Roma 4 - Tagbanwa

Piyaꞌalimbawaan ni Pablo i mga nalabayan ni Abraham

¹ Ta, in iyan siꞌ i sangpiten ta sabap it ki Abraham, iyan mabantug nga puꞌun-puꞌun nameng mga Judio, unuy maꞌrutan ta pasar it itung mga bagay duꞌut kanyang nalabayan?

² Ka in maat sabap it kaꞌustuꞌang pagsunud ya it mga urdin ipiyabetang si Abraham ngaytu nga mataldeng kat panleteg it Ampuꞌang Diyus, simpri may ipagkapalandi-landi ya na. Temed ega maat ipiyabetang kanya nga mataldeng sabap it kaꞌustuꞌan i pagsunud ya.

³ Ka unuy inaat it kasuratan? Daꞌga baꞌ magsusurat nga namayaꞌ si Abraham it sanggup ngaytit Ampuꞌang Diyus it kanya, aypaꞌ ipiyabetang kanya nga taw nga mataldeng sabap it pamayaꞌ ya ngayti?

⁴ Aypaꞌ egaytu tumbas it pagsunud yat mga urdin. Kaꞌalimbawaan it itu ngaytu, beteꞌ, taw nga magꞌurnal. Iyan tangdan nga tanggapen ya sabap it buwat ya, ega pagtaꞌwagen nga ildaw it kanya in daꞌga tangdan ka may binwatan ya.

⁵ Temed belag i karibriyan ngaytu. Itu, ildaw tu nga banar. Ka, pabetang ngaytut aten it Ampuꞌang Diyus nga mga taw na nga mataldeng, egaytu sabap it siyunud tami i inaat yat aten, in daꞌga sabap lamang it pagsarig baw pamayaꞌ ta it kanya, kanya nga magpabetang nga ega nay kakasalaꞌan it mga makasalaꞌan naga, sabap it kamataynen ni Cristo.

⁶ Ituy pagpaꞌiguꞌan ni David nga adiꞌ it tagnaꞌ. Ipiyamatuud ya nga masagya i mga taw nga ipabetang it Ampuꞌang Diyus nga mataldeng maski kurang sira kat mga buwat nga magagayen.

⁷ Magꞌaat i magsusurat, “Magkasagya sira nga napasinsiya it Ampuꞌang Diyus i muꞌsang pagranggaꞌ nirat mga urdin ya, baw mga kasalaꞌan nira, ega na pagdedemdemen ya.

⁸ Talagang magkasagya i taw nga, muꞌsang kasalaꞌan ya, punasen it Ampuꞌang Diyus.”

⁹ Ta unu, itu ngaytung kapasinsiyaan it kasalaꞌan, mga Judio lamang i makatanggap, sira nga naturiꞌan? U makatanggap gasiꞌ i mga bangsa nga ega Judio, sira nga ega turiꞌ? Iyan bay matuud, makatanggap i maski ega Judio. Ka sangpiten ku siꞌ si Abraham ngayti nga ipiyabetang it Ampuꞌang Diyus nga mataldeng sabap it duꞌut pamayaꞌ baw pagsarig ya.

¹⁰ Ka panawun it pikiran mi in kaꞌnuytu nagꞌabut it kanya. Unu, iyan ipiyabetang kanya nga mataldeng, naturiꞌan na kanya, u ega paꞌ? Yay matuud, kat iting timpu, ega paꞌ naturiꞌan kanya.

¹¹ Baw iyan miyabut na nga nanuriꞌ kanya, turiꞌ ya ngayti, katandaꞌ lamang it maski ega pay turiꞌ ya ipagpabetang kanya nang lagi it Ampuꞌang Diyus nga taw nga mataldeng sabap it pamayaꞌ baw pagsarig ya. Aypaꞌ, si Abraham ngaytu, subuk piyakaꞌamaꞌ it muꞌsa nga magpamayaꞌ baw magsarig it Ampuꞌang Diyus, maski ega sakep sirat urdin nga pagturiꞌ. Sira gasiꞌ, ipabetang nga mataldeng sabap it pamayaꞌ baw pagsarig nira.

¹² Subung naga, kanyay piyakaꞌamaꞌ it muꞌsang mga Judio nga ega lamang naturiꞌan, in daꞌga tingled duꞌut Ampuꞌang Diyus i pamayaꞌ baw pagsarig nira, subung nagat puꞌun-puꞌun nira nga si Abraham, maski ega paꞌ turiꞌ kanya.

