1 Chamué 23 - Tupanaarü Ore

Dabí rü Firitéugüme̱xẽwa ĩane ga Queiráxü̃ ínanguxuchixẽxẽ

^1-2 Rü wüxi ga ngunexü̃gu ga Firitéugü rü ĩane ga Queirágu nachocu, rü trigu ga yexwacax púxü̃ rü naxca̱x nangĩ̱xgü. Rü yexguma yemaxü̃ Dabímaxã yaxugügu, rü nüma ga Dabí rü Cori ya Tupanana naca, rü ñanagürü: —¿Choxü̃́ cunatauxchaxẽxẽxü̃ nax ngẽma Firitéugüxü̃ chayada̱i̱xü̃? —ñanagürü. Rü nüma ga Cori ya Tupana rü nanangãxü̃ rü ñanagürü: —Ngü̃, ¡rü yada̱i̱x i ngẽma Firitéugü rü naxme̱xwa ínanguxü̃xẽxẽ i ngẽma duü̃xü̃gü i ĩane ya Queirácüã̱xgü —ñanagürü.

³ Natürü ga Dabíarü duü̃xü̃gü rü Dabíxü̃ ñanagürügü: —Nua Yudáanewa nax ingẽxmagüxü̃ rü nüxü̃ tamuü̃e i ngẽma Firitéugü. Rü ngẽxguma chi ĩane i Queiráwa ixĩxgu rü yexera nüxü̃ tamuü̃e i ngẽma Firitéugüarü churaragü —ñanagürügü.

⁴ Rü yexguma ga nüma ga Dabí rü wena Cori ya Tupanana naca. Rü nüma ya Cori ya Tupana rü nanangãxü̃ rü ñanagürü: —¡Inaxũãchi rü nawa naxũ ya ĩane ya Queirá! Erü choma rü tá cuxme̱xgu chanayixẽxẽ i ngẽma Firitéugü —ñanagürü.

⁵ Rü Dabí rü norü duü̃xü̃gümaxã inaxũãchi nax ĩane ga Queiráwa naxũxü̃. Rü yexma Firitéugümaxã nügü nadai. Rü nüxü̃ narüporamae rü guxü̃xü̃ma nadai. Rü nügüaxü̃́ nayagagü ga Firitéugüarü naxü̃na ga wocagü. Rü yemaacü Dabí Firitéugüme̱xẽwa ínanapoxü̃ ga yema duü̃xü̃gü ga ĩane ga Queirácüã̱xgü.

⁶ Rü yexgumayane ga Abiatá ga Aimérex nane rü Queiráwa naxũ nax Dabíxü̃ naxümücüxü̃ca̱x. Rü yéma nanange ga Tupanaarü efóx.

⁷ Rü Chaúmaxã nüxü̃ nixugüe ga Dabí rü ĩane ga Queiráwa nax nayexmaxü̃. Rü nüma ga Chaú rü ñaxü̃gu narüxĩnü: —Ñu̱xma nixĩ i Cori ya Tupana rü Dabíxü̃ cho̱xme̱xgu nanguxẽẽxü̃. Erü ñu̱xma nax ĩane ya Queirágu naxücuxü̃ rü ngẽxma ĩã̱xarü wãxtaruxü̃maxã narüwãxtaü̃ rü taxucürüwa niña —ñaxü̃gu narüxĩnü.

⁸ Rü yexgumatama ga nüma ga Chaú rü guxü̃ma ga norü churaragüca̱x naca nax ĩane ga Queiráwa naxĩxü̃ca̱x nax Dabíxü̃ rü norü duü̃xü̃güxü̃ ínayauxü̃xü̃ca̱x.

⁹ Natürü yexguma Dabí nüxü̃ cuáchigagu nax Chaú nagu rüxĩnüxü̃ nax yamáxchaü̃ãxü̃, rü chacherdóte ga Abiatáxü̃ namu nax naxü̃tawa nangeaxü̃ ga Tupanaarü efóx nax Cori ya Tupanana naca̱xü̃ca̱x.

