1 Corintios 14 - Tupanaarü Ore

Ngẽma tama nüxü̃ icuáxü̃ i nagawa nax idexaxü̃chiga

¹ ¡Rü naxca̱x peda̱u̱x nax duü̃xü̃güxü̃ pengechaü̃güxü̃! Rü ngẽxgumarüxü̃ ta name nixĩ i naxca̱x pedau i ngẽma cua̱xgü i Naãxẽ ya Üünexü̃wa ne ĩxü̃. Rü ngẽma cua̱x i yexeraãcü penaxwa̱xexü̃ nixĩ nax pexü̃́ natauxchaxü̃ nax nüxü̃ pixuxü̃ i Tupanaarü ore.

² Yíxema tama nüxü̃ tacuáxü̃ i nagawa idexaxe, rü Tupanamaxã nixĩ i tidexaxü̃ rü tama i duü̃xü̃gümaxã, erü taxúema nüxü̃ tacua̱x nax ñuxũ ñaxü̃chiga yixĩxü̃. Rü Tupanaãxẽ ya Üünecü nixĩ i tüxü̃ idexaxẽẽxü̃, natürü ngẽma ore i nüxü̃ tixuxü̃ rü ẽxü̃guxü̃ nixĩ.

³ Natürü yíxema nüxü̃ ixuxe i Tupanaarü ore rü ngẽma yaxõgüxü̃arü ngü̃xẽẽruxü̃ tixĩ, erü ngẽma oremaxã nüxü̃́ tanangúchaü̃xẽxẽ nax yexeraãcü yaxõgüãxü̃ca̱x rü ngẽma oremaxã tanataãẽxẽxẽ i ngẽxguma guxchaxü̃ nüxü̃ üpetügu.

⁴ Rü yíxema tama nüxü̃ tacuáxü̃ i nagawa idexaxe, rü tümaca̱xtama nixĩ i ngẽma nax yexeraãcü mea Tupanaaxü̃́ tayaxõxü̃ca̱x. Natürü yíxema nüxü̃ ixuxe i Tupanaarü ore rü nüxü̃ tixu nax yexeraãcü Tupanaaxü̃́ yaxõgüãxü̃ca̱x i guxü̃ma i ngẽma yaxõgüxü̃.

⁵ Choma chierüx chanaxwa̱xe nax guxãma i pema rü ngẽma tama nüxü̃ pecuáxü̃ i nagawa nax pidexagüxü̃. Natürü ngẽma yexeraãcü chanaxwa̱xexü̃ nixĩ nax duü̃xü̃gümaxã nüxü̃ pixuxü̃ i Tupanaarü ore. Erü ngẽma nixĩ i to i nagawa idexaxü̃arü yexera rümemaexü̃ ega tataxu̱xgu nax texé nüxü̃ ixuxü̃ nax ta̱xacüchiga yixĩxü̃ i ngẽma dexa i to i nagawa nüxü̃ tixuxü̃ nax ngẽmaãcü nüxü̃ nangü̃xẽẽxü̃ca̱x i ngẽma yaxõgüxü̃.

⁶ Rü dücax, Pa Chauenexẽgüx, rü ngẽxguma chi pexü̃tawa chaxũxgu, rü chi to i nagawa chidexagu, ¿rü ta̱xacüwa chi pexü̃́ namexü̃ i ngẽma? Natürü ngẽxguma chi pemaxã nüxü̃ chixuxgu i ngẽma Tupana tüxü̃ nüxü̃ cua̱xẽẽxü̃, rü ẽ̱xna ngẽma chomatama nüxü̃ chacuáxü̃ nax aixcüma yixĩxü̃, rüe̱xna ngẽma ẽxü̃guxü̃ i ñu̱xma Tupana tüxü̃ nüxü̃ cua̱xẽẽxü̃, rüe̱xna ta̱xacürü to i ngu̱xẽẽtae i Tupanachiga, rü ngẽmawaxi nixĩ i pexü̃́ mexü̃.

