Roma 2 - Tagbanwa

Kataldengan nga muꞌsa i ibetangan it Ampuꞌang Diyus nga ukuman

¹ Ta, barang pagraꞌwayen mi na i karaꞌe-raꞌetan ngaytung siyangpit ku, temed ega pikiren mi nga egay turubagen mi gasit imyu. Sabap, kat pagꞌukuman mi ngaytut beken, subuk pagꞌukumanan mi nagay sadili mi. Ka lamang paꞌuku-ukuman kamu, atkayan nagay imyung pagbuwaten.

² Talagang magkaꞌrutan ta nga purus mataldeng i ukuman nga ibetangan it Ampuꞌang Diyus kat mga magbuwat ngaytut atkaytu.

³ Takaꞌ in beteꞌ pagbetanganan mi nat ukuman i mamagbuwat ngaytut karaꞌe-raꞌetan temed surubung nagay karaꞌe-raꞌetan nga pagbuwaten mi, ega pikiren mi nga mapalagyuwan mi i ukuman ngaytut Ampuꞌang Diyus.

⁴ Barang tanud mi, mga taw kamu na nga pagsagyaan nga pirmi it Ampuꞌang Diyus sabap it kadakulat ildaw yat imyu, baw kapalulusan ya nga pagpataꞌnan ya lamang it kaꞌlay ngaytu i mga kasalaꞌan mi. Temed subuk ega pagꞌabutun it pikiran mi nga, buwat ya nga atkaytu, sana yay tumaban it imyu it magsinguliꞌ baw mangindiꞌ it muꞌsa ngaytung mga kasalaꞌan mi.

⁵ Yay matuud, sabap it kadsen it ulu mi baw, iyan daꞌkamu na ngayan magsinguliꞌ, pagpabeꞌgaten mi na talagay panriga nga ibetangan it imyu in asan nat aldaw nga ipatantu nat Ampuꞌang Diyus i iseg ya baw ukumanan yat ega basta-bastang kataldengan i kasalaꞌan it taw.

⁶ Kat aldaw ngayan talagang tumbasan ya i kadakel it taw uyun kat kanirang mga binwatan.

⁷ May mga taw nga mapiyaꞌres it buwat it magagayeng pagbuwaten ka iyan nagay kat nakem nira, nga galangen sira nga sakpen it ega basta-bastang kabantugan duꞌun it langit, baw begayan it egay kaskedang kaꞌgenan. Ta, sira ngaytu, siguradung begayan it kaꞌgenan ngaytu nga egay kaskedan.

⁸ Temed talagang egay maski sang kildan-tulduꞌ nga pasinsiya nga tanggapen it mga taw nga ipagpadaꞌeg lamang nga pirmi i sadili nira, nga yagay pagpakugayenen, karaꞌe-raꞌetan, nga pagpasngelan niray kamatuudan nga garing duꞌut Ampuꞌang Diyus. Talagang labayen nirang banar i iseg ya.

⁹ Talagang kakuriꞌan nga ega basta-basta baw karigaan nga ereꞌeret i labayen it kumpur magbuwat ngaytut karaꞌe-raꞌetan, uꞌna nay mga Judio, subung naga i muꞌsang bangsat taw nga beken.

¹⁰ Temed kamatuudan talaga nga kabantugan, kaꞌimbengan it nakem, baw paggalang it kanira i matanggap it kumpur magbuwat ngaytu it magayen, uꞌna nay mga Judio, subung naga i beken nga bangsa.

¹¹ Sabap, Ampuꞌang Diyus, egay pagbidaꞌen ya manggid.

¹² Talagang basta kasalaꞌan, belsan it Ampuꞌang Diyus it panriga. Iyan mga bangsa nga ega Judio, maski ega ipabetang yat kanira nga ega siyunud nira i mga urdin nga ipiyaskel yat mga Judio, ka egay uru-urut nirat mga urdin ngayti, temed rigaen ya naga ka dakulaꞌ nagay binwat nirang kasalaꞌan. Baw iyan mga Judio, paribasay sira i piyaskelan yat mga urdin ya, rigaen ya sira sabap ega naga siyunud nira i mga urdin ya ngayti.

¹³ Ka ega maat tumaldeng i taw kat panleteg it Ampuꞌang Diyus in sabap lamang it piyaskelan it mga urdin ya, in daꞌga iyan lamang nga magsunud it mga urdin ngaytu.

¹⁴ Mga bangsa nga ega Judio, maski egay uru-urut nirat mga urdin it Ampuꞌang Diyus nga ipiyaskel ya it mga Judio, temed in sumang kaꞌanu magkaꞌuyun i buwat nira it kadalanan it mga urdin ngaytu. Ta in atkayan, mga magagayeng pagbuwaten nga magpangbit kat nakem nira, yay piyakaꞌurdin nga magpadisir it kanira.

¹⁵ Ka subuk magsusurat kat nakem nira i mga urdin it Ampuꞌang Diyus. Aypaꞌ magpamatuud talagay nakem nira in magayen u daꞌga i mga pagbuwaten nira.

