Roma 11 - Tagbanwa

Ega naga kapuꞌsaan it mga Israelita i maꞌilang. May maribri naga nga maski ega dakel.

¹ Ta kayti, itu siꞌ i ingkut ku, unu, manupusan na nga inindiꞌan nat Ampuꞌang Diyus i piniliꞌ ya ngaytung mga taawan ya? Yay matuud, ega. Ka, ungaytu, aku ngaytu. Daꞌga baꞌ esa aku nagang Israelita? Inapuꞌ aku naga ni Abraham baw, kagiyaringanan ku, nanggaring naga kat kuyunang mga tungtung-inapuꞌ ni Benjamin.

² Talagang ega bibasen it Ampuꞌang Diyus i mga taw nga, garing it tagnaꞌ paꞌ nga lagi, nakapabetang-betang ya nga magbalyung mga kamatuudan nga taawan ya. Unu, nalipatan mi na i magbebtang ngayan duꞌut kasuratan pasar it ki Elias? Nangablaꞌ kanya duꞌun it Ampuꞌang Diyus sabap it pagbuwaten it mga kabilug yang Israelita.

³ Daꞌga baꞌ basaꞌan maat ya ngayan, “Ampuꞌang Diyus, siyari na nirat pangimatay i mga prupitaꞌ mu, baw siyari na gasiꞌ nirat panranggaꞌ i papangantengan it ipagsambat imu. Ta aku mana ngaytuy naꞌped nga mapiyamayaꞌ it imu. Ta unut, kuꞌimatayen nira gasiꞌ aku.”

⁴ Temed daꞌga baꞌ tiyubag kanya it Ampuꞌang Diyus it atkaytu, “Ega bayan ika-ikaw na lamang. Ka may pitu nagang ribu nga kalalakiyan nga ipiyapinpin ku nga matuud naga nga mga taawan ku. Sira ngaytu, ega magpanluud nga magsamba it ki Baal.”

⁵ Ta, atkayan naga kayti. Sabap it kaꞌildaw it Ampuꞌang Diyus may sang bagiꞌ naga nga dekeyeꞌ it mga Judio ngaytu nga napiliꞌ it Ampuꞌang Diyus nga mga kamatuudang taawan ya.

⁶ Baw paribasay kaꞌildaw it Ampuꞌang Diyus i garing kaytu, ega maꞌaat ta nga napiliꞌ ya sira sabap duꞌun it mga sadili nirang pagbuwaten. Sabap in aaten ta sabap it mga buwat nirang sadili, intuntis nga ega na mataꞌwag nga kat kaꞌildaw it Ampuꞌang Diyus. Belag i ildaw, belag i buwat.

⁷ Aypaꞌ maꞌyag nga ega naga muꞌsang mga Israelita, nakatanggap it iyan nga pagpaꞌresan nira. Iyan lamang i nakatanggap, mga napiliꞌ it Ampuꞌang Diyus. Sabap, kadaklan kat bangsa ngaytu, diyungagan nat Ampuꞌang Diyus it padsen i kaꞌuꞌuluwan nira.

⁸ Ka atkaytu naga i magbebtang duꞌun it kasuratan nga magꞌaat, “Binwat yay nakem nira nga subuk magꞌigaꞌ nga ega magkabatiꞌ. Maski may mata nira, subuk binlegan ya sira. Maski may talinga, subuk piyabngel seked it kayti na ngaytung timpu.”

⁹ Baw itu paꞌ gasiꞌ i inaat ngayan it adiꞌ nga si David, “Pagꞌangutun ku nga buwaten mu i mga pagkaraꞌnen nirang masasagya nga subuk balatik nga ikasepet it kanira. U subuk dakulang kakekleban nga bilang panriga mut kanira.

¹⁰ Sana lumabu-labu nay mata nira, isaꞌun daꞌsira na makalteg. Baw kat kabeꞌgat it mga kakuriꞌan nga ipagpaꞌabut mu it kanira subuk rudrud na sirang pirmi.”

