Roma 12 - Tagbanwa

Mga adaten nga ibles ta it kaꞌildaw ngaytut Ampuꞌang Diyus it aten

¹ Aypaꞌ kayti, mga kasulsugan ku, sabap it ega basta-basta ngaytung kaꞌildaw it Ampuꞌang Diyus it aten, may isasar kut kadakel mi. Buwaten mi na i sadili mi nga subuk salisi nga ipagsamba duꞌun it Ampuꞌang Diyus. Ega maat paꞌimatay in daꞌga iꞌintergaꞌ mi na duꞌut kanya i muꞌsang pangaꞌgenan mi nga magsugid nga mga taawan ya na kamu, mga taw nga pagsagyaan ya nga pirmi ka magpangaꞌgenan na nga alaid kat muꞌsang kasalaꞌan. Atkaytuytu i matuud nga pagsamba it kanya nga bagay it dakulang kaꞌildaw ya ngaytut aten.

² Talagang adaten mi kayti, kaꞌilangan magpablag na kat adat it kadaklan situt banwa nga ega magꞌintindi it Ampuꞌang Diyus. Paꞌuyunan mi nga pirmi i pagbaꞌgu it Ampuꞌang Diyus it nakem mi. Iyan baꞌ, maꞌaat kamu nga subuk baꞌgu kamu na nga mga taw. Sikayan matantuwan mi i kaꞌirgan it Ampuꞌang Diyus, in unuy magayen kat panleteg ya, baw iyan nga pagsagyaan ya, mga bagay nga ikataldeng it pangaꞌgenan mi.

Kaꞌilangan, mapiyalulus tami nga pagsarungaen it magayen i mga kakayaan nga ipiyagꞌildaw it Espiritu Santo it aten

³ Kayti, kat pudir it pagkaꞌapustul ku nga ipiyagꞌildaw it Ampuꞌang Diyus it aken, ipagsasar ku it imyu nga muꞌsa nga paꞌalaidan mi na i pikir ngayang ipagpataꞌas-taꞌas i sadili. Ka may mga kakayaan nga ipiyagꞌildaw it Ampuꞌang Diyus it aten, uyun kat kadakulat kanya-kanyang pamayaꞌ. Kaꞌilangan tamaꞌ i pabetang mi it mga kakayaan nga ipiyagꞌildaw it Ampuꞌang Diyus it imyu. Ega pasubraꞌan mi.

⁴ Subung tu it kaꞌalimbawaan it bilug tami nga dakel i buwat-buwat ya temed may kanya-kanyang kaꞌargan.

⁵ Ta kita, atkayan naga kayti. Dakel tami nga magpamayaꞌ it ki Cristo, temed kat pakilagpit tami it kanya ngaytu, subung ta nat sang kabilu-bilugan. Kada esat aten, subuk nagsugpa-sugpaten na, baw may kanya-kanyang kaꞌargan kat ikagayen it muꞌsa.

⁶ Ta it kada esat aten, inildawan it Ampuꞌan it kalasi-kalasing kakayaan, kaꞌilangan gamiten tami i ipiyagꞌildaw ya ngaytu. In beteꞌ iyan i ipiyagꞌildaw yat imu, pagpanakman ka it ampang nga ipagpaꞌrut it Ampuꞌang Diyus duꞌut kadakel, kaꞌilangan ituturan mu nga uyun kat kadakulat pamayaꞌ mu, ega sumubraꞌ u kumurang.

⁷ Ta in iyan i kakayaan nga ipiyagꞌildaw it Ampuꞌan it imu, manigsirbi ka it maꞌiba mu, kaꞌilangan magsirbi kat kamatuudan. U in beteꞌ manigpangadal ka it ampang it Ampuꞌang Diyus,

⁸ u manigpakseg it pamayaꞌ it beken, sarungaen it magayen. Ta in nakem nga mapiyamgay i tiyanggap mu nga ildaw, kaꞌilangan mapiyamgay kang matuud it egay antap it nakem nga maraꞌway. In magpamaalaꞌ, ega pabaya-bayaꞌan, mamaalaꞌ it magayen. In piyanakman ka it nakem nga maꞌildaw kat masigkataw mu, kaꞌilangan ildawan mu sirat masagyang-masagyay nakem.

