Roma 8 - Tagbanwa

Padisir nat Espiritu Santo i pagsunudun it mga inanak nat Ampuꞌang Diyus

¹ Temed kayti, ituy kamatuudan nga iyan mga maglalagpit nat ki Cristo Jesus, nga magpasakep nat kanya, talagang ega na maꞌulug kat maski unu nga ukuman nga panriga.

² Ka, sabap it pakilagpit tat ki Cristo Jesus, nabaꞌgu nat Espiritu Santo i pangaꞌgenan tami. Ipiyagribri ya na kita kat pamegbeg it kasalaꞌan nga yay tumaban it aten duꞌun it kamataynen nga egay kaskedang panriga.

³ Talagang, pagsunud it taw it mga urdin, ega ikapisit kataldengan kat panleteg it Ampuꞌang Diyus u ikaliꞌwan it taw kat pamegbeg it kasalaꞌan. Ka egay magkasunud it kaꞌustuꞌan it mga urdin ngaytu, sabap it singkadan tang kaꞌiꞌirgan nga maraꞌe-raꞌet nga magbabanwa na kat muꞌsang taw. Temed maski atkayan, may ipiyabetang-betang it Ampuꞌang Diyus nga yanay nakapabaraꞌ it ega ngayan nakapabaraꞌ it pagsunud it taw it mga urdin. Ka binwat it Ampuꞌang Diyus, ipiyalampud ya i sadili yang Anak nga nagbalyung taw isaꞌun kasbung nga banar it aten nga makasalaꞌan. (Temed kanya, egay kakasalaꞌan.) Bawnga, kat binwat ya nga tiyanggung ya i kasalaꞌan tami nga mga taw, riyanggaꞌ ya talaga i pamegbeg it aten it kasalaꞌan.

⁴ Ipiyabetang-betang it Ampuꞌang Diyus i muꞌsa ngaytu isaꞌun kapangaꞌgenan tami uyun kat kataldengan nga pagꞌaaten it mga urdin ya. Mapakay naytu in magpangaꞌgenan na kat pamaalaꞌ it Espiritu Santo, ega na kat aten nga sadiling kaꞌirgan.

⁵ Sabap iyan mga pagbebegbegan paꞌ it singkadan nirang kaꞌiꞌirgan nga maraꞌe-raꞌet, singkadan nira ngayting kaꞌiꞌirgan i pirmi nirang pagsumbayaꞌen. Temed iyan nga pagbebegbegan na it Espiritu Santo, simpri kaꞌirgan nat Espiritu Santo i pagsunudun.

⁶ Temed kamatuudan tu nga iyan nga yapay kanget it nakem, singkadan nirang kaꞌiꞌirgan nga maraꞌe-raꞌet, kabilangan it atkaytung pangaꞌgenan, subuk patay. Temed iyan nga talagang padisir nat Espiritu Santo i pagsunudun, ega basta-basta i pangaꞌgenan baw kaꞌimbengan it nakem.

⁷ Sabap talagang iyan singkadan ngaytung kaꞌiꞌirgan it taw, kuntraꞌ talagat Ampuꞌang Diyus ka ega magpasakep it mga urdin garing duꞌun it kanya. Baw yay matuud, egay kaya nira nga pasakep it mga ituꞌun ngaytu.

⁸ Aypaꞌ, iyan mga pagbebegbegan pat singkadan nirang kaꞌiꞌirgan nga maraꞌe-raꞌet, ega mapakay nga sagyaan it Ampuꞌang Diyus.

⁹ Temed kamu, paribasay magsasarum nay Espiritu Santo asat bilug mi, daꞌkamu na pagbebegbegan it mga singkadan mi ngaytung kaꞌiꞌirgan in daꞌga Espiritu Santo na ngaytuy magbebegbeg it imyu. (In beteꞌ ega magsasarum kat bilug it esang taw i isiyanggup ni Cristo nga Espiritu Santo, ireg sugiden talagang ega paꞌ sakep ni Cristo.)