¹¹ Ta unuytu, pandaꞌga ngaytu it mga Judio it ki Cristo, pabetang-betang it Ampuꞌang Diyus isaꞌun lamang maꞌilang sirang muꞌsa? Ega naga. Sabap, kat pabetang-betang ya, yay liꞌwan it pandaꞌga nira ngaytu, inabut na gasiꞌ it karibriyan i mga taw nga ega Judio isaꞌun sikayan minggit na sana i mga Judio ngaytu.

¹² Ta kayti, iyan kasalaꞌan ngaytung pandaꞌga it mga Judio it ki Cristo, baw kaꞌuruꞌ-uruꞌan nira ngaytu, in yay tiyanaꞌan ya, siyakep nay mga bangsa nga ega Judio it ega basta-bastang kagayenan nga garing duꞌun it Ampuꞌang Diyus, daꞌga baꞌ subraꞌ nang kat ikagayen it muꞌsang babanwaan in maat pasakep nat ki Cristo i muꞌsang mga Judio?

Mga taw nga ega Judio, nga subuk ipiyatunas lamang, sana ega palabawan nira i mga Judio

¹³ Ta, kamu na nga ega Judio asan i kupakisugi-sugidan ku. Ta it aku, narumraan it Ampuꞌan nga manigpangadal it mga taw nga ega Judio, talagang pagsarungaen kut magayen i katengdanan ku ngaytu, ega desang pagkalabtaꞌen ku.

¹⁴ Ka in maat, sana, dakel nga taw nga ega Judio i makatantu it karibriyan sabap it pangadal ku, barang minggit na i mga kabilug ku nga mga Judio, paꞌres na sirat karibriyan ngaytu isaꞌun makatantu sira gasiꞌ.

¹⁵ Ka in tiyanaꞌan it inindiꞌan it Ampuꞌang Diyus i mga Judio ngaytu, magkagayen nay Ampuꞌang Diyus baw muꞌsang bangsat taw nga beken, daꞌga baꞌ subrang magayen in pasakep gasit ki Cristo i mga Judio ngaytu baw tanggapen sira siꞌ it Ampuꞌang Diyus? Talagang in atkayan, kabilangan ya, subuk mga taw nga patay nga nagꞌegen it paꞌuliꞌ.

¹⁶ Baw siguru mapakay nagang mabut i ituꞌun ngaytu nga pagꞌiꞌinawaren ku sabap, in ipiyabetang it Ampuꞌang Diyus nga mga taawan ya na i mga kiyaꞌapuꞌ-apuꞌan it mga Judio ngaytu, mapakay nga atkayan naga i pabetang ya it mga tungtung-inapuꞌ nira. Subung it mga ipagbegay nga pasalamat duꞌun it Ampuꞌang Diyus. Maski uꞌnang bagiꞌ lamang it kaygen i ipagbegay duꞌut kanya, magsugid nga kanya nagay tagpuꞌun it muꞌsang piyatbasan tami. Atkayan naga, in beteꞌ ipaꞌalimbawa tat esang kayu, in egay unu-unu it gamut ya daꞌga baꞌ atkayan naga i mga sanga ya?

¹⁷ Ipasigi ku paꞌ i alimbawa ku ngaytut kayu. Iyan bangsa ngaytu nga Israel i subuk kayu nga magbuwaꞌ nga pagꞌaꞌasikasuun it Ampuꞌang Diyus. Iyan mga bangsat taw nga ega Judio i subuk kayu nga magbuwaꞌ, temed kayu kat talun. Egay nagluwak, egay magꞌasikasu. Ta, kayti, paribasay kadaklan it mga Judio, ega magkilala it kamatuudang dalan it karibriyan, dakel nang sanga it kanirang kayu i siyapak nat Ampuꞌang Diyus. Temed kamu, subuk ipiyasanga ya lamang duꞌut kayu ngayting nasapakan. Aypaꞌ nakaꞌuyut kamu nat amen nga mga Judio nga ega dimnaꞌga it ki Cristo. Ta, kabilangan ya, sang kakayu-kayuwan tami na ngaytung magbuwaꞌ nga pagꞌaꞌasikasuun it Ampuꞌang Diyus.

