1 Chamué 24 - Tupanaarü Ore

Dabí rü tama Chaúxü̃ nima̱x

¹ Rü yexguma Chaú nataeguxgu ga Firitéugümaxã nügü ínadaixü̃wa, rü namaxã nüxü̃ nixugügü ga En-gádiarü chianexü̃wa nax nayexmaxü̃ ga Dabí.

² Rü yexguma ga Chaú rü 3,000 ga churaragü nidexechi ga guxü̃ma ga Iraéanecüã̱xgütanüwa, rü Dabíca̱x nayadaugü nagu ga yema ma̱xpǘnearü tuãchi.

³ Rü yexguma yexma naxĩxgu ga Chaú, rü yexma nüxü̃ nangau ga ñuxre ga carnérutücumügü norü ngaicamagu ga wüxi ga ma̱xpǘnearü ãxmaxü̃ ga nagu yacúxü̃ ga Dabí norü churaragümaxã. Rü nüma ga Chaú rü yema ãxmaxü̃gu nangaxi nax yexma íyawo̱xéxü̃ca̱x.

⁴ Rü nüma ga Dabíarü churaragü rü ñanagürügü Dabíxü̃: —Ñu̱xmawaxix nixĩ i yanguxü̃ ga yema uneta ga Cori ya Tupana cumaxã nüxü̃ ixuxü̃ nax cuxme̱xgu nangu̱xẽẽãxü̃ i ngẽma curü uanü. ¡Rü ẽcü yama̱x cuma nagu curüxĩnüxü̃ãcüma! —ñanagürügü. Rü nüma ga Dabí rü naxũãẽãcüma bexma Chaúarü deyuchirupechinüwa íxraxü̃ niwie.

⁵ Natürü ga yixcüama ga Dabí rü poraãcü nüxü̃́ nangu̱x ga yema naxüxü̃.

⁶ Rü ñanagürü norü churaragüxü̃: —¡Cori ya Tupana choxü̃ rüngü̃xẽxẽ nax tama ta̱xacü namaxã chaxüxü̃ca̱x i ngẽma chorü ãẽ̱xgacü! Nüma rü ãẽ̱xgacü nixĩ yerü Cori ya Tupanatama nüxü̃ naxuneta —ñanagürü.

⁷ Rü yemaacü ga Dabí rü nüxna nachogü ga norü churaragü yerü tama nanaxwa̱xe nax Chaúxü̃ nax yama̱xgüxü̃. Rü nüma ga Chaú rü ínaxũxũ ga yema ãxmaxü̃wa rü inaxĩ.

⁸ Natürü nüma ga Dabí rü Chaúwetama inayago ga yema ãxmaxü̃wa rü nüxna nacagü rü ñanagürü: —Pa Ãẽ̱xgacüx, Pa Ãẽ̱xgacüx —ñanagürü. Rü nüma ga Chaú rü nügü nadauegu. Rü nüma ga Dabí rü ñaxtüanegu yangücuchiãcüma nüxü̃ narümoxẽ.

⁹ Rü ñanagürü nüxü̃: —¿Tü̱xcüü̃ i naga cuxĩnüxü̃, Pa Ãẽ̱xgacüx, i ngẽma duü̃xü̃gü i cumaxã nüxü̃ ixuxü̃ nax choma rü naxca̱x chadauxü̃ nax cuxü̃ chimáxü̃?

¹⁰ Pa Chorü Ãẽ̱xgacüx, ñu̱xmawaxix nixĩ i aixcüma nüxü̃ cucuáxü̃ nax tama cuxü̃ chimáxchaü̃. Rü woo Cori ya Tupana rü cho̱xme̱xgu cuxü̃ nax nangu̱xẽẽchirexü̃ i nua ma̱xpǘnearü ãxmaxü̃wa, natürü i choma rü tama cuxü̃ chiima̱x, Pa Ãẽ̱xgacüx. Erü nagu charüxĩnü nax cuma rü ãẽ̱xgacü quixĩxü̃ erü Cori ya Tupana rü marü ngẽmaca̱x cuxü̃ naxuneta.

¹¹ ¡Rü dücax, mea nuxã nadawenü, Pa Ãẽ̱xgacüx, i ñaa cho̱xme̱xwa ngẽxmaxü̃! ¿Tama ẽ̱xna curü gáuxü̃chirutüchi yixĩxü̃ i ñaa? Rü ngẽmawa nüxü̃ cucua̱x nax marü chi cuxü̃ nax chimáxü̃. Rü ngẽmawa nüxü̃ cucua̱x, Pa Ãẽ̱xgacüx, nax taxuxü̃ma i chixexü̃ cumaxã chaxüxchaü̃xü̃, rü tama chanaxwa̱xexü̃ nax chacuechitaexü̃ rü bai i ñuxgu ta̱xacürü chixexü̃ cumaxã chaxüxü̃. Natürü i cumax, Pa Ãẽ̱xgacüx, rü chowe quingechigü nax choxü̃ quimáxü̃ca̱x.

