Roma 9 - Tagbanwa

Egay beken nga ipagkapiliꞌ it taw, sigun lamang it pabetang-betang nagat Ampuꞌang Diyus

¹ Ta kayti, may kusugiden ku baw ega ambut kuytu, sabap kat sakep aku na ni Cristo. Eeꞌ baꞌ, talagang matuud i kusugiden ku ka ipagpamatuud it nakem ku, baw nakem ku, kat padisir nat Espiritu Santo.

² Itu na ngaytu, ereꞌeret talagay kasmek ku nga magkasgawan nat nakem ku sabap it mga kaduguꞌ ku ngaytung mga Judio.

³ In maat mapakay, talagang ega na pagdaꞌkuun ku nga makablag akut ki Cristo baw betanganan it ukuman nga rigaen it egay kaskedan nga batuꞌ it mga kaduguꞌ ku ngaytu nga magkasmekan ku, in magꞌaat nga yay ikaribrit kanira.

⁴ Ka itung mga taw, mga Israelita sira, iyan bangsa nga subuk inanak it Ampuꞌang Diyus it tagnaꞌ. Ipiyalteg ya it kanira i ega basta-bastang kabantugan ya. Piyaskelan ya sirat mga magagayeng pakiꞌupakat, baw sira pay piyaꞌalimaan ya it mga urdin ya. Ipiyatantu it Ampuꞌang Diyus it mga Israelita ngaytu i kadalanan it matuud nga pagsamba it kanya baw sira ngaytu i inildawan yat mga sanggup ya nga magagayen.

⁵ Mabantug i mga kagiyaringanan nira baw gasiꞌ nga kaduguꞌan nira naga i nanganak it ki Cristo ngaytu, iyan nagbalyu kanya nga taw. Si Cristo ngaytu, Ampuꞌang Diyus kanya nga magbebegbeg it muꞌsa, nga pagbantugun baw pagsambaen it egay katupusan. Kamatuudan talagaytu.

⁶ Ega pikiren mi nga sanggup lampud lamang i isiyanggup ngaytit Ampuꞌang Diyus it tagnaꞌ. Sabap kaꞌilangan tang kilalaen nga ega muꞌsang mga Israelita i maat kamatuudang Israelita, nga ireg sugiden mga taawan ya nga may kamatuudang pamayaꞌ it kanya.

⁷ Ega gasiꞌ muꞌsa nga mga tungtung-inapuꞌ ni Abraham i pagkilalaen nga kamatuudang tungtung-inapuꞌ ya, sira nga tumanggap it mga isiyanggup it Ampuꞌang Diyus. Subung nagat inaat ngaytit Ampuꞌang Diyus it ki Abraham nga magꞌaat, “Asat ki Isaac i liꞌwanan it bangsa ngayang taꞌwagen nga mga tungtung-inapuꞌ mu.”

⁸ Ituy pagpaꞌulugan kaytu, paribasay si Isaac lamang i anak nga isiyanggup it Ampuꞌang Diyus it kana Abraham, iyan mga tungtung-inapuꞌ ni Isaac lamang ngaytu i kilalaen nga mga tungtung-inapuꞌ ni Abraham nga tumanggap it mga isiyanggup it Ampuꞌang Diyus. Iyan mga tungtung-inapuꞌ it anak ngayti ni Abraham nga belag i inaꞌ, daꞌsira kilalaen nga bangsa nga piniliꞌ it Ampuꞌang Diyus nga tumanggap it mga isiyanggup ya ngaytu.

⁹ Ka ituꞌun ngaytu i isiyanggup it Ampuꞌang Diyus it tagnaꞌ ngayti, “Pagtaꞌlib it sang taꞌun, paꞌuliꞌ aku naga situt imyu. Pagpaꞌuliꞌ ku, manganak nat lalaki i asawa mu nga si Sara.”

¹⁰ Egaytu desang itu ngaytu. Panawun it pikiran mi in unuy inaat it Ampuꞌang Diyus duꞌun it esa ngayting kiyaꞌapuꞌ-apuꞌan namen nga si Isaac, pagdarugmatiꞌ it asawa ya nga si Rebeca.

