Nüxíraxü̃xü̃ ga to ga popera ga ãẽ̱xgacügüchiga ümatüxü̃ 22 - Tupanaarü Ore

¹ Rü yexguma ga Dabí rü ñanagürü: —Ñaa nachica i Orná trigu nawa púxü̃wa tá nangẽxma ya Tupanapata ya taxü̃ne rü ngẽma ãmarearü guruxü̃ nax ngẽmawa Iraéanecüã̱xgü Tupanaca̱x ínaguxü̃ca̱x i norü ãmaregü —ñanagürü.

Dabí nananutaque̱xe ga yemaxü̃gü nax naxügüã̱xü̃ca̱x ga Tupanapata ga taxü̃ne

² Rü yemawena rü nüma ga Dabí rü nanangutaque̱xexẽxẽ ga yema duü̃xü̃gü ga to ga nachixü̃anecüã̱xgü ga Iraétanügu ãchiü̃güxü̃. Rü guxemagüxü̃ namu nax nutaarü mexẽẽcüwawa tapuracüexü̃ nax gumamaxã naxügüã̱xü̃ca̱x ga Tupanapata ga taxü̃ne.

³ Rü yexgumarüxü̃ ta nananutaque̱xe ga muxü̃ma ga fieru nax yemawa naxüaxü̃ca̱x ga itapuagü ga ĩã̱xarü potaruü̃gü rü ĩã̱xarü chotaruü̃gü. Rü yexgumarüxü̃ ta nananutaque̱xe ga muxü̃ma ga bróũchenaxca̱x ga guma Tupanapata.

⁴ Rü yexgumarüxü̃ ta nananutaque̱xe ga muxü̃ma ga mürapewagü ga ocayiwanaxca̱x, yerü ga ĩanegü ga Chidóü̃cüã̱xgü rü Tírucüã̱xgü rü muxü̃ma ga mürapewagü ga ocayiwanaxca̱x yéma nana.

⁵ Rü nüma ga Dabí rü ñaxü̃gu narüxĩnü: —Yimá chaune ya Charomóü̃ rü nabumare, rü taxũta naãxẽxü̃ nacua̱x nax naxüaxü̃ ya yima Tupanapata ya taxü̃ne, erü yima napata tá ixĩxü̃ne rü tanaxwa̱xe nax nataxü̃ rü namexẽchixü̃, rü guxü̃ i nachixü̃anewa nanguchigaxü̃. Rü ngẽmaca̱x i ñu̱xma rü marü ichanaxügü nax chananutaque̱xexü̃ i guxü̃ma i ngẽmaxü̃gü i namaxã naxüxü̃ —ñaxü̃gu narüxĩnü. Rü yemaacü ga Dabí rü nananutaque̱xe ga guxü̃ma ga yemaxü̃gü naxü̃pa ga nax nayuxü̃.

⁶ Rü yemawena rü nüma ga Dabí rü nane ga Charomóü̃ca̱x naca rü namaxã nüxü̃ nixu nax nüma naxüaxü̃ca̱x ga guma ĩpata ga taxü̃ne ga Cori ya Iraétanüxü̃arü Tupanaarü ixĩxü̃ne.

⁷ Rü yexguma ga Dabí rü Charomóü̃xü̃ ñanagürü: —Pa Chaunex, choxü̃́ nangúchaü̃ nax chanaxüxü̃ ya wüxi ya ĩpata ya taxü̃ne naxca̱x ya Cori ya chorü Tupana.

⁸ Natürü nüma ya Tupana rü chomaxã nüxü̃ nixu rü ñanagürü: “Cuma rü tacü ya nagü cunabaxẽxẽ rü muxü̃ ga daiwa cuxüpetü. Rü ngẽmaca̱x taxũtáma cuma nixĩ i cha̱u̱xca̱x cunaxüxü̃ ya yima ĩpata ya taxü̃ne, erü chope̱xegu cunabaxẽxẽ ya tacü ya nagü i ñoma i naanewa.

⁹ Natürü wüxi ya cune tá cuxü̃́ nangẽxma, rü nüma rü wüxi ya yatü ya ngüxmüxẽxẽruxü̃ tá nixĩ namaxã i norü uanügü i nüxna ngaicamagüxü̃. Rü ngẽmaca̱x i naéga rü Charomóü̃ tá nixĩ. Rü tá íchayachaxãchixẽxẽ i ngẽma norü uanügü nax tama nachixewegüãxü̃ca̱x i Iraétanüxü̃.