Mga beken pang adaten baw pabetang tami it masigkataw nga pagsagyaan it Ampuꞌang Diyus

⁹ Ega bete-beteꞌen mi lamang nga may raras mi nat beken, in daꞌga talagang pagrarasan mi sira nga matuud. Raꞌwayen mi na i maraꞌe-raꞌet nga buwat, yanay ragaen mi i magayen.

¹⁰ Kaꞌilangan magsigraras kamu it esa may esa baw magsiggalang nga subung kamut sang sulsugan, nga raras mi it maꞌiba mi, subraꞌ paꞌ it raras mi it sadili mi.

¹¹ Ega garusan mi i pagsirbi mit Ampuꞌan, in daꞌga paꞌresan mi nga banar it may pagmaꞌiseg it nakem.

¹² Pasagyaen mi nga pirmi i nakem mi ka dedemdemen mi i kagayenan nga pagdadarapaꞌen. Sagkaꞌen mit magayen i nakem i mga kakuriꞌan nga magꞌabut it imyu. Baw yanay adaten mi, mapiyanalangin kamu nang pirmi.

¹³ Adaten mi gasiꞌ i mapiyanabang kamut mga sulsug mi kat pamayaꞌ nga kukurangen, baw masagya mi nga papaꞌabutun asat imyu i in siyuy egay siguradung mapaꞌabutan nga balay.

¹⁴ Kuydaw mi sumpaan i mga magpakuriꞌ it imyu, in daꞌga ipanalangin mi ga nga ildawan sirat Ampuꞌang Diyus.

¹⁵ Magayen, in unuy pagsagyaan it sulsug mi kat pamayaꞌ sagyaan mi gasit imyu. In may magkasmekan ya, ipabetang mi nga magkasmekan mi nga muꞌsa.

¹⁶ Kaꞌilangan, pabetang mi it esa may esa, surubung. Ega maat pataꞌas-taꞌas kamu baw ega raꞌwayen mi i beken nga maat raꞌyat u timawaꞌ, in daꞌga iba-ibaen mi nagat magayen. Ega ipabetang mi nga kamu nay subrang makaꞌrut.

¹⁷ Ayaw kamut pagbeles-belesen in buwatan kamu it maꞌiba mi it maraꞌe-raꞌet. Paꞌresan mi nga mangaꞌgenan kamu it egay maꞌiway it maski siyu.

¹⁸ Kaꞌilangan, paꞌresan mi nga banar i pagꞌurunyun nga kat ikaꞌimbeng it pakiꞌiba-iba mi it masigkataw mi. Baw in beteꞌ may ikaranggaꞌ it pakiꞌiba-iba mi ngaytu, siguruun mi nga ega kamuy garing.

¹⁹ Mga pagmaꞌalen ku nga kasulsugan, pagsaꞌupun ku siꞌ nga iꞌaat it imyu nga ayaw kamut pagbeles-belesen. Ipataꞌan mi na lamang it Ampuꞌang Diyus. Kanya nay baalaꞌ. Sabap daꞌga baꞌ magsusurat nagay ampang ngayan it Ampuꞌang Diyus nga magꞌaat, “Akuy Manigꞌukuman it taw. Aku manay baalaꞌ meles.”

²⁰ Aypaꞌ ega belsen mi, in daꞌga sunudun mi i magbebtang duꞌun it kasuratan nga magꞌaat, “In beteꞌ paggetmanan i minwat it imu it maraꞌe-raꞌet, ega ingtanan mu in daꞌga pakaꞌnen mu. In kuꞌinum kanya, paꞌimnun mu. Ta daꞌga sikayan pasli kat nakem ya i eyaꞌ nga ega pateng?”

²¹ Ayaw kamut padaꞌeg-daꞌeg it maraꞌe-raꞌet nga pagbuwaten it taw it imyu, in daꞌga indaꞌegen mi i karaꞌe-raꞌetan nira ngaytu it mga pagbuwateng magagayen.