Nehemias 6 - Tagbanwa

Nakapaꞌman nira naga i kutaꞌ it Jerusalem maski pasigi sira nga pagsasawun it mga magkuntraꞌ it kanira

¹ Ta, nabaritaꞌan na Sanbalat, si Tobias baw si Gesem nga taga Arabia nga nakapaꞌman ku na i kutaꞌ. Ega nay maski unu nga ranggaꞌ ya. Yamanay kurang ya, ega paꞌ nakapabwat ku i mga puwirtaꞌan ya.

² Aypaꞌ, binwat na Sanbalat, duwa ni Gesem, inimbitar nira aku nga pakikita akut kanira duꞌun it esang baryu nga duꞌun it daranasan it Ono, ka may sugi-sugiden namen. Temed magkaꞌrutan kuytu nga esang akal nira it aken isaꞌun mapasakitan nira aku.

³ Aypaꞌ ka may tiyaꞌeg ku nga naꞌaduꞌun it kanira, taban i ampang ku nga magꞌaat, “Ega bay rugar ku it paꞌasan ka ega basta-basta talaga i pagbuwaten namen sini. Unuka tananan ku it paꞌasan lamang it imyu? Ka in atkayan maꞌatrasu lamang i buwat namen ngayni.”

⁴ Epat nga bisis i imbitar nira it aken, epat gasiꞌ nga bisis diyaꞌga ku sira.

⁵ Pagkamuya ni Sanbalat it atkayti i buwat ku, may piyapaꞌaduꞌun ya nat aken nga esa nga taawan ya, taban i ikalima nga imbitar ya it aken, esang surat nga ega pagsisiraduun i bintangan.

⁶ Magꞌaat i magbebtang duꞌun it surat, “Matanug na kat paꞌari-ari nga bangsa, baw ipagpamatuud paytu ni Gesem nga ikaw baw mga kaꞌibaan mu nga mga Judio, giyayen-gayen mi siꞌ it muwat i kutaꞌ mi ngayan sabap may pikir mi nga kuntraꞌen i adiꞌ tami ngayti duꞌun it Babilonia, nga manliꞌwan na kat pagsakep ya. May baritaꞌ paꞌ nga kupagꞌadiꞌ ka kunuꞌ.

⁷ Baw may sugid-sugid paꞌ nga nagpatindeg ka it mga prupitaꞌ nga sira i magpanugid-sugid duꞌun it Jerusalem nga may adiꞌ na duꞌun it Juda, nga ikaw na. Siguradu nga egaytu mataguꞌ duꞌun it adiꞌ. Aypaꞌ, magayen, paꞌasini ka nga lagi, isaꞌun marunding tami i pasar it itu nga bagay.”

⁸ Ta, magꞌaat i itiyubag ku it surat ngayti, “Iyan pamuwat-buwat baw tandes mu lamang yan. Egay kamatuudan ya kayan.”

⁹ Namuyaan ku nga pagpaiꞌlamen nira kami isaꞌun mapdekan namen i pagbuwaten namen ngayti, isaꞌun ega maꞌman. Binwat ku, nanalangin duꞌun it Ampuꞌang Diyus. Maat ku, “Pagꞌangutun ku asan it imu nga begayan mu aku it pagmaꞌiseg it nakem.”

¹⁰ Kaꞌsa namasyar aku duꞌun it ki Samaya nga anak ni Delaya baw apuꞌ ni Mahetabel. Pagꞌabut ku, duꞌun kanya it seled it balay baw magsisiradu it magayen i mga talaꞌep. Pagseled ku maat ya, “Mayaꞌ ka it aken. Patataguꞌ ta duꞌun it Templo. Magsiradu ta baw duꞌun i patataguꞌan ta it Ega Basta-bastang Seled. Ka mabut yan i mga kuꞌimatay ngayan it imu. Delemen yan i iꞌabut nira.”

¹¹ Temed katubag akut kanya, “Egaytu basta-basta malagyu baw patataguꞌ i itu nga lalaki. Siyu aku nga taw kat pikir mu nga sumalyat iyan nga seled duꞌun it Templo isaꞌun lamang ega magtas i ginawa ku? Yay matuud, talagang ega buwaten ku yan.”

¹² Timimbaw kat nakem ku nga ega naga tiyaꞌeg kanya it Ampuꞌang Diyus in daꞌga magpapru-prupitaꞌ lamang kanya. Aat ya ngaytit aken, akal ya lamang, ka tiyangdanan kanya na Tobias, duwa ni Sanbalat.

¹³ Tiyangdanan nira kanya nga paiꞌlamen ya aku isaꞌun magkasalaꞌan aku nga semled ngayti duꞌun it Templo. Ta, in atkayan, maꞌiway na nira it aken kat ikaranggaꞌ ku.

¹⁴ “Ampuꞌang Diyus, sana rigaen mu na Tobias baw si Sanbalat sabap it binwat nira ngaytu it aken. Sana belsen mu gasiꞌ i binwat it babay nga prupitaꞌ nga si Noadias baw beken paꞌ nga prupitaꞌ nga antap it nakem nira, paiꞌlamen nira aku.”

¹⁵ Ta, kat ikaduwang puluꞌ baw lima nga aldaw it bulan it Elul, naꞌman namen na i kutaꞌ ngayti. Garing it pagpapuꞌun limang puluꞌ baw duwa nga aldaw i ikiyaꞌman namen it tetegel nga buwat.

¹⁶ Naliluꞌ i mga magkuntraꞌ ngaytit amen baw mga bangsa kat linibut namen, iyan nabaritaꞌan nira i nabwat namen ngayti. Bawnga nanlaꞌnus i tuꞌlang nira ka namuyaan nira nga naꞌman namen lamang, sabap it tabang it Ampuꞌang Diyus namen.