1 Chamué 12 - Tupanaarü Ore

Chamué rü Chaúme̱xẽgu nanaxǘ ga Iraéanecüã̱xgü nax nüma namaxã inacuáxü̃ca̱x

¹ Rü yemawena ga Chamué rü guxü̃ma ga Iraéanecüã̱xgüpe̱xewa ñanagürü: —Pema nüxü̃ pecua̱x rü guxü̃ma ga yema naxca̱x ípecaxü̃ rü pexca̱x chanaxü nax yangucuchixü̃ca̱x ya yimá perü ãẽ̱xgacü ya réi.

² Daa nixĩ ya ãẽ̱xgacü ya pemaxã tá icuácü. Choma rü marü chaya rü chataueru, natürü chaunegü rü petanüwa nangẽxmagü. Choma nixĩ ga yexguma changextü̱xügucürüwatama pemaxã ichacuáxü̃ rü ñu̱xma rü ta.

³ Rü ñu̱xma rü daxe chixĩ. Ega ngẽxguma chi texéarü wocaca̱x rüe̱xna búruca̱x changĩ̱xgux, rüe̱xna texé chi chaxaixgu, rü chixri tümamaxã ichacua̱xgu rüe̱xna chanayauxtanügu ga ta̱xacürü guxchaxü̃ chamexẽẽ̱xgu, rü marü name i Cori ya Tupanape̱xewa rü nape̱xewa ya yimá ãẽ̱xgacü ya Tupana nüxü̃ unetacü, rü choxü̃ ípexuaxü̃. Rü choma rü tá chanaxütanü i ngẽma pexü̃́ changetanüxü̃ —ñanagürü.

⁴ Rü nüma ga Iraéanecüã̱xgü rü nanangãxü̃gü, rü ñanagürügü: —Taguma toxchi cuxai rüe̱xna chixri tomaxã icucua̱x. Rü taguma cunayauxtanü ega torü guxchaxü̃ cumexẽẽgu —ñanagürügü.

⁵ Rü nüma ga Chamué rü ñanagürü: —Ñu̱xma rü nüma ya Cori ya Tupana, rü yimá ãẽ̱xgacü ya nüma nüxü̃ naxunetacü nixĩ ya nüxü̃ ĩnüecü nax pema rü taxuxü̃ma i chixexü̃ chowa ipeyangauxü̃ —ñanagürü. Rü nüma ga duü̃xü̃gü rü ñanagürügü: —Aixcüma ngẽmaãcü nixĩ —ñanagürügü.

⁶ Rü nüma ga Chamué rü ñanagürü ta nüxü̃ ga yema Iraéanecüã̱xgü: —Nüma ga Cori ya Tupana nixĩ ga Moichéxü̃ rü Aróü̃xü̃ naporaexẽẽxü̃ nax Equítuanewa perü o̱xigüxü̃ ínanguxü̃xẽẽxü̃ca̱x.

⁷ Rü pema rü ípemexẽẽgü erü Cori ya Tupanape̱xewa tá pexna nüxü̃ chacua̱xãchixẽxẽ i guxü̃ma i nüma pexca̱x rü perü o̱xigüca̱x naxüxü̃ woo tama aixcüma naga pexĩnüe.

⁸ Rü yexguma Acóbu rü ñu̱xũchi natanüxü̃ Equítuanewa ngugügu, rü mucü ga taunecü yéma nayexmagügu ga guxema pexrü o̱xigü, rü nüma ga Equítuanecüã̱xgü rü chixri tümamaxã inacua̱x. Rü yemaca̱x Cori ya Tupanana nacagüe. Rü nüma ga Cori ya Tupana rü Moichéxü̃ rü ñu̱xũchi Aróü̃xü̃ yéma namugü nax Equítuanewa ínanguxü̃xẽẽãxü̃ca̱x ga yema pexrü o̱xigü. Rü ñaa nachicawa nanangugüxẽxẽ.

⁹ Natürü ga nümagü rü norü Cori ya Tupanaxü̃ narüngümae. Rü yemaca̱x nüma ga Tupana rü ĩane ga Achóxarü ãẽ̱xgacü ga Yabíü̃arü churaragüeru ga Chícharame̱xẽwa nanayexmagüxẽxẽ. Rü ñu̱xũchi Firitéugüme̱xẽwa rü Moáarü ãẽ̱xgacüme̱xẽwa nanayexmagüxẽxẽ. Rü yexmagü nixĩ ga perü o̱xigümaxã nügü daixü̃.

¹⁰ Natürü nüma ga Iraétanüxü̃ rü noxtacüma Tupanamaxã nüxü̃ nixugüe nax chixexü̃ naxügüxü̃ rü nüxna yaxĩgachitanüxü̃. Rü ñanagürügü: “Cupe̱xewa chixexü̃ taxü erü cuxü̃ ítata̱xgü rü ñu̱xũchi nüxü̃ ticua̱xüü̃gü i naxchicüna̱xãgü i Baá rü Ataré. Rü ngẽmaca̱x cuxü̃ taca̱a̱xü̃ nax naxme̱xwa toxü̃ ícunguxü̃xẽẽxü̃ i ngẽma torü uanügü. Rü cumaxã nüxü̃ tixugüe nax cuxü̃xicatama tá ticua̱xüü̃güxü̃”, ñanagürügü.

¹¹ Rü yemaca̱x ga Tupana rü Yerubaáxü̃ rü Baráxü̃ rü Yetéxü̃ rü Chamuéxü̃ yéma namu nax perü uanügüme̱xẽwa pexü̃ ínanguxü̃xẽẽxü̃ca̱x. Rü ngẽmaca̱x nixĩ i ñu̱xma rü taãẽwa pengẽxmagüxü̃.

