Nehemias 2 - Tagbanwa

Piyaꞌintulutan si Nehemias nga paꞌaduꞌun it Jerusalem

¹ Iyan bulan nat Nisan it ikaduwang puluꞌ ngayting taꞌun it pagꞌadiꞌ ni Artajerjes, may esang aldaw nga magbuwat aku nagat katengdanan ku duꞌun it adapan it adiꞌ ngayti. Pagꞌabut it irimnun ya ipiyakawaꞌ ku duꞌun it kanya. Namuyaan ya nga magkasmek aku. Yapayti kamuya yat aken nga maꞌlung i pagkinataw ku.

² Pagkamuya ya kayti, iningkut ya aku nga magꞌaat, “Unuka atkayan nga maꞌlung i pagkinataw mu it ega naga magsarut ka? Siguru may dakulaꞌ nga magkasmekan mu?” Miniꞌlam aku it ingkut ya ngaytit aken.

³ Tiyubag ku nga magꞌaat, “Kagalang-galang nga Adiꞌ, sana egay kaskedan it kaꞌgenan mu. Unuka ega maꞌlung i pagkinataw ku it ranggaꞌ paꞌ i siyudad ngayti it Jerusalem, nga duꞌun i limbengan it mga kagiyaringanan ku? Baw anteng paꞌ i mga puwirtaꞌan ya.”

⁴ “Ta, unuy ireg mu kayti nga buwaten ku?” ingkut it aken it adiꞌ ngayti. Pagkagneg ku, nanalangin aku it kat nakem ku lamang duꞌun it Ampuꞌang Diyus duꞌut langit nga magbebegbeg it muꞌsa. Pagkapanalangin ku,

⁵ maat ku, “Kagalang-galang nga Adiꞌ, in beteꞌ mapalugtan mu aku, magkapikir aku bat muliꞌ daꞌan duꞌun it Juda ka ipabwat ku sana i siyudad ngayti nga limbengan it mga kagiyaringanan ku.”

⁶ Katubag i adiꞌ ngayti, nga kaꞌumid ya naga i asawa ya, “Kapira ka yan duꞌun? Kaꞌnu yan i panguliꞌ mu?” Ta, kat ampang ya ngayti, namuyaan ku nga ipagpalugut ya aku. Aypaꞌ isiyugid ku nay pagpikiren ku nga tirminu.

⁷ Ta, nagpasanguꞌ-sanguꞌ aku siꞌ nga in mapakay nagat kanya buwatan ya aku it kariꞌgenang surat nga tabanen ku duꞌun it mga gubirnadur nga duꞌun it muꞌsang rugar ngayti nga duꞌut sedpan nga ayun it kadanuman it Eufrates, isaꞌun palapasen nira aku nga paꞌaduꞌun it Juda.

⁸ Miyangut aku gasiꞌ it surat nga iduꞌun kut ki Asaf, nga manigpamaalaꞌ it talun it adiꞌ, isaꞌun palugtan ya aku nga makakurtiꞌ it kayu nga ibwat it mga puwirtaꞌan it pagkukutaꞌeng piyakabalay it mga guwardiya nga duꞌut tepad it Templo, baw ibwat gasiꞌ it mga puwirtaꞌan it kutaꞌ it siyudad, baw taꞌidan ku gasiꞌ nga balay. Ta, muꞌsa ngayti, ega diyaꞌga it adiꞌ ngayti sabap it magayeng tabang it Ampuꞌang Diyus it aken.

⁹ Iyan napanaw aku na, piyaꞌibaan aku paꞌ it adiꞌ ngayti it mga mangangabayuꞌ nga sundaluꞌ, pati mga kapitan nira. Iyan duꞌun nat dipag it kadanuman it Eufrates ipagpalteg ku na duꞌun it gubirnadur it kada sang prubinsiya i ipiyasurat ku ngaytit adiꞌ.

¹⁰ Takaꞌ, iyan siꞌ i simnalaꞌ, pagkaꞌrut ni Sanbalat nga taga Horon baw esang punuꞌan nga si Tobias nga taga Ammon, daꞌsira namagkabaraꞌan. Ega talaga ireg nira nga may kumampiꞌ it mga Israelita ngayti baw tumulus it ikagayen nira.

Tinili-tili daꞌan ni Nehemias i ranggaꞌ paꞌ nga kutaꞌ it Jerusalem, bawnga isiyugid yay enged ya

¹¹ Ta, miyabut aku na duꞌun it Jerusalem baw nagpaꞌna it seledat tulung aldaw.

