Nüxíraxü̃xü̃ ga to ga popera ga ãẽ̱xgacügüchiga ümatüxü̃ 10 - Tupanaarü Ore

Chaú rü nanegü rü daigu nayue

¹ Rü nüma ga Firitéugü rü Iraéanecüã̱xgüca̱x ínayaxüãchi. Rü ma̱xpǘne ga Guibóagu nügü nadai. Rü muxü̃ma ga Iraéanecüã̱xgü yexma nayue rü yemaca̱x Firitéugücha̱xwa nibuxmü.

² Rü nüma ga Firitéugü rü Chaúwe rü nanegüwe nangẽgü. Rü nanadai ga Chaú nanegü ga Yonatáü̃ rü Abinadá rü Maquichúa.

³ Rü yemawena rü Chaúca̱x nibuxmü rü yema würamaxã ixãxnexü̃ rü Chaúmaxã namexchinügü rü poraãcü nanapi̱xẽẽgü.

⁴ Rü yexguma ga nüma ga Chaú rü yema norü poxü̃ruü̃xü̃ ñanagürü: —¡Nayaxu i ngẽma curü tara rü ngẽmamaxã choxü̃ nacana! Erü tama chanaxwa̱xe i choxü̃ ngúxü̃ ningexẽẽgü i ngẽma duü̃xü̃gü i tama Tupanaaxü̃́ yaxõgüxü̃ —ñanagürü. Natürü nüma ga gumá norü poxü̃ruxü̃ rü tama nanacanachaü̃ yerü namuü̃. Rü yexguma ga nüma ga Chaú rü nanayaxu ga norü tara rü nümatama nagu nügü nanguxẽxẽ.

⁵ Rü nüma ga gumá norü poxü̃ruxü̃ rü nüxü̃ nadau ga nax nayuxü̃ ga Chaú rü yemaca̱x ga nüma rü ta nügütama norü taragu nügü nanguxẽxẽ rü nayu.

⁶ Rü yemaacü nixĩ ga nayuexü̃ ga Chaú rü nanegü rü guxü̃ma ga natanüxü̃.

⁷ Rü guxü̃ma ga yema togü ga Iraéanecüã̱x ga guma ma̱xpǘnearü tuãchigu ipeaxü̃, rü yexguma nüxü̃ nadaugügu ga nax yabuxmüxü̃ ga Chaúarü churaragü rü marü nax nayuexü̃ ga Chaú rü nanegü, rü yexguma ga nüma ga yexma ãchiü̃güxü̃ rü ínachoxü̃ nawa ga guma norü ĩanegü rü nüma rü ta nibuxmü. Rü nüma ga Firitéugü rü yéma nangugü rü yexma naxãchiü̃gü nagu ga guma ĩanegü.

⁸ Rü yexguma nügü nadaixgu wenaxarü moxü̃ãcü rü nüma ga Firitéugü rü yema nügü ínada̱i̱xü̃wa naxĩ nax tüxü̃ yadexenegüxü̃ca̱x ga guxema yuexe. Rü yexma Chaúxü̃ rü nanegüxü̃ nayangaugü ga yexma yuexü̃ nagu ga guma ma̱xpǘne ga Guibóa.

⁹ Rü nüma ga Firitéugü rü Chaúxü̃ ínacuxü̃xü̃ne rü nanade ga naxne. Rü nayadaerugü rü nayangegü ga naeru rü naxnegü. Rü ñu̱xũchi guxü̃ma ga Firitéugüarü ĩanegüwa norü tupanachicüna̱xãpatawa duü̃xü̃gümaxã nüxü̃ nixugüetanü ga nachiga ga marü nax nayuxü̃.

¹⁰ Rü ñu̱xũchi ga guma naxnegü, rü nüma ga Firitéugü rü norü tupanagüchicüna̱xãpataxü̃gu nayanu. Rü yema naeru rü norü tupana ga Dagóü̃arü tupaucaarü ĩxtapü̱xgu nayacho.

^11-12 Rü guxü̃ma ga yema Iraéanecüã̱xgü ga ĩane ga Yabécüã̱x ga Garaáxanewa yexmane, rü yexguma nüxü̃ nacua̱xgügu ga yema Firitéugü Chaúmaxã ügüxü̃, rü guxü̃ma ga yema yatügü ga tama muü̃ewa̱xexü̃ rü wüxigu nügümaxã nagu narüxĩnüe nax yadexaxü̃ca̱x ga yema Chaúxü̃ne rü nanegüxü̃ne. Rü Yabéwa nanana. Rü yexma nixĩ ga nata̱xgüãxü̃ ga yema naxü̃negü natüü̃gu ga wüxi ga castaña. Rü yemawena 7 ga ngunexü̃ naxauree.

^13-14 Rü yemaacü nixĩ ga nayuxü̃ ga Chaú nagagu ga yema chixexü̃ ga naxüxü̃. Yerü nüma ga Chaú rü tama Tupanaga naxĩnü rü ñu̱xũchi yuüxü̃ ga ẽxü̃guxü̃xü̃ cuáxü̃na nayaca. Rü tama nüxna naca ga Tupana. Rü yemagagu nixĩ ga nüma ga Tupana ga nayuxẽẽãxü̃ ga Chaú rü Ichaxí nane ga Dabíxü̃ naxunetaxü̃ nax nüma Iraéanecüã̱xgüarü ãẽ̱xgacü yixĩxü̃ca̱x.