¹⁰ Temed in tiyakenaꞌan ta na ni Cristo, nga pagsasaruman ta na it Espiritu Santo, maski kamataynen i abutun it bilug ta nga yay liꞌwan it kasalaꞌan situt banwa, temed magkasiguru ta nga, kat keseg it Espiritu Santo ngaytu, begayan tat kaꞌgenang egay kaskedan sabap ipiyabetang tami na nga mataldeng kat panleteg it Ampuꞌang Diyus.

¹¹ Matuud tu, in magꞌuꞌunu kat guna it Espiritu Santo ya inggen it Ampuꞌang Diyus si Jesus it paꞌuliꞌ, atkayan naga, maski matay paꞌ i bilug mi, kat guna it Espiritu Santo ya nga ipiyapasarum it Ampuꞌang Diyus kat bilug mi, egnen ya gasiꞌ kamu it paꞌuliꞌ in timpu na.

¹² Aypaꞌ, mga kasulsugan, may utang tami nga nakem kayti. Dapat tami na talaga nga mangaꞌgenan uyun duꞌun it kaꞌirgan it Ampuꞌang Diyus, ega maat uyun duꞌun it mga singkadan tang kaꞌiꞌirgan nga maraꞌe-raꞌet.

¹³ Sabap in mangaꞌgenan kamu paꞌ uyun duꞌun it singkadan mi nga kaꞌiꞌirgan nga maraꞌe-raꞌet, daꞌkamu karibri kat kamataynen nga egay kaskedang panriga. Temed in kat keseg it tabang it Espiritu Santo pagꞌimatayen mi na i mga kaꞌiꞌirgan ngaytung singkadan mi, ta sikayan siguradung may kaꞌgenan mi nang egay kaskedan.

¹⁴ Ka sira nga magpasakep nga pirmi kat padisir it Espiritu Santo nga ipiyapasarum it Ampuꞌang Diyus, sira na i pagtaꞌwageng mga anak ya.

¹⁵ Matuud tu, mga anak it Ampuꞌang Diyus i panaꞌwag it aten, ka iyan Espiritu Santo nga magsasarum situt bilug tami, egaytu Espiritu it pagkaꞌuripen isaꞌun pirmi tang manguripeꞌpey kat adapan it Ampuꞌang Diyus sabap it mga kasalaꞌan tami. In daꞌga, kat panakem it Espiritu Santo ngaytu, magkatantuwan ta na nga inanak tami na talaga it Ampuꞌang Diyus. Aypaꞌ, kayti, mataꞌwag tami nay Ampuꞌang Diyus nga “Amaꞌ.”

¹⁶ Eeꞌ baꞌ, Espiritu Santo na ngaytuy magpamatuud kat nakem ta nga talagang kita, inanak nang matuud it Ampuꞌang Diyus.

¹⁷ Baw ega lamang desang inanak ya na kita, in daꞌga siguradung may kabagiꞌan tami gasiꞌ it kagayenang ibgay ya kat muꞌsang mga anak ya kat pagdadarapaꞌen. Talagang kaꞌuyutan tami ni Cristo it mabagiꞌan it ituꞌun ngaytu. Masiguru tami i kagayenan ngaytu in sagkaꞌen tat masagyay nakem i mga kakuriꞌan nga magꞌabut it aten sabap it pagsunud ta it kanya, nga sikayan subuk magpaꞌuyu-uyut ta it mga siyagkaꞌan ya nga kakuriꞌan.

Kabantugan baw pagbaꞌgu it banwa nga pagsisiguruun tami

¹⁸ Temed maski sang unuy kadakulat kakuriꞌan nga malabayan ta situt banwa, pagsisiguruun ku nga ega manenga-tengaꞌ it kabantugan nga ibgay it Ampuꞌang Diyus it aten asan it pagdadarapaꞌen.

¹⁹ Sabap muꞌsang mga paryaman nga giyuna it Ampuꞌang Diyus, subuk pagpaꞌbutun nang banar i aldaw ngayang itanyag yat kadakel i kadakulat kabantugan nga ibgay ya kat mga inanak ya.

