Roma 10 - Tagbanwa

Ipagtaldeng kat panleteg it Ampuꞌang Diyus, ega mapisiꞌ kat pagsunud it taw it mga urdin, in daꞌga kat pamayaꞌ baw pagsarig it ki Cristo

¹ Mga kasulsugan ku, talagang magtetdek kat nakem ku baw iyan i ipagpanalangin ku nga pirmi duꞌun it Ampuꞌang Diyus, nga sana maribri nga muꞌsa i mga Judio ngaytu.

² Talagang ipagpamatuud kuytu nga eꞌres nga banar i pagsirbi nirat Ampuꞌang Diyus temed egay kasepsep nira it kamatuudang pagsirbi nga pagsagyaan ya.

³ Sabap imbis nga kilalaen nira i ipiyaꞌrut it Ampuꞌang Diyus it kanira in magꞌuꞌunu tumaldeng i taw kat panleteg ya, yagay piyaꞌresan nira, sadili nirang pabetang-betang nga pagsunud nirat mga urdin. Ega maat pagpaꞌuyunan nira i pabetang-betang it Ampuꞌang Diyus in magꞌuꞌunu mapisiꞌ i italdeng ngaytu.

⁴ Ka si Cristo talaga i nakasunud it kaꞌustuꞌan it muꞌsang mga urdin it Ampuꞌang Diyus. Baw sabap it kataldengan ya ngaytu tumaldeng kat panleteg it Ampuꞌang Diyus i kumpur mamayaꞌ baw sumarig it binwat ya nga karibriyan.

⁵ Ka ituy ipiyasurat it ki Moises pasar it pagsunud it taw it mga urdin in maat yay ikapisiꞌ it italdeng nira kat panleteg it Ampuꞌang Diyus. Maat ya, “In siyu-siyuy magsunud it kaꞌustuꞌan it mga urdin ngaytu, yay ikapisiꞌ ya it kaꞌgenan nga garing duꞌun it Ampuꞌang Diyus.”

⁶ Simpri, atkayang pagsunud, ega mapakay in kat taw lamang. Temed, paribasay tiyuman na ni Cristo kat kanyang pagsunud, ega na kaꞌilangan tumanen tay aten. Kayti maꞌaten i kataldengan ngaytu kat pamayaꞌ baw pagsarig ta lamang it binwat ngaytu ni Cristo. Aypaꞌ, subung it magsusurat it tagnaꞌ, ega aaten muy sadili mu, “Ay siyu baytuy kapalangit nga maat palampud it ki Cristo?” Ka nakalampud na yan.

⁷ Baw ega gasiꞌ aaten mu, “Siyu sadaw i kapaꞌaduꞌun it pagꞌaꞌanuꞌan it mga miyatay nga mamisiꞌ it ki Cristo nga miyatay na?” Ka inggen naga yan si Cristo it paꞌuliꞌ.

⁸ Temed ituy kamatuudan, garing talaga it tagnang-tagnaꞌ situ nga lagit aten i ampang it Ampuꞌang Diyus nga magsugid it in magꞌuꞌunu ipabetang ya kita nga mataldeng. Ka magꞌaat i magsusurat, “Adeꞌdeng it imu nga pirmi i ampang ku, sabap kat nakem mu talaga, nga marway maꞌampang mu.” Ta, kayti, itu nay ampang ngaytu nga ipagpangadal namen pasar it pamayaꞌ baw pagsarig it ki Cristo.

⁹ Sabap in magkapamatuud ka na nga kamatuudang Ampuꞌan si Jesus ngaytu, baw in talagang tingled i pamayaꞌ mu nga kanya, inggen it Ampuꞌang Diyus it paꞌuliꞌ, talagang maribri ka kat panriga it Ampuꞌang Diyus sabap it kasalaꞌan mu.

¹⁰ Sabap in tingled talagay pamayaꞌ baw pagsarig ta, yay ikapisiꞌ tat italdeng kat panleteg it Ampuꞌang Diyus. Baw in mayaꞌngan nay dilaꞌ tat magpamatuud it pasar it pamayaꞌ baw pagsarig ta ngaytu, siguradu nay karibriyan ta.