¹¹ Kat mga inaat ya ngayti ipiyakilala sit Ampuꞌang Diyus nga, pagpiliꞌ ya it taw nga ildawan ya, ega sabap it magagayeng buwat it taw in daꞌga sigun lamang kat pabetang-betang ya. Sabap parabir simnakit i mga gambar ngaytu ni Rebeca, nga ega pay nabwat nirang magayen u daꞌga,

¹² inampang nang lagi it Ampuꞌang Diyus it kanya nga magꞌaat, “Masinakepan it ariꞌ i akaꞌ manggid.”

¹³ Magsusurat gasiꞌ i beken nga inaat ya nga magꞌaat, “Si Jacob, pagmaꞌa-maꞌalen ku, temed si Esau, pagꞌisgan ku.”

Pagsisiguruun tami nga mataldeng talagay pabetang-betang it Ampuꞌang Diyus, lamang magkaliluꞌan ta

¹⁴ Ta it atkaytu na unu, maꞌaat tami i Ampuꞌang Diyus nga ega mataldeng i pabetang yat taw? Yay matuud, ega ta maꞌaat i atkayan.

¹⁵ Sabap waytu i inaat ya duꞌun it ki Moises, “Magsanguꞌ aku it in siyuy ireg ku nga sanguꞌan. Magꞌildaw aku gasiꞌ it in siyuy ireg ku nga ildawan.”

¹⁶ Aypaꞌ kaꞌildaw it Ampuꞌang Diyus, uyun duꞌun it kasanguꞌ yat taw, ega maat mapisiꞌ ta kat sadili ta nga kaꞌirgan u sadili lamang nga paꞌres it taw.

¹⁷ Atkayan naga, mapakay gasiꞌ nga ega ildawan yay beken nga taw, sigun gasiꞌ kat pabetang-betang ya. Ka magsusurat i itung inampang ya duꞌun it esang adiꞌ ngaytit tagnaꞌ duꞌut Egipto nga magꞌaat, “Ipiyatindeg ku ikaw, isaꞌun lamang kat mga buwaten kut imu, ipatantu ku i keseg it guna ku, baw isaꞌun gasiꞌ lemkep it muꞌsang banwa i katanug it ngaran ku.”

¹⁸ Aypaꞌ maꞌyag nga pagꞌildawan it Ampuꞌang Diyus i in siyuy ireg ya nga ildawan, baw pagpadsenen yay ulu it iyan ireg ya nga demsen i ulu.

¹⁹ “Temed in atkayan,” aaten mu, “unuka pagꞌiwayen paꞌ it Ampuꞌang Diyus, it pabetang-betang ya naga i kadsen ngaytut ulu nira?”

²⁰ Ayaw! Ega aaten muy atkayan. Sabap kita, taw lamang. Ega mapakay nga sambaranaꞌen tami i Ampuꞌang Diyus. Ka simpri ega magayen in aaten it giyuna lamang i iyan nagguna it kanya i ampang nga atkaytu, “Aa bilaꞌ! Unuka binwat mu akut atkaytu?”

²¹ Pakapikiren mi i buwat it manigbuwat it dakut. Maski esa-esay dakut nga bubwaten ya, daꞌga baꞌ may pudir ya nga bagiꞌen baw buwaten i kada sang bagiꞌ it in unuy ireg ya nga buwaten, mga berebtangan nga ega basta-bastay paggamitan u garamiten it aldaw-aldaw?

²² Ta atkayan naga, may pudir talaga it Ampuꞌang Diyus nga muwat it in unuy ireg ya. Mapakay nga ipatantu yay iseg ya baw kadakulat keseg ya kat mga taw nga egay beken nga pagꞌangutun in daꞌga panriga ya it kadakulat kasalaꞌan nira. Temed in beteꞌ ega daꞌan rigaen ya sira, in daꞌga pagpataꞌnan ya it maski maꞌlay i karaꞌe-raꞌetan nira ngaytu, egay maꞌiway tat kanya.