²⁰ Ka kayti, mga paryaman ngaytu, subuk ega na magkabaraꞌan it kabetangan nira kayti nga ega magkapaꞌuliꞌnan nira i tagnaꞌ nga kagayen nira. Ega maat sadili nirang ireg i kabetangan nira ngaytu, in daꞌga pabetang-betang nagat Ampuꞌang Diyus. Temed egaytu maat seked it kaꞌnu-kaꞌnu.

²¹ Ka mabut i aldaw nga, maski mga paryaman ngaytu, baꞌguun it Ampuꞌang Diyus. Ipaliꞌwan ya sira kat pagkaꞌuripen nirat panraꞌway baw panranggaꞌ, bawnga kita nga mga inanak ya, sang tamiyan na it muꞌsang paryaman nga giyuna ya i begayan it ega basta-bastang kabantugan nga ribri ta na kat muꞌsang napaliꞌ it kasalaꞌan.

²² Ka magkaꞌrutan ta kayti nga muꞌsang mga paryaman ngaytu, garing it tagnaꞌ seked kayti, magkakuriꞌan. Kaꞌaat ka kabetangan nira, subuk babay nga pagsakitan na.

²³ Baw ega lamang baꞌ maat mga paryaman ngaytu, pati kita gasiꞌ. Piyapasaruman ya na kita it Espiritu Santo, temed ituy uꞌnang bagiꞌ lamang it ibgay yat aten. Aypaꞌ pagpaꞌbutun tang banar i aldaw nga ibgay yat aten i kaꞌustuꞌang kagayenan nga ipagꞌareg yat muꞌsang mga inanak ya, baw ildawan ya kita it ega basta-bastang bilug nga liꞌwan nat muꞌsang karanggaꞌan.

²⁴ Talagang ribri ta naytu. Takaꞌ ega paytu kumplitu. Temed pagsisiguruun ta nga mabut i kakumplituwan ya asan it pagdadarapaꞌen. Simpri ega paytu miyabut, ka in beteꞌ miyabut na unuka pagsisiguruun ta nga mabut paꞌ? Ka siyuy magpaꞌbut paꞌ in naltegan ya na i pagpapaꞌbutun ya ngayti?

²⁵ Temed in ega paꞌ miyabut i pagpapaꞌbutun ta, elatan tami it teꞌteꞌ talaga i paniguru ta ngaytu.

²⁶ Kat mga kakuriꞌan nga magkalabayan tami talagang dakulaꞌ nga tabang it aten it paniguru ta ngaytu. Atkayan naga, pagtabangen tami gasit Espiritu Santo kat in unu nga magkakurangan ta. Alimbawa kat panalangin. Ka ega naga magkaꞌrut ta manalangin uyun kat kaꞌirgan it Ampuꞌang Diyus. Temed maski atkayan, kat kadakulat sanguꞌ yat aten, pirmi gasiꞌ nga magpanalangin i Espiritu Santo ngaytu, nga bilang pagbatuꞌan ya kita kat adapan it Ampuꞌang Diyus. Baw Espiritu Santo ngaytu, magkapanalangin kanyat ampang nga ega mapakay in ampang it taw lamang.

²⁷ Baw Ampuꞌang Diyus, paribasay magkaꞌrutan yay maski kat nakem it taw, talagang magkasepsepan ya i pagꞌaaten it Espiritu Santo, beken it uyun nga pirmi kat kaꞌirgan ya i mga ipagpanalangin nga panindeg it Espiritu Santo it aten nga mga taawan it Ampuꞌang Diyus.

Egay makablag it aten kat raras it Ampuꞌang Diyus

²⁸ Talagang magkaꞌrutan tami nga, muꞌsang mga bagay nga magkalabayan it mga may pagmaꞌal nga matuud it Ampuꞌang Diyus, pagpabaraꞌen ya nga kat ikagayen nira, sira nga ipiyapinpin ya uyun kat pabetang-betang ya.

²⁹ Sabap talagang garing paꞌ it katagnaꞌ-tagnaꞌan, pagnanakmen nang lagi it Ampuꞌang Diyus in siyu may siyu i panakman ya nga pasakep it kanya, baw ipiyasiguru ya gasiꞌ nga makasbung sirat Anak ya nga si Jesus. Kabilangan ya, si Jesus na ngaytu i mabantug nga kiyaꞌakaꞌan tami nga muꞌsang nagsulsu-sulsugun nga inanak it Ampuꞌang Diyus.