¹¹ Ka maꞌyag i inaat ngayan duꞌun it kasuratan nga magꞌaat, “Siyu-siyu nga mamayaꞌ baw sumarig it kanya, talagang ega desang maꞌasaꞌ-asaꞌ.”

¹² Talagang muꞌsang bangsat taw i pagpaꞌiguꞌan kaytu, sabap kat panleteg it Ampuꞌang Diyus egay piyagbelagan it mga Judio baw taw nga ega Judio. Esa-esa i Ampuꞌan tami nga muꞌsa, baw egay kaskedan it ildaw nga ipagꞌatag ya kat muꞌsang magpandangep duꞌut kanya.

¹³ Ka daꞌga baꞌ inaat naga gasiꞌ duꞌun it kasuratan i atkaytu, “Maribri i kumpur magpaꞌildaw it Ampuꞌang Diyus.”

Ega nay makadaꞌawa it mga Judio

¹⁴ Temed ta, magꞌuꞌunu kapangabang i taw duꞌun it Ampuꞌan in ega pagpamayaꞌnen baw pagsarigan nira kanya? Baw magꞌuꞌunu gasiꞌ pamayaꞌnen nira in ega paꞌ natuturanan sira pasar it kanya? Baw magꞌuꞌunu matuturanan sira in egay mangadal duꞌut kanira?

¹⁵ Temed ta, magꞌuꞌunu gasiꞌ mangadal i esang taw in ega tiyaꞌeg kanya it Ampuꞌang Diyus? Ta, mga Judio ngaytu, may mga tiyaꞌeg naytut Ampuꞌang Diyus nga mangadal duꞌut kanira. Ka daꞌga baꞌ magbebtang naga ngayan duꞌun it kasuratan i atkaytu, “Magaye-gayen nga banar nga paglawagen i magdadarapaꞌ nga magtataban it magayen nga baritaꞌ.”

¹⁶ Lamang, kayti, dekeyeꞌ lamang it mga Judio ngaytu i magpamayaꞌ it Magayen ngaytung Baritaꞌ. Subung tut inaat gasiꞌ ngayan it prupitaꞌ nga si Isaias nga magꞌaat, “Ampuꞌang Diyus, subuk egay nagpakimatuud it ipiyanuturan ngaytu it amen.”

¹⁷ Aypaꞌ maꞌyag nga ega magkapamayaꞌ i taw in ega paꞌ nagnegan nira i maat pamayaꞌnen. Baw egay beken nga kaꞌilangan nira nga magnegan, Magayen ngaytung Baritaꞌ pasar it ki Cristo.

¹⁸ Temed barang ega namayaꞌ i mga Judio sabap ega natuturanan sirat mga bagay ngaytu, maat i ingkut ku. Temed ega. Talagang natuturanan na sira. Ka daꞌga baꞌ may magbebtang duꞌut kasuratan nga magꞌaat, “Nagnegan na i pagꞌaaten nira kat muꞌsang banwa. Nanlekep talagay ampang nira kat muꞌsang rugar situt sinirungat langit.”

¹⁹ Temed, maat siꞌ i ingkut ku, barang ega lamang nasepsepan it mga Judio? Ta, ega gasiꞌ atkayan. Nasepsepan nira naga temed piyakiꞌambut nira ga. Aypaꞌ ka ipiyasurat it Ampuꞌang Diyus it ki Moises i ituꞌun nga magꞌaat, “Paꞌinggiten baw paꞌisgen ku kamu ka ildawan ku nay mga bangsa nga ega Judio nga kat pabetang mi, mga taw nga egay kakapulusan baw egay kasepsep.”

²⁰ Bawnga raraparan talagay ipiyasurat it Ampuꞌang Diyus it ki Isaias nga magꞌaat, “Naparagan aku nat mga taw nga ega magtulus it aken. Maski ega magpakaꞌrut pasar it aken, piyaꞌyagan ku na sira.”

²¹ Temed, pasar it mga Judio maat i inaat ya ngayan, “Pirmi nga magkakayap i alima ku it delem-aldaw, nga kutanggapen ku sira, temed iyan nagang pagpategasan baw pagkuntraꞌen akut bangsa ngaytu.”