⁷ ¡Rü dücax ngẽma paxetaruxü̃ i quena rü ẽ̱xna árpa! Rü ngẽxguma ngéma naxãgamaregu rü tama ínaxueguãchigagu rü taxũchima nüxü̃ tacua̱x nax ta̱xacügu napaxüxü̃.

⁸ Rü ngẽma churaragü, rü ngẽxguma tama mea nangógagu ya yimá cornéta ya daixca̱x naxca̱x caxü̃ne ¿rü ñuxãcü tá nügü namexẽxẽ nax nügü nada̱i̱xü̃ca̱x?

⁹ Rü ngẽma nixĩ i pexü̃ üpetüxü̃ i pema i ñu̱xma. Rü ngẽxguma chi tama perü conümaxã nüxü̃ pixuxgu i dexa i mea nüxü̃ icuáxü̃, ¿rü ñuxãcü tá nüxü̃ tacua̱x nax ñuxũ ñaxü̃chiga yixĩxü̃ i ngẽma nüxü̃ pixuxü̃? Rü ñoma ngürüanewa pidexagüxü̃rüxü̃ tá pixĩgü.

¹⁰ Rü aixcüma nixĩ i namuxü̃ i nagagü i ñoma i naanewa. Rü guxü̃ma i ngẽma nagagü rü name naxca̱x i ngẽma duü̃xü̃gü i nawa idexagüxü̃.

¹¹ Natürü ngẽxguma chi tama nüxü̃ chacua̱xgu i ngẽma naga i to i duü̃xü̃ chomaxã nawa idexaxü̃, rü ngẽma duü̃xü̃ca̱x rü to i nachixü̃anecüã̱x chixĩ, rü cha̱u̱xca̱x rü to i nachixü̃anecüã̱x i duü̃xü̃ nixĩ i nümax.

¹² Choma nüxü̃ chacua̱x rü pema rü pexü̃́ nangúchaü̃ nax pexü̃́ nangẽxmaxü̃ i ngẽma cua̱x i Tupanaãxẽ ya Üünecü tüxna ãxü̃. Natürü name nixĩ i naxca̱x pedau nax guxü̃arü yexera pexna naxããxü̃ i ngẽma cua̱x i namaxã nüxü̃ perüngü̃xẽẽxü̃ i guxü̃ma i yaxõgüxü̃ nax yexeraãcü mea Tupanaaxü̃́ yaxõgüãxü̃ca̱x.

¹³ Rü ngẽmaca̱x yíxema duü̃xẽ ya taxúema nüxü̃ cuáxü̃ i nagawa idexaxe, rü name nixĩ i Tupanana naxca̱x taca nax tüxna naxããxü̃ca̱x i cua̱x nax nüxü̃ tixuxü̃ca̱x nax ta̱xacüchiga yixĩxü̃ i ngẽma to i nagawa nüxü̃ tixuxü̃.

¹⁴ Rü ngẽxguma chi taxúema nüxü̃ cuáxü̃ i nagawa chayumüxẽgu, rü chauãẽ nixĩ i ngẽma yumüxẽxü̃. Natürü chomatama rü taxuxü̃ma chacua̱x nax ta̱xacüchiga yixĩxü̃ i ngẽma chauãxẽarü yumüxẽ.

¹⁵ ¿Rü ñuxãcü tá chayumüxẽxü̃ i ñu̱xmax? Rü marü name nixĩ ega taxúema nüxü̃ cuáxü̃ i nagawa chayumüxẽgu, natürü chanaxwa̱xe i guxãma nüxü̃ cuáxü̃ i nagawa rü ta chayumüxẽ. Rü marü name nixĩ ega taxúema nüxü̃ cuáxü̃ i nagawa chawiyaegu, natürü chanaxwa̱xe i guxãma nüxü̃ cuáxü̃ i nagawa rü ta chawiyae.

