1 Chamué 6 - Tupanaarü Ore

Firitéugü rü nanatáeguxẽxẽgü ga yema baú ga Tupanaarü mugüchixü̃

¹ Rü yema baú ga Tupanaarü mugüchixü̃ rü 7 ga tauemacü Firitéugüarü naanewa nayexma.

² Rü nüma ga Firitéugü rü nanangutaque̱xexẽxẽ ga norü chacherdótegü rü yuüxü̃gü nax yemagüna nacagüexü̃ca̱x, rü ñanagürügü: —¿Ta̱xacü tá namaxã taxüxü̃ i ngẽma Iraéanecüã̱xgüarü Tupanaarü mugüchixü̃? ¡Tomaxã nüxü̃ pixu nax ñuxãcü tá wena nachixü̃aneca̱x tanatáeguxẽẽxü̃! —ñanagürügü.

³ Rü nüma ga yema chacherdótegü rü yuüxü̃gü rü nanangãxü̃gü, rü ñanagürügü: —Ngẽxguma penatáeguxẽẽgu i ngẽma baú i Iraéanecüã̱xgüarü Tupanaarü mugüchixü̃, rü ¡taxũtáma ngẽmaãcümare penatáeguxẽxẽ! Rü name nixĩ nax nüxna penaxãxü̃ i wüxi i ãmare nax ngẽmaãcü Iraéanecüã̱xgüarü Tupanaxü̃ namaxã perüngüxmüxẽẽxü̃. Rü ngẽxguma i pema rü tá pexca̱x nitaanegü, rü tá nüxü̃ picua̱xãchitanü nax ngẽmagagu yixĩxü̃ ya Tupana i pexü̃ yada̱xaweexẽẽxü̃ —ñanagürügü.

⁴ Rü nüma ga duü̃xü̃gü rü yema chacherdótegüna rü yuüxü̃güna nacagüe, rü ñanagürügü nüxü̃: —¿Ta̱xacü tá nixĩ i nüxna taxãmarexü̃ nax namaxã tanangüxmüxẽẽxü̃ca̱x? —ñanagürügü. Rü nümagü ga chacherdótegü rü yuüxü̃gü nanangãxü̃gü rü ñanagürügü: —Penaxwa̱xe i penaxü i 5 i naxchicüna̱xãgü i úirunaxca̱x i nataixnapü̱xügüraxü̃xü̃. Rü ngẽma naxchicüna̱xãgü rü ngẽma 5 i perü ãẽ̱xgacügüe̱xpü̱x tá nixĩ i penaxüxü̃. Rü ñu̱xũchi 5 i ü̃cachicüna̱xã i úirunaxca̱x tá pexü. Erü ngẽma taixnagümaxã nixĩ ya Tupana i pexü̃ yada̱xaweexẽẽxü̃, rü ü̃cagümaxã nixĩ i guxchaxü̃ pexna naxãxü̃ i guxãma i pemax rü perü ãẽ̱xgacügü.

⁵ Rü ngẽmaca̱x name nixĩ i ípenaxüxü̃ i ngẽma taixnachicüna̱xãgü rü naxchicüna̱xãgü i ngẽma ü̃cagü i guxchaxü̃ pexna ãxü̃ i perü ĩanewa. ¡Rü nüxü̃ picua̱xüxü̃ ya yimá Iraéanecüã̱xgüarü Tupana! Rü bexmana ngẽmaãcü tá nüxü̃ narüchau nax pexü̃ yada̱xaweexẽẽxü̃, rü pexü̃ napoxcuexü̃ i pemax rü perü tupanagü rü perü naane.

⁶ ¿Rü tü̱xcüü̃ pegü ípenataiãchiarü maxü̃ã̱xgü narüxü̃ ga yema Equítuanecüã̱xgü rü norü ãẽ̱xgacü ga Faraóü̃? Yerü yexguma Tupana düxwa guxchaxü̃ naxca̱x ínguxẽẽguxicatama nixĩ ga Iraétanüxü̃xü̃ yange̱xgüxü̃.

⁷ ¡Rü ngexwacaxü̃ne ya peweü̃ ya ãchicúne pexü̱x! ¡Rü yimá peweü̃ rü taxre i woca i ãxacüxü̃ rü taguma ü̃paacü ñuxgu ta̱xacü itúgüxü̃wa peyanga̱xcuchi! Natürü ngẽma naxacügü ¡rü naxpüü̃gu namaxã penguxü̃ nax tama naéwe nangegüxü̃ca̱x!

⁸ ¡Rü ñu̱xũchi yimá peweü̃gu peyaxǘe i ngẽma baú i Cori ya Tupanaarü mugü nawa ngẽxmaxü̃! ¡Rü ngẽma baúcüwagu peyaxüechiü̃ i ngẽma naxchicüna̱xãgü i úirunaxca̱x ixĩgüxü̃ i norü Tupanaarü ngüxmüxẽxẽruxü̃ ixĩxü̃! ¡Rü ngẽmawena rü peyange̱xgü i ngẽma wocagü nax nüma ínanaxwa̱xexü̃wa naxĩxü̃ca̱x namaxã i ngẽma baú!

⁹ Rü pema rü mea tá penangugü rü ngextáama naxĩ i ngẽma wocagü namaxã i ngẽma baú. Rü ngẽxguma Iraéanecüã̱xgüarü naanewaama naxĩxgu i Bex-cheméwaama, rü ngẽmawa tá nüxü̃ tacua̱x nax yimá Iraéanecüã̱xgüarü Tupana yixĩxü̃ i taxca̱x ínanguxẽẽxü̃ i ngẽma da̱xaweane. Natürü ngẽxguma tama ngémaama naxĩxgu rü ngẽmawa tá nüxü̃ tacua̱x nax tama Iraéanecüã̱xgüarü Tupana yixĩxü̃ ga tüxü̃ poxcucü rü woetama ngẽma taxca̱x ínangumare —ñanagürügü.