¹⁶ Ega lipaten it Ampuꞌang Diyus i muꞌsa ngaytu kat aldaw ngayan nga ipaꞌalima ya nat ki Cristo Jesus i pangukuman it muꞌsang binwat it katataawan, maski mga pagbuwaten nga ipagtagu-taguꞌ nira kayti. Ituy ipagpangadal ku kat Magayen ngaytung Baritaꞌ.

Ega pagsagyaan it Ampuꞌang Diyus i taw in kat pagkaJudio ya na lamang

¹⁷ Ta, kayti, mga kabilug ku nga mga Judio asan, may ikusugid ku it imyu. Pagꞌaaten mu nga Judio ka. Ipagpataꞌas-taꞌas mu i kabit mu duꞌut Ampuꞌang Diyus nga mga Judio lamang i piyaskelan it mga urdin ya.

¹⁸ Aypaꞌ, maat mu, mga Judio lamang i magkaꞌrut nga banar in unuy magagayeng buwaten nga uyun kat kaꞌirgan ya nga ipagtulduꞌ it mga urdin ngaytu.

¹⁹ Ipagpatuꞌgud mu nga magkapangadal mu nay kamatuudan pasar it Ampuꞌang Diyus kat mga taw nga subuk beleg. Ipagpabetang mu nay sadili mu nga magkabgay ka nat kaꞌyagan kat mga taw nga elam paꞌ kaytu.

²⁰ Ipagpalandi-landi mu nga magkapadisiran mu i mga taw nga ega Judio, nga kat pabetang mu, atnat engel-engel u madaragen paꞌ ka egay pagkilala nirat Ampuꞌang Diyus. Ka maat mu nga situt aten lamang nga mga Judio i mga urdin it Ampuꞌang Diyus, nga iyan lamang i kamatuudan nga magbegay it tamaꞌ nga kasepsep.

²¹ Ta, in magkapangadal ka nat beken, unuka ega pagtulduꞌan muy sadili mu? Ipagpanulduꞌ mut beken nga kuydaw i takaw. Ta, unuka magtakaw ka nagay imu?

²² Ipagꞌaat mu nga ega mapakay i pamakun it esang taw duꞌun it ega asawa ya. Temed iyan nagay buwat mut imu! Maat mu gasiꞌ pagraꞌwayen mu i mga pagbete-beteꞌen nga diyus. Temed ega pagraꞌwayen mu nga seldan i mga papagsambaan it mga pagbete-beteꞌen ngaytu ka takawun i betang duꞌun!

²³ Ipagpatuꞌgud mu nga pagsasakpan ka it mga urdin it Ampuꞌang Diyus. Temed pagtibabaꞌen mu naga kanya ka pagranggaꞌen mu nagay mga urdin ya ngaytu.

²⁴ Ka, sabap it karaꞌe-raꞌetan nga pagbuwaten mu, magkasudi-sudi i Ampuꞌang Diyus it mga taw nga ega Judio, subung it magsusurat duꞌun it kasuratan it tagnaꞌ.

²⁵ Ta, ipagpatuꞌgud mu gasiꞌ nga taawan ka it Ampuꞌang Diyus, sabap tiyuriꞌan ka uyun duꞌun it inaat it urdin ya. Temed pagturiꞌ mu ngayan, may kapulusan lamang in pagsunudun mut magayen i mga urdin ngaytu. Takaꞌ in ega naga pagsunudun mu, kabilangan mu, taw nga ega tiyuriꞌan nga ega taawan ya.

²⁶ Atkayan naga, mga taw nga ega Judio nga ega tiyuriꞌan, in beteꞌ buwat nira magkaꞌuyun duꞌut pagꞌaaten it mga urdin, daꞌga kabilangan nira subuk turiꞌ nga mga taw nga pagsagyaan it Ampuꞌang Diyus?

²⁷ Aypaꞌ, mga bangsa ngaytu nga ega Judio nga ega tiyuriꞌan, in uyun kat mga urdin i buwat nira, maꞌukumanan nira kamu sabap, maski maat mga tiyuriꞌan kamu nga taawan it Ampuꞌang Diyus nga piyaskelan it mga urdin ya, temed ega naga pagsunudun mi.

²⁸ Yay matuud, ega kamatuudang Judio nga pagsagyaan it Ampuꞌang Diyus i esang taw in sabap na lamang it Judio i bangsa ya. Baw ega gasiꞌ kamatuudang pagturiꞌ nga pagsagyaan it Ampuꞌang Diyus i pagturiꞌ nga kat bilug lamang.

²⁹ In daꞌga kamatuudang Judio nga pagsagyaan it Ampuꞌang Diyus i esang taw in kat seled ya i pagkaJudio baw pagturiꞌ ya, nga nakem ya i subuk naturiꞌan ka nabaꞌgu it Espiritu Santo. Aypaꞌ pagsagyaan kanya it Ampuꞌang Diyus ka pagsunudun yay kaꞌirgan it Ampuꞌang Diyus it tingled i nakem ya, ega maat pagsunud nga desang paleteg-leteg lamang isaꞌun tuꞌgudun it masigkataw.