Pamayaꞌ baw pagsarig ta lamang i ikatanggap it ildaw it Ampuꞌang Diyus, ega kat buwat nga sadili

¹³ Dedemdemen mi nay isiyanggup ngayti it Ampuꞌang Diyus it ki Abraham nga ipasakep it kanya baw mga tungtung-inapuꞌ ya i muꞌsang banwa. Temed egaytu maat sabap it pagsunud ni Abraham it mga urdin it Ampuꞌang Diyus, in daꞌga sabap it kataldengan nga ipiyabetang it Ampuꞌang Diyus it kanya uyun kat pamayaꞌ baw pagsarig ya.

¹⁴ Ka in beteꞌ mga magsunud lamang it mga urdin ya i makasakep, daꞌga maꞌaat nga egay kapulusan it pamayaꞌ baw pagsarig ngaytu baw egay kamatuudan it sanggup ngayti, ka egay magkasunud it mga urdin it pagsunud nga kaꞌustuꞌan?

¹⁵ Talagang, mga urdin ngaytu, ega ikapisiꞌ it ildaw in daꞌga panriga sabap pirmi nga pagranggaꞌen it muꞌsang taw. Iyan lamang i egay magkaranggaꞌ nga urdin, in beteꞌ egay urdin.

¹⁶ Aypaꞌ maꞌyag nga ega kat pagsunud nirat urdin matuman it taw i isiyanggup ngaytit ki Abraham, in daꞌga kat pamayaꞌ nirat inaat it Ampuꞌang Diyus, isaꞌun matanyag nga ildaw ya i garingan, ega sadili nirang buwat. Ka in atkayan, masiguru naytu it muꞌsang mga tungtung-inapuꞌ ni Abraham kat pamayaꞌ, sira nga ega lamang magsunud it mga urdin in daꞌga magpamayaꞌ baw magsarig gasiꞌ it Ampuꞌang Diyus, subung nagat ki Abraham. Sabap, si Abraham, kabilangan ya, subuk amaꞌ tami nga muꞌsa in situt pamayaꞌ baw pagsarig ngaytuy pagsugiden.

¹⁷ Ka daꞌga basaꞌan magꞌaat ngayan duꞌun it kasuratan, “Ipiyabetang-betang ku nga ikaw na ngaytu i panggaring-garingan it dakel nga bangsa.” Saꞌup ku sing iꞌaat nga talagang matuman i isiyanggup ngaytit ki Abraham ka egay beken nga simnanggup in daꞌga Ampuꞌang Diyus nga pagpamayaꞌnen baw pagsarigan ya, kanya nga ega basta-bastay guna ka maski taw nga patay, magkaꞌgen ya, baw, mga bagay nga ega paꞌ miyabut, magkapabaraꞌ ya.

¹⁸ Si Abraham ngaytu, talagang dakulay pamayaꞌ yat inaat it Ampuꞌang Diyus nga subuk kadakel it bituꞌun i kadakel it mga tungtung-inapuꞌ ya. Maski ega na talaga mapakay nga makaꞌanak paꞌ kanya, ininggetan ya talagay pamayaꞌ yat sanggup ngayti. Aypaꞌ nagbaraꞌ kanyang matuud nga amaꞌ it dakel nga bangsa.

¹⁹ Kat iting timpu magsasang gatus nang taꞌun i idad ya. Maꞌaat nang atnat patay nay bilug ya, ta unu pay ikaꞌanak ya? Ta, asawa ya gasiꞌ, ega magpanganak nga babay. Temed maski atkayti, ega nagduwa-duwa i pamayaꞌ yat inaat it Ampuꞌang Diyus.

²⁰ Talagang egay maski dekeyeꞌ nga pakiꞌambut ni Abraham duꞌut isiyanggup ngaytit kanya, in daꞌga subrang kiminseg i pamayaꞌ ya nga magsisigi nga pagbantugun yay Ampuꞌang Diyus.

²¹ Ka talagang pagsisiguruun ya nga kayang-kaya it Ampuꞌang Diyus nga tumanen i isiyanggup ya ngaytit kanya.

²² Aypaꞌ, sabap it keseg it pamayaꞌ ya ngayti, ipiyabetang kanyat Ampuꞌang Diyus nga taw nga mataldeng.

²³ Temed ampang ngaytu nga “ipiyabetang kanyat Ampuꞌang Diyus nga taw nga mataldeng,” ega lamang kanyay pagpaꞌiguꞌan,

²⁴ in daꞌga pati kita gasiꞌ. Ka atkayan nagay pabetang it Ampuꞌang Diyus it aten in tingled duꞌut kanya i pamayaꞌ baw pagsarig ta, kanya nga minggen it paꞌuliꞌ it Ampuꞌan ta nga si Jesus.

²⁵ Talagang ipiyaꞌimatay tu si Jesus ngaytu it Ampuꞌang Diyus ka iyan i tumanggung it mga kasalaꞌan tami. Bawnga inggen kanya it paꞌuliꞌ isaꞌun, kita, ipabetang na nga mataldeng kat panleteg it Ampuꞌang Diyus.