Santiago 4 - Tagbanwa

Pasakep nga matuud duꞌun it Ampuꞌang Diyus

¹ Ta ari pagpanggaringan it raꞌe-raꞌeten baw daꞌe-daꞌegen mi? Daꞌga baꞌ garing it sadili mi nga mga kaꞌiꞌirgan nga magdadaꞌeg kat nakem mi?

² May pagꞌirgan mi nga banar temed ega magkapisiꞌ mi. Aypaꞌ ka magꞌiseg kamu nga kuꞌimatay kamu na isaꞌun lamang maꞌimyu. Kaꞌirak mi it mga bagay nga ega magkapisiꞌ mi, yanay papuꞌnan it raꞌe-raꞌeten baw daꞌe-daꞌegen mi. Temed ta, unuka mapisiꞌ mi it ega magkaꞌrut kamu mangut duꞌun it Ampuꞌang Diyus?

³ Baw maski mangut kamu, ega naga ibgay ya it imyu, sabap it ega magayen i antap it nakem mi, ka gamiten mi kat mga buwat nga uyun kat sadili mi lamang nga kaꞌiꞌirgan, ega maat kaꞌirgan it Ampuꞌang Diyus.

⁴ Kamung mga taw, subung kamut pagꞌaꞌasawaeng babay nga barapakun, nga ega paglabiyen yay pagꞌasawa, ka atkayay buwat mi duꞌun it Ampuꞌang Diyus. Unu, ega magkaꞌrutan mi nga basta iyan i ragaen mi, mga bagay situt banwa ngaytu, pagkuntraꞌen mi i Ampuꞌang Diyus? Yay matuud, in siyu-siyu nga pagtemden ya nga ega kaꞌirgan it Ampuꞌang Diyus in daꞌga mga kaꞌiꞌirgan situt banwa i ragaen ya, egay beken, magkasiguru ya i sadili ya nga kakuntraꞌ it Ampuꞌang Diyus.

⁵ Ka barang tanud mi nga egay kakapulusan it ipagpanulduꞌ ngayan duꞌun it ampang it Ampuꞌang Diyus, nga basta nakem it taw, maꞌireg nga maꞌireg seked it subraꞌ nay kaꞌinggit ya.

⁶ Temed subraꞌ paꞌ kaytu i ildaw nga ipagbegay it Ampuꞌang Diyus. Aypaꞌ ka magsusurat kat kasuratan nga magꞌaat, “Talagang pagkuntraꞌen it Ampuꞌang Diyus i mga mapiyataꞌas-taꞌas, temed dakulay ildaw nga ipagbegay ya kat mga mapiyababaꞌ.”

⁷ Aypaꞌ pasakep kamu nga matuud it Ampuꞌang Diyus. Iyan si Satanas, ega na pasaleꞌsegen mi, in daꞌga labanan mi kanya. Simpri in atkayay mamuyaan ya, paꞌalaid kanya talaga asan it imyu.

⁸ Mandangep kamu duꞌun it Ampuꞌang Diyus ka siguradung sumambung kanya, nga ildawan ya kamu. Kamu nga mga makasalaꞌan, indiꞌan mi nay mga kasalaꞌan mi ngayan. Tingleden mi na duꞌun it Ampuꞌang Diyus i nakem mi nga magduwa-duwa paꞌ.

⁹ Eeꞌ baꞌ, masmekan mi nga banar baw sugawan mi i mga kasalaꞌan mi. Gantiyan mit sugaw i kasesleman mi baw kasmek i kasagyaan mi.

¹⁰ Pababaꞌ kamu baꞌ kat panleteg it Ampuꞌang Diyus. Sabap, iyan mapiyababaꞌ, ipataꞌas ya.

¹¹ Mga sulsug ku kat pamayaꞌ, paꞌalaidan mi i adat nga pagdiya-diyampaꞌen. Sabap in siyu nga pagdiyampaꞌen ya i sulsug ya kat pamayaꞌ, nga bilang pagbetanganan yat ukuman, egay beken, pagtibabaꞌen yay urdin it Ampuꞌang Diyus. Ipagpabetang ya nga egay kapulusan it ipiyagꞌurdin nga magsigraras tami it esa may esa. Simpri basta pagtibabaꞌen muy urdin ngaytu, ega maꞌaat ka nga magsunud, in daꞌga pagpasaꞌliyan mu na, adimaat mataꞌas ka paꞌ it Ampuꞌang Diyus.

¹² Ka yay matuud, Ampuꞌang Diyus lamang i garing it urdin baw kanya lamang i mapakay nga Manigꞌukuman. Sabap kanya lamang i may pudir nga rimibri baw muuꞌ. Temed ikaw, siyu ka na nga magbetangan it ukuman kat masigkataw mu?

Ega talaga magayeng adat i mapiyasubraꞌ

¹³ Pikiren mi tu i itu gasiꞌ nga sugi-sugid ku, kamu nga magꞌaat, “Kayting aldaw u dedelem paꞌaduꞌun kami it iti nga siyudad. Mga sang taꞌun i kaꞌlay namen duꞌun. Magnigusyuꞌ kami duꞌun isaꞌun dumakulay pirak.”

¹⁴ Temed ta, ega paꞌ magkaꞌrutan mi in unuy mabetangan mi it kumadedelman. Sabap kaꞌgenan ta, subung lamang it tabuk nga timindeg, ega maꞌlay magsipat.

¹⁵ Sana baꞌ, in magrima-rima kamu, pikiren mi daꞌan in unu, kaꞌirgan naga it Ampuꞌang Diyus. Yay magayen nga aaten mi, “In beteꞌ kaꞌirgan it Ampuꞌang Diyus baw ildawan yat magayen nagay ginawa, iti sana i magkapikir namen nga kubwaten u kupanawun.”

¹⁶ Temed ta, malandi-landi kamu na baw mapiyasubraꞌ na it Ampuꞌang Diyus. Ega yan talaga magkapakay ya i atkayan ngayan.

¹⁷ Aypaꞌ dedemdemen mi tu. Iyan taw nga magkaꞌrutan ya nay in unuy magayen, nga dapat ya nga pagbuwaten, temed ega yay pagbuwaten ya, kasalaꞌan ya naga yan.