Nüxíraxü̃xü̃ ga to ga popera ga ãẽ̱xgacügüchiga ümatüxü̃ 20 - Tupanaarü Ore

Dabí nayapu ga Rabá

¹ Rü taunecüarü guxgu ga yexguma primaberawa nanguxgu, rü yexguma nixĩ ga ãẽ̱xgacügü naxca̱x daugüxü̃ nax to ga nachixü̃anearü ãẽ̱xgacümaxã nügü nada̱i̱xü̃. Rü nüma ga Yoá rü norü churaragümaxã nanapu ga Amóü̃tanüxü̃arü naane. Rü naxca̱x ínayaxüãchi ga ĩane ga Rabá. Rü nüxü̃ ínachomaegu rü nagu napogüe. Natürü nüma ga Dabí rü Yerucharéü̃watama nayexma.

² Rü yemawena ga Dabí rü yéma Rabáwa nangu. Rü guma ĩanearü ãẽ̱xgacüeruwa nanayaxu ga yema norü nga̱xcueruxü̃ ga úirunaxca̱x ga nutaxacügü ga imexẽchicümaxã nga̱xãẽxü̃ ga 33 quíru yáxü̃. Rü ñu̱xũchi Dabíeruwa nayanga̱xcuchigü. Rü nüma ga Dabí rü guma ĩanewa nanade ga muxü̃ma ga yemaxü̃gü ga itatanüxü̃.

³ Rü yema duü̃xü̃gü ga guma ĩanewa yaxügüxü̃ rü ínanagaxü̃. Rü cheragümaxã rü tríguarü puruü̃gü ga fierunaxca̱xmaxã rü yuemagümaxã nanapuracüexẽxẽ. Rü nüma ga Dabí rü yematama naxü ga guxü̃nema ga Amóü̃tanüxü̃arü ĩanegüwa. Rü yemawena rü guxü̃ma ga norü churaragümaxã Yerucharéü̃ca̱x nataegu.

Churaragü ga imáchanexü̃chixü̃maxã nügü nadai

⁴ Rü yemawena rü Guéchewa Firitéugümaxã nayexma ga to ga dai. Rü yema daigu nixĩ ga Chibecái ga ĩane ga Uchácüã̱x rü Chipáixü̃ yamáxü̃. Rü nüma ga Chipái rü yema imáchanexü̃chixü̃tanüxü̃ nixĩ. Rü yemaacü ga Iraétanüxü̃ rü Firitéugüxü̃ narüporamaegü.

⁵ Rü nayexma ga to ga dai ga Firitéugümaxã. Rü yema daigu rü Eranáü̃ ga Yaí nane nayama̱x ga Laxmí. Rü nüma ga Laxmí rü Gáxcüã̱x ga Goriáx naenexẽ nixĩ, rü guma naxne rü wüxi ga wocae ga natamena̱xãxü̃chicü nixĩ.

⁶ Rü yemawena rü nayexma ga to ga dai ga Gáxwa. Rü yemawa nayexma ga wüxi ga yatü ga máchanexü̃chixü̃ ga mutaréme̱xẽxü̃. Rü 6 chigü nixĩ ga wüxime̱xẽwa, rü 6 chigü nixĩ ga wüxicutüwa. Rü guxü̃wama rü 24 nixĩ. Rü nüma rü yema imáchanexü̃tanüxü̃ nixĩ.

⁷ Rü nüma ga yema mutaréme̱xẽxü̃ rü Iraétanüxü̃xü̃ naxãxũne. Natürü Yonatáü̃ ga Chimá nane rü nayama̱x. Rü nüma ga Chimá rü Dabíenexẽ nixĩ.

⁸ Rü yema duü̃xü̃gü ga imáchanexü̃chixü̃ rü Gáxcüã̱x ga Refátanüxü̃ nixĩgü. Natürü Dabíme̱xẽgu rü norü churaragüerugüme̱xẽgu nayi.