Santiago 2 - Tagbanwa

Dapat nga maꞌildaw tami, nga egay pagbidaꞌen nga taw

¹ Mga kasulsugan ku, ta sana kat pamayaꞌ mi it mabantug nga Ampuꞌan tami nga si Jesu-Cristo, ega na adaten mi i may pagbidaꞌen nga taw.

² Alimbawa, magtingped kamu, may semled nga esang taw nga magsisiꞌsing it bulawan baw magpapakay it atnang gayen. Baw may sang kataawan nga semled nga pakayan ya, magkatambelan nay tambel.

³ Kayti ega nagsubung i istimar mi it kanirang duwa. Ka iti lamang, mabakas ngayti i pakayan, i istimaren mit magayen, nga aaten mi, “Bilaꞌ, kayni kay imu madung it ining araꞌdungan.” Itiꞌen, ega ngayti, tibabaꞌen mi nga aaten mi, “Sikayan ka lamang i imu timindeg,” u “Asan na lamang it daꞌtag i adungan mu.”

⁴ Talagang pagbidaꞌen mi na in atkayan pay pangistimar mi. Kamaliꞌ nga kamaliꞌ i pabetang mi it masigkataw mi.

⁵ Ka panawun it pikir mi, mga pagmaꞌalen ku nga sulsug kat pamayaꞌ. Daꞌga ba piniliꞌ it Ampuꞌang Diyus i mga makukuriꞌ situt sinirungat langit, nga siray magmanggaden kat pamayaꞌ baw makaꞌuyut duꞌun it kaꞌadiꞌan nga isiyanggup ya it muꞌsang kamatuudan i pagmaꞌal it kanya?

⁶ Temed pagtibabaꞌen mi lamang i mga makukuriꞌ. Daꞌga baꞌ mga manggaden ngaytu i magpakuriꞌ it imyu? Daꞌga baꞌ manu-manu idimanda nira kamu?

⁷ Baw daꞌgaꞌ baꞌ sira gasiꞌ i magtibabaꞌ it mabantug nga ngaran it Ampuꞌan ta nga si Jesu-Cristo?

⁸ Talagang magayen i pagbuwaten mi in pagsunudun mi i mataꞌas nga ipiyagꞌurdin it Ampuꞌang Diyus nga isiyurat duꞌun it kasuratan ngayang magꞌaat, “Rarasan mu i masigkataw mu it subung nagat raras mu it sadili mu nga bilug.”

⁹ Temed in mga manggaden lamang i paggalangen mi baw iyan makukuriꞌ pagtibabaꞌen mi na, kasalaꞌan mi naga yan. Ta, urdin ngaytu nga riyanggaꞌ mi, magpamatuud it makasalaꞌan kamu na.

¹⁰ Ka in ranggaꞌen it esang taw i maski sang kabagiꞌan na lamang it mga urdin ngaytu, ipabetang kanya it Ampuꞌang Diyus nga makasalaꞌan na, maski maat pagsunudun ya i muꞌsang mga beken.

¹¹ Ka alimbawa, ipiyagꞌurdin it Ampuꞌang Diyus nga magꞌaat, “Kuydaw ka it pamakun duꞌun it ega asawa mu.” Baw kanya naga i nagꞌurdin nga, “Kuydaw ka it pangimatay it masigkataw mu.” Ta, daꞌka nga matuud magpamakun, temed in beteꞌ mangimatay ka, simpri makasalaꞌan ka na, ka riyanggaꞌ mu nagay urdin.

¹² Temed sabap it maꞌildaw i Ampuꞌang Diyus, ipiyagꞌurdin ya gasiꞌ nga in magꞌuꞌunu maribri tami kat kasalaꞌan. Ta it ukumanan tami uyun kat urdin ya ngaytu, kaꞌilangan nga maꞌintur kamung banar kat adat mi baw pangangampangan mi nga maꞌildaw kamu gasiꞌ i imyu.

¹³ Sabap iyan ega magkaꞌrut mildaw it masigkataw ya, ega gasiꞌ paltegan kanya it ildaw in ukumanan na kanya it Ampuꞌang Diyus. Temed iyan maꞌildaw, egay dapat iꞌlaman ya asan it ipagꞌukuman na ngayan.

Pamayaꞌ nga egay uyut nga buwat, ega nagay kapulusan ya

¹⁴ Mga sulsug ku kat pamayaꞌ, talagang egay mapulus it esang taw, maski maat ya, “Aken, may pamayaꞌ ku na,” temed ega nagay pagbuwaten ya nga magpamatuud it kat Ampuꞌan na kanya. Yay matuud, atkayang kalasit pamayaꞌ, ega siguruun ya nga maribri kanya.

¹⁵ Alimbawa, esang sulsug kat pamayaꞌ, lebas na kanya baw makuriꞌ na it magkakaꞌen.

