Roma 6 - Tagbanwa

Sana alaid nat aten i paꞌuripen ta pat kasalaꞌan

¹ Ta kayti, unu, magayen in ipasigi tay buwat ta it kasalaꞌan isaꞌun lamang magbastanti situt aten i kaꞌildaw ngaytut Ampuꞌang Diyus?

² Talagang ega atkayan. Ka kabilangan ta kayti, atnat miyatay na kat tagnang pangaꞌgenan ta nga makasalaꞌan, baw ipiyagꞌugad na kat baꞌgung pangaꞌgenan. Ta unuka mangaꞌgenan ta paꞌ kat kasalaꞌan ngayti?

³ Unu, ega maꞌyag it imyu nga, iyan nagpabawtis tami nga katandaꞌ it magpakilagpit tami na it ki Jesu-Cristo, magsugid nga magꞌuꞌuyut tami na it kamataynen ya?

⁴ Aypaꞌ, kaꞌalimbawaan it pagbawtis ngaytut aten, natay baw ilimbeng na nga iba ni Cristo. Temed it inggen naga ngaytu kanya it paꞌuliꞌ kat keseg it guna it Diyus Amaꞌ, subuk sang tamiyan nagay inggen. Aypaꞌ, kaꞌilangan mangaꞌgenan tami na uyun duꞌun it pagbaꞌgu ngaytut pangaꞌgenan ta.

⁵ Sabap ega lamang desang nakaꞌuyut tami it ki Cristo duꞌun it kamataynen ya ngayti, in daꞌga nakaꞌuyut ta na gasit kanya duꞌun it pagꞌegen yat paꞌuliꞌ, nga nabaꞌgu nay pangaꞌgenan tami.

⁶ Ka magkaꞌrutan ta nga tagnang adat ta nga makasalaꞌan, subuk naransang na nga uyut ni Cristo duꞌut krus, isaꞌun maꞌawaꞌ talagay kaꞌiꞌirgan baw nakem tang maraꞌe-raꞌet, nga daꞌta na maꞌuripen pat kasalaꞌan.

⁷ Sabap iyan miyatay na, ribri na kat keseg it kasalaꞌan.

⁸ Ta, it atkaytu na nga, tagnang adat tami nga maraꞌe-raꞌet, nakaꞌuyut na it ki Cristo nga inimatay, aypaꞌ pagsisiguruun ta nga, kaꞌilangan, mangaꞌgenan ta na it baꞌgung pangaꞌgenan nga mataldeng, nga subung nagat pangaꞌgenan ni Cristo.

⁹ Ka magkaꞌrutan ta nga, si Cristo ngaytu, inggen kanyat paꞌuliꞌ baw ega naytu maat matay pat sumaꞌup. Talagang ega nay pudir it kamataynen it kanya.

¹⁰ Sabap, kat kamataynen ya, kumplitu na i pandaꞌeg yat kasalaꞌan. Aypaꞌ ega na kaꞌilangan ya nga matay paꞌ it sumaꞌup. Baw kayti, it inggen kanyat paꞌuliꞌ, magpangaꞌgenan na it subraꞌ nga kat ikabantug it Ampuꞌang Diyus.

¹¹ Aypaꞌ ka dapat mi na nga ipabetang i sadili mi nga atnat patay kat muꞌsang kasalaꞌan, nga muꞌsang pangaꞌgenan mi, kat ikabantug gasiꞌ it Ampuꞌang Diyus sabap it pakilagpit mi it ki Jesu-Cristo.

¹² Mga bilug ta, pirmi nga kubwat it karaꞌe-raꞌetan. Aypaꞌ, kaꞌilangan, daꞌkamu na paꞌuripen paꞌ it kasalaꞌan nga pagsumbayaꞌen mi nga pirmi i mararaꞌe-raꞌet ngaytung kaꞌirgan.

