Mga Pagbayaꞌen 7 - Tagbanwa

Diyaꞌeg ni Gedeon i mga Madianita

¹ Pagkadedelman naꞌadle-adlem it mapanaw si Jerobaal, nga si Gedeon na ngayti, baw muꞌsang mga taawan ya. Duꞌun i piyagkampuwan nira it Tumbud it Harod. Iyan mga Madianita ngayti, duꞌut nurti nira nga ayun, duꞌun it daranasan, nga adeꞌdeng it Mungsuꞌ it More.

² Maat it AMPUꞌANG DIYUS it ki Gedeon, “Dakel naytu nga banar i kaꞌibaan mu ngaytu. Barang iyan i pikiren nira, sadili nira nga pandaꞌeg it mga Madianita, ega sabap it tabang ku.

³ Aypaꞌ aaten mu sira nga, iyan alab-alaben, mapakay naga nga muliꞌ.” Pagꞌaat ni Gedeon ngayti, miyuliꞌ i duwang puluꞌ may duwa nga ribu. Yamanay naꞌped, sang puluꞌ nga ribu.

⁴ Temed inaat siꞌ it AMPUꞌANG DIYUS si Gedeon, nga magꞌaat, “Dakel paꞌ nga naꞌped. Aypaꞌ pabayaꞌen mu sira duꞌun it tambing it danum. Duꞌun ipatantu ku in siyu may siyu i pabayaꞌen mu baw ega pabayaꞌen mu.”

⁵ Atkayti nga matuud i binwat ni Gedeon. Pagꞌabut nira duꞌut sapaꞌ ngayti, maat it AMPUꞌANG DIYUS it kanya, “Ipablag muy iyan minum it siyaklut nirat pala-palad nira i danum baw iyan limingkuꞌud ka teypen niray panginum nira.”

⁶ Ta, yan mininum it siyaklut it pala-palad i danum, tulung gatus lamang. Iyan beken, limningkuꞌud i mininum.

⁷ Maat siꞌ it AMPUꞌANG DIYUS it ki Gedeon, “Iyan tulung gatus ngayan nga siyaklut it pala-palad niray kanirang ininum nga danum, iyan lamang i pabayaꞌen mu it pakibunuꞌ it mga Madianita. Talagang ipadaꞌeg ku yan sirat imyu. Iyan beken ngayan, paꞌuliꞌen mu naga.”

⁸ Ta atkayti nga matuud, piyaꞌuliꞌ ni Gedeon i kumpur mga ega naga ngayti mapakay. Yamanayti, tulung gatus ngayti, i naꞌped, nga siray piyamgayan yat mga gamit baw taburi nga inaydan ya duꞌun it piyaꞌuliꞌ ya ngayti. Iyan kampu it mga Madianita, magkaꞌungawan na nira duꞌut daranasan.

⁹ Pagdelem, inaat siꞌ si Gedeon it AMPUꞌANG DIYUS, “Bangun kamu na. Sulungun mi na i mga Madianita. Siguradu yan nga ipadaꞌeg ku sirat imyu.

¹⁰ Temed in alab-alaben ka paꞌ, pabayaꞌen muy sarig-sarigan mu ngayan nga si Pura ka aduꞌunun mu sirat patagu-taguꞌ.

¹¹ Siguradu yan nga kemseg nay nakem mu, pagkagneg mu it pamagrundingen nira.” Ta, daꞌnay parbitik na Gedeon duwa ni Pura it namagpanaw nga naꞌaduꞌun it binit it kampu it mga Madianita ngayti.

¹² Mga Madianita ngayti, pati mga Amalecita baw beken ngayting mga taw nga magbabanwa duꞌun it lebatan nga ayun, talagang magꞌalinaynay na sira duꞌut daranasan ngayti. Daꞌna magkabilang i kadakel it mga kamelyo nira ka subung nat igis i kadakel.

¹³ Pagkapaꞌadeꞌdeng na Gedeon, may nagnegan nira nga mamagrunding. Maat it sang kataawan, “May tiyagaynep ku baꞌ, maat magleteg akut esang tinapay nga magbaliling. Maat nabalilingan nay kampu tami ngaytu, baw napsag i esang balay. Unupat gimimbaꞌ nay naꞌiguꞌ ya ngayti.”