¹⁰ Rü yemaacü nanaxügü ga yema yatügü. Rü taxre ga woca ga íxãxacüxü̃ niyauxgü rü tümapǘü̃gu tüxü̃ nawocu ga guxema naxacügü. Rü yemawena ga yema wocagü rü guma naweü̃wa nayangacuchigü.

¹¹ Rü ñu̱xũchi gumá naweü̃gu nayaxüegü ga yema baú ga Cori ya Tupanaarü mugü nawa yexmaxü̃. Rü yexma nayaxüechixü̃gü ta ga yema ü̃cachicüna̱xãgü ga úirunaxca̱x, rü yema taixnachicüna̱xãgü.

¹² Rü yemawena ga yema wocagü rü ĩane ga Bex-cheméwa nadaxü̃ ga namagu naxĩ, rü nixáietanü, rü we̱xgu naxĩ rü taxuwama ínachocu. Rü nüma ga Firitéugüarü ãẽ̱xgacügü rü naweama nixĩxü̃tanü ñu̱xmata Bex-cheméarü üyeanewa nangugü.

¹³ Rü yema duü̃xü̃gü ga Bex-chemécüã̱xgü ga naanegüwa tríguarü buxuwa puracüexü̃, rü yexguma nüxü̃ nadaugügu ga yema baú ga Cori ya Tupanaarü mugü nawa yexmaxü̃, rü poraãcü nataãẽgü.

¹⁴ Rü yexguma Yochuéarü naanewa nanguxgu ga Bex-cheméwa, rü yéma nayachaxãchi. Rü yéma nayexma ga wüxi ga nuta ga tacü. Rü nüma ga Bex-chemécüã̱xgü ga duü̃xü̃gü rü nagu napogüe ga gumá naweü̃ rü üxüxü̃ nayaxĩxẽẽgü. Rü ga yema wocagü rü Tupanaca̱x nanadai rü ínanagu.

¹⁵ Rü nümagü ga Lebítanüxü̃ rü marü ínanaxüegü ga yema baú ga Tupanaarü mugüchixü̃ rü yema caicháũ ga nawa nayexmagüxü̃ ga yema ü̃cachicüna̱xãgü, rü yema úirupü̱xügü ga nataixnapü̱xügüraxü̃xü̃. Rü gumá nuta ga tacüétügu nananugü. Rü yema ngunexü̃gu ga yema Bex-chemécüã̱xgü rü Cori ya Tupanaca̱x ínanagu ga naxü̃nagü rü muxü̃ma ga togü ga norü ãmaregü.

¹⁶ Rü nüma ga yema 5 ga ãẽ̱xgacügü ga Firitéugü rü yáxü̃wa nüxü̃ narüdaunü. Rü yexguma marü nüxü̃ nadaugügu ga marü Iraéanecüã̱xgüme̱xẽwa nax nanguxü̃ ga yema baú, rü yemawena rü Ecróü̃ca̱x nawoegu ga yematama ngunexü̃gu.

¹⁷ Rü yema 5 ga taixnachicüna̱xãgü ga úirunaxca̱x ga Firitéugü Cori ya Tupanana naxuaxü̃güxü̃ norü ngüxmüxẽẽruxü̃, rü yema rü guma ĩanegü ga Adúx, rü Gácha, rü Acharóü̃, rü Gáx, rü Ecróü̃arü ãmaregü nixĩ.

¹⁸ Rü yema ü̃cachicüna̱xãgü ga úirunaxca̱x rü nae̱xpü̱x nixĩ ga guma Firitéugüarü ĩanegü ga meama ípoxegugüne ga yema 5 ga ãẽ̱xgacügü namaxã icua̱xgüne. Rü naétü namaxã nangau ga guma ĩanexacügü ga tama ípoxegugüne. Rü yimá nuta ya tacü ga naétügu naxü̃́nagüãcü ga yema baú ga Tupanaarü mugüchixü̃, rü ñu̱xma rü ta ngéma nangẽxma nawa i ngẽma Yochuéarü naane i ĩane ya Bex-cheméwa yexmaxü̃.

¹⁹ Natürü nüma ga Cori ya Tupana rü nanadai ga ñuxre ga duü̃xü̃gü ga Bex-chemécüã̱xgü yerü yema Tupanaarü mugüchixü̃ ga baúgu nadaucu. Rü 70 ga yatügü nixĩ ga yuexü̃. Rü nüma ga yema ĩanecüã̱xgü rü poraãcüxüchima naxauxe naxca̱x ga yema duü̃xü̃gü ga Cori ya Tupana natanüwa daixü̃.

²⁰ Rü yemaca̱x ga nüma ga Bex-chemécüã̱xgü rü ñanagürügü: —¿Texé tame nax Cori ya Tupana ya üünecüpe̱xewa tangexmaxü̃? ¿Rü ngextá tá ínamuxü̃ i ngẽma baú i ñu̱xmax? —ñanagürügü.

²¹ Rü yemaca̱x ĩane ga Quiriáx-yearíü̃arü duü̃xü̃güca̱x yéma namugagü rü ñanagürügü: —Ngẽma Firitéugü rü marü nanatáeguxẽẽgü i ngẽma baú i Cori ya Tupanaarü mugüchixü̃. Rü ngẽmaca̱x name i nua pexĩ rü peyayaxu —ñanagürügü.