¹² Rü Tupana nixĩ ya nüxü̃ cuácü nax texe tixĩxü̃ i ngẽma chixexü̃gu rüxĩnüxü̃. Rü ñu̱xma nax choxü̃ quimáxchaü̃xü̃ rü nüma nixĩ i nüxü̃ nacuáxü̃ i ta̱xacü tá cumaxã naxueguxü̃. Natürü i chomax, Pa Ãẽ̱xgacüx, rü tagutáma ta̱xacürü chixexü̃ cumaxã chaxü.

¹³ Ngẽma nũxcümaü̃xü̃ i dexa rü ñanagürü: “Ngẽma chixexü̃ rü chixexü̃arü uruü̃güwa ne naxũ”, ñanagürü. Rü ngẽmaca̱x i chomax, Pa Ãẽ̱xgacüx, rü tagutáma nagu charüxĩnü nax cuxü̃ chimáxü̃.

¹⁴ ¿Rü ñu̱xma rü texéwe nixĩ i nangexü̃ ya Iraéanearü ãẽ̱xgacü? ¿Rü texéwe nixĩ i yangẽchigüxü̃? Chowe nixĩ erü ñoma wüxi i airu i yuxü̃rüxü̃ chixĩ. Rü wüxi i naixchinawe i taxuwama mexü̃rüxü̃ chixĩ naxca̱x!

¹⁵ Rü ngẽmaca̱x Cori ya Tupana tá nixĩ ya mea nangugücü i tachiga i yixema taxre rü tá nüxü̃ nixu nax texé tixĩxü̃ ya yíxema chixexü̃ üxe. Rü nüma tá nixĩ i chauétüwa nachogüxü̃ rü cuxme̱xwa choxü̃ ínapoxü̃xü̃, Pa Ãẽ̱xgacüx —ñanagürü.

¹⁶ Rü yexguma Dabí nüxü̃ rüchauxgu nax yadexaxü̃, rü nüma ga Chaú rü tagaãcü nanangãxü̃ rü ñanagürü: —¿Ẽ̱xna cuma quixĩxü̃, Pa Chaunex, Pa Dabíx, i chomaxã quidexaxü̃? —ñanagürü. Rü ñu̱xũchi inanaxügü ga nax naxaxuxü̃.

¹⁷ Rü ñu̱xũchi ñanagürü: —Ngẽma cuma nüxü̃ quixuxü̃ nixĩ i aixcüma ixĩxü̃. Erü cuma rü mexü̃ choxü̃ cudauxẽxẽ woo nax chixexü̃ cumaxã chaxüxü̃ i chomax.

¹⁸ Rü ñu̱xma rü aixcümaxü̃chi choxü̃ cunawe̱x nax cuma rü naxca̱x cudauxü̃ nax mexü̃ chomaxã cuxüxü̃. Erü nüma ya Cori ya Tupana rü marü cuxme̱xgu choxü̃ nangu̱xẽẽchire̱x, natürü tama choxü̃ quima̱x.

¹⁹ Rü aixcüma nixĩ i nataxuxü̃ma i duü̃xü̃ i tama norü uanüxü̃ imáxü̃ ega naxme̱xgu nanguxgu. Rü ngẽmaca̱x ¡Tupana cuxü̃́ naxütanü naxca̱x i ngẽma mexü̃ i ñu̱xma cha̱u̱xca̱x cuxüxü̃!

²⁰ Rü ñu̱xma nixĩ i aixcüma nüxü̃ chacuáxü̃ nax cuma tá yixĩxü̃ i Iraéanecüã̱xgüarü ãẽ̱xgacü quixĩxü̃. Rü cuma tá nixĩ i namaxã icucuáxü̃, rü cuxme̱xwa mea tá Iraéanecüã̱xgüxü̃ nangupetü.

²¹ ¡Rü ẽcü Tupanaégagu chomaxã nüxü̃ ixu rü tagutáma cuyanaxoxẽxẽ i ngẽma chautaagü nax ngẽmaãcü tagutáma iyanaxoxü̃ca̱x i chauéga i chautanüxü̃tanüwa! —ñanagürü.

²² Rü nüma ga Dabí rü Tupanaégagu Chaúmaxã inaxuneta. Rü yemawena ga nüma ga Chaú rü napataca̱x nataegu. Rü nüma ga Dabí rü norü churaragümaxã wenaxarü yema nagu yacu̱xgüxü̃ ga ma̱xpǘnearü ãxmaxü̃wa naxũ.