¹⁶ Ta kayti may esat imyu nga maat it kanya, “Masagya ka nayang muliꞌ. Sana pasamunsayaꞌ ka it pamakay baw pangaꞌen.” Temed ega naga tabangen mu kanya it kakurangan ya ngayti. Daꞌga ega nagay kapulusan it iti nga inampang mu?

¹⁷ Ta atkayan naga yan, pamayaꞌ nga desang pakimatuud, nga egay uyut nga pagbuwaten nga ipagpamatuud, yay paꞌaaten nga patay nga pamayaꞌ.

¹⁸ Temed barang may kupakibatir, nga magꞌaat, “Iyan beken, pamayaꞌ nga ipiyagꞌildaw it kanya, ega basta-bastang pagsarig yat Ampuꞌan. Iyan beken, ipiyagꞌildaw it kanya, magagayeng pagbuwaten.” Temed tubag ku kayan, “Egay beblagan it kamatuudang pamayaꞌ baw magagayeng pagbuwaten. Ipatantu mut aken nga in magꞌuꞌunu makilalaan ku nga may kamatuudan it pamayaꞌ mu ngayan nga egay pagbuwaten mu nga magpamatuud it kat Ampuꞌan ka na. Aken, mga pagbuwaten ku i magpamatuud it kamatuudan talagay pamayaꞌ ku.”

¹⁹ Pagpamayaꞌnen mu kunuꞌ nga esa-esa lamang i Ampuꞌang Diyus. Magayen yan. Temed maꞌyag nga ega ipagkaribri in yay seked it pamayaꞌ, pakimatuud na lamang, sabap maski mga mararaꞌe-raꞌet, magpakimatuud sira gasiꞌ nga may Ampuꞌang Diyus ngaytu nga paꞌaaten, temed ta, magkapanguripeꞌpey sirat iꞌlam it magꞌaꞌareg it kanira nga panrigang egay kaskedan.

²⁰ Unu, may kurang pat kasepsep asan? Unu, kaꞌilangan ku paꞌ nga ipaꞌyag nga ega talagay kapulusan it pamayaꞌ ya ngayan basta egay pagbuwaten ya nga magpamatuud it kat Ampuꞌan na kanya?

²¹ Ka panawun it pikiran mi si Abraham nga kiyaꞌapuꞌ-apuꞌan tami. Daꞌga baꞌ ipiyagpabetang kanya nga mataldeng it Ampuꞌang Diyus sabap duꞌun it buwat ya, iyan siyunud yay inaat nga ibgay yat Ampuꞌang Diyus i anak ya nga si Isaac nga buwateng ipagsamba nga antengen duꞌun it papangantengan?

²² Duꞌun it iti ngayti, magkaltegan ta nga kat pamayaꞌ ni Abraham egay beblagan it pakimatuud baw mga pagbuwaten nga magpamatuud it pamayaꞌ ya ngayti. Iyan binwat ya ngayti i magpakilala nga egay kurang it pamayaꞌ ya it Ampuꞌang Diyus.

²³ Aypaꞌ iyan binwat ya ngayti i ipagpamatuud it kasuratan ngayan nga magꞌaat, “Piyamayaꞌ ni Abraham i inaat it Ampuꞌang Diyus. Aypaꞌ ka ipiyabetang kanya it Ampuꞌang Diyus nga taw nga mataldeng kat panleteg ya.” Baw panaꞌwag it kanya, Magayen nga iba-iba it Ampuꞌang Diyus.

²⁴ Ta nasepsepan mi na nga ipagpabetang i esang taw nga mataldeng basta may pagbuwaten ya nga ipagpamatuud it maratuudan talagay pamayaꞌ ya. Ega maat sabap it pamayaꞌ nga desang pakimatuud lamang.

²⁵ Atkayan naga si Rahab, iyan babay it tagnaꞌ paꞌ nga ipagpanulus yay bilug ya. Ka daꞌga baꞌ, iyan napikir ya nga pasakep it Ampuꞌang Diyus, masagya nga inistimar ya kat seled it pamalay-balay ya i duwang kataawan nga mga piyasunda it mga Israelita? Bawnga imiyunaꞌaw ya pat kanira i dalan nga iyan i sunsunun nira isaꞌun makapalagyu. Ta sabap it mga binwat ya, nga pamatuud it kamatuudan i pamayaꞌ ya, ipiyabetang kanya it Ampuꞌang Diyus nga mataldeng kat panleteg ya.

²⁶ Paꞌugdun paꞌ nga alimbawa ku, basta linꞌidan nat kiyarurwa i bilug, simpri patay na. Ta atkayan naga yan, pamayaꞌ nga desang pakimatuud ka egay ipagpamatuud nga buwat, talagang patay nga pamayaꞌ.