Roma 3 - Tagbanwa

¹ Ta, in atkayan, barang pagpikiren mu, unuy kapulusan it pagkaJudio ta? Baw unu gasiꞌ i kagayenan it pagturiꞌ ngaytu?

² Tubag ku, dakulaꞌ nagay kapulusan it pagkaJudio ta. Uꞌnat muꞌsa, mga Judio ngaytu i piyaskelan it Ampuꞌang Diyus it ampang ya it tagnaꞌ.

³ Temed maat mu, “Unuy kapulusan kayan it may ega naga simnunud it magsusurat duꞌun?” Paꞌugdun mu paꞌ, “Daꞌga baꞌ ega na tumanen it Ampuꞌang Diyus i isiyanggup ya ngaytut mga Judio?”

⁴ Temed ega. Maski maꞌambut i muꞌsang taw, ega maꞌambut i Ampuꞌang Diyus. Tumanen ya naga i isiyanggup yat mga Judio. Ka may magsusurat naga duꞌun it kasuratan nga magꞌaat, “Isaꞌun matanyag kat matat kadakel nga matuud i mga ampang mu. Baw isaꞌun maski sang unu i batir it taw it imu, limiꞌwan nga purus kataldengan talagay imu.”

⁵ “Temed,” maat it beken, “in subrang matanyag i kataldengan it Ampuꞌang Diyus sabap lamang it kadakulat kasalaꞌan ku, daꞌga baꞌ ega magayen in ukumanan ya i pagbuwaten ku ngaytung kasalaꞌan? Sana pakugayenen ya, ka subuk kat ikabantug ya naga.” (Egaytu ipagpanulduꞌ ku. Pagsangpiten ku lamang i daꞌawa it katataawan.)

⁶ Ayaw! Ega pikiren i atkayan. Ka in pakugayenen it Ampuꞌang Diyus i kasalaꞌan it taw, magꞌuꞌunu maꞌukumanan ya asan it pagdadarapaꞌen i kasalaꞌan it muꞌsang taw situt sinirungat langit?

⁷ “Takaꞌ,” maat it beken, “in alimbawa ipasbung tay ampang it taw it ampang it Ampuꞌang Diyus matanyag i kabantugan it Ampuꞌang Diyus, ka egay maparagan tang maski sang tagaꞌ nga ambut kat ampang ya, ega subuk kat taw. Ta, in atkayan, unuka ukumanan ya paꞌ i kaꞌambutan it taw in kat ikabantug ya naga?”

⁸ Maat nira, in kat ikabantug nagat Ampuꞌang Diyus i liꞌwan it karaꞌe-raꞌetan nga pagbuwaten it taw, sumari ta na lamang it buwat it karaꞌe-raꞌetan! Iyan beken, mamagpanranggaꞌ it aken ka ipagpaliꞌwan nira nga itu nagay ipagpanulduꞌ ku. Temed ega. Talagang, sira ngaytu, egay pagduwa-duwa nga rigaen sirat Ampuꞌang Diyus ka yay bagay it kanira.

Egay taw nga mataldeng kat panleteg it Ampuꞌang Diyus

⁹ Aypaꞌ unu, kita ngaytu nga mga Judio, landaw ta na kat beken nga taw? Yay matuud, ega. Sabap ipiyagpamatuud ku na nga, muꞌsang taw, Judio baw daꞌga, uripen nga muꞌsa it kasalaꞌan.

¹⁰ Sabap maꞌyag i tagnaꞌ nga ipiyasurat it Ampuꞌang Diyus nga magꞌaat, “Talagang egay taw nga mataldeng kat panleteg it Ampuꞌang Diyus. Maski esa, talagang ega.

¹¹ Egay taw nga may kamatuudang kasepsep. Baw egay magpaꞌres tumulus it in magꞌuꞌunu makilalaan nirang banar i Ampuꞌang Diyus.

¹² Talagang muꞌsat taw, nangalaid kat dalan it kamatuudan. Nagbaraꞌ na sirang egay kakapulusan. Talagang egay magbuwat it kagayenan. Maski esa, ega na.

¹³ Kat kadakulat ampang nirang mararaꞌway, kaꞌalimbawaan it baꞌbaꞌ nira, lebeng nga ega tiyaburan. Dilaꞌ nira in kumuliꞌget, pangakal i pagsugiden. Subung gasit kat bibig na niray dalit it dukul.

¹⁴ Baꞌbaꞌ nira, punuꞌ nat panamayaꞌ baw pangarampangen.

¹⁵ Mayayaꞌngan nay mga aꞌay nira basta paturuꞌ it duguꞌ it masigkataw nira.

¹⁶ Kaꞌaat ka piyanawan nira, atnat siyakep it maꞌingget nga panalakep.

¹⁷ Talagang egay uru-urut nirat adat ngaytung pagꞌini-inibaen.

¹⁸ Egay kat nakem nira nga maski dekeyeꞌ nga iꞌlam nira it Ampuꞌang Diyus.” Yay ipiyasurat it Ampuꞌang Diyus it tagnaꞌ.