¹⁶ Erü ngẽxguma chi taxúema nüxü̃ cuáxü̃ i nagawa Tupanaxü̃ quicua̱xüü̃gu, rü yíxema duü̃xẽgü ya ngéma irüxĩnüexe, rü taxucürüwa cumaxã wüxigu Tupanaxü̃ ticua̱xüü̃gü, erü tama nüxü̃ tacua̱x nax ta̱xacüchiga yixĩxü̃ nax Tupanaxü̃ quicua̱xüxü̃xü̃

¹⁷ Rü woo ngẽma curü yumüxẽ rü namexẽchigu, natürü yíxema duü̃xẽgü ya ngéma irüxĩnüexe rü taxuxü̃ma i mexü̃ nawa tayaxu ega to i nagawa cuyumüxẽgu.

¹⁸ Tupanana moxẽ chaxã, erü perü yexera taxúema nüxü̃ cuáxü̃ i nagawa chidexa.

¹⁹ Natürü woo 10,000 i ore i taxúema nüxü̃ cuáxü̃ i nagawa nax chidexaxü̃, natürü ngẽma yaxõgüxü̃arü ngutaque̱xegüwa rü cha̱u̱xca̱x rü narümemae chi nixĩ ega woo wüxime̱xpü̱x i ore i meama nüxü̃ icuáxü̃wa namaxã nüxü̃ chixuxgu i Tupanaarü ore nax ngẽmaãcü ngẽmamaxã mea chanangúexẽẽxü̃ca̱x.

²⁰ Pa Chauenexẽgüx, tama name i ñoma buxü̃gürüxü̃ nagu perüxĩnüe i ngẽma ore i pemaxã nüxü̃ chixuxü̃. Rü narümemae nixĩ i ñoma buxü̃gürüxü̃ pegü pixĩgüxẽxẽ na̱xcha̱xwa i ngẽma chixexü̃. Natürü ngẽma perü ĩnüwa rü penaxwa̱xe i duü̃xü̃gü i marü yáxü̃rüxü̃ mea nagu perüxĩnüe rü nagu pexĩ i ngẽma ore i pemaxã nüxü̃ chixuxü̃.

²¹ Tupanaarü ore ga ümatüxü̃ rü ñanagürü: “Tá chanamugü i to i nachixü̃anecüã̱x i duü̃xü̃gü nax to i nagawa yadexagüxü̃ca̱x namaxã i chorü duü̃xü̃gü i Yudíugü. Natürü woo ngẽmaãcü chanaxüxgu, rü taxũtáma chauga naxĩnüe i ngẽma Yudíugü”, ñanagürü ga Tupana.

²² Rü ngẽmaca̱x ngẽma nax to i nagawa idexaxü̃, rü wüxi i cua̱xruxü̃ nixĩ naxca̱x i ngẽma duü̃xü̃gü i tama yaxõgüxü̃. Rü tama duü̃xü̃gü i marü yaxõgüxü̃ca̱x nixĩ i ngẽma. Natürü ngẽma Tupanaarü orexü̃ nax ixuxü̃, rü duü̃xü̃gü i marü yaxõgüxü̃ca̱x nixĩ nax yexeraãcü mea Tupanaaxü̃́ yaxõgüãxü̃ca̱x. Rü tama duü̃xü̃gü i tama yaxõgüxü̃ca̱x nixĩ i ngẽma.

²³ Rü ngẽxguma chi pema i yaxõgüxe pengutaque̱xegügu, rü guxã chima to i nagawa pidexagügu, ¿rü ñuxũ ñaxü̃ tá ega petanügu naxücu̱xgu i wüxi i duü̃xü̃ i ngéma iyarüxĩnüxü̃ rü ẽ̱xna wüxi i duü̃xü̃ i tauta yaxõxü̃? ¿Taux ẽ̱xna i nagu tá naxĩnüxü̃ nax pexãũãẽgüxü̃ i pemax?