¹⁴ “Aaꞌ,” maat it sang kataawan ngayti, “iyan ega nayay belag, tarem nayat basiꞌ it Israelita ngayang si Gedeon nga anak ni Joas. Kita ngaytu nga mga Madianita, pati kadakel ngaytu nga kaꞌibaan ta, siguradung daꞌgen nira ka tabangen kanya it Ampuꞌang Diyus.”

¹⁵ Pagkagneg ni Gedeon kayti, nanluud kanya ka biyantug yay Ampuꞌang Diyus. Bawnga miyuliꞌ na sira ni Pura ngayti duꞌut kanirang kampu. Pagꞌabut, siyulag yay beken ngayti nga mga kaꞌibaan nira, nga inaat ya, “Magꞌali-alistu kamu na, ka siguradung ipadaꞌeg it AMPUꞌANG DIYUS it aten i mga Madianita ngaytu.”

¹⁶ Tinlung bagiꞌ ni Gedeon i mga taawan ya ngayti. Kada esa binggayan ya it taburi baw tukur nga pagsasakruban pat guriꞌ i sugu ya.

¹⁷ Maat ya it kanira, “Iyan in adeꞌdeng tami na asat kampu nira, yay lelteg mi, in unuy buwaten ku, ka yanagay imyung buwaten.

¹⁸ Basta nagnegan mi nga inyepan namen nay ameng taburi, eypan mi na gasiꞌ i imyu baw igaꞌuy mi nga aaten mi, ‘Kat AMPUꞌANG DIYUS baw ki Gedeon i pandaꞌeg!’”

¹⁹ Maglubu-lubuk nat delem, yapay kapagsubli it mga guwardiya it mga Madianita ngayti, nakapatpad na na Gedeon duꞌut kampu it mga Madianita ngayti. Inyepan na niray mga taburi nira ngayti baw pinsaꞌ na niray guriꞌ ngayting sakrub ngaytit mga tukur nira.

²⁰ Derengan i pesaꞌ it tulu ngayting bagiꞌ nga taawan ni Gedeon bawnga inyepan na niray taban nira ngayting mga taburi. Pagseskelen it gibang i tidaw ngayti, taburi ngayti sekel it iwanan nira, mintras ipaggaꞌuy nira nga magꞌaat, “Kat AMPUꞌANG DIYUS baw ki Gedeon i pandaꞌeg!”

²¹ Egay magliꞌi-liꞌid nga maski esa duꞌut mga pagtitindegan nira nga duꞌut linibut it kampu ngayti. Temed ta, yan duꞌut kampu ngayti, aribugar na sira baw atnat giyaw-giyaw ka mamagꞌiꞌlam na.

²² Sigi-siging eyep it tulung gatus ngayting kataawan it mga taburi nira ngayti, binwat it AMPUꞌANG DIYUS nga nagꞌuna-unayen nat nagbunuꞌ i duꞌut kampu ngayti. Iyan beken nanganya-kanya nat piyalagyuwan. May naꞌaduꞌun it Bet-sita nga ayun duꞌut Cerera baw duꞌut Abel-mehola nga adeꞌdeng duꞌun it Tabata.

²³ Piyadaliꞌan ni Gedeon it pasugid i mga kuyunang mga tungtung-inapuꞌ ni Neftali, ni Aser baw ki Manases ka ipiyagpaꞌusig yay mga Madianita ngayting namagpalagyu.

²⁴ Piyapanawan gasiꞌ ni Gedeon i kuyunan nga mga tungtung-inapuꞌ ni Efraim ka apaꞌan i duꞌun it didipagan it danum it Jordan seked duꞌun it sapaꞌ it Bet-bara. Siyunud it taga Efraim i ipiyagꞌurdin ngaytit kanira.

^25a Inapaꞌan nira baw tiyaraꞌusig i mga Madianita ngayti. Nadakep baw inimatay nira i duwa nga mga pagbayaꞌen nga si Oreb baw si Zeeb.