Roma 14 - Tagbanwa

Ega pakidaꞌgan i sulsug kat pamayaꞌ nga ega paꞌ magꞌalaid i kanyang kasepsep

¹ Itu paꞌ gasiꞌ i isugid ku. Kaꞌilangan, tanggapen mit masagya i iyan mga kaꞌibaan mi nagat magpamayaꞌ it ki Cristo temed ega paꞌ magꞌalaid i kasepsep nirat kaꞌulugan it itung mga bagay kat pangaꞌgenan nira it aldaw-aldaw. Takaꞌ ega tanggapen mi isaꞌun lamang pakidaꞌgan mi sirang pirmi duꞌut kakurangan ngaytit kasepsep nira.

² Ka iyan beken asat imyu, pagꞌuꞌrutan na nira nga mapakay nang kumaꞌen it maski unu nga pangaꞌen, temed iyan beken nga ega paꞌ ustuꞌ i kasepsep nira, inglay lamang i masdaꞌan nira ka magpangangaliꞌ kumaꞌen it karniꞌ.

³ Temed maski atkayan, magayen ega tibabaꞌen it iyan mamagkaꞌen it maski unu i taw nga magpangangaliꞌ. Baw gasiꞌ iyan magpangangaliꞌ, ega sawayen mi i beken nga egay pagpangangaliꞌan nirang kaꞌnen, ka surubung kamu nga tiyanggap it Ampuꞌang Diyus.

⁴ Ay siyu kang taw nga magꞌukuman it taraꞌgen it beken? Simpri agalen ya lamang i may pudir nga mukuman in magayen u daꞌga i buwat ya. Baw basta si Cristo i agalen nga pagsirbiyan ta, siguradung tabangen ya kita, ka talagang kaya ya nga tumabang it aten kat buwat nga magayen.

⁵ U in pasar it pabetang it mga aldaw, siguru may asat imyu nga, pabetang nirat beken nga aldaw, maꞌal kunuꞌ. Temed maat it beken, ega, ka surubung kunuꞌ i muꞌsang aldaw. Kaꞌilangan ineꞌteꞌen ta kat sadili tang pikir in unuy magayen kat panleteg it Ampuꞌang Diyus, ega maat guruun lamang i pikir it beken it egay kasiguruwan ta in magayen u daꞌga i pikir ya ngayti.

⁶ Ka ungaytu, sira nga may mga aldaw nga ipagpabetang nira nga maꞌal, daꞌga baꞌ, pagbuwaten nira naga kat ikabantug it Ampuꞌan? Baw sira nga egay pagpangangaliꞌan nirang kaꞌnen, egay beken nga kat nakem nira in daꞌga kat ikabantug gasit Ampuꞌan i pagbuwaten nira. Ta, sira nga may pagpangangaliꞌan nirang kaꞌnen, atkayan naga. Baw muꞌsa ngaytu, magpangangaliꞌ baw daꞌga, simpri pagpasalamatan nira duꞌut Ampuꞌan i muꞌsang pagkaꞌnen nira.

⁷ Ka kita, paribasay nagpasakep nat ki Cristo, ega na mapakay nga buwaten ta in unu na lamang i ireg tang buwaten. Ka, egen u patay na, pagsasakpan tang pirmi it pudir it Ampuꞌan.

⁸ Yay magayen, basta may ginawa paꞌ, gamiten tay muꞌsang pangaꞌgenan ta kat pagsirbi tat Ampuꞌan. Baw in mabut na nga ipalad yat aten i kamataynen ta, masagya ta nga pasakep it pabetang-betang ya, ka pagsisiguruun ta nga mintras egen u maski patay na, kat pudir tang pirmi it Ampuꞌan ngaytu.

⁹ Sabap egay beken nga liꞌwan it ipiyaturuꞌ ni Cristo i duguꞌ ya baw inggen naga kanyat paꞌuliꞌ, nagbaraꞌ talaga kanya nga Ampuꞌan tami nga muꞌsa nga magpamayaꞌ it kanya. Mintras egen tami u maski patay na, kanyay Ampuꞌan nga magpupudir it aten.

¹⁰ Aypaꞌ, it atkayan na, unuka atkayan i buwat mi nga pagsaway-sawayen mi i sulsug mi kat pamayaꞌ? U iyan beken, unuka pagtibabaꞌen mi i kasubung mi nga magpamayaꞌ it Ampuꞌan ngaytu? Unu, kamu na i manigꞌukuman it kanira? Simpri ega, in daꞌga Ampuꞌang Diyus. Ka mabut i aldaw nga timindeg ta nga muꞌsa kat adapan ya baw ukumanan ya i muꞌsang binwat ta.

¹¹ Sabap magbebtang naga duꞌun it kasuratan ngayang magꞌaat, “Maat it Ampuꞌang Diyus, ‘Aku ngaytu nga egay kamataynen i magsumpa nga manluud i kada esang taw kat adapan ku. Bawnga talagang muꞌsat baꞌbaꞌ, mabngaꞌ nga magpamatuud sabap it kabantugan ku.’”