¹⁹ Baw magkaꞌrutan ta na nga unu-unu nga pagsugiden it ampang ngaytut Ampuꞌang Diyus, ega lamang mga taw nga ega Judio i pagpaꞌiguꞌan in daꞌga mga Judio gasiꞌ, ka siray uꞌna-uꞌnang pagsasakpan it mga urdin ya. Aypaꞌ ega nay makadaꞌawa it maski siyu in mangukuman na i Ampuꞌang Diyus ngaytu. Limiꞌwan talaga nga mapakay nga betanganan ya it ukuman i muꞌsang taw.

²⁰ Sabap egay maski siyung taw nga tumaldeng kat panleteg it Ampuꞌang Diyus kat pagsunud yat mga urdin, ka ipagpatantut aten it mga urdin ngaytu nga makasalaꞌan tami nga muꞌsa.

In magꞌuꞌunu tumaldeng i taw kat panleteg it Ampuꞌang Diyus

²¹ Temed kayti, ipiyatantu nat Ampuꞌang Diyus in magꞌuꞌunu tumaldeng i taw kat panleteg ya. Dalan ngaytut kataldengan, ipagpamatuud naga it mga kasuratan it tagnaꞌ nga ipiyasurat it Ampuꞌang Diyus it ki Moises baw mga prupitaꞌ. Ega na maat duꞌun paꞌ it pagsunud it mga urdin ngayti tumaldeng i taw.

²² In daꞌga talagang kat pagsarig it kamataynen ni Jesu-Cristo baw kamatuudang pamayaꞌ it kanya, iyan i ikapisiꞌ tat kataldengan kat panleteg it Ampuꞌang Diyus. Mapakay tu kat maski siyung taw ka, muꞌsang taw, surubung.

²³ Makasalaꞌan talagay muꞌsa baw alaid kat ega basta-bastang kataldengan it Ampuꞌang Diyus.

²⁴ Temed maski atkaytu na, ipagꞌildaw nat Ampuꞌang Diyus kat mga taw i kataldengan ngaytu kat panleteg ya. Ka duꞌun it kamataynen ni Cristo Jesus ipiyagribri ya na i katataawan kat panriga it Ampuꞌang Diyus sabap it mga kasalaꞌan nira.

²⁵ Ipiyabetang-betang it Ampuꞌang Diyus nga kat pagturuꞌ it duguꞌ ni Cristo Jesus ngaytu buwaten kanya nga salisi nga ipagꞌangut it kapasinsiyaan it kasalaꞌan. In siyu-siyuy sumarig baw mamayaꞌ it kamataynen ya ngaytu, makanira na i kapasinsiyaan ngaytu it kasalaꞌan. Binwat tu it Ampuꞌang Diyus i atkaytu isaꞌun matantuwan it muꞌsang taw nga, kanya, mataldeng baw ega mapakay nga ega ukumanan ya i kasalaꞌan it taw. Ka, maski na maat kaꞌlay ngaytu, garing paꞌ it tagnaꞌ, subuk pagpataꞌnan ya lamang i kasalaꞌan it taw,

²⁶ temed kayti, inukumanan ya na i kasalaꞌan ngaytu kat kamataynen ni Jesus. Aypaꞌ, kayti, magkatantuwan ta nga purus kataldengan i ipagpapanaw ya baw mapakay na nga ipagpabetang ya nga ega nay kasalaꞌan it kumpur magsarig baw magpamayaꞌ it ki Jesus.

²⁷ Aypaꞌ naꞌawaꞌ nay muꞌsang patuꞌgud it taw pasar it mga magagayeng buwat nga maat yay ikapisiꞌ it tumaldeng sira kat panleteg it Ampuꞌang Diyus. Sabap ega kat buwat ta mapisiꞌ taytu, in daꞌga kat kamatuudang pagsarig baw pamayaꞌ ta.

²⁸ Ka talagang maꞌyag nga maꞌyag nga ega duꞌut pagsunud tat mga urdin ipabetang tat Ampuꞌang Diyus nga mataldeng, in daꞌga duꞌut pamayaꞌ baw pagsarig tat binwat ni Jesus.

²⁹ Baw ega lamang mga Judio i tanggapen ya, adimaat mga Judio lamang i ireg ya nga sakpen. Ega maat atkayan in daꞌga talagang sakpen ya i muꞌsang bangsat taw, kumpur pasakep it kanya.

³⁰ Talagang esa-esa lamang i Ampuꞌang Diyus ngaytu baw esa-esa lamang i ikapisiꞌ it kataldengan kat panleteg ya, sigun lamang kat pagsarig baw pamayaꞌ it binwat ni Jesu-Cristo. Egaytuy piniliꞌan, Judio baw daꞌga.

³¹ Ta it atkayan, barang pagpikiren mi nga ipagpabetang namen nga ega nay kapulusan it mga urdin ngaytu nga garing duꞌut Ampuꞌang Diyus, nga ega na kaꞌilangan sunudun it taw? Temed ega. Ega maat magꞌaꞌatkayan, in daꞌga pagpanindegan namen naga.