Norü taxre ga popera ga ãẽ̱xgacügüchiga 12 - Tupanaarü Ore

Yudáanewa ãẽ̱xgacü nixĩ ga Yoá

¹ Rü yexguma 7 ga taunecü marü ãẽ̱xgacü yixĩxgu ga Yeú ga Iraéanewa rü nüma ga Yoá rü inanaxügü nax Yudáanewa ãẽ̱xgacü yixĩxü̃. Rü 40 ga taunecü ãẽ̱xgacü nixĩ ga Yerucharéü̃wa. Naé rü ĩane ga Bechébacüã̱x iyixĩ rü Chíbia nixĩ ga ngĩéga.

² Rü yema naxüxü̃ ga Yoá rü name ga Cori ya Tupanape̱xewa, yerü nüma ga chacherdóte ga Yoiadá rü mexü̃maxã nanaxucu̱xẽ.

³ Natürü tama nagu napogüe ga yema tupananetagüarü ãmarearü guruü̃gü, rü yemaca̱x ga duü̃xü̃gü rü yéma nayanagugüama ga ãmaregü rü ñu̱xũchi pumarate̱xe ga yixichixü̃.

^4-5 Wüxi ga ngunexü̃gu rü nüma ga ãẽ̱xgacü ga Yoá rü chacherdóte ga Yoiadáxü̃ ñanagürü: —Name nixĩ i tanamexẽxẽ ya Tupanapata ya taxü̃ne. Rü ngẽmaca̱x name nixĩ i penade i guxü̃ma i ngẽma diẽru i woetama Tupanana üxü̃ rü ngẽma diẽru i wüxichigü i duü̃xü̃ norü ngúchaü̃maxã ixãxü̃. ¡Rü ñu̱xũchi curü duü̃xü̃gü i diẽrumaxã icua̱xgüxü̃maxã nüxü̃ ixu nax ngẽma diẽrumaxã namexẽxẽgüãxü̃ca̱x ya yima Tupanapata ya taxü̃ne! —ñanagürü.

⁶ Natürü yexguma 23 ga taunecü ãẽ̱xgacü yixĩxgu ga Yoá rü nüma ga chacherdótegü rü taxũtáma nanamexẽẽgü ga guma Tupanapata ga taxü̃ne.

⁷ Rü yemaca̱x ga nüma ga ãẽ̱xgacü ga Yoá rü naxca̱x nangema ga chacherdóte ga Yoiadá rü yema togü ga chacherdótegü ga namücügü. Rü ñanagürü nüxü̃: —¿Ta̱xacüca̱x tama penamexẽxẽ ya yima Tupanapata ya taxü̃ne? ¡Rü ñu̱xmaü̃cüxü rü marü taxũtáma pegüxü̃́tama diẽru ngĩxü̃ peyaxu naxü̃tawa i ngẽma diẽrumaxã nguxü̃güxü̃! Rü guxü̃ma i ngẽma diẽru i ñu̱xma ngẽxmaxü̃ rü Tupanapata ya taxü̃nearü mexẽẽruxü̃ tá nixĩ —ñanagürü.

⁸ Rü nüma ga chacherdótegü rü norü me nixĩ nax nüxü̃ naxunetaxü̃ ga wüxi ga diẽru ga woetama Tupanapata ga taxü̃nearü mexẽẽruxü̃ ixĩxü̃ rü marü taxũtáma nügüxü̃tama ngĩxü̃ nayauxgüxü̃ca̱x.

⁹ Rü yexguma nüma ga chacherdóte ga Yoiadá rü wüxi ga diẽruchixü̃ naxã́taü̃wa naxüxmaxetü. Rü ãmarearü guruü̃arü tügünecüwaguama nanaxǘ ga Tupanapata ga taxü̃nearü ĩã̱xwa. Rü yema ĩã̱xarü dauruü̃gü rü duü̃xü̃güna nayadeetanü ga yema diẽru, rü yema diẽruchixü̃gu nayanucuetanü.

¹⁰ Rü yexguma marü naxããcugu ga diẽruchixü̃, rü nüma ga ãẽ̱xgacüarü diẽruarü ugüruxü̃, rü nüma ga chacherdóte rü ngĩxü̃ nixugügüxü̃ ga diẽru, rü wüxi ga chocagu ngĩxü̃ nanucu.

