Roma 7 - Tagbanwa

Basta nagpalagpit ta na it ki Cristo, daꞌta na uripen it kaꞌustuꞌan nga pagsunud it mga urdin isaꞌun maribri

¹ Mga kasulsugan ku, magkaꞌrutan ku nga ega elam it imyu i paꞌaateng urdin. Aypaꞌ urut mi nga, mga urdin, magsasakep lamang it taw basta egen paꞌ kanya. Temed in natay na, ega na.

² Ka, alimbawa, babay nga may asawa na. Kat pamegbeg kanya it asawa ya mintras egen paꞌ kanyang tagꞌasawa. Temed in patay na kanya, liꞌwan nay babay ngaytu kat in unu nga pagꞌaaten it urdin pasar it nagꞌasawa.

³ Talagang dakulang kapakunan ya in paꞌasawa kanya it beken nga lalaki basta egen pay uꞌna ngayting asawa ya. Temed in patay nay uꞌnang asawa ya, ega na pagsasakpan kanya it itung ipagꞌaat it urdin. Maski paꞌasawa na kanyat beken nga lalaki, ega na maꞌaat nga nakapakun paꞌ kanya.

⁴ Ta, atkayan nagay karibriyan ta, mga kasulsugan ku. Ka tagnaꞌ, subuk inasawa ta it mga urdin nga yanay magbebegbeg it aten. Temed paribasay subuk natay tami na nga iba ni Cristo duꞌut krus, daꞌta na kat pamegbeg it mga urdin ngaytu. Kayti, belag nay asawa ta, ka inggen si Cristo it paꞌuliꞌ baw subuk inasawa ya na kita. Aypaꞌ kanya na i magbebegbeg it aten isaꞌun mangaꞌgenan ta nat pangaꞌgenang mataldeng kat ikabantug it Ampuꞌang Diyus.

⁵ Ka iyan katꞌesa nga pagbebegbegan ta paꞌ it sadili tang kaꞌirgan nga maraꞌe-raꞌet, maski unuy pagbawalen it mga urdin it Ampuꞌang Diyus, yanay pirmi tami nga pagkubwaten. Aypaꞌ dakulay karaꞌe-raꞌetan nga pagbuwaten tat tagnaꞌ, nga yay tumaban it aten duꞌun it kamataynen nga egay kaskedang panriga.

⁶ Temed kayti, ribri ta na kat pamegbeg ngaytit urdin ka natay tami nayan nga iba ni Cristo duꞌut krus. Aypaꞌ pagsirbiyan ta nay Ampuꞌang Diyus it masagyay nakem nga nabaꞌgu nat Espiritu Santo. Ega subuk tagnaꞌ nga basta pagsunudun lamang i mga urdin nga magsusurat temed subuk magkaregesan lamang.

Matantuwan ta duꞌut mga urdin i karaꞌway it kasalaꞌan

⁷ Ta, unuy ireg sugiden kaytu? Barang pagpikiren mi na nga maraꞌe-raꞌet palan i urdin. Temed ega maat magꞌaꞌatkayan, in daꞌga magayen naga, ka mga urdin it Ampuꞌang Diyus i magtulduꞌ it aten in unuy ega magayen kat panleteg ya. Subung alimbawa it paꞌaaten ngayan nga, “Kuydaw ka it irak.” In daꞌga may itu ngaytung urdin ega naꞌrutan ku nga maraꞌe-raꞌet palan i paꞌaaten ngaytung irak.

⁸ Temed, pagkaꞌrut ku nga kuntraꞌ kat urdin it Ampuꞌang Diyus i irak ngayan, subrang kiminseg i magbabanwa nga kasalaꞌan situt aken baw, liꞌwan ya, narayak ya aku kat pagsumbayaꞌ it muꞌsang kalasit irak. Temed in daꞌga may urdin, subuk magꞌigaꞌ pay kasalaꞌan ngayan.

⁹ Iyan ega paꞌ magkasepsepan kuy pagpaꞌiguꞌan it mga urdin, tanud ku egay aken nga kasalaꞌan. Temed iyan natantuwan kung banar i pagpatalandagan it mga urdin ngaytu, minyag nga minyag i kadakulat kasalaꞌan ku.

¹⁰ Mga urdin, sana yay ikapisiꞌ tat kaꞌgenang egay kaskedan in sunudun tat kaꞌustuꞌan. Temed namuyaan ku nga palan, kamataynen nga egay kaskedang panriga i abutun ku, sabap it daꞌku magkasunud it magayen.

¹¹ Sabap subuk giyamit it kasalaꞌan i mga urdin isaꞌun madaya-dayaꞌan aku lamang. Ka tanud ku taw aku nga mataldeng ari palan it, makasalaꞌan aku nga abutun it kamataynen nga egay kaskedang panriga.

