Roma 15 - Tagbanwa

Ega lamang sadiling kaꞌirgan i pagpipikiren, in daꞌga, pati kat maꞌiba ta, pikiren naga

¹ Ta, kayti, kita ngaytu nga magꞌalaid nay kasepsep pasar it magayen nga pagsunud it Ampuꞌan, kaꞌilangan, ega naga pabaya-bayaꞌan tami i iyan mga malbaw paꞌ ngayan nga kasepsep, in daꞌga tabangen. Magayen ega lamang sadili nga kaꞌirgan i kat pikiran,

² in daꞌga iyan kaꞌirgan it maꞌiba ta, basta kaꞌirgan nga ikagayen ya baw ikseg it pamayaꞌ ya.

³ Sabap, maski si Cristo, iyan situ paꞌ kanyat banwa, ega sadili yang kaꞌirgan i kat nakem ya. Ka subuk natuman duꞌut kanya i magsusurat duꞌun it kasuratan nga magꞌaat, “Mga panibabaꞌ nirat imu, Ampuꞌang Diyus, aku ngaytu i naꞌiguꞌ.”

⁴ Ega lipaten mi nga, muꞌsa nga magbebtang duꞌun it kasuratan garing paꞌ it tagnaꞌ, panulduꞌ naytut Ampuꞌang Diyus it aten. Ka sabap it ampang ya ngaytu magkasagkaꞌ ta it mga kakuriꞌan nga magꞌabut it aten, baw pagpaksegen i nakem tami isaꞌun subraꞌ nga maꞌingget i paniguru ta it kagayenan nga maꞌaten kat pagdadarapaꞌen.

⁵ Ampuꞌang Diyus talaga i puꞌun it kasagkaꞌ ta ngaytu it kakuriꞌan baw pakseg ngaytut nakem ta. Ipagpanalangin ku nga tabangen ya gasiꞌ kamu nga mangaꞌgenan it urunyun kamu nga muꞌsa, uyun gasiꞌ it kaꞌirgan baw ipiyagladawan ni Cristo Jesus.

⁶ Ka in atkayan subuk esa-esa nay nakem baw baꞌbaꞌ mi nga magbantug it Ampuꞌang Diyus nga Amaꞌ it Ampuꞌan tami nga si Jesu-Cristo.

Talagang pabetang-betang nga lagi it Ampuꞌang Diyus nga ildawan ya i mga taw nga ega Judio

⁷ Aypaꞌ in magꞌuꞌunu masagyang tiyanggap tami ni Cristo kat ikabantug it Ampuꞌang Diyus, atkayan nagay imyung buwaten kat esa may esa, isaꞌun subrang mabgayan mi kanya it kabantugan.

⁸ Ka daꞌga baꞌ kat ikagayen tami nga muꞌsa, Judio baw daꞌga, i inasitu ngayan ni Cristo? Pasar it mga Judio nagbalyu kanya nga manigsirbi nira isaꞌun ipamatuud ya i mga isiyanggup it Ampuꞌang Diyus duꞌun it mga kagiyaringanan nira.

⁹ Baw pasar it mga bangsa nga ega Judio naꞌasitu kanya isaꞌun sira gasiꞌ, makabantug it Ampuꞌang Diyus sabap natantuwan na niray kadakulaꞌ it kaꞌildaw ya. Subung gasiꞌ it magsusurat nga magꞌaat, “Bantugun ku ikaw kat adapan it mga taw nga ega Judio. Kantaꞌen ku talaga i pagbantug kut ngaran mu.”

¹⁰ Magꞌaat pay beken nga inaat, “Sumagya kamung taw nga ega Judio, sang kamuwan it mga taw nga piniliꞌ ya.”

¹¹ Baw magꞌaat paꞌ gasiꞌ i beken nga inaat, “Kamung mga taw nga ega Judio, bantugun mi i Ampuꞌang Diyus. Muꞌsa kamu nga bangsa, magbantug kamu it kanya.”

