Nehemias 1 - Tagbanwa

Piyanakman si Nehemias nga tumabang it mga Judio nga nakaꞌuliꞌ na duꞌun it Jerusalem [Mga 445 B.C.]

¹ Ituy pamatuud nga isiyurat ni Nehemias nga anak ni Hacalias. Kat ikaduwang puluꞌ nga taꞌun it pagꞌadiꞌ ni Artajerjes duꞌun it Babilonia, iyan bulan it Kisler, duꞌun aku it pagkukutaꞌen nga siyudad it Susa, nga magbuwat it katengdanan ku.

² Kaꞌsang aldaw miyabut si Hanani nga sulsug ku nga lalaki nga garing duꞌun it Juda, sang siraan it beken nga mga lalaki gasiꞌ. Pagkakita ku, iningkut ku sira pasar it Jerusalem baw pasar it kabetangan it mga kabilug namen nga mga Judio nga nadakepan nga nagsigꞌuliꞌ ngayti duꞌun it Juda.

³ Katubag sira it aken, maat nira, “Abaa, makuriꞌ baw kasasanguꞌan talaga i kabetangan nira duꞌun. Ka ranggaꞌ paꞌ i kutaꞌ it Jerusalem baw mga puwirtaꞌan ya, ega paꞌ pagꞌaꞌayusun garing it siyuriban ngayti.”

⁴ Pagkagneg ku kayti, miyadung aku ka siminggaw. May pirang aldaw nga singgawan kuy iti ngayti nga maski sukdan it pangaꞌen, daꞌku magsukdan. Sigi nga panalangin ku duꞌun it Ampuꞌang Diyus nga duꞌun it langit.

⁵ Bawnga nanalangin aku nga magꞌaat, “AMPUꞌANG DIYUS duꞌun it langit nga magbebegbeg it muꞌsa, ikaw i subrang gunaan nga dapat namen nga galangen it may iꞌlam. Talagang maꞌildaw ka nga pagtumanen mu i mga sanggup mu kat mga matuud nga magmaꞌal it imu baw kamatuudan nga magsunud it mga urdin mu.

⁶ Kayti, magpasanguꞌ-sanguꞌ aku it imu nga pagnegan mu i ipagpanalangin ku ngaytu, aku nga manigsirbi mu. Delem-aldaw i panalangin ku kaytu asan it imu sabap it bangsa namen ngaytu nga Israel nga mga manigsirbi mu. Talagang pagꞌaminen ku nga nagkasalaꞌan kami asan it imu, sang kamiyan it mga kagiyaringanan namen, pati aku baw mga kagiyaringanan kut aken.

⁷ Kiyuntraꞌ namen ikaw nga ereꞌeret. Ega siyunud namen i mga ipiyagꞌurdin mu. Matuud nga riyanggaꞌ namen i mga pabetang-betang nga ibinggay mut amen nga ipiyaꞌalima mu it manigsirbi mu nga si Moises.

⁸ Kayti ipagpanalangin ku nga sana demdemen mu i ipiyagꞌaat mu ngayan it ki Moises nga maski maat buwatan nira ikaw it maraꞌe-raꞌet nga mangindiꞌ sirat imu baw maski tari-tariwanaken mu sira duꞌun it alalaid nga mga bangsa,

⁹ temed in paꞌuliꞌan nira naga ikaw baw sumunud siꞌ it mga urdin mu, ildawan mu naga sira. Eeꞌ baꞌ, maski tiyari-tariwanak mu sira duꞌun it kapuspusan it banwa, iꞌuliꞌ mu naga duꞌun it rugar nga piniliꞌ mu nga yay pagsambaan it imu.

¹⁰ Ka mga kabilug ku ngayti nga mga manigsirbi mu, mga taawan mu sira nga, kat keseg it ega basta-bastang guna mu, ipiyagꞌuliꞌ mu duꞌun it dati nga rugar nira.

¹¹ Aypaꞌ, AMPUꞌANG DIYUS, pagnegan mu sana i panalangin ku, baw panalangin it beken nga mga manigsirbi mu nga magꞌireg na nga banar nga pasakep it imu it may kamatuudan nga galang. Pagꞌangutun ku nga panguꞌnaan mu aku baw panakman mu i adiꞌ nga paꞌintulutan ya aku it kubwaten ku.” Kat iti nga timpu, katengdanan ku, magpamaalaꞌ it pagꞌimnun it adiꞌ.