¹² Aypaꞌ ega talagay maꞌiway ta duꞌut urdin ka garing tu duꞌut Ampuꞌang Diyus. Talagang kada urdin ngaytu, ega basta-basta, mataldeng, baw subrang magayen.

¹³ Temed, maat it beken, in talagang matuud nga magayen i urdin ngaytu unuka iyan nagay magtaban it taw duꞌut kamataynen nga egay kaskedang panriga? Ega maat atkayan. Mga urdin, magayen naga temed paggamiten it kasalaꞌan isaꞌun mga taw, sumari nat buwat it karaꞌe-raꞌetan. Aypaꞌ sikaytu ta magkamuyaan in sang unu talagay karaꞌway it kasalaꞌan ngaytu, nga yanayan i magtaban it taw duꞌun it kamataynen nga egay kaskedang panriga, ega maat mga urdin.

Magꞌiꞌindaꞌeg i duwa kat pikiran it mga magpamayaꞌ nat ki Cristo

¹⁴ Pagsisiguruun tami nga, mga urdin ngaytu, uyun nga banar it kaꞌirgan it Ampuꞌang Diyus ka kanya nagay garing. Temed aku, belag. Pirmi akung pagdaꞌgen it mga kaꞌiꞌirgan nga maraꞌe-raꞌet nga alaid kat kaꞌirgan it Ampuꞌang Diyus. Subung it pagꞌuꞌuripnen aku talagat kasalaꞌan ngaytu.

¹⁵ Talagang ega magkasagyaan ku i buwat ku. Sabap iyan mga magagayeng buwat nga ireg ku sana nga buwaten, ega naga iyan i pagbuwaten ku, in daꞌga in ari pay pagraꞌwayen ku, iyan paꞌ i magkabwat ku.

¹⁶ Temed in pagraꞌwayen ku, maski magkabwat ku naga, intuntis magpamatuud aku nga kamatuudan baw kagayenan naga i mga urdin nga magsabat it aken pasar it mga bagay ngaytu nga maraꞌway.

¹⁷ Aypaꞌ maꞌyag nga may sang bagiꞌ nga nakem ku nga ega kubwat it kasalaꞌan. Temed kasalaꞌan na ngayan nga magbabanwa situt aken, yay puꞌun-sabap it karaꞌe-raꞌetan nga magkabwat ku.

¹⁸ Magkaꞌrutan ku nga, sabap it singkadan ku nga kaꞌiꞌirgan nga maraꞌe-raꞌet, subuk karaꞌe-raꞌetan nga bulun i magbabanwa situt aken. Ka maski ireg ku nga ireg nga muwat it magagayen nga bagay, temed in sadili ku lamang talagang ega kaya ku nga muwat it magayen ngaytung magkapikir ku.

¹⁹ Ka talagang atkayang matuud nga ega magkabwat ku i magayen ngaytu nga ireg ku nga buwaten. Baꞌlig i magkabwat ku, maraꞌway ngaytu nga ega ireg ku nga buwaten.

²⁰ Temed it atkayan nga magkabwat ku i ega ngaytu ireg ku, talagang ega naytu pagtemden ku paꞌ, in daꞌga subuk pagrayaken aku lamang it kasalaꞌan na ngaytung magbabanwa situt bilug ku.

²¹ Aypaꞌ itu nay namuyaan ku, basta iyan ireg ku nga muwat it bagay nga magayen, pagꞌarangen nga lagi it karaꞌe-raꞌetan nga magbabanwa situt aken.

²² Ka kayti, in kat nakem ku lamang, masagya aku naga nga sumunud it mga urdin ngaytut Ampuꞌang Diyus.

²³ Temed, mga maraꞌe-raꞌet nga kaꞌirgan it bilug ku, maglaban it mga magagayeng bagay nga magkapikir kung buwaten. Subuk naꞌuripen aku talaga it mga maraꞌe-raꞌet nga kaꞌirgan nga magbabanwa situt bilug ku, nga egay beken nga liꞌwan ya, kasalaꞌan na.

²⁴ Aypaꞌ talagang kaꞌildaw-ildaw i kabetangan ku ngaytu. Siyuy rimibri it aken kat bilug ku ngaytung magtaban it aken duꞌun it kamataynen nga egay kaskedang panriga?

²⁵ Talagang dakulay pasalamat ku duꞌut Ampuꞌang Diyus sabap, kat keseg it binwat it Ampuꞌan tami nga si Jesu-Cristo, kanya i rimibri it aten. Temed saꞌup ku sing iꞌaat in unuy magkamuyaan ku nga kabetangan ku kayti nga, kat pikir baw nakem ku, kaꞌirgan it Ampuꞌang Diyus i kusunudun ku sana. Temed kasalaꞌan naga i magkabwat ku sabap it mga singkadan ku nga kaꞌiꞌirgan nga maraꞌe-raꞌet.