Roma 13 - Tagbanwa

Kaꞌilangan, kilalaen it kamatuudan i mga magpamaalaꞌ it banwa

¹ Itu gasiꞌ i magayen it kitang taw, pasakep tami nga muꞌsa it mga punuꞌan it banwa tami, sabap pabetang-betang nagat Ampuꞌang Diyus i may mga punuꞌan ngaytu. Talagang garing duꞌut kanya i kariꞌgenan it muꞌsa ngaytung magpamaalaꞌ it banwa.

² Aypaꞌ iyan taw nga magkuntraꞌ it punuꞌan, pagkuntraꞌen ya i pabetang-betang ngaytut Ampuꞌang Diyus. Ta, in atkayan, siguradu kanya nga betanganan it ukuman nga rigaen.

³ Eeꞌ baꞌ, ega kuntraꞌen mi i mga punuꞌan it banwa sabap, katengdanan nira ngaytu, ega dapat iꞌlaman it mga magbuwat it magayen. Yay dapat miꞌlam, sira nga magbuwat it karaꞌe-raꞌetan. Aypaꞌ in ireg mi nga egay maiꞌlaman mi duꞌut kanira, magꞌintur nga purus magagayen i buwaten mi ka sikayan pagbantu-batungun kamu nayan nira.

⁴ Ka mga magpamaalaꞌ ngaytu, subuk mga manigsirbi it Ampuꞌang Diyus kat ikagayen mi. Temed talagang miꞌlam ka in maraꞌe-raꞌet i pagbuwaten mu, sabap egaytu lugud-lugud, may pudir nira talaga nga rimiga it imu it maski piyakamabeꞌgat nga ukuman. Ka sira, subuk alima it Ampuꞌang Diyus nga megay it panriga kat in unu nga karaꞌe-raꞌetan.

⁵ Aypaꞌ kaꞌilangan nga pasakep kamu it kanira it kamatuudan, ega maat sabap lamang yay ikaribri mi kat iseg it Ampuꞌang Diyus, in daꞌga sabap ipagpamatuud gasiꞌ it nakem mi nga yay tamaꞌ nga adat it kitang taw.

⁶ Ta, sabap gasiꞌ it ituꞌun ngaytu, magbayad tami it in unu nga mga barayadan. Sabap, mga punuꞌan ngaytu, bilang Ampuꞌang Diyus i nagpatindeg it kanira baw magꞌapun i paꞌres nirat pamaalaꞌ nira ngaytu, ka katengdanan nira talaga.

⁷ Aypaꞌ magbayad kamu talaga it in unu nga barayadan i magkaꞌiguꞌ it imyu nga pagbayadan. Baw galangen mi gasiꞌ it may iꞌlam i mga may mataꞌas ngaytu nga katengdanan. Eeꞌ baꞌ, galangen mi i maski siyu nga may katengdanan.

Ega na paꞌuliꞌan tami i pangaꞌgenan kat kadleman sabap kat kaꞌyagan ta na

⁸ Ega ugaliꞌen mi i daꞌkamu magkaꞌrut magbayad it utang. Temed in pasar it raras it masigkataw i pagsugiden, yay subuk utang nga ega magkabayadan. Basta may ginawa ta kaꞌilangan ipasigi tami i kararas ngaytu, ka in siyuy may kamatuudang raras it masigkataw ya, natuman ya na i kaꞌurdinan it Ampuꞌang Diyus.

⁹ Ka panawun it pikiran mi i mga urdin ngayang magꞌaat, “Kuydaw ka it pamakun duꞌun it ega asawa mu, kuydaw ka it pangimatay it masigkataw mu, kuydaw ka it panakaw,” baw “kuydaw ka it kaꞌirak.” Ta mga itu ngaytu, baw maski unu pang urdin nga beken nga subung nat mga itu ngaytu, egay beken nga uliꞌan in daꞌga itu na, “Rarasan mu i masigkataw mu it subung nagat raras mu it sadili mu nga bilug.”

¹⁰ In talagang pagrarasan mu i masigkataw mu, simpri ega na magkubwat ka it ega magayen kat maski siyu. Aypaꞌ in maat talagang pagrarasan tat kamatuudan i masigkataw ta, sikayan pagsunudun tang lagi i muꞌsa ngaytung urdin nga beken.

¹¹ Sana paꞌresan mi i kararas ngaytu, subraꞌ na it urut mi na nga aldaw-aldaw magꞌadeꞌdeng-magꞌadeꞌdeng nay pamaꞌuliꞌ ni Cristo, iyan timpu nga ipagtuman it kakumplituwan it karibriyan tami nga muꞌsa. Aypaꞌ ayaw kamut pasbung it mga taw nga maꞌlek pang maꞌlek i igaꞌ, in daꞌga magsusulag kamu na.

¹² Ka in ipaꞌalimbawa tat aldaw baw delem i kaꞌlay it banwa, kayti ngaytung timpu, subuk magkukuꞌ-aldaw na. In maꞌbut nay kakumplituwan it karibriyan ta, yay subuk aldaw na nga banar. Aypaꞌ, kaꞌilangan, paꞌalaidan tami na i muꞌsang karaꞌe-raꞌetan, ka yanay buwat it banwa it timpu pat delemen nga ega paꞌ limnampud si Cristo. Kayti ngaytu, it naꞌyagan tami na, yanay paꞌresan tami nga buwaten, purus magagayen, ka yay subuk kalasag tat buwat ni Satanas.

¹³ Sana pangaꞌgenan ta kayti, bagay it mga taw nga magpangaꞌgenan na kat kaꞌyagan, nga naꞌiriꞌ nay muꞌsang palangu, mga pagkasagyaan na nga pagpanggaringan it ereꞌeret nga palangu, pamakun duꞌun it ega asawa ta, pagsarit sumbayaꞌ it kaꞌiꞌirgan nga maraꞌway it egay maski unu nga pagsupil it sadili, baw pati pakidaꞌeg baw inggi-inggiten.

¹⁴ Kaꞌilangan, kat muꞌsang bagay, patibayaꞌ kamung pirmi it Ampuꞌan nga si Jesu-Cristo, isaꞌun yanay maltegan kat pangaꞌgenan mi, kanya nang adat. Ega na sumbayaꞌen i sadiling kaꞌirgan nga maraꞌe-raꞌet u begayan pat rugar kat pikiran mi.