²⁴ Natürü ngẽxguma chi guxãma i pema nüxü̃ pixuxgu i Tupanaarü ore, rü chi petanügu naxücu̱xgu i wüxi i duü̃xü̃ i tama yaxõxü̃ rü ẽ̱xna wüxi i duü̃xü̃ i ngéma iyarüxĩnüxü̃, rü tá nüxü̃ naxĩnü i ngẽma Tupanaarü ore i nüxü̃ pixuxü̃. Rü ngẽmaãcü tá nügü nicua̱xãchi nax chixexü̃wa nangẽxmaxü̃ i norü maxü̃. Rü tá nügügu tátama inarüxĩnü i ngẽxguma nüxü̃ naxĩnügu i ngẽma nüxü̃ pixugüexü̃.

²⁵ Rü ngẽmaãcü tá nango̱x i ngẽma chixexü̃ i nüxicatama nüxü̃ nacuáxü̃ rü ngẽxma tá nacaxã́pü̱xü, rü tá Tupanaxü̃ nicua̱xüxü̃. Rü tá nüxü̃ nixu nax aixcüma Tupana petanüwa nangẽxmaxü̃.

Name nax meamare penaxüxü̃ i ngẽxguma pengutaque̱xegügu

²⁶ Dücax, Pa Chauenexẽgüx, ñu̱xma tá pemaxã nüxü̃ chixu nax ñuxãcü tá penaxüxü̃ ega ngẽxguma pengutaque̱xegügu. Rü ñuxre i pema rü marü name nax Tupanaarü wiyaegu pewiyaegüxü̃, rü toguxe rü tangu̱xẽẽtaegüxü̃, rü toguxe rü nüxü̃ tixuxü̃ i ngẽma ore ya Tupana tüxü̃ nüxü̃ cua̱xẽẽxü̃, rü toguxe rü nawa tidexagüxü̃ i naga i tama nüxü̃ tacua̱xgüxü̃, rü toguxe rü tanango̱xẽẽgüxü̃ i ngẽma dexa i to i nagawa nüxü̃ yaxugüxü̃. Natürü guxü̃ma i ngẽma rü tanaxwa̱xe i ngẽma yaxõgüxü̃arü ngü̃xẽẽca̱x nax yixĩxü̃, nax yexeraãcü yaxõgüãxü̃ca̱x rü mea Tupanaca̱x namaxẽxü̃ca̱x.

²⁷ Rü ngẽxguma to i naga i pema tama nüxü̃ pecuáxü̃wa pidexagügu, rü name nixĩ i taxre rü ẽ̱xna tomaepü̱xicatama tidexagü. Rü tanaxwa̱xe i wüxíexíra tidexa i noxri rü yixcama ya toguxe. Rü ngẽxguma chi texé to i nagawa idexaxgu, rü name nixĩ nax tangexmaxü̃ ya wüxíe ya nüxü̃ ixuchigüxe nax ta̱xacüchiga yixĩxü̃ i ngẽma ore i to i nagawa nüxü̃ tixuxü̃.

²⁸ Natürü ngẽxguma chi tataxu̱xgu nax texé nüxü̃ ixuxü̃ nax ta̱xacüchiga yixĩxü̃ i ngẽma ore i to i nagawa nüxü̃ tixuxü̃, rü narümemae nixĩ nax noxtacüma tama to i nagawa tidexagü i perü ngutaque̱xewa. Rü narümemae i wüxichigü tüxica Tupanamaxãxicatama bexma tidexa.

²⁹ Rü ngẽxgumarüxü̃ ta ngẽxguma pengutaque̱xegügu, rü name nixĩ i taxre rü ẽ̱xna tomaepü̱xicatama nüxü̃ tixu i Tupanaarü ore. Rü ngẽma togü i ngutaque̱xetanüxü̃ rü name nixĩ nax mea nangugügüãxü̃ i ngẽma ore.