¹⁰ Rü Dabí rü ñanagürü: —Pa Cori ya Iraétanüxü̃arü Tupanax, daa curü duü̃ rü nüxü̃ nacuáchiga nax Chaú rü tá daa ĩane ya Queiráwa naxũxü̃ nax chaugagu nadaiaxü̃ca̱x i duü̃xü̃gü.

¹¹ ¿Rü núma tá naxũxü̃ i Chaú nax cha̱u̱xca̱x yadauxü̃, ngẽma nüxü̃ chacuáchigaxü̃ãcü? ¿Rü ngẽma duü̃xü̃gü i Queirácüã̱xgü rü tá nüxna choxü̃ namugüxü̃? Pa Cori ya Iraétanüxü̃arü Tupanax, choma i curü duü̃ rü cuxna chaca nax chomaxã nüxü̃ quixuxü̃ —ñanagürü. Rü nüma ga Cori ya Tupana rü nanangãxü̃ rü ñanagürü: —Chaú rü tá núma naxũ —ñanagürü.

¹² Rü yexguma ga nüma ga Dabí rü ínaca rü ñanagürü: —¿Rü ngẽma Queirácüã̱xgü rü tá Chaúna choxü̃ namuxü̃ namaxã i chorü duü̃xü̃gü? —ñanagürü. Rü nüma ga Cori ya Tupana rü nanangãxü̃ rü ñanagürü: —Pexü̃ inamugü tá nixĩ —ñanagürü.

¹³ Rü yexguma ga Dabí rü ñu̱xũchi norü duü̃xü̃gü ga 600 ga norü mu rü ĩane ga Queiráwa ínachoxü̃, rü inaxĩ tama nüxü̃ nacua̱xgüãcü nax ngextá tá naxĩxü̃. Rü yexguma Chaú nüxü̃ cuáchigagu ga Dabí rü marü nax yañaxü̃ ga ĩane ga Queiráwa, rü ínayachaxãchi nax nawe nangexü̃.

Dabí rü chianexü̃ i taxúema íxãpataxü̃wa nayexma

¹⁴ Rü nüma ga Dabí rü yema chianexü̃ ga Chíxwa naxũ, rü yexma ma̱xpǘnearü ãxmaxü̃gügu norü duü̃xü̃gümaxã nicu̱xgü rü yéma nayexmagü. Rü nüma ga Chaú rü guxü̃ma ga ngunexü̃gu naxca̱x nadau, natürü ga Tupana rü Dabína nadau, rü yemaca̱x ga Chaú rü taguma nüxü̃ inayangau.

¹⁵ Natürü nüma ga Dabí rü Chaúca̱x namuü̃, yerü naxca̱x nadau ga nax yamáãxü̃ca̱x. Rü yemaca̱x ga Dabí rü naixnecü ga Óregu narüxã̱ũ̱x ga chianexü̃ ga Chíxwa.

¹⁶ Rü wüxi ga ngunexü̃gu, rü nüma ga Yonatáü̃ ga Chaú nane rü Órewa naxũ ga Dabí íyexmaxü̃wa. Rü nayataãẽxẽxẽ rü pora nüxna nayaxã nax yexera Tupanaaxü̃́ yaxõõxü̃ca̱x.

¹⁷ Rü Dabíxü̃ ñanagürü: —Taxuca̱xma cumuü̃ erü chaunatü ya Chaú rü tagutáma cuxü̃ itayangau. Cuma rü tá Iraéanecüã̱xgüarü ãẽ̱xgacü quixĩ, rü choma rü tá cutüü̃wa chaxü. Rü ngẽma rü chaunatü ya Chaú rü marü nüxü̃ tacua̱x —ñanagürü.

¹⁸ Rü yexguma ga nüma ga Dabí rü Yonatáü̃ rü Cori ya Tupanape̱xewa nügümaxã inaxügagü. Rü yemawena ga Yonatáü̃ rü nataegu, rü nüma ga Dabí rü yexmatama Óregu narüxã̱ũ̱x.

