Nehemias 4 - Tagbanwa

Ipiyasigi i pagꞌayus it kutaꞌ it Jerusalem ngayti maski pagsasawun sira it mga kalaban nira

¹ Iyan nabaritaꞌan ni Sanbalat nga magsisigi nay pagꞌayus namen it kutaꞌ ngayti nangiseg kanya nga banar, baw siyari ya na kami it paꞌeyaꞌ.

^4a Temed yay buwat namen, magpanalangin duꞌun it Ampuꞌang Diyus.

⁶ Baw ipiyasigi namen i pagꞌayus namen ngayti it kutaꞌ. Aypaꞌ ka, ega naꞌlay, nalubuk nay katagbaw it palikus it siyudad ngayti, ka ipiyagpadaꞌeg it mga taw kat nakem nira nga paꞌresan.

⁷ Ta, yan nabaritaꞌan ni Sanbalat, si Tobias, mga taga Arabia, mga Ammonita baw mga Astodita gasiꞌ nga magkaꞌman namen na i kutaꞌ ngayti, miyereꞌeret i iseg nira.

⁸ Nagꞌisun-isunun sira nga rumpakan nira i Jerusalem isaꞌun masasaw i buwat namen ngayti.

⁹ Aypaꞌ ka, egay beken nga buwat namen, nanalangin kami duꞌun it Ampuꞌang Diyus namen, baw may binwat namen nga mga manigbantay it delem-aldaw.

¹³ Bawnga, binwat ku, kada rugar nga ababaꞌ pay kutaꞌ, duꞌun it mga rugar nga mabulud-bulud, may pagpabantayen ku duꞌun nga pagpisiꞌen ku kat kada kaduguꞌan. Rangkap sira nga muꞌsa it basiꞌ, kanya kayti karis, besak, u panaꞌ.

¹⁴ Iyan magpupuwistuꞌ nay muꞌsa inaat kuy mga ginuꞌu, mga pagbayaꞌen it siyudad, baw kadakel it mga taw, “Ayaw kamut iꞌlam it mga magkuntraꞌ ngayan it aten. Yay dedemdemen mi, pagtatarimaen tami it Ampuꞌang Diyus, kanya nga landaw nga gunaan baw kaiꞌlaman talaga. Kaꞌilangan labanan tami sira ka panindegan tami i mga sulsug tami, mga anak, asawa, baw pamalay-balay tami.”

¹⁵ Iyan nabaritaꞌan it mga magkuntraꞌ ngaytit amen nga ega nataguꞌ it amen i pagpikiren nira ngayti, aypaꞌ ka natantuwan nira nga piyaar sira it Ampuꞌang Diyus. Egay beken, ipiyasigi siꞌ it kadakel i kanya-kanyang buwaten duꞌut kutaꞌ ngayti.

¹⁶ Garing sikayti, iyan gurupu it taw nga mga taawan ku, sang lubuk na lamang i magtabang it pagbuwat it kutaꞌ, sang lubuk, mga bantay siray kanira. Iyan mga bantay ngayti, siray magseskel it mga basiꞌ it katataawan, mga besak, panaꞌ baw mga kanukal it deꞌgan. Iyan mga pagbayaꞌen it katataawan, duꞌun i kanirang puwistuꞌ it talikudan it mga tungtung-inapuꞌ ni Juda

¹⁷ nga magꞌayus ngayti it kutaꞌ. Iyan mga manigꞌakut it buwat-buwat, sang bali nga alima nira, buwat-buwat, sang bali, basiꞌ.

¹⁸ Baw, iyan mga magbuwat ngayti it kutaꞌ, magsasaꞌbit naga it basiꞌ, nga areg it ipakibunuꞌ. Iyan manigtaburi it paꞌimbanda, duꞌun naga nga pirmi it umid ku.

¹⁹ Inaat kuy katataawan, mga ginuꞌu nira, baw mga pagbayaꞌen, “Kayti, dakulaꞌ i pagbuwaten tami ngaytu baw nagtaꞌal-taꞌalen tami.

²⁰ Aypaꞌ basta nakagneg kamu it tingeg it taburi, melep kamu nga muꞌsa situt amen. Ampuꞌang Diyus tami, kanya i manguꞌna it aten it pakibunuꞌ in sakaliꞌ nga may manrumpak.”

²¹ Atkayti na i buwat namen it kaꞌlay namen it buwat it kutaꞌ ngayti. Aldaw-aldaw, garing it lembat i aldaw seked it manresa na i bituꞌun, sigi-sigi i buwat namen.