¹³ Baw gasiꞌ ega mi na ipasakep it pamegbeg it kasalaꞌan i maski unu nga bagiꞌ it bilug mi nga ipagsumbayaꞌ it karaꞌe-raꞌetan, in daꞌga iyan na i pasakpan mi, Ampuꞌang Diyus. Ipabetang mi i sadili mi nga patay na nga ipiyagꞌugad na kat baꞌgung pangaꞌgenan, bawnga ipagꞌintergaꞌ mi duꞌut Ampuꞌang Diyus i muꞌsang-muꞌsa mi kat buwat nga purus mataldeng kat panleteg ya.

¹⁴ Sabap liꞌwan ta na kat pamegbeg it kasalaꞌan ka kayti, ega na pagsunud tat mga urdin i pagsarigan ta nga ikapisit kataldengan kat panleteg it Ampuꞌang Diyus, in daꞌga yanay pagsagyaan ta nga ikapisiꞌ it kataldengan ngaytu, ildaw it Ampuꞌang Diyus it aten.

Sana iyan nay paꞌuripnan ta, kaꞌirgan it Ampuꞌang Diyus

¹⁵ Ta unu, it kayti nga kat sakep ta na it ildaw it Ampuꞌang Diyus, mapakay na nga sumari ta nat buwat it kasalaꞌan sabap, yanayan, pagsisiguruun ta nga ega yay ikapisiꞌ tat karibriyan, pagsunud ngaytit mga urdin ni Moises? Talagang ega maat magꞌaꞌatkayan.

¹⁶ Daꞌga baꞌ magkaꞌrutan mi nga in siyuy paꞌuripnan ta, kat pudir ya na kitang banar? In muwat tami nga muwat it kasalaꞌan, subuk uripen tami na it kasalaꞌan ngaytu. Baw egay beken nga liꞌwan ya, kamataynen. Iyan talagay magayeng paꞌuripnan ta, pagsunud it kaꞌirgan it Ampuꞌang Diyus, nga liꞌwan ya, pangaꞌgenang mataldeng kat panleteg ya.

¹⁷ Kayti dakulay pasalamat ku it kanya sabap kamu, nga dati nga uripen it kasalaꞌan, piyalulusan mi baw siyunud i kamatuudang ipiyangadal asat imyu.

¹⁸ Piyaliꞌwan kamu na kat pudir it kasalaꞌan baw kayti, pagbuwat it kataldengan, yanay subuk piyaꞌuripnan mi.

¹⁹ Paribasay matꞌed i mga bagay ngaytu, baw ega paꞌ dakulaꞌ i kasepsep mi, piyaꞌalimbawaan kut uripen baw agalen isaꞌun madaliꞌ masepsepan mi. Saꞌup ku sing iꞌaat, katꞌesa ipiyabegbeg mi i sadili mi kat muꞌsang kalasit karaꞌe-raꞌetan nga maraꞌway kat panleteg it Ampuꞌang Diyus. Aypaꞌ kayti, beteꞌ, iꞌugad mi na i pagsirbi mi baw ipabegbeg mi na i mga bilug mi kat buwat nga mataldeng baw alaid kat muꞌsang kasalaꞌan.

²⁰ Ka katꞌesa, nga uripen kamu paꞌ it kasalaꞌan, alaid kat nakem mi i mga mataldeng nga pagbuwaten.

²¹ Temed ta, unuy napulus mi it iti nga mga bagay nga pagbuwaten mi katꞌesa it pagꞌeyaꞌan mi naga kayti? Ka yay matuud, uliꞌan-uliꞌan ya kaytu, kamataynen.

²² Temed ta, kayti nga piyaliꞌwan kamu na kat pamegbeg it kasalaꞌan, kayti nga nagpaꞌuripen kamu na it Ampuꞌang Diyus, dakulay kapulusan ya ka magpangaꞌgenan kamu na uyun kat kaꞌirgan ya, nga egay beken nga uliꞌan kaytu, kaꞌgenang egay kaskedan.

²³ Sabap maꞌyag nga kamataynen nga egay kaskedang panriga i liꞌwan it kasalaꞌan ngaytu. Temed maꞌyag gasiꞌ nga kaꞌgenang egay kaskedan i ipagꞌildaw ngaytut Ampuꞌang Diyus kat muꞌsang taw nga maglalagpit nat ki Cristo Jesus nga Ampuꞌan tami.