¹² Natürü ga pema ga yexguma Amóü̃tanüxü̃arü ãẽ̱xgacü ga Naáx pexca̱x íyachoõchichaü̃gu nax pexü̃ nada̱i̱xü̃ca̱x, rü choxna naxca̱x peca ga wüxi ga ãẽ̱xgacü nax pemaxã inacuáxü̃ca̱x woo nax Cori ya Tupanachire̱x nax yixĩxü̃ ya perü ãẽ̱xgacü.

¹³ Rü daa nixĩ ya yimá ãẽ̱xgacü ya pematama naxca̱x ípecacü. Rü nüma ya Cori ya Tupana rü marü pexna nanamu ya yimá ãẽ̱xgacü ya naxca̱x ípecacü.

¹⁴ Rü ñu̱xma i pema rü name nixĩ i aixcüma Cori ya Tupanaxü̃ pengechaü̃gü, rü nüxü̃ picua̱xüü̃gü rü naga pexĩnüe rü tama nüxü̃ perüngümae i norü mugü. Rü wüxigu namaxã ya yimá perü ãẽ̱xgacü rü penaxwa̱xe ya Tupana naxwa̱xexü̃ãcüma pemaxẽ. Rü ngẽxguma ngẽmaãcü penaxü̱xgu rü guxü̃táma mea nixũ.

¹⁵ Natürü ngẽxguma taxũtáma naga pexĩnüegu rü ngẽxguma nüxü̃ pexoo̱xgu i ngẽma norü mugü, rü nüma ya Tupana rü tá pexü̃ rü perü ãẽ̱xgacüxü̃ napoxcu.

¹⁶ ¡Rü taxṹ i pixĩgachixü̃! Rü tá nüxü̃ pedau i ngẽma taxü̃ i mexü̃ i Cori ya Tupana pepe̱xewa tá üxü̃ i ñu̱xmax.

¹⁷ Pema rü meama nüxü̃ pecua̱x rü ñu̱xma nax tríguarü buxgüwa nanguxü̃ rü taguma napu. Rü ngẽmaca̱x i ñu̱xma rü tá Tupanana chaca nax ãẽmacü rü pucü nua namuxü̃ca̱x nax ngẽmawa nüxü̃ picua̱xãchitanüxü̃ca̱x i ngẽma chixexü̃ i taxü̃ i pexüxü̃ ga yexguma wüxi ya perü ãẽ̱xgacü i réica̱x ípecaxgu —ñanagürü.

¹⁸ Rü yexguma ga nüma ga Chamué rü Tupanana naca. Rü yexgumatama nüma ga Cori ya Tupana rü ãẽmacü inanaxǘxẽxẽ rü nanapuxẽxẽ. Rü yexguma ga guxü̃ma ga yema duü̃xü̃gü rü poraãcü Cori ya Tupanaxü̃ rü Chamuéxü̃ namuü̃e.

¹⁹ Rü yemaca̱x guxü̃ma ga yema duü̃xü̃gü rü Chamuéxü̃ ñanagürügü: —¡Cori ya curü Tupanana toxca̱x naca nax tama tayuexü̃ca̱x! Erü ñu̱xma rü tanayexeraxẽxẽ i guxü̃ma i torü chixexü̃gü nagagu nax wüxi ya torü ãẽ̱xgacü i réica̱x nax ítaca̱xaxü̃ —ñanagürügü.

²⁰ Rü nüma ga Chamué rü nanangãxü̃ rü ñanagürü: —¡Taxuca̱xma pemuü̃e! Rü aixcüma nixĩ ga chixexü̃ pexüxü̃. Natürü i ñu̱xma rü ¡pexuãxẽ nax tama Cori ya Tupanana pexĩgachixü̃ca̱x, rü aixcüma nüxü̃ pengechaü̃güxü̃ca̱x rü nüxü̃ picua̱xüü̃güxü̃ca̱x!

²¹ ¡Rü taxṹ i nawe perüxĩxü̃ i ngẽma tupananetagü i tama pexü̃ rüngü̃xẽẽxü̃ rü tama pexü̃ maxẽxẽxẽxü̃! Erü ucaxü̃mare nixĩ i ngẽma tupananetagü.

²² Rü nümatama ya Cori ya Tupana rü marü pexü̃ nade yerü nanaxwa̱xe nax norü duü̃xü̃gü pixĩgüxü̃. Rü ngẽmaca̱x tagutáma pexü̃ ínawogü erü tama nanaxwa̱xe i texé nüxü̃ tixu nax tama yangu̱xẽẽãxü̃ i norü ore.

²³ Rü ñu̱xma i choma rü tama chanaxwa̱xe i pecadu chaxü, rü ngẽmaca̱x taxũtáma nüxü̃ charüchau nax pexca̱x chayumüxẽxü̃. Rü tá pexü̃ changúexẽxẽama nax mea Cori ya Tupanaca̱x pemaxẽxü̃ rü mea nawe perüxĩxü̃ca̱x.

²⁴ Rü ñu̱xma i pema rü penaxwa̱xe i Cori ya Tupanaaxü̃́ peyaxõgü rü aixcüma nüxü̃ picua̱xüü̃gü. ¡Rü nagu perüxĩnüe nax ñuxãcü poraãcü pexü̃ nax nangü̃xẽxẽxü̃!

²⁵ Natürü ngẽxguma chi chixexü̃ pexügüamagu, rü nüma ya Cori ya Tupana rü tá pexü̃ inarüxoxẽxẽ wüxigu namaxã ya perü ãẽ̱xgacü —ñanagürü ga Chamué.