¹⁹ Natürü ĩane ga Chíxcüã̱x ga duü̃xü̃gü, rü Guibeáwa naxĩ rü Chaúmaxã narüdexagü, rü ñanagürügü: —Dabí rü torü naanegu nicu̱x nagu i ngẽma ãxmaxü̃gü i ma̱xpǘne ya Aquiráwa ngẽxmagüxü̃ i Órearü Naixnecüwa i ngẽma chianexü̃arü súrwaama.

²⁰ Rü ngẽxguma curü me yixĩxgu, Pa Ãẽ̱xgacüx ¡rü towe rüxũ! Rü toma rü tá cuxca̱x tayayauxgü rü cuxna tá tanamu —ñanagürügü.

²¹ Rü nüma ga Chaú rü nanangãxü̃ rü ñanagürü: —¡Tupana pexü̃ rüngü̃xẽxẽ erü choxü̃ pengechaü̃ rü chaugu perüxĩnüe!

²² ¡Rü ẽcü pewoegu i ñu̱xmax, rü mea naxca̱x peyada̱u̱x i ngẽma nachica i nawa nangẽxmaxü̃! Rü ngẽxguma nüxü̃ ipeyangauxgu rü ¡chomaxã nüxü̃ peyarüxu! Erü nüma rü naãxẽxü̃ nacua̱xüchi.

²³ ¡Rü mea nüxü̃ pidaugü i guxü̃ma i norü cu̱xchicaxü̃ rü ñu̱xũchi nua chomaxã nüxü̃ peyarüxu! Rü choma rü tá pewe ngéma chaxũ. Rü ega aixcüma ngẽma naanewa nangẽxmagu, rü choma rü tá naxca̱x chadauama natanügu i ngẽma Yudátanüxü̃ —ñanagürü.

²⁴ Rü nüma ga yema Chíxcüã̱xgü rü Chaúxü̃ narümoxẽgü, rü ñu̱xũchi norü ĩaneca̱x nawoegu. Rü nüma ga Dabí rü norü churaragümaxã rü chianexü̃ ga Maóü̃arü doxonexü̃wa nayexmagü ga yema chianexü̃arü súrwaama.

²⁵ Rü nüma ga Chaú rü norü churaragü rü inaxĩãchi nax naxca̱x nayadaugüxü̃ca̱x. Rü yexguma yemaxü̃ nacua̱xgu ga Dabí, rü guma ma̱xpǘnearü ãxmaxü̃wa nixĩgachi rü tóxnamana naxĩ ga Maóü̃arü chianexü̃wa. Rü nüma ga Chaú rü yema Maóü̃arü chianexü̃gu naxücu nax yexma Dabíca̱x nadauxü̃ca̱x.

^26-27 Rü nüma ga Chaú rü guma ma̱xpǘnecüwagu namaxã nixũ ga norü churaragü. Rü nüma ga Dabí rü norü tocüwagu Chaúcha̱xwa nibuxmü namaxã ga norü churaragü. Rü yexguma marü Chaú norü churaragümaxã Dabíxü̃ ínaxüexü̃gu nax yayauxgüãxü̃ca̱x, rü Chaúxü̃tawa nangu ga wüxi ga orearü ngeruxü̃ ga namaxã nüxü̃ yarüxuxü̃ nax paxa nataeguxü̃ca̱x yerü ga Firitéugü rü wenaxarü Iraéanegu nachocu.

²⁸ Rü yemaca̱x nüma ga Chaú rü nüxü̃ narüchau nax Dabíwe yangẽchigüxü̃, rü nataegu nax Firitéugümaxã nügü yadaixü̃ca̱x. Rü yexgumacürüwa ga yema nachica ga Dabí nawa yexmaxü̃ rü Ma̱xpǘne ya Nawa Yigüna Ixĩgachitanünegu naxãéga.

²⁹ Rü yemawena ga Dabí rü En-gádiarü chianexü̃wa naxũ nax yéma ma̱xpǘnegüarü cu̱xchicaxü̃wa nayexmaxü̃ca̱x.