1 Chamué 4 - Tupanaarü Ore

Firitéugü rü nachixü̃anewa nanangegü ga yema baú ga Tupanaarü mugü nawa yexmaxü̃

¹ Rü nüma ga Chamué rü guxü̃ma ga Iraéanecüã̱xgümaxã nüxü̃ nixu ga yema Tupanaarü ore. Rü yexgumaü̃cüxü rü nüma ga Firitéugü rü nügü nanutaque̱xe nax Iraéanecüã̱xgümaxã nügü nada̱i̱xü̃ca̱x. Rü yemaca̱x ga nüma ga Iraéanecüã̱xgüarü churaragü rü naxca̱x nichoxü̃ nax nügü namaxã nada̱i̱xü̃ca̱x. Rü ĩane ga Ebéü̃-échexü̃tawa nangugü, rü yexma nügü ninu. Rü nüma ga Firitéugüarü churaragü rü ĩane ga Aféxwa nayexmagü.

² Rü nüma ga Firitéugü rü nügü ninu nax Iraéanecüã̱xgümaxã nügü nada̱i̱xü̃ca̱x. Rü yexguma nügü nadaixgu, rü nüma ga Firitéugü rü Iraéanecüã̱xgüxü̃ narüporamaegü. Rü yema nügü ínadaixü̃wa nanadai ga 4,000 ga norü churaragü.

³ Rü yexguma yema ínapegüxü̃ca̱x nawoegu̱xgu ga Iraéanecüã̱xgüarü churaragü rü yema Iraéanearü ãẽ̱xgacügü rü ñanagürügü nügümaxã: —¿Tü̱xcüü̃ i ñu̱xma ya Tupana i Firitéugüxü̃ naxüchicaxü̃ nax tüxü̃ naporamaegüxü̃ca̱x? ¡Rü ngĩxã Chilówa taxĩ rü tayayaxu i ngẽma baú i Cori ya Tupanaarü mugü nawa ngẽxmaxü̃ nax ngẽmaãcü i nüma rü tatanüwa nangẽxmaxü̃ca̱x rü tüxü̃ ínapoxü̃xü̃ca̱x nüxna i ngẽma tórü uanügü! —ñanagürügü.

⁴ Rü yemaca̱x ga Iraéanecüã̱xgü rü ñuxre ga churaragü Chilówa namugü. Rü yéma nayayauxgü ga yema baú ga nawa nayexmaxü̃ ga norü mugü ga Cori ya Tupana ya Guxü̃étüwa Ngẽxmacü. Rü Oní rü Fineéx ga yema taxre ga Erí nanegü rü yema baú ga Cori ya Tupanaarü mugü nawa yexmaxü̃xü̃ta nixĩxü̃tanü.

⁵ Rü yexguma yema Iraéanearü churaragü ípegüxü̃wa nanguxgu ga yema baú ga Tupanaarü mugüchixü̃, rü nüma ga Iraétanüxü̃ rü taãẽmaxã poraãcü aita naxüe ñu̱xmata waixü̃mügu yaxũgagü.

^6-7 Rü yexguma yemaxü̃ naxĩnüegu ga Firitéugü rü nügüna nacagüe rü ñanagürügü: —¿Ta̱xacüca̱x ínicuxcu i ngẽma Iraétanüxü̃ i ínapegüxü̃wa? —ñanagürügü. Natürü yexguma yema Firitéugü nüxü̃ cua̱xgügu nax yema Iraétanüxü̃ ínapegüxü̃wa nangegüãxü̃ ga yema baú ga Tupanaarü mugü nagu nuxü̃ rü namuü̃e. Rü ñanagürügü: —Tupana rü ngẽma Iraétanüxü̃ ínapegüxü̃wa nangu. ¿Rü ta̱xacü tá tüxü̃ nangupetü i ñu̱xmax erü tagumachire̱x ngẽmaãcü nangupetü?

⁸ Rü ñu̱xmax rü poraãcüxüchi ãũcümaxü̃wa tangexmagü. ¿Rü texé tá naxme̱xwa tüxü̃ ítapoxü̃ ya yimá Tupana ya poraxüchicü? Yerü gumátama Tupana nixĩ ga ínachianexü̃wa Equítucüã̱xgüxü̃ poxcucü namaxã ga naguxü̃raü̃xü̃ ga guxchaxü̃gü.

⁹ Pa Firitéugüarü Churaragüx, ¡taxṹ ipemuü̃exü̃ rü perümaãchitanüxü̃! ¡Rü guxü̃ i perü poramaxã namaxã pegü pedai i ngẽma Iraétanüxü̃ nax ngẽmaãcü tama norü puracütanüxü̃xü̃ pexü̃ yaxĩgüxẽxẽxü̃ca̱x yema nümagü rü tórü puracütanüxü̃ yaxĩgügurüxü̃! —ñanagürügü.