¹⁸ Takaꞌ gasiꞌ, maski atkayan, ega naga pataꞌas-taꞌas kamut dati ngayting mga sanga nga siyapak. Demdemen mi naga nga ega kamu i magbegay it kaꞌgenan it gamut, in daꞌga mga gamut i magbegay it kaꞌgenan mi.

¹⁹ “Temed,” maat mi, “kami na ngaytung taw nga ega Judio i pagsagyaan it Ampuꞌang Diyus. Iyan mga Judio, ega na pagsagyaan ya. Ka ungaytu, siyapak i dati nga sanga isaꞌun lamang kami na i makapasanga duꞌun.”

²⁰ Sabagay nasapak nga matuud i dati nga sanga. Temed siyapak sira ka egay pamayaꞌ u pagsarig nirat Ampuꞌang Diyus. Magpanadili ga. Baw kamu, matuud nga ipiyasanga kamu na duꞌut nasapakan ngayti, temed ega adat mi i siyagyaan it Ampuꞌang Diyus in daꞌga pamayaꞌ baw pagsarig mi it kamataynen ni Cristo. Aypaꞌ ayaw kamu nagat pataꞌas-taꞌas, in daꞌga magꞌintur kamu naga it may iꞌlam.

²¹ Sabap in iyan dati nga sanga siyapak it Ampuꞌang Diyus, siguradu nga sapaken ya naga kamu in mangindiꞌ kamu it pamayaꞌ mit kanya.

²² Sikaytu talagang matantuwan tami i kadakulat ildaw it Ampuꞌang Diyus baw kabeꞌgat gasiꞌ it pangukuman ya. Mga Judio ngayting nagpategas it kanya, nakaparag na talaga it pangukuman ya ngaytu, ka siyapak sira. Temed kamu ngaytu, naparagan mi na i kaꞌildaw ya nga egay kasbung. Talagang ipasigi yay ildaw ya ngaytut imyu in pasigi nga magayen i pasakep mit kanya. Temed in mangindiꞌ kamu, sapaken kamu nagay imyu.

²³ Baw maski mga Judio ngaytu, in maat mamayaꞌ na sirat ki Cristo, talagang iꞌuliꞌ siꞌ sira kat nasapakan nira ngaytu. Sabap kayang-kaya it Ampuꞌang Diyus nga ipasanga siꞌ sira duꞌun it sumaꞌup.

²⁴ Sabap in maski kamu nga ega Judio, nga subuk belag nga kalasit kayu, nakapasanga it Ampuꞌang Diyus duꞌun, maski maat nanyang na kat singkadan it banwa, daꞌga subraꞌ nay iyan mga Judio nga dati nga sanga ya? Unuka yasiꞌ ega makapasanga ya duꞌun it puꞌun nirang lagi?

Maribri talagay kapuꞌsaan nga napiliꞌ it Ampuꞌang Diyus

²⁵ Mga kasulsugan, may ipagpaꞌrut nat Ampuꞌang Diyus nga, garing it tagnaꞌ, ega paꞌ ipiyaꞌrut yat taw. Kaꞌilangan nga maꞌrutan mi tu isaꞌun ega makapataꞌas-taꞌas mi i sadili mi u manadilit pasepsep. Ta, itu nay ipagpaꞌrut it Ampuꞌang Diyus nga, kadaklan it mga Judio, paribasay magpakitabug sirat kamatuudan pasar it karibriyan, piyadsen ya na i mga ulu nira. Baw maneꞌteꞌ tu seked it timpu nga magpamayaꞌ nat ki Cristo i kapuꞌsaan it mga taw nga ega Judio nga napiliꞌ it Ampuꞌang Diyus.

