ngunexü̃gu ga yexguma ñuxre ga Iraétanüxü̃ rü wüxi ga yatü ga yuxü̃ iyata̱xgüyane rü nüxü̃ nadau ga yéma ne naxĩxü̃ ga wüxitücumü ga yema ngĩ́ta̱xagüxü̃. Rü yemaca̱x guxema yuxe rü naxma̱xü̃ ga Erichéu nagu ixücuchixü̃gu nayañaxcuchigü ga yema naxü̃ne. Natürü yexguma Erichéuchina̱xãmaxã nañaxgu ga yema naxü̃ne rü wenaxarü namaxü̃ rü inachi.

²² Rü yexguma Yoacá maxü̃gu, rü nüma ga Achaé ga Chíriaanearü ãẽ̱xgacü rü Iraéanecüã̱xgüxü̃ ngúxü̃ ningexẽxẽ.

²³ Natürü nüma ga Cori ya Tupana rü nüxü̃́ nangechaü̃tümüü̃gü ga yema Iraéanecüã̱xgü yerü Abraáü̃maxã rü Ichaámaxã rü Acóbumaxã marü inaxuneta. Rü yemaca̱x poraãcü yema Iraétanüxü̃gu narüxĩnü rü tama nanaxwa̱xe nax nadaiaxü̃ rü nügüpe̱xewa ínawoxü̃ãxü̃. Rü ñu̱xma rü ta rü tama nüxü̃ naxo rü tama ínanawogü.

²⁴ Rü yexguma nayu̱xgu ga Achaé ga Chíriaanearü ãẽ̱xgacü rü nane ga Ben-adáx nixĩ ga nachicüxü ãẽ̱xgacü ixĩxü̃.

²⁵ Rü nüma ga Yoá rü Yoacá nane nixĩ. Rü nüma ga Yoá rü Ben-adáxna nanapuxü̃ ga guma ĩanegü ga Achaé puxü̃ne nüxna ga Yoacá ga Yoá nanatü. Rü nüma ga Yoá rü tomaepü̱xcüna Ben-adáxü̃ narüporamae, rü yemaacü Iraéaneca̱x nanawoeguxẽxẽ ga guma ĩanegü.