Roma 5 - Tagbanwa

Naꞌawaꞌ nay ega ipagkagayen it taw baw Ampuꞌang Diyus

¹ Ta it ipagpabetang ta nat Ampuꞌang Diyus nga ega nay kakasalaꞌan sabap it pamayaꞌ baw pagsarig tat kamataynen it Ampuꞌan ta nga si Jesu-Cristo, aypaꞌ kagayen tami na kanya.

² Sabap it binwat ngaytu ni Jesu-Cristo nga pagpamayaꞌnen baw pagsarigan ta, pagsasakpen ta na it ildaw ngaytut Ampuꞌang Diyus nga paglabayen ta na kayti. Baw talagang pagsisiguruun tat masagyang-masagya nga sakpen ta gasiꞌ it ega basta-bastang kabantugan nga ibgay it Ampuꞌang Diyus it aten duꞌun it langit.

³ Baw ega lamang itu ngaytu i masagyaan tami. Maski mga kakuriꞌan nga paglabayen ta kayti, pagsagyaan ta gasiꞌ sabap urut ta nga, liꞌwan ya kaytu, subrang madungagan i kateꞌteꞌ tat pamayaꞌ ta.

⁴ Ta daꞌga, in atkayan, subrang sagyaan tami it Ampuꞌang Diyus ka matanyag nga magkateꞌteꞌ tami nga mga taw? Aypaꞌ, liꞌwan ya gasiꞌ, subrang magmapaꞌgen i kasiguruwan tat kagayenan nga ibgay yat aten kat pagdadarapaꞌen nga timpu.

⁵ Talagang egaytu desang kaꞌuruꞌ-uruꞌan i pagꞌiꞌinawaren ta ngaytu sabap natantuwan ta na nga pagrarasan tang banar it Ampuꞌang Diyus. Ipiyatantu naytut aten it Espiritu Santo nga ipiyapasarum ya situt bilug ta.

⁶ Panawun it pikiran mi i kadakulat raras ngaytut Ampuꞌang Diyus. Sabap, iyan ega talagay mabwat it taw isaꞌun maribri kat panriga sabap it kasalaꞌan nira, kat timpu nga ipiyabetang-betang it Ampuꞌang Diyus, ipiyalampud ya si Cristo nga paturuꞌ it duguꞌ ya ka tumanggung it kasalaꞌan it taw.

⁷ Talagang makuriꞌ tu mabwat it maski siyu nga iganti yay ginawa ya kat ginawa it beken nga taw, maski na maat mataldeng i taw ngayting paggantiyan ya. Sabagay barang may mangaas nagaytut muwat it atkaytu in talagang magayen i adat it taw ngaytung paggantiyan ya.

⁸ Temed ta, kayti, ipiyatantu it Ampuꞌang Diyus i kadakulat raras yat aten it, maski tegeb ta nang tegeb it kasalaꞌan, igiyanti ni Cristo i ginawa ya sabap it aten.

⁹ Ta it kayti, timnaldeng tami na kat panleteg it Ampuꞌang Diyus sabap it pamayaꞌ baw pagsarig tat timnuruꞌ ngayti nga duguꞌ ni Cristo, ta, sabap nagat binwat ngaytu ni Cristo, siguradu nang maribri ta gasiꞌ kat panriga it Ampuꞌang Diyus sabap it mga kasalaꞌan tami.

¹⁰ Sabap tagnaꞌ, mga kakuntraꞌ tami talaga it Ampuꞌang Diyus sabap it mga kasalaꞌan ta. Temed tiyanggap ya na kita nga subuk magagayeng iba-iba ya sabap it kamataynen it Anak ya nga si Jesus. Aypaꞌ in atkayay ildaw yat maski mga kakuntraꞌ ya, kayti, it mga iba-iba ya na kita, subraꞌ nang maribri ta kat panriga ya ka, lamang natay si Jesus, egen siꞌ kayti. Ipasiguru ya i karibriyan ta.

¹¹ Baw ega lamang maribri ta kat panriga in daꞌga masagya tami nga magbantug it Ampuꞌang Diyus ka, sabap it Ampuꞌan nga si Jesu-Cristo, tiyanggap ya na kita nga mga iba-iba ya.

Piyanggaringan it nakmutan i banwa it kasalaꞌan baw ildaw nga ega basta-basta

¹² Ta, kasalaꞌan ngaytu nga nakakmut it banwa, sang kataawan lamang i garing, si Adan ngayti. Subung naga i kamataynen ngaytu, liniꞌwanan ya duꞌut kasalaꞌan ngayti ni Adan. Iti na ngayti, puꞌun-puꞌun it nanlatap nat taw i kamataynen ngaytu, sabap subung nat nagkasalaꞌan nay muꞌsang taw ka esa-esay puꞌun.