³⁰ Ta itu, mga ipiyasiguru ya ngaytu, miyabut i aldaw nga piyanakman ya nga pasakep it kanya. Bawnga, sabap it pamayaꞌ baw pagsarig nirat binwat ni Cristo, ipiyabetang ya sira nga ega nay kakasalaꞌan kat panleteg ya. Baw sira ngaytu i begayan ya paꞌ it ega basta-bastang kabantugan.

³¹ Ta it atkaytu na nga kampiꞌ na situt aten i Ampuꞌang Diyus, maꞌyag nga maꞌyag nga maski siyu i kakuntraꞌ ta, ega talaga daꞌgen nira kita.

³² Maski sadili yang Anak, ega ipiyagꞌimet it Ampuꞌang Diyus, in daꞌga ipiyalugut yat ukuman nga kamataynen kat ikagayen tami nga muꞌsa nga mga taw. Ta, it ipiyagbegay-matag yat aten i Anak ya ngaytu, daꞌga baꞌ iꞌatag ya nagat aten i muꞌsang bagay nga ipagkagayen tami?

³³ Ta, kita ngaytung piniliꞌ it Ampuꞌang Diyus, siyu paꞌ i makadimanda it aten duꞌun it adapan ya? Yay matuud, ega, ka Ampuꞌang Diyus naga i nagsanggup nga iniriꞌ ya na talaga kat panleteg ya i muꞌsang mga kasalaꞌan tami.

³⁴ Aypaꞌ talagang ega na mapakay nga betanganan tami paꞌ it ukuman it maski siyu duꞌun it adapan it Ampuꞌang Diyus. Ka ipiyaturuꞌ ni Cristo Jesus i duguꞌ ya sabap it kasalaꞌan tami. Baw ega lamang iyan in daꞌga inggen kanyat paꞌuliꞌ, nga binggayan na kanyat ega basta-bastang kabantugan duꞌun it iwanang ayun it Ampuꞌang Diyus. Baw kayti pirmi ya kitang pagpanindegan duꞌun.

³⁵ Ta, it atkaytu na, talagang pagsisiguruun ta nga egay makablag it aten kat raras ni Cristo ngaytut aten. Maski sang unuy kadakulat kakuriꞌan u kagipitan nga magkalabayan ta, maski pakuriꞌ it aten, maski getem u pagmiskin ta, maski kabetangan nga kaꞌiꞌilang, eeꞌ baꞌ maski tarep basiꞌ, egaytu kablag it aten kat raras ni Cristo.

³⁶ Ka subung nat magbebtang naga duꞌun it kasuratan ngayang magꞌaat, “Sabap it magpasakep kami nat imu, subuk magꞌuꞌungaw kami nga pirmi it kali. Kabilangan namen, subuk mga tupa nga kuꞌimatayen ka karniꞌen.”

³⁷ Temed, kat muꞌsa ngaytung mga kakuriꞌan nga magkalabayan tami, kabilangan ta, landaw talaga it piyakamagayen nga mandadaꞌeg, sabap it subraꞌ nga pagsisiguruun tami i ega basta-basta ngaytung raras ni Cristo it aten.

³⁸ Eeꞌ baꞌ, pagsisiguruun ku nga egay makablag it aten kat raras ngaytu. Maski kamataynen u kagipitan it pangaꞌgenan ta, maski mga anghil, atnagay mga maraꞌe-raꞌet, magpanlud baw daꞌga, nga may dakulang kiyaꞌrutan baw pudir duꞌut kanya-kanyang pagsasakpan. Talagang maski unu nga magꞌabut it aten kayti u kat pagdadarapaꞌen,

³⁹ maski unu nga bagay kat dibwat u kat seled it banwa, talagang maski unu nga giyuna it Ampuꞌang Diyus, egaytu makablag it aten kat raras ya, iyan raras nga ipiyatantu ya duꞌun it Ampuꞌan ta ngaytung si Cristo Jesus.