¹² Iyan maglubu-lubuk nat delem it ikatlu ku na ngayting aldaw, nasulag aku dayun it nanliꞌwan duꞌun it ranggaꞌ paꞌ ngayting kutaꞌ it siyudad ka tili-tiliyen ku. May pira nagang kataawan nga inupakat ku nga pabayaꞌen. Ega pay siyugidan ku nga maski siyu it in magꞌuꞌunu piyanakman aku it Ampuꞌang Diyus nga ipatindeg it sumaꞌup i siyudad it Jerusalem. Aku lamang i magsasakay it kabayuꞌ.

¹³ Delem paꞌ i pagpanliꞌwan namen duꞌun it pagpangaranan it Puwirtaꞌan it Mintang. Namsag kami duꞌun it pagpangaranan it Tumbud it Dragon, baw napanaw kami ayun duꞌun it pagpangaranan it Puwirtaꞌan nga Pagpaliꞌwanan it mga Marirignaꞌ. Magpanaw pagtili-tiliyen ku i ranggaꞌ paꞌ ngayti nga kutaꞌ it siyudad baw mga puwirtaꞌan ya ngayting namagkaꞌanteng it siyuriban ngayti.

¹⁴ Nanlangbus kami duꞌun it pagpangaranan it Puwirtaꞌan it Tumbud, inabut namen duꞌun it tumbud nga pagpangaranan it Tumbud it Adiꞌ. Pagkaꞌbut namen duꞌun, egay magkalapasan it pagsasakayan ku ngayting kabayuꞌ.

¹⁵ Aypaꞌ duꞌun i piyapanawan ku it tambing it sapaꞌ baw sigi nga pagleteg-letegan ku i kutaꞌ it siyudad ngayti. Bawnga nagpaꞌuliꞌ kami na. Duꞌun nagat liniꞌwanan namen ngayting puwirtaꞌan i sinledan namen.

¹⁶ Nakaꞌuliꞌ aku it ega namuyaan it mga pagbayaꞌen it siyudad. Aypaꞌ napanaw aku ngayti baw in unu i binwat ku, ega naꞌrutan nira. Ka ega pay siyugidan ku it enged ku duꞌun it Jerusalem ngayti, maski mga kabilug ku nga mga Judio, mga sasirduti, mga ginuꞌu, mga pagbayaꞌen, u maski siyu nga maat pabwaten ku it pabwat ngayti it kutaꞌ.

¹⁷ Ta, it natili-tili ku na i ranggaꞌ paꞌ ngayti nga kutaꞌ, itiyuturan ku nat kanira i inuliꞌ ku. Maat ku it kanira, “Daꞌga baꞌ maꞌyag it imyu i makuriꞌ ngaytu nga kabetangan tami? Jerusalem ngaytu, ega basta-basta i karanggaꞌan ya baw anteng paꞌ i mga puwirtaꞌan ya. Aypaꞌ magayen, magtabang-tabangen tami. Ipatindeg tami naga i kutaꞌ isaꞌun maꞌawaꞌ na i kaꞌeyaꞌan tami ngaytu.”

¹⁸ Ipiyagtuturan ku gasiꞌ it kanira in magꞌuꞌunu aku piyanguꞌnaan baw tiyabang it Ampuꞌang Diyus ku, baw in unuy ipiyagꞌaat it aken it adiꞌ duꞌun it Babilonia. Pagkagneg nira, maamaatan sira, “Ta, in atkayan palan, papuꞌun tami nat muwat.” Egay beken, masasagya nga nagtabang-tabangen sira it magayen ngayti nga ipiyanakem it aken nga buwaten.

¹⁹ Temed, pagkaꞌrut na Sanbalat ngayti nga taga Horon baw punuꞌan ngayti nga si Tobias nga taga Ammon, pamagselman na nira kami. Pati si Gesem nga taga Arabia, magpanibabaꞌ na gasit amen. Maamaatan sira, “Unu bayan i buwa-buwat mi ngayan? Unu, labanen mi i adiꞌ?”

²⁰ Katubag akut kanira, “Pagsisiguruun ku nga, iyan Ampuꞌang Diyus duꞌut langit nga magbebegbeg it muꞌsa, kanya i tumabang it amen nga mga manigsirbi ya. Aypaꞌ, talagang makapatabus namen i buwaten namen ngaytu. Temed kamu, egay lalabeten mi it maski unu nga kusas situt Jerusalem. Ega gasiꞌ i kariꞌgenan mi situt itung siyudad, baw ega maꞌimyu i maski unu situ nga arandeman it imyu it mga kaꞌanakan mi.”