Nehemias 9 - Tagbanwa

Inamin it mga Israelita i mga kasalaꞌan nira, pati kasalaꞌan it mga kagiyaringanan nira

¹ Iyan ikaduwang puluꞌ baw epat na nga aldaw it iti naga nga bulan, namagtingped siꞌ i mga Israelita. Kat iti nga aldaw nagpuwasa sira, nagpakay it maꞌerep, baw inanuꞌan niray ulu nira it kapu-kapu, nga katandaꞌ it may dakulang magkasmekan.

² Baw nagpabulun sira nga mga tungtung-inapuꞌ ni Israel, nga egay nakaragiꞌ it kanira nga mga taw nga ega Judio. Bawnga magtitindeg sira nga inamin nira i mga kasalaꞌan nira baw kasalaꞌan it mga kagiyaringanan nira.

³ Magtitindeg lamang sira seledan it tulung uras mintras pagbasaen duꞌut kanira i mga urdin ngayti it AMPUꞌANG DIYUS nira. Pagkatupus, may tulung uras gasiꞌ i kaꞌlay it magꞌamin sira it mga kasalaꞌan nira, baw magbantug it AMPUꞌANG DIYUS nira.

²⁶ Maat nira, “Maski dakulay ildaw mu it mga kagiyaringanan namen, ega siyunud nira ikaw in daꞌga kiyalaban nira ga. Piyasngelan nira i mga urdin mu baw, iyan pagsitaren sira it mga prupitaꞌ nga tiyaꞌeg mu isaꞌun papaꞌuliꞌen sira asan it imu, piyangimatay nira ga. Talagang dakulay panibabaꞌ nira it imu.

²⁷ Ta, sabap it mga binwat nira ngayti, piyataꞌnan mu sira kat alima it mga kalaban nira, isaꞌun pakuriꞌan. Temed, iyan nangabang sira asan it imu, piyagnegan mu sira asan it langit, baw kat kadakulat ildaw mu it kanira binggayan mu sira it mga pagbayaꞌen nga rimibri it kanira.

²⁸ Temed lamang atkayti na nga ipiyagribri na sira kat mga kalaban nira, yanaga nga simnutil sira it imu. Aypaꞌ ka piyataꞌnan mu siꞌ sira nga daꞌgen it mga kalaban nira. Pagsinguliꞌ nira siꞌ it sumaꞌup baw miyangut it tabang mu, siyambungan mu siꞌ sira, ikaw nga asan it langit. Saꞌup-saꞌup mu sira nga ipiyagribri, uyun kat ildaw mu it kanira.

²⁹ Saꞌup-saꞌup gasiꞌ nga ipiyagsasar mu it kanira nga paꞌuliꞌan nira siꞌ nga sunudun i mga urdin mu. Temed kat kapiyasubraꞌ nira subraꞌ sira nga nagpasngel nga nagbuwat it kasalaꞌan nga kuntraꞌ it mga urdin mu ngaytu. Lamang makanira i kamatuudan nga kaꞌgenan in sunudun nira it kaꞌustuꞌan i mga urdin mu, temed lamwat sira ga nga piyadsen i ulu nira baw talagang daꞌsira nagpagneg.

³⁰ Pira-pira nga taꞌun nga pabayaꞌ-bayaꞌ mu it kanira. Tiyaldeng mu paꞌ sira it ampang nga ipiyasugid mu it mga prupitaꞌ mu kat panakem it Espiritu Santo mu. Temed ega naga nagpagneg sira. Aypaꞌ ka ipiyasakep mu siꞌ sira it mga beken nga bangsa.

³¹ Temed, kat kadakulaꞌ it ildaw mu, ega naga teꞌteꞌ nga inindiꞌan mu sira u piyuuꞌ. Sabap maꞌildaw ka baw masanguꞌ nga Ampuꞌang Diyus.

³³ Talagang mataldeng ka kat muꞌsang panriga mu it amen. Pabetang-betang mu ngaytu, purus matuud, ka nagkasalaꞌan kami.”

Ipiyasiguru nira i sadili nira kat kamatuudan nga pagsunud it Ampuꞌang Diyus

³⁶ “Kayti, mga uripen kami lamang kat banwa ngaytu nga ipiyasubli mu it mga kagiyaringanan namen. Situt banwa ngaytu, yay ireg mu, bastanti i magkakaꞌen nira kat mga mapatbasan nira.

³⁷ Temed kayti, iyan i magpasamunsayaꞌ it mga piyatbasan namen, mga adiꞌ nga piyapandaꞌeg mu it amen sabap it mga kasalaꞌan namen. Kat sakep na nira i bilug namen. Magkasunud nira i in unuy magkaꞌirgan nira. Pati mga ayep namen, pagꞌambuꞌun na nira nga kanira na. Talagang ega naytu basta-basta i kakuriꞌan namen ngaytu.

³⁸ Ta, sabap it kabetangan namen ngaytu nga atkaytu, kami ngaytu nga mga taawan mu, minwat kami it esang ipiyagsurat nga sanggup. Itu ngaytu, kamatuudan nga piyagꞌunyunan baw pinirmaꞌan it mga pagbayaꞌen namen, mga Levita, baw mga sasirduti.