¹³ Talagang, garing duꞌut ki Adan ngayti seked it timpu nga ipiyaskel it Ampuꞌang Diyus i mga urdin ya duꞌut ki Moises, sigi nay pagkasalaꞌan it taw. Maski ega magkaranggaꞌ niray mga urdin ngayti, ka ega paꞌ ipiyalampud it Ampuꞌang Diyus, temed may mga urdin naga nga pagranggaꞌen nira, iyan mga urdin nga subuk magsusurat kat nakem nira. Ka simpri ega ipagpabetang sira nga makasalaꞌan in egay urdin nga pagranggaꞌen nira.

¹⁴ Maski ega subuk kasalaꞌan ngayti ni Adan i kasalaꞌan nira, ka ega pagkuntraꞌen i ipiyagpina-pinaꞌ it Ampuꞌang Diyus, temed ipagpabetang sira naga nga makasalaꞌan. Kamatuudan, magsisigi nang magpatay. Ka ega maꞌaat nga nagpapuꞌun duꞌut timpu ni Moises nga pagbebegbegan nat kamataynen i taw, in daꞌga garing paꞌ talagat timpu ni Adan. Mga bagay ngaytu pasar it ki Adan, subuk ladawan lamang it mga bagay pasar it ki Cristo, kanya nga isiyanggup it Ampuꞌang Diyus nga mabut in naꞌbut nay timpu.

¹⁵ Temed, ta, ega nagaytu maat nagsubung sira in daꞌga dakulay piyagbelagan it liꞌwan it binwat it duwa ngaytu. Sang kataawan lamang si Adan ngaytu. Temed sabap it kasalaꞌan ya pagsasakpen nat kamataynen i muꞌsang banwa. Si Jesu-Cristo ngaytu, sang kataawan naga. Temed sabap it binwat ya, mapakay na nga ildawan i muꞌsang taw it ega basta-bastang kagayenan nga subraꞌ paꞌ nga banar it kamataynen nga liꞌwan it kasalaꞌan ngayti ni Adan.

¹⁶ Baw itu pay piyagbelagan it ildaw ngaytut Ampuꞌang Diyus baw iyan ega magayen nga natanaꞌan it kasalaꞌan ni Adan. Sabap lamang it esa-esa lamang ngayti nga kasalaꞌan ni Adan ipiyabetang i muꞌsang banwa nga makasalaꞌan, nga kaꞌilangan rigaen it Ampuꞌang Diyus. Takaꞌ belag talagay ildaw it Ampuꞌang Diyus. Ka maski ega na mabilang i kasalaꞌan it taw temed mapakay nga ipabetang na sira nga ega nay kakasalaꞌan kat panleteg ya.

¹⁷ Maꞌyag nga sabap it kasalaꞌan it sangbat nga taw, si Adan ngaytu, nasakep nay muꞌsang taw it kamataynen. Temed sabap gasiꞌ it sangbat nagang taw nga si Jesu-Cristo, subrang piyakamagayen i matanggap it iyan magpaꞌildaw-ildaw it kanya. Ka sabap it ildaw it Ampuꞌang Diyus nga bastanting-bastanti, begayan sirat begay-matag nga maꞌiriꞌ kat panleteg ya i muꞌsang kasalaꞌan nira, baw kaꞌibaan na sira ni Cristo it magꞌadiꞌ duꞌun it langit.

¹⁸ Aypaꞌ maꞌyag na siguru it aten nga in magꞌuꞌunu pagsasakpan nat ukuman nga kamataynen i muꞌsang taw sabap it esa lamang ngayting kasalaꞌan ni Adan, atkayan naga nga sabap it kamataynen ni Cristo nga egay maski unu nga kasalaꞌan, mapakay nang tumaldeng nay muꞌsang taw kat panleteg it Ampuꞌang Diyus, nga mabgayan sira it kaꞌgenang egay kaskedan.

¹⁹ Sabap in magꞌuꞌunu, kat ega pagsunud it sangbat nga taw, dakel nay nagbaraꞌ nga makasalaꞌan kat panleteg it Ampuꞌang Diyus, atkayan naga, sabap it pagsunud it sangbat nagang taw, dakel na i magbaraꞌ nga mataldeng kat panleteg ya.

²⁰ Iyan naꞌlay na, ipiyaꞌrut nat Ampuꞌang Diyus i mga urdin ya, isaꞌun subraꞌ nga makilalaan it taw i kadakulat pagranggaꞌ nirat mga urdin ngaytu. Temed maski sang unuy kadakulat kasalaꞌan it taw, subrang-subraꞌ nga magbastanti i ildaw it Ampuꞌang Diyus.

²¹ Aypaꞌ, maski nandaꞌeg i kasalaꞌan ngaytu nga liꞌwan ya kamataynen, diyaꞌeg naytut ildaw it Ampuꞌang Diyus. Ildaw na ngaytuy magpandaꞌeg ka, sabap it binwat it Ampuꞌan ta nga si Jesu-Cristo, mapakay na nga tumaldeng nay taw kat panleteg it Ampuꞌang Diyus baw mabgayan it kaꞌgenang egay kaskedan.