^11-12 Rü yema diẽru rü yexguma marü poperagu ngĩxü̃ nawǘpaneguwena, rü yema puracütanüxü̃eruna ngĩxü̃ nana nax yemaacü yema corapinagüaxü̃́, rü yema puracümaxã icua̱xgüxü̃axü̃́, rü yema ĩxtapüarü üruü̃güaxü̃́, rü yema nutaarü mexẽẽcüwaruü̃güaxü̃́ naxütanügüãxü̃ca̱x. Rü yexgumarüxü̃ ta yema diẽrumaxã naxca̱x nataxegü ga mürapewagü rü nuta ga marü imexẽẽcüwagücü rü guxü̃ma ga togü ga yemaxü̃gü ga nanaxwa̱xegüxü̃ Tupanapata ga taxü̃nearü mexẽẽruxü̃.

¹³ Natürü ga yema diẽru ga duü̃xü̃gü Tupanapata ga taxü̃newa ngĩxü̃ ngẽgüxü̃cü rü tama copugüarü üruü̃ca̱x iyixĩ, rü tama omügüchiraü̃arü yoeruü̃arü üruü̃ca̱x iyixĩ, rü bai i tacháũgüarü üruü̃ca̱x yixĩxü̃, rü bai i cornétagüarü üruü̃ca̱x yixĩxü̃, rü bai nax togüama ga yemaxü̃gü ga úirunaxca̱x rü diẽrumünaxca̱xarü üruü̃ca̱x yixĩxü̃.

¹⁴ Yerü yema diẽru rü yema yatügü ga Tupanapata ga taxü̃nearü puracümaxã icua̱xgüxü̃na ngĩxü̃ naxãgü nax yemamaxã namexẽẽgüãxü̃ca̱x ga guma Tupanapata ga taxü̃ne.

¹⁵ Natürü ga yema diẽru ga yema yatügü ga puracümaxã icua̱xgüxü̃na ngĩxü̃ naxãgü nax puracütanüxü̃axü̃́ naxütanügüãxü̃ca̱x, rü taxuca̱xma nüxna nacagü ngĩchiga ga yema diẽru yerü mea ngĩmaxã inacua̱xgü.

¹⁶ Natürü yema diẽru ga duü̃xü̃gü norü pecadugügagu ngĩxü̃ inaxãgücü rü tama Tupanapata ga taxü̃newa ngĩxü̃ nangegü, yerü chacherdótegüca̱x iyixĩ.

¹⁷ Rü yema ngunexü̃gügu ga Chíriaanearü ãẽ̱xgacü ga Achaé rü ĩane ga Gáxcüã̱xgümaxã nügü nadai rü ñu̱xũchi nayapugü ga guma ĩane. Rü yemawena rü Yerucharéü̃ca̱x ínayagoõchi.

¹⁸ Natürü ga Yudáanearü ãẽ̱xgacü ga Yoá rü nanade ga guxü̃ma ga yemaxü̃gü ga imexü̃ ga nüxíraxü̃güxü̃ ga ãẽ̱xgacügü ga Yochapáx rü Yoráü̃ rü Ocochía Tupanapata ga taxü̃newa naxü̃ ga yexguma Yudáanewa ãẽ̱xgacügü yixĩgügu. Rü ñu̱xũchi Yoá nanade ta ga yema yemaxü̃gü ga nümatama inanaxügüchiréxü̃ rü yexgumarüxü̃ ta nanade ga guxü̃ma ga yema úirugü ga Tupanapata ga taxü̃nearü diẽruchíxü̃wa yexmagüxü̃. Rü ñu̱xũchi nanade ga guxü̃ma ga úirugü ga guma ãẽ̱xgacüpatawa yexmagüxü̃. Rü yemawena rü Achaéxü̃tawa nanana ga guxü̃ma ga yema. Rü yexguma ga Achaé rü ínayachaxãchi nax Yerucharéü̃ca̱x íyagoõchixü̃.

¹⁹ Rü guxü̃ma ga yema Yoáchiga rü yema naxüxü̃chiga rü yema popera ga Yudáanearü ãẽ̱xgacügüchiga nagu ümatüxü̃gu naxümatü.

²⁰ Rü yema norü churaragüerugütama rü bexma nagu narüxĩnüe nax yama̱xgüchaü̃ãxü̃. Rü yema nama ga Chiláwa daxü̃wa yexmane ga napata ga Bex-milógu nayama̱xgü.

²¹ Rü yema norü churaragüerugü ga Yochacáx ga Chimáx nane rü Yochabá ga Choméx nane rü nayama̱xgü. Rü yexguma nayu̱xgu rü Dabíarü Ĩanegu nanata̱xgü. Rü nawena nane ga Amachía ãẽ̱xgacüxü̃ ningucuchi.