²³ Unu pay maꞌaat ta in binwat yay atkaytu isaꞌun ipakilala yay kabantugan ya nga egay kasbung kat mga taw nga ipiyabetang ya nga ildawan ya, sira nga piniliꞌ baw pagtabangen ya isaꞌun itsu sirang mangaꞌgenan duꞌun it kabantugan ya ngaytu?

²⁴ Kita naytu nga muꞌsa i paꞌaaten kaytu, kita nga piniliꞌ baw piyanakman ya nga pasakep it ki Cristo. Baw egaytu lamang desang mga Judio, in daꞌga uyut na gasiꞌ i maski ega Judio.

²⁵ Ka ipiyasurat ya naga duꞌun it prupitaꞌ nga si Oseas i ituꞌun nga magꞌaat, “Taꞌwagen ku na nga mga taawan ku i ega dati nga taawan ku, baw tagnaꞌ gasiꞌ ngayting ega pamagmaꞌalen ku, kayti, maꞌalen ku na.”

²⁶ Baw itu gasiꞌ i inaat it Ampuꞌang Diyus nga ipiyasurat yat ki Oseas ngayti, “Mga tagrugar ngayti nga tagnaꞌ ega pagtaꞌwagen nga mga taawan ku, mabut i aldaw nga sira na ngaytu i taꞌwagen nga mga anak ku, aku nga Ampuꞌang Diyus nga egen it egay kaskedan.”

²⁷ Ta, pasar it mga Judio, nga mga tungtung-inapuꞌ ni Israel, ituy ipiyanggesang-gesang it prupitaꞌ it tagnaꞌ nga si Isaias, “Maski na maat liyaksaꞌ-laksaꞌ tami nang mga tungtung-inapuꞌ ni Israel, ka atnat igis duꞌut baybayan i kadakel, temed dekeyeꞌ lamang it aten i maribri kat panriga it Ampuꞌang Diyus.

²⁸ Sabap maꞌigpit baw apuraꞌen it Ampuꞌang Diyus i pangukuman ya it mga taw situt sinirungat langit.”

²⁹ Parabir miyabut i ukuman ngayti duꞌut mga Israelita, itu siꞌ i ipiyasurat it ki Isaias nga magꞌaat, “In daꞌga lamang piyaꞌpedan tami naga it Ampuꞌang Diyus nga landaw nga gunaan it sang dekeyeꞌ nga kabagiꞌan it bangsa ta nga subuk piyakabiꞌni ya, makabetang ta na talaga it subuk mga banwa ngayti nga Sodoma baw Gomorra nga piyuuꞌ.”

Subuk ega kat ulu it mga Judio i Magayeng Baritaꞌ

³⁰ Ta, unuy kaꞌulugan it pagꞌaaten ku ngaytu? Itu nay kaꞌulugan, nga mga bangsa ngaytung ega Judio, nga tagnaꞌ ega pagꞌintindiyen nira in magꞌuꞌunu mapasinsiya i mga kasalaꞌan nira, kayti ngaytu ipiyagpabetang nat Ampuꞌang Diyus nga ega nay kakasalaꞌan kat panleteg ya sabap it pamayaꞌ baw pagsarig nirat binwat ni Cristo.

³¹ Temed mga Judio ngaytu nga sigi nagay paꞌres nirat pagsunud it mga urdin isaꞌun tumaldeng sira kat panleteg ya, ega nagay liyapusan.

³² Kaꞌaiꞌ? Unuka atkaytu? Sabap tanud nira, ipabetang sira nga mataldeng in paꞌresan niray pagsunud it mga urdin. Ega naꞌbut it pikiran nira nga mapisiꞌ lamang kat pamayaꞌ baw pagsarig it ki Cristo i pagtaldeng ngaytu. Aypaꞌ limniꞌwan nga si Cristo ngaytu, dakulang kakekleban nira.

³³ Subung nagaytu it duꞌut kasuratan ngayang magꞌaat, “Ungaytu, subuk dimnaꞌtun akut batu nga pirming magkasampukan baw kakekleban it mga taw duꞌut siyudad ngaytung Sion. Temed iyan mamayaꞌ baw sumarig it paꞌaaten ngaytung batu, ega desang maꞌasaꞌ-asaꞌ.”