¹² Ta, maat pay inaat gasiꞌ it prupitaꞌ nga si Isaias, “May tumubuꞌ siꞌ kat mga tungtung-inapuꞌ ni Jesse. Iyan i timindeg nga mamaalaꞌ it mga bangsa nga ega Judio. Duꞌut kanya i paniguru nirat kagayenan.”

¹³ Sana, Ampuꞌang Diyus ngaytu nga puꞌun it kasiguruwan it pagꞌiꞌinawaren tami, ildawan ya kamu it kasagyaan nga egay kaskedan baw kaꞌimbengan it nakem sabap it pamayaꞌ baw pagsarig mit kanya isaꞌun, kat keseg it Espiritu Santo, subrang makaꞌunay i kasiguruwan mit kagayenan nga maꞌimyu kat pagdadarapaꞌen.

Piyatikesegan nga banar ni Pablo i pangadal yat mga taw nga ega Judio.

¹⁴ Mga kasulsugan ku kat pamayaꞌ, kat aken lamang, talagang pagsisiguruun ku nga mga nakman kamu nagang mga taw, baw dakulaꞌ nagay magkasepsepan mi pasar it kamatuudan nga garing duꞌun it Ampuꞌang Diyus. Makaꞌrut kamu gasiꞌ pademdem it esa may esa pasar it itung mga bagay.

¹⁵ Takaꞌ maski na, kat surat ku ngaytu, paribasay may mga bagay nga kaꞌilangan ku nga ipademdem it imyu, aypaꞌ iriyapar kuy ampang ku. Takaꞌ binwat kuytu sabap it ildaw it Ampuꞌang Diyus it aken,

¹⁶ nga binwat ya aku nga manigsirbi ni Cristo Jesus kat ikagayen it mga taw nga ega Judio. Kabilangan ku ngaytu, subung akut sasirduti nga magpangadal it Magayeng Baritaꞌ garing duꞌut Ampuꞌang Diyus isaꞌun, mga taw nga ega Judio, mabwat sira nga subuk pasalamat nga ipagbegay duꞌun it kanya, pasalamat nga masagyaan ya sabap binwat sira it Espiritu Santo nga mapakay na nga tanggapen ya.

¹⁷ Aypaꞌ ega magꞌeyaꞌ aku nga ipabantug it sang dekeyeꞌ i natanaꞌan it pagsirbi ku ngaytut Ampuꞌang Diyus kat tabang ni Cristo Jesus it aken.

¹⁸ Sabap, kat mga magkabwat ku baw kat pangangampangan ku, dakel nga taw nga ega Judio i napapamayaꞌ ku nga pasakep it ki Cristo. Temed ega maat pagꞌambuꞌun ku nga sadili ku nga kakayaan i garing kaytu, in daꞌga tabang tu ni Cristo it aken.

¹⁹ Kat ega basta-bastang tabang it Espiritu Santo dakel i nabwat kung kalililuꞌang bagay nga tandaꞌanan it matuud i ipagpanulduꞌ ku. Talagang alalaid nang mga banwa i napangadalan kut Magayen ngaytung Baritaꞌ pasar it Manriribri nga si Cristo. Garing duꞌut Jerusalem simingked duꞌut Ilirico subuk egay naribayan ku nga rugar.

²⁰ Talagang kaꞌlay ngaytut pangadal ku, iyan i pirmi ku nga pagbuwaten, magpangadal duꞌut mga rugar nga ega paꞌ kilala nira i paꞌaaten ngaytu nga si Cristo ka, in ipaꞌalimbawa tat pagbuwat it balay, akuy subuk manigpatindeg it arigi. Temed in may arigi nang lagi nga nakapatindeg it beken ega pasilabtan ku, ka ega ireg ku nga pakiꞌagawan.