¹⁰ Rü nüma tá nixĩ i naxüaxü̃ ya chopata ya taxü̃ne. Rü ñoma chaunexü̃chirüxü̃ tá nixĩ rü choma rü tá ñoma nanatürüxü̃ chixĩ. Rü tá nüxü̃ charüngü̃xẽxẽxü̃ nax nüma rü nane rü nataagü guxü̃gutáma ãẽ̱xgacü yixĩxü̃ i Iraéanewa”, ñanagürü ga Tupana.

¹¹ Rü ñu̱xmax, Pa Chaunex, rü cuxü̃tawa nangẽxma ya Tupana, rü marü cua̱x cuxna naxã nax cunaxüxü̃ca̱x ya yima napata ya taxü̃ne, yexgumarüxü̃ ga cumaxã nax naxueguãxü̃ nax cuma tá yixĩxü̃ nax cunaxüxü̃.

¹² Rü nüma ya Cori ya Tupana rü marü cuxna nanaxã i ĩnü i mexü̃ rü curü cua̱x. Rü ngẽxguma nüma cuxü̃ yangucuchixẽẽgu nax Iraétanüxü̃arü ãẽ̱xgacü quixĩxü̃ ¡rü yanguxẽxẽ i ngẽma norü mugü ya Cori ya curü Tupana!

¹³ Rü guxü̃táma mea cuxü̃́ inixũ i ngẽxguma tá cuyanguxẽẽgu i ngẽma norü mugü rü norü ucu̱xẽgü ga Cori ya Tupana Moichémaxã nüxü̃ ixuxü̃ naxca̱x ga Iraétanüxü̃. ¡Ẽcü pora naxü rü cugü naporaxẽẽama! ¡Rü taxṹ i curümaãchixü̃! ¡Rü taxṹ i cumuü̃xü̃!

¹⁴ Rü dücax, choma rü pora chaxü nax chananutaque̱xexü̃ i ngẽmaxü̃gü nax naxüaxü̃ca̱x ya Cori ya Tupanapata ya taxü̃ne. Rü nangẽxma i 3,300 toneláda nagúxü̃ i úiru, rü 33,000 toneláda nagúxü̃ i diẽrumü. Rü ngẽma nax nataxü̃ i bróũche rü fieru rü ngẽmaca̱x taxucürüwama tanangugü i norü ya. Rü ngẽxgumarüxü̃ ta marü chananutaque̱xe i mürapewagü rü nutagü. Rü cumax rü tá cunaxüétü i ngẽma chanutaque̱xexü̃.

¹⁵ Rü ngẽxgumarüxü̃ ta i cumax rü cuxü̃́ nangẽxma i muxü̃ma i puracütanüxü̃ i nutaarü mexẽẽcüwaruü̃gü, rü cuxü̃́ nangẽxma i ĩxtapü̱xarü chauxnagüruü̃gü, rü corapinagü, rü yatügü i naguxü̃raü̃xü̃ i puracüxü̃ cuáxü̃.

¹⁶ Rü ngẽma úiru, rü ngẽma diẽrumü, rü ngẽma bróũche, rü ngẽma fieru, rü ngẽma nax namuxũchixü̃ rü taxucürüwama tanangugü. Rü ngẽmaca̱x name nax icunaxügüxü̃ i ngẽma puracü. ¡Rü nüma ya Cori ya Tupana cuxü̃ rüngü̃xẽxẽ! —ñanagürü ga Dabí.

¹⁷ Rü yemawena rü nüma ga Dabí rü yema Iraétanüxü̃maxã icua̱xgüxü̃xü̃ namu nax nane ga Charomóü̃xü̃ nangü̃xẽẽgüxü̃ca̱x.

¹⁸ Rü ñanagürü: —Cori ya Tupana rü petanüwa nayexma, rü ngẽmaca̱x i ngẽma togü i nachixü̃anegü rü tama pemaxã daigu narüxĩnüe rü guxü̃wama taãẽwa pengẽxmagü. Rü nüma ya Tupana rü cho̱xme̱xwa nanangexmagüxẽxẽ i guxü̃ma i duü̃xü̃gü i ñaa nachixü̃anewa maxẽxü̃. Rü ñu̱xmax rü Tupaname̱xẽwa rü norü duü̃xü̃güme̱xẽwa nangẽxma i ñaa naane.

¹⁹ Rü ngẽmaca̱x i ñu̱xmax rü name nixĩ nax aixcüma Tupanaca̱x pedaugüxü̃. ¡Rü penaxü̱x ya yima Tupanapata ya taxü̃ne nax ngéma penangexü̃ca̱x i ngẽma baú i Tupanaarü mugü nagu nuxü̃, rü ngéma yima Tupanapata ya taxü̃ne i tá pexüxü̃newa penanaxü̃ca̱x i ngẽma nawechigü i üünegüxü̃! —ñanagürü ga Dabí.