¹² Aypaꞌ ka, muꞌsa tami, egay maꞌped nga daꞌga madap it Ampuꞌang Diyus nga manubag it muꞌsang binwat ta.

Magꞌintur nga ega makapakursud mi kat kasalaꞌan i maꞌiba mi

¹³ Aypaꞌ iyan i magayen, daꞌtami magsawa-sawayen. In daꞌga, kaꞌilangan magꞌintur tang banar nga egay maski unu kat pagbuwaten ta nga subuk makursudan it sulsug ta kat pamayaꞌ nga ipagkasalaꞌan ya.

¹⁴ Talagang, kat keseg it pakilagpit ku it Ampuꞌan nga si Jesus, urut ku baw pagsisiguruun ku nga egay pangaꞌen nga, in sabap lamang it pangaꞌen ngayan, maꞌaat nga maraꞌe-raꞌet nga pagkaꞌnen kat panleteg it Ampuꞌang Diyus. Temed in may sang kalasing pangaꞌen nga, kat pasepsep it esang taw, pagpalꞌiyan it Ampuꞌang Diyus, ega na mapakay nga kaꞌnen ya ka, in kaꞌnen ya, kasalaꞌan ya na.

¹⁵ Aypaꞌ magꞌintur kamu sabap in limiꞌwan nga magkakleban it sulsug mu kat pamayaꞌ i ega magpangangaliꞌ ka kumaꞌen it iyan pagpikiren ya nga pagpalꞌiyan it Ampuꞌang Diyus, ega nayan pagꞌintindiyen mu i paꞌaaten ngayang raras it masigkataw. Aypaꞌ ega buwaten muy pangaꞌen mu nga ikakursud duꞌut kasalaꞌan it sulsug mu kat pamayaꞌ, nga yay tumaban it kanya duꞌun it panrigang egay kaskedan. Sabap, kanya ngaytu, esa naga nga tiyanggung ni Cristo i kasalaꞌan kat kamataynen ya.

¹⁶ Aypaꞌ maski ipagpamatuud it nakem mu nga ega naga kasalaꞌan i esang pagbuwaten mu, temed in ipagpabetang it beken nga kasalaꞌan naga, ega na lamang buwaten.

¹⁷ Sabap kaꞌadiꞌan ngaytu it Ampuꞌang Diyus, ega iyan i pagpaꞌiguꞌan, in unuy pagkaꞌnen baw pagꞌimnun tami, in daꞌga iyan pangaꞌgenan nga mataldeng, maꞌimbeng nga pakiꞌiba-iba it masigkataw, baw kasagyaan it nakem nga begay it Espiritu Santo.

¹⁸ Basta atkayan i pagsirbi tat ki Cristo talagang pagsagyaan ta it Ampuꞌang Diyus baw pagdaya-dayawun it masigkataw.

¹⁹ Aypaꞌ, kaꞌilangan, paꞌresan tami i in unuy kat ikaꞌimbeng it pakiꞌiba-iba tami, baw muwat it mga bagay nga makapapaꞌgen it pamayaꞌ it esa may esa.

²⁰ Ega ranggaꞌen mu i buwat it Ampuꞌang Diyus kat pangaꞌgenan it maꞌiba mu in sabap lamang it pangaꞌen. Matuud nga ega nay pangaꞌen nga pagpalꞌiyan it Ampuꞌang Diyus, temed in ikapakursud mut iba mu kat kasalaꞌan i sabap it pagkaꞌnen mu, kasalaꞌan mu naga yan.

²¹ Aypaꞌ magayen, ayaw ka na lamang it kaꞌen it alimbawa karniꞌ, u beteꞌ minum it irimnun, u maski baꞌ unu nga buwat nga ipagkasalaꞌan it sulsug mu kat pamayaꞌ.

²² Ta, ikaw ngaytu nga maat magkasepsep pasar it mga bagay ngaytu, isugid mu lamang duꞌut Ampuꞌang Diyus. Ega ipalandi-landi mu u ipandaꞌeg-daꞌeg. Magkasagya i taw nga ega pagꞌukumanan it nakem ya pasar it mga binwat ya, ka pagsisiguruun ya nga ega naga kuntraꞌ kat kaꞌirgan it Ampuꞌang Diyus.

²³ Temed iyang taw nga kumaꞌen maski magduwa-duwa i pikir ya in mapakay nagang kaꞌnen i iyang pangaꞌen, may turubagen ya na duꞌun it Ampuꞌang Diyus, sabap egay kasiguruwan ya nga uyun kat pamayaꞌ yat ki Cristo i binwat ya ngayti. Ka maski unu nga bagay nga ega uyun duꞌun it pamayaꞌ ta, simpri kasalaꞌan ta na.