²⁶ Aypaꞌ atkaytu na ngaytu i pabetang-betang it Ampuꞌang Diyus nga ikaribri it muꞌsang mga Judio gasiꞌ nga napiliꞌ ya. Talagang egay matuduꞌ nga maski sangbat. Subung nagat magsusurat duꞌun it kasuratan ngayang magꞌaat, “May mabut nga Manriribri nga kat duguꞌ nagat taga Sion i liꞌwanan. Punasen ya i muꞌsang pakikuntraꞌ it kaꞌirgan it Ampuꞌang Diyus it mga tungtung-inapuꞌ ni Jacob.

²⁷ Kada taw nga pagꞌawaꞌen ku nay kasalaꞌan ya, pagtumanen ku nay upakat ku ngaytu it kanira.”

²⁸ Basta pagdaꞌgaen it mga Judio i Magayen ngaytung Baritaꞌ, mga kakuntraꞌ sirat Ampuꞌang Diyus. Temed kat pabetang-betang ya, kat ikagayen mi nagaytu ka, liꞌwan ya, kamu na i inildawan yat karibriyan. Temed sabap it isiyanggup it Ampuꞌang Diyus duꞌun it mga kiyaꞌapuꞌ-apuꞌan it bangsa ngaytu nga Israel, pasigi paꞌ nga pagrarasan ya i mga Judio ngaytung napiliꞌ ya.

²⁹ Ka basta napikir ya nga miliꞌ kanya it esang taw nga begayan ya it ega basta-bastang ildaw ya, egaytu alang-alang.

³⁰ Ka ungaytu, tagnaꞌ ngayti, daꞌkamu magpamayaꞌ it Ampuꞌang Diyus temed kayti inabut kamu na it ildaw ya ngaytu nga karibriyan sabap it buwat ngaytu it mga Judio, nga ega magpamayaꞌ sira it ki Cristo.

³¹ Ta, unu paꞌ kayti, mga Judio na ngaytuy ega magpamayaꞌ. Temed, kat pabetang-betang it Ampuꞌang Diyus, sabap it inggit nirat imyu nga may karibriyan na, yay tumaban it kanira it pasakep it ki Cristo ngaytu isaꞌun maꞌildawan sira gasiꞌ it karibriyan.

³² Sabap subuk piyataꞌnan lamang it Ampuꞌang Diyus nga maꞌuripen tami nga muꞌsa it kasalaꞌan isaꞌun makapatantu yat aten i kaꞌildaw ya.

Kabantug-bantug talagay Ampuꞌang Diyus

³³ Ega babasta-bastaen talaga i kaꞌildaw ngaytu it Ampuꞌang Diyus. Matꞌed talaga i kasepsep yat muꞌsang bagay baw egay ipaꞌlam it kanya nga maski unu. Mga pabetang-betang ya baw padisir, siyung taw i magkataluktuk?

³⁴ Subung nagat magbebtang duꞌun it kasuratan nga magꞌaat, “Siyu i magkataꞌseb it pikir it Ampuꞌang Diyus? Siyuy manigpadisir ya?”

³⁵ “Baw ta, siyu paꞌ i makabgay it in unu nga bagay duꞌun it Ampuꞌang Diyus nga bilang utang nat Ampuꞌang Diyus duꞌun it kanya?”

³⁶ Sabap muꞌsa ngaytu nga betang it banwa, kanya lamang i garing. Kanya i nagguna, kanya i magbebegbeg, baw egay beken nga uliꞌan it muꞌsa ngaytung giyuna ya in daꞌga purus kat ikabantug ya. Aypaꞌ bantugun kanya it egay katupusan seked it kaꞌnu-kaꞌnu. Kamatuudan talagaytu.