²¹ In atkaytu, matuman i magsusurat duꞌut kasuratan nga magꞌaat, “Sira nga ega paꞌ tiyulduꞌan pasar it kanya, kilalaen na nira kanya. Baw sira nga ega paꞌ nabaritaꞌan, masepsepan na nira.”

KupaRoma nga banar si Pablo

²² Ta, itu nang buwat ku, pirmi ngaytung magpanaw nga magpangadal, i magkabaer it aken it kaꞌlay ngaytu it ega ngaytu ipagkatabu-tabus it kupaꞌasan ku ngaytut imyu.

²³ Temed ta, it ega nay naꞌped nga rugar sini ka nalekep-lekep ku na, baw it naꞌlay na ngaytung rima-rima ku it kupaꞌasat imyu,

²⁴ sana yay pagꞌiꞌinawaren ku, makapatuluy aku asat imyu in paꞌEspaa aku na, ka ireg ku kapakiꞌiba-iba aku it imyu parabir aku lumangbus. Baw in nakapagꞌiba-iba tami nat magayen barang katabang kamu nagat aken kat panaw ku ngayan.

²⁵ Temed kayti, paJerusalem aku daꞌan. Iduꞌlung ku paꞌ duꞌut mga sulsug tami kat pamayaꞌ i tabang ngaytu it kanira.

²⁶ Sabap yay napagꞌupa-upakatan it mga magpamayaꞌ nga taga Macedonia baw taga Acaya, nga pataban sirat tabang nira duꞌut mga makukuriꞌ nga mga sulsug tami kat pamayaꞌ nga duꞌun it Jerusalem ngayti.

²⁷ Yay matuud masasagya sira kat napagꞌupa-upakan nira ngaytu nga ituꞌun ka subuk dakulang pagdemdemen nira nga utang nga nakem kat mga Judio nga magpasakep nat ki Cristo. Ka sabap it mga Judio ngaytu nabagiꞌan na sirat karibriyan. Aypaꞌ it magkakuriꞌan nay mga Judio ngaytu, ega mapakay nga ega bagiꞌan sirat in unu nga ikatabang it mga sulsug nira ngaytu kat pamayaꞌ nga ega Judio.

²⁸ Tabang nira ngaytu, esang subuk buwaꞌ it pamayaꞌ nirat ki Cristo. In nakaduꞌlung ku na duꞌut Jerusalem baw nakaꞌintergaꞌ na duꞌut kanira i paꞌaaten ku ngaytu nga tabang, iyan talagay napikir ku nga kubwaten, patuluy aku asat imyu in paꞌEspaa aku na.

²⁹ Baw in talagang katabus aku nga patuluy asan pagsisiguruun ku nga dakulay malabayan tang ildaw ni Cristo kat ikagayen tami nga muꞌsa.

³⁰ Asi-asi pat imyu mga sulsug ku kat pamayaꞌ, sabap sang tamiyan nay maglalagpit it Ampuꞌan nga si Jesu-Cristo, baw sabap it raras tat esa may esa nga begay it Espiritu Santo, pagꞌegtan ku i pangangut kut tabang mi. Kaꞌilangan ku nga paꞌresan mi i panalangin mit aken,

³¹ nga maribri aku kat alima it mga mamagpasngel it Magayeng Baritaꞌ duꞌun it Judea. Ipanalangin mi gasiꞌ nga tabang ngaytu nga iduꞌlung ku duꞌut Jerusalem, tanggapen it mga taga duꞌun it masagyay nakem.

³² Ka in atkayan, kat kaꞌirgan it Ampuꞌang Diyus, masagya aku nagang kaꞌbut asan it imyu baw subrang sumagya i nakem ku kat magayen nga pagꞌiba-iba tami.

³³ Baw ipagpanalangin ku gasiꞌ kamu nga sana pagtatarimaen kamung muꞌsa it Ampuꞌang Diyus, kanya nga puꞌun it kaꞌimbengan it nakem.