Nüxíraxü̃xü̃ ga to ga popera ga ãẽ̱xgacügüchiga ümatüxü̃ 15 - Tupanaarü Ore

Dabí rü Lebítanüxü̃xü̃ namu nax Yerucharéü̃wa nangegüãxü̃ca̱x ga baú ga Tupanaarü mugü nawa yexmaxü̃

¹ Rü nüma ga Dabí rü duü̃xü̃güxü̃ namu nax guma Dabíarü Ĩanegu naxügüã̱xü̃ca̱x ga napata. Rü yexgumarüxü̃ ta nanamu nax naxügüã̱xü̃ca̱x ga wüxi ga yexwaca̱xü̃ne ga ĩpata ga naxchirunaxca̱x nax yéma nayexmaxü̃ca̱x ga yema baú ga Tupanaarü mugüchixü̃.

² Rü yexguma nüma ga Dabí rü nanamu rü ñanagürü: —Ngẽxguma napatawa penangexgu i ngẽma baú i Tupanaarü mugüchixü̃, rü Lebítanüxü̃xicatátama nixĩ i ngẽma yangegüxü̃. Erü nümagü nixĩ ya Tupana nüxü̃ unetaxü̃ nax guxü̃gutáma ngẽma puracü naxügüxü̃ca̱x —ñanagürü.

³ Rü ñu̱xũchi nüma ga Dabí rü Yerucharéü̃gu nanangutaque̱xexẽxẽ ga guxü̃ma ga Iraétanüxü̃ nax yemaacü guma napata ga yexwacax naxügünewa nangegüaxü̃ca̱x ga yema baú ga Tupanaarü mugüchixü̃.

⁴ Rü yexgumarüxü̃ ta nanangutaque̱xexẽxẽ ga Aróü̃tanüxü̃ rü Lebítanüxü̃.

⁵ Rü yexgumarüxü̃ ta naxĩtaque̱xe ga Queáxtanüxü̃. Rü Uriéx nixĩ ga namaxã icuáxü̃. Rü 120 nixĩ ga norü mu namaxã ga Uriétanüxü̃.

⁶ Rü yexgumarüxü̃ ta naxĩtaque̱xe ga Merarítanüxü̃. Rü Achaía nixĩ ga namaxã icuáxü̃. Rü 220 nixĩ ga norü mu namaxã ga Achaíatanüxü̃.

⁷ Rü yexgumarüxü̃ ta naxĩtaque̱xe ga Guerchóü̃tanüxü̃. Rü Yoé nixĩ ga namaxã icuáxü̃. Rü 130 nixĩ ga norü mu namaxã ga Yoétanüxü̃.

⁸ Rü yexgumarüxü̃ ta naxĩtaque̱xe ga Erichapáü̃tanüxü̃. Rü Chemaía nixĩ ga namaxã icuáxü̃. Rü 200 nixĩ ga norü mu namaxã ga Chemaíatanüxü̃.

⁹ Rü yexgumarüxü̃ ta naxĩtaque̱xe ga Ebróü̃tanüxü̃. Rü Erié nixĩ ga namaxã icuáxü̃. Rü 80 nixĩ ga norü mu namaxã ga Eriétanüxü̃.

¹⁰ Rü yexgumarüxü̃ ta naxĩtaque̱xe ga Uchiétanüxü̃. Rü Aminadá nixĩ ga namaxã icuáxü̃. Rü 112 nixĩ ga norü mu namaxã ga Aminadátanüxü̃.

¹¹ Rü ñu̱xũchi nüma ga Dabí rü naxca̱x nangema ga chacherdótegü ga Chadóx rü Abiatá. Rü yexgumarüxü̃ ta naxca̱x nangema ga yema Lebítanüxü̃ ga Urié, rü Achaía, rü Yoé, rü Chemaía, rü Erié, rü Aminadá.

¹² Rü ñanagürü nüxü̃: —Pema nax namaxã pecuáxü̃ i Lebítanüxü̃ rü name nixĩ i pema rü petanüxü̃ Tupanape̱xewa pegü pimexẽẽgü nax ngẽmaãcü ngẽma nachica i chamexẽẽxü̃wa penangexü̃ca̱x i ngẽma baú i Cori ya Iraétanüxü̃arü Tupanaarü mugüchixü̃.

¹³ Rü yexguma noxri yayaxu̱xgu ga yema baú ga Tupanaarü mugüchixü̃, rü tama pema peyayaxu. Rü yemaca̱x ga nüma ga Tupana rü nanadai ga ñuxre ga tatanüxü̃, yerü tama naga taxĩnüe rü tama nüxna icaxíraãcü tayayauxgü —ñanagürü ga Dabí.

¹⁴ Rü yexguma nüma ga yema chacherdótegü rü yema Lebítanüxü̃ rü Tupanape̱xewa nügü nimexẽẽgü nax yemaacü yangegüãxü̃ca̱x ga yema baú ga Iraétanüxü̃arü Tupanaarü mugüchixü̃.

¹⁵ Rü yema naxpawerumaxã nügüãtügu nayangetaü̃gü yema Tupana rü Moichémaxã nüxü̃ ixuxü̃rüxü̃.