¹⁰ Rü yexguma ga yema Firitéugü rü Iraéanecüã̱xgüca̱x ínayaxüãchi rü nügü nadai. Rü nüma ga Iraéanecüã̱xgü rü nixü, rü yema ínapegüxü̃wa nabuxmü. Rü nayue ga muxü̃ma ga Iraéanecüã̱xgüarü churaragü, rü 30,000 wa nangu.

¹¹ Rü yexgumarüxü̃ ta nanapugü ga yema baú ga Tupanaarü mugü nawa yexmaxü̃, rü nanadai ga Oní rü Fineéx ga yema taxre ga Erí nanegü.

¹² Natürü wüxi ga churara ga Bẽyamíü̃tanüxü̃ rü niña ga yema nügü ínadaixü̃wa, rü yematama ngunexü̃gu Chilówa nangu. Rü norü ngechaü̃maxã nügü nayarügáutechiru, rü nügü nabuxeru, rü yemaacü ínangu.

¹³ Rü yexguma yéma nanguxgu ga yema churara rü nüma ga Erí rü ĩã̱xü̃tawa narüto nawa ga yema norü tochicaxü̃. Rü namagu ínadawenü yerü naxca̱x naxoegaãẽ ga yema baú ga Tupanaarü mugü nawa yexmaxü̃. Rü yema yatü rü guma ĩanegu naxücu rü nüxü̃ nixu ga yema ngupetüxü̃. Rü yexgumatama ga guxü̃ma ga duü̃xü̃gü rü inanaxügüe ga poraãcü nax naxauxexü̃.

¹⁴ Rü yemaxü̃ naxĩnügu ga Erí rü ínaca rü ñanagürü: —¿Ta̱xacüchiga nixĩ i ngẽma nax íyacuxcuxü̃? —ñanagürü. Rü nüma ga yema churara rü nañu̱xãẽ ga Erímaxã nüxü̃ nax yanaxuxü̃ ga yema ngupetüxü̃.

¹⁵ Rü nüma ga Erí rü nüxü̃́ nayexma ga 98 ga taunecü rü marü natauxetüxüchi ga yexguma.

¹⁶ Rü nüma ga churara rü ñanagürü: —Ñu̱xmatama íchangu i ngẽma togü ítada̱i̱xü̃wa nax ne chañaxü̃. Rü ñu̱xmatama chiña i nawa i ngẽma dai —ñanagürü. Rü nüma ga Erí rü nüxna naca rü ñanagürü: —¿Ta̱xacü nangupetü, Pa Chaunex? —ñanagürü.

¹⁷ Rü nüma ga yema churara rü nanangãxü̃ rü ñanagürü: —Nüma i Iraéanecüã̱xgü rü Firitéutanüxü̃cha̱xwa nibuxmü rü ñu̱xũchi muxẽma ya tatanüxü̃ tüxü̃ nadai. Rü ngẽmatanügu nayue ya yimá taxre ya cune ya Oní rü Fineéx, rü ngẽma baú i Tupanaarü mugü nawa ngẽxmaxü̃ rü Firitéugü nanapugü —ñanagürü.

¹⁸ Rü yexguma yema orearü ngeruxü̃ nüxü̃ ixuxgu nax napuxü̃ ga yema baú ga Tupanaarü mugüchixü̃, rü nüma ga Erí rü norü tochicaxü̃wa ínawa̱x rü ĩã̱xü̃tagu nangu. Rü yema nax nayaxüchixü̃ rü yangü̱xü̃, rü yemaca̱x nibüyenaxã ga yexguma nanguxgu, rü yexma nayu. Rü nüma ga Erí rü 40 ga taunecü nixĩ ga Iraéanecüã̱xgümaxã inacuáxü̃.

¹⁹ Rü yexguma ga guxema Erí naneã̱x ga Fineéx naxma̱x rü ixãxãcü rü marü ngĩrü ngunexü̃wa nanguxchaü̃ ga nax naxíxraxacüxü̃. Natürü yexguma nüxü̃ naxĩnügu nax Firitéugü napugüxü̃ ga yema baú ga Tupanaarü mugüchixü̃, rü ngĩ̱xtü ga Erí rü ngĩte ga Fineéx rü marü nayuexü̃, rü yemaarü ngechaü̃maxã yexeraãcü poraãcü inguxneca rü ixíraxacü.

²⁰ Rü yexguma yema ngĩxü̃ rüngü̃xẽẽgüxü̃ ngĩxü̃ daugügu ga nax nayuégaxü̃, rü ñanagürügü ngĩxü̃: —¡Taxṹ i cumuü̃xü̃! Erü marü naxíxra i wüxi i cune —ñanagürügü. Natürü ga ngĩma rü tama inangãxü̃ rü tama naga ixĩnü.

^21-22 Rü Icabúgu inaxüéga ga yema ngĩne rü ngĩgürügü: —Tupana rü marü tüxna nixũgachi erü marü nataxuma i ngẽma baú i Tupanaarü mugüchixü̃ i nua Iraéanewa —ngĩgürügü. Rü yema ngĩgürügü yerü marü nanapugü ga Tupanaarü mugüchixü̃ rü marü nayue ga ngĩ̱xtü rü ngĩte.