³⁰ Natürü ngẽxguma chi íyadexayane i wüxi i duü̃xü̃, rü Tupana tümamaxã idexagu ya toguxe ya ngéma rütoxe, rü name nixĩ nax iyanachianexü̃ i ngẽma nüxíra idexaxü̃ nax tidexaxü̃ca̱x ya yíxema duü̃xẽ ya Tupana tümamaxã idexaxe.

³¹ Rü ngẽxguma texé Tupana tümamaxã idexagu, rü name nixĩ i wüxichigü ítanangu̱xẽxẽ nax tümawa nanguxü̃ nax nüxü̃ tixuxü̃ca̱x i ngẽma Tupana tümamaxã nuxü̃ ixuxü̃ i ore nax ngẽmaãcü i ngẽma yaxõgüxü̃ rü nüxü̃ nacua̱xgüxü̃ca̱x nax ta̱xacüchiga yixĩxü̃ i ngẽma nüxü̃ tixuxü̃ rü nataãẽgüxü̃ca̱x.

³² Rü ngẽmaãcü tanaxwa̱xe i meama tügümaxã itacua̱x ya wüxichigü ya yíxema Tupana tümamaxã idexaxe.

^33-34 Erü perü ngutaque̱xegüwa rü Tupana nanaxwa̱xe nax mea penaxüxü̃ i guxü̃ma, rü tama nanaxwa̱xe nax ngéma pexãũgatanüxü̃ rü pegü ípetüexẽẽxü̃. Rü guxü̃ma i ngẽma togü i yaxõgüxü̃arü ngutaque̱xegüwa rü marü nüxü̃ nayapue nax tama yadexagüxü̃ i ngexü̃gü. Rü name nixĩ i pema rü ta ngẽmaãcü penaxü, erü nachu̱xu nax yadexagüxü̃ i ngexü̃gü i ngutaque̱xegüwa. Rü name nixĩ nax yatügüga naxĩnüexü̃ i ngexü̃gü, ngẽma Tupanaarü ore tüxü̃ muxü̃rüxü̃.

³⁵ Rü ngẽxguma chi wüxi i ngexü̃ ta̱xacüxü̃ nacuáxchaü̃gu, rü name nixĩ i natena naca i nachiga i ngẽma. Erü wüxi i ãne nixĩ ega ngutaque̱xewa yadexaxgu i wüxi i ngexü̃.

³⁶ Pa Coríntiucüã̱xgüx, name nixĩ nax nüxna pecua̱xãchiexü̃ nax tama pewaxira ne naxũxü̃ i Tupanaarü ore. Rü tama pexicatama nixĩ i penayauxgüxü̃ i ngẽma.

³⁷ Rü ngẽxguma chi texé tügügu rüxĩnügu nax Tupanaarü orearü uruxü̃ tixĩxü̃ rü ẽ̱xna tügügu tarüxĩnügu nax Tupanaãxẽ ya Üünecü tüxna naxãxü̃ i ta̱xacürü cua̱x, rü name nixĩ i nüxna tacua̱xãchi nax tórü Coriarü mu yixĩxü̃ i ñaa ore i pexca̱x chaxümatüxü̃.

³⁸ Natürü ngẽxguma chi texé tama nüxü̃ cuáxchaü̃gu i ngẽma pexca̱x chaxümatüxü̃, rü nüma ya Cori ya Tupana rü tama tüxü̃ nacua̱x.

³⁹ ¡Rü ngẽmaca̱x, Pa Chauenexẽgüx, rü Tupanana naxca̱x peca i cua̱x nax meama nüxü̃ pixuxü̃ca̱x i norü ore! ¡Rü tama penachu̱xu nax to i nagawa yadexagüxü̃ i duü̃xü̃gü!

⁴⁰ Rü perü ngutaque̱xegüwa, rü name nixĩ nax mea penaxüxü̃ i guxü̃ma. Rü tama name i ngéma pexãũgatanü rü pegü ípetüexẽxẽ.