¹⁶ Rü ñu̱xũchi nüma ga Dabí rü yema Lebítanüxü̃maxã icua̱xgüxü̃xü̃ namu nax nüxü̃ naxunetagüxü̃ca̱x ga wiyaetanüxü̃ rü paxetatanüxü̃ nax taãẽãcüma norü ngúchaü̃maxã napaxgüãxü̃ca̱x ga paxetaruü̃gü ga árpagü ga ixíraxü̃, rü árpagü ga ítáxü̃, rü platíyugü.

¹⁷ Rü nüma ga yema Lebítanüxü̃ rü nüxü̃ naxunetagü ga Emáü̃ ga Yoé nane, rü Emáü̃enexẽ ga Achá ga Berequía nane, rü Merarítanüxü̃ ga Etáü̃ ga Cuchaía nane.

¹⁸ Rü yexgumarüxü̃ ta nüxü̃ naxunetagü ga Lebítanüxü̃ ga yema tomaepü̱x ga paxetatanüxü̃arü ngü̃xẽẽruü̃gü. Rü yemagü nixĩ ga Chacaría, rü Yaachié, rü Chemiramóx, rü Yeié, rü Uní, rü Eriá, rü Benaía, rü Maachía, rü Matatía, rü Eriferéu rü Meneía. Rü nüxü̃ naxunetagü ta ga yema Tupanapataarü ĩã̱xarü dauruü̃gü ga Obéx-edóü̃ rü Yeié.

¹⁹ Rü nüma ga yema wiyaeruü̃gü ga Emáü̃ rü Acháx rü Etáü̃ nixĩgü ga yema platiyuarü paxruü̃gü.

²⁰ Rü yema árpagü ga ixíraxü̃arü paxruü̃gü nixĩ ga Chacaría rü Achié rü Chemiramóx rü Yeié rü Uní rü Eriá rü Maachía rü Benaía.

²¹ Rü yema árpagü ga taxü̃arü paxruü̃gü nixĩ ga Matatía rü Eriferéu rü Meneía rü Obéx-edóü̃ rü Yeié rü Achachía. Rü nümagü nixĩ ga namaxã inacua̱xgüxü̃ ga wiyaegü.

²² Rü Quenanía nixĩ ga yema paxetatanüxü̃maxã rü wiyaetanüxü̃maxã icuáxü̃ ga yexguma yema Lebítanüxü̃ yangegügu ga yema Tupanaarü mugüchixü̃ ga baú. Yerü nüma ga Quenanía rü wüxi ga yatü ga nüxü̃ cuácü nixĩ.

^23-24 Rü Berequía rü Ercaná nixĩ ga namaxã icua̱xgüxü̃ ga yema nüxna daugüxü̃ ga yema baú ga Tupanaarü mugüchixü̃. Rü yema chacherdótegü ga yema baúpe̱xewa cornétagu icuegüxü̃ nixĩ ga Chebanía rü Yochapáx rü Natanaé rü Amachái rü Chacaría rü Benaía rü Eriéche. Rü Obéx-edóü̃ rü Yeía nixĩ ga to ga yema baúna daugüxü̃.

²⁵ Rü nüma ga Dabí rü wüxigu yema Iraétanüxü̃arü ãẽ̱xgacügümaxã rü yema churaragüerugümaxã taãẽãcüma Obéx-edóü̃patawa naxĩ nax yayauxgüãxca̱x ga yéama baú ga Tupanaarü mugü nagu nuxü̃ nax Yerucharéü̃wa nangegüãxü̃ca̱x.

²⁶ Rü nüma ga Tupana rü poraãcü nüxü̃ narüngü̃xẽxẽ ga yema Lebítanüxü̃ ga yangetaü̃güxü̃ ga yema baú ga Tupanaarü mugü nagu nuxü̃. Rü yemaca̱x Tupanaca̱x nanadai ga 7 ga woca ga iyatüxü̃ rü 7 ga carnérugü rü ñu̱xũchi naxca̱x ínanagugü.

²⁷ Rü nüma ga Dabí rü guxü̃ma ga yema Lebítanüxü̃ ga yema baú ingetaü̃güxü̃ rü yema wiyaeruü̃gü rü ñu̱xũchi nüma ga wiyaegümaxã icuácü ga Quenanía rü naxchiru ga imáxü̃ ga línunaxca̱x ixĩgüxü̃gu nicu̱xgü. Rü nüma ga Dabí rü yema naxchiruétüwa nicuxcuchi ga wüxi ga norü daxũ ga bochacüüxü̃.

²⁸ Rü yemaacü nüma ga Dabí, rü guxü̃ma ga yema Iraétanüxü̃ rü nagu nicuegü ga carnéruchatacu̱xregü rü nanapaxgü ga platíyugü rü árpagü ga ixíraxü̃ rü árpagü ga ítáxü̃. Rü yemaacü taãẽãcü Yerucharéü̃wa nanangegü ga yema baú ga Tupanaarü mugü nagu nuxü̃.

²⁹ Rü yexguma Yerucharéü̃wa namaxã nangugügu ga yema baú ga Tupanaarü mugüchixü̃, rü ngĩma ga Chaúxacü ga Micá rü ãẽ̱xgacüpataarü beü̃tánawa idawenü. Rü yexguma nüxü̃ nada̱u̱xgu nax taãẽãcüma íyayüxüxü̃ ga Dabí rü poraãcüma ngĩãẽwa nangu̱x ga yema nax naxüxü̃ ga Dabí.