Nüxíraxü̃xü̃ ga to ga popera ga ãẽ̱xgacügüchiga ümatüxü̃ 18 - Tupanaarü Ore

Dabí rü norü uanügüxü̃ narüporamae

¹ Rü yemawena nüma ga Dabí rü Firitéugüxü̃ narüporamae. Rü Firitéugüna nanapu ga ĩane ga Gáx namaxã ga norü ĩanexacügü. Rü yemaacü Dabíme̱xẽwa nayexmagü ga yema Firitéugü.

² Rü yexgumarüxü̃ ta Moácüã̱xgüxü̃ narüporamae. Rü nüma ga Moátanüxü̃ rü Dabíme̱xẽwa nayexmagü, rü Dabíaxü̃́ nanaxütanügü ga yema diẽru ga Dabí nagu unetaxü̃.

³ Rü yexguma Chobáanearü ãẽ̱xgacü ga Adáx-éche rü yema naane ga taxtü ga Eufrátewa yexmaxü̃wa naxũxgu nax napuãxü̃ca̱x, rü Dabí rü ĩane ga Amágu Adáx-échemaxã nügü nadai rü nüxü̃ narüporamae.

⁴ Rü nüma ga Dabí rü ínanayauxü̃ ga 7,000 ga Adáx-échearü churaragü ga cowarugu ĩxü̃, rü 20,000 ga norü churaragü ga nacutügumare ĩxü̃, rü 1,000 ga norü carugü. Rü nanapoemetü̱xü ga yema cowarugü ga carugü itúgüxü̃, natürü ínayaxüxẽxẽ ga 100 ga cowarugü naxca̱x ga 100 ga carugü.

⁵ Rü yemawena rü Chíriaanecüã̱xgü ga ĩane ga Damácuwa maxẽxü̃ rü Chobáanearü ãẽ̱xgacü ga Adáx-échearü ngü̃xẽẽwa yéma naxĩ. Natürü nüma ga Dabí rü nüxü̃ narüporamae. Rü yexma nanadai ga 22,000 ga Chírianecüã̱xgü.

⁶ Rü yemawena rü nüma ga Dabí rü yexma Chíriaanearü ĩane ga Damácugu nayaxüpata ga norü churaragü. Rü yemaacü ga Chíriaanecüã̱xgü rü Dabíme̱xẽwa nayexmagü rü nüxü̃́ nanaxütanügü ga yema diẽru ga Dabí nagu unetaxü̃. Rü yemaacü ga Tupana rü Dabíxü̃ narüporamaexẽxẽ ga ngextá ínaxũxü̃wa.

⁷ Rü yemawena ga Dabí rü nanade ga Adáx-échearü churaragüerugüarü poxü̃ruü̃gü ga úirunaxca̱x. Rü Yerucharéü̃wa nanana.

⁸ Rü yexgumarüxü̃ ta nanade ga muxü̃ma ga yemaxü̃gü ga bróũchenaxca̱x ga Adáx-échearü ĩanegü ga Tibáwa rü Cúü̃wa yexmagüxü̃. Rü yema bróũchewa nixĩ ga Charomóü̃ naxüxü̃ ga Tupanapata ga taxü̃nearü dexápáxü̃ rü guma norü caxtagü ga nga̱xãẽruü̃gü rü ñu̱xũchi yema Tupanapataarü nawechigü.

^9-10 Rü yexguma ĩane ga Amáarü ãẽ̱xgacü ga Toí nüxü̃ cuáchigagu nax Dabí rü Chobáanearü ãẽ̱xgacü ga Adáx-échexü̃ naporamaexü̃, rü nüma ga Toí rü nane ga Aduráü̃xü̃ yéma Dabíxü̃tawa namu namaxã ga muxü̃ma ga yemaxü̃gü ga úirunaxca̱x rü diẽrumünaxca̱x rü bróũchenaxca̱x. Rü yemaacü Dabíxü̃ narümoxẽ rü namaxã nataãxẽ yerü Adáx-échexü̃ narüporamae. Rü ü̃paacü ga nüma ga Toí rü ta Adáx-échemaxã nügü nadai.

¹¹ Rü nüma ga Dabí rü Tupanana nanana ga yema yemaxü̃gü. Rü wüxigu inanana namaxã ga yema úiru rü diẽrumü ga nüxna napuxü̃ ga Edóü̃tanüxü̃ rü Moátanüxü̃ rü Amóü̃tanüxü̃ rü Firitéugü rü Amaréxtanüxü̃.

¹² Rü yexgumarüxü̃ ta ga nüma ga Abichái ga Cheruiá nane rü Yucüraarü Metachinüxü̃gu nanadai ga 18,000 ga Edóü̃tanüxü̃.

¹³ Rü yemawena rü nüma ga Dabí rü yexma Edóü̃anegu nayaxüpata ga norü churaragü. Rü guxü̃ma ga yema Edóü̃tanüxü̃gu rü Dabíme̱xẽwa nayexmagü. Rü yemaacü ga Tupana rü Dabíxü̃ narüporamaexẽxẽ ga ngextá ínaxũxü̃wa.

Dabíarü churaragüerugüchiga

¹⁴ Rü nüma ga Dabí rü guxü̃ma ga Iraétanüxü̃arü ãẽ̱xgacü nixĩ, rü aixcüma meama we̱xgu namaxã inacua̱x.

¹⁵ Rü gumá norü churaragümaxã icuácü nixĩ ga Yoá ga Cheruiá ngĩne. Rü Yochapáx ga Ailúx nane nixĩ ga Dabíarü poperaarü ümatüruxü̃.

¹⁶ Rü Chadóx ga Aitúx nane rü ñu̱xũchi Aimérex ga Abiatá nane nixĩ ga chacherdótegü ixĩgüxü̃. Rü Chaxchá nixĩ ga norü ümatüruxü̃ ga guxü̃ma ga yema Iraéanewa ngupetüxü̃.

¹⁷ Rü Benaía ga Yoiadá nane nixĩ ga namaxã icuáxü̃ ga yema churaragü ga Queretéugü rü Peretéugü ga Dabína daugüxü̃. Rü Dabí nanegü nixĩ ga norü ngü̃xẽẽruxü̃gü ixĩgüxü̃.