Nüxíraxü̃xü̃ ga popera ga Timutéuca̱x naxümatüxü̃ ga Pauru 2 - Tupanaarü Ore

Yumüxẽchiga

¹ Rü ñu̱xma rü tá pemaxã nüxü̃ chixu nax ñuxãcü namexü̃ nax peyumüxẽgüxü̃. Rü ngẽma nüxíra naxca̱x peyumüxẽgüxü̃ tá nixĩ i guxü̃ma i duü̃xü̃gü i ñoma i naanewa maxẽxü̃. ¡Rü Tupanana naxca̱x peca nax nüxü̃ nangü̃xẽẽxü̃ca̱x rü nüxü̃́ nüxü̃ narüngü̃maxü̃ca̱x i norü pecadugü! ¡Rü moxẽ nüxna pexã ya Tupana naxca̱x i norü ngü̃xẽxẽ i guxü̃ i duü̃xü̃güna naxãxü̃!

² Rü ngẽxgumarüxü̃ ta name nixĩ i naxca̱x peyumüxẽ i guxü̃ma i nachixü̃anegüarü ãẽ̱xgacügü rü guxü̃ma i norü ngü̃xẽẽruü̃gü i ãẽ̱xgacügü nax ngẽmaãcü itaãẽgüxü̃ca̱x rü Tupanape̱xewa rü guxü̃ i duü̃xü̃güpe̱xewa tüxü̃́ nangẽxmaxü̃ca̱x i wüxi i maxü̃ i aixcüma mexü̃.

³ Rü ngẽma nixĩ i namaxã nataãẽxü̃ ya yimá Tupana ya tüxü̃ maxẽxẽẽcü.

⁴ Erü nüma nanaxwa̱xe nax guxãma tüxü̃́ nangẽxmaxü̃ i maxü̃ i taguma gúxü̃ rü guxãma nüxü̃ cuáxü̃ i ngẽma ore i aixcüma ixĩxü̃.

⁵ Erü Tupana rü wüxitama nixĩ rü nataxuma i to. Rü ngẽxgumarüxü̃ ta wüxitama nixĩ i Tupanape̱xewa taétüwa chogüxü̃. Rü nüma nixĩ ya Ngechuchu ya Cristu ya Tupana Nane ga duü̃xü̃xü̃ ixĩcü.

⁶ Rü nüma ga Ngechuchu rü nügü inaxã rü nayu nax guxü̃ i duü̃xü̃güxü̃ naxütanüxü̃ca̱x nax Tupanaxü̃tawa nangugüxü̃ca̱x. Rü yexguma Ngechuchu yu̱xgu nixĩ ga Tupana yanguxẽẽxü̃ ga yema ü̃paacü nüxü̃ yaxuxü̃ rü tá duü̃xü̃güxü̃ namaxẽxẽxẽxü̃.

⁷ Rü Tupana choxü̃ naxuneta nax norü orearü ngeruxü̃ chixĩxü̃ca̱x. Rü choxü̃ namu nax chanangúexẽẽxü̃ca̱x i ngẽma duü̃xü̃gü i tama Yudíugü ixĩgüxü̃ nax nümagü rü ta yaxõgüãxü̃ca̱x rü nüxü̃ nacua̱xgüxü̃ca̱x i ngẽma ore i aixcüma ixĩxü̃. Rü ngẽma pemaxã nüxü̃ chixuxü̃, rü aixcüma nixĩ, rü tama chidora.

⁸ Rü ñu̱xma chanaxwa̱xe i guxü̃wama nayumüxẽgü i yatügü. Rü chanaxwa̱xe i ngearü pecaduã̱xãcüma naxugüme̱xẽ. Rü tama name i nügümaxã nanueãcüma rüe̱xna nügü nachoxü̃gagüãcüma nayumüxẽgü.

⁹ Rü chanaxwa̱xe i ngexü̃gü rü meamare üxü̃ i naxchirugu nicu̱xgü, rü meamare nügü namexẽẽyaegü, rü tama poraãcü nügü nanga̱xãẽgü úirumaxã rü meruxü̃gümaxã rü naxchiru i tatanüxü̃maxã.

¹⁰ Rü name nixĩ i meamare Tupanaca̱x namaxẽ, rü mexü̃ i puracü naxügü, erü ngẽmaãcü nanaxwa̱xegü nax namaxẽxü̃ i ngẽma ngexü̃gü i aixcüma Tupanaaxü̃́ yaxõgüxü̃.

¹¹ Rü chanaxwa̱xe i ngexü̃gü rü mea inaxĩnüe i ucu̱xẽgü. Rü tama name nax nachoxü̃gawa̱xegüxü̃.

¹² Erü ngexü̃gü rü tama chanaxwa̱xe nax perü ngutaque̱xegüwa yatügüxü̃ nangúexẽẽxü̃, rü yatügüétüwa naxügüxü̃. Rü name nixĩ i mea inarüxĩnüemare.

¹³ Yerü Tupana rü Adáü̃xü̃xíra naxü rü yixcama ga Ébaxü̃.

¹⁴ Rü Chataná rü tama Adáü̃xü̃ nawomüxẽxẽ, natürü yema ngecüxü̃ nixĩ ga nawomüxẽẽxü̃. Rü yemaacü pecadugu ingu ga yema ngecü.

¹⁵ Rü ngẽma ngexü̃gü rü ngẽxguma naxãxãcügügu rü tá inayauxgü i maxü̃ i taguma gúxü̃ ega mea ngĩxacügümaxã inacua̱xgügu, rü aixcüma yaxõgüãgu, rü aixcüma duü̃xü̃güxü̃ nangechaü̃gu rü